“Tongana mo yeke sambela, mo kiri gï na ndö ti tënë oko fani mingi pëpe.”​—Matthieu 6:7.

Jéhovah aye ape ti tene e tene na lo asambela so e bata ni na li wala e diko ni na yâ ti mbeni mbeti ti asambela. Me lo ye si asambela ti e alondo na bê ti e. A yeke sara mo tongana nyen, tongana mbeni kamarade ti mo ayeke tene gï na mo même tënë lâ na lâ? Avrai kamarade ayeke fa atënë ti bê ti ala na mba. Tongana e sambela Nzapa na atënë ti e wani, a fa so e bâ lo tongana kamarade ti e.

“Ala yeke hunda ye, me ala wara ni pëpe ngbanga ti so ala yeke hunda ni ti sara na ye ti sioni.”​—Jacques 4:3.

E hinga so Nzapa ayeke kiri ande tënë na asambela ti e ape, tongana e hunda na lo aye so e hinga so lo ye si e sara ni ape wala e wara ni ape. Na tapande, so Nzapa atene na e polele ti sara bê ti warango ye ape nga ti mä na bê pëpe na tënë ti chance, mo pensé so lo yeke kiri ande tënë na sambela ti mbeni zo so asara jeu ti nginza na ahunda na lo ti sara si lo wara chance ti gagné jeu ni? (Ésaïe 65:11; Luc 12:15). Jéhovah ayeke kiri tënë na asambela tongaso ape! Ti tene Nzapa akiri tënë na asambela ti e, a lingbi aye so e hunda na lo ague oko na aye so lo fa na yâ ti Bible.

 “Zo so ake ti mä tënë ti ndia, même sambela ti lo ayeke sioni mingi.”​—aProverbe 28:9.

Ândö, Nzapa akiri tënë pëpe na asambela ti azo so ake ti sara ye alingbi na andia ti lo so ayeke mbilimbili (Ésaïe 1:15, 16). Nzapa achangé ape (Malachie 3:6). Tongana e ye si Nzapa amä e, a lingbi e sara kue ti mä yanga ti lo. Me ka tongana ândö, e sara aye ti sioni? A ye ti fa so Jéhovah ayeke mä ande e encore ape? Ên-ën! Nzapa ayeke pardonné e tongana e changé bê ti e na e sara kue ti zia ngia na bê ti lo.—Kusala 3:19.