TARA TI IMAGINÉ: Mo yeke na yâ ti mbeni musée so a zia gbâ ti angbene statue dä. Mingi ti astatue ni abuba. Ti ambeni, ambeni mbage ti terê ni ayeke dä ape. Me mbeni oko na milieu ni, ye oko asara tâ ni ape; ye kue na terê ni angbâ pendere. Mo ngbâ mo hunda zo so ayeke sara na mo vizite ni, mo tene: “Statue ti so ni so ayeke fini ni la?” Lo tene: “Ên-ën, lo ninga même ahon ambeni mingi ge, lâ oko a kiri a leke peko ni ape.” Mo kiri mo hunda lo: “Eskê a bata lo na mbeni ndo la lo ngbâ pendere so?” Lo tene: “Ên-ën, ngu apika même ni. Nga, gbâ ti azo ti sioni agi ti buba ni.” Peut-être li ti mo akpe na mo hunda lo: ‘A sara statue ni na nyen?’

E lingbi ti tene so Bible ayeke tongana kota statue so. A yeke mbeni mbeti so aninga mingi; lo ninga ahon gbâ ti ambeti. Tâ tënë, ambeni ngbene mbeti ayeke nga dä. Legeoko tongana ti astatue so abuba, tongana ngu ahon gbâ ti angbene mbeti ni so abuba. Na tapande atënë so ambeti ni atene lani na ndö ti science ague tâ nde mingi na aye so azo agi ndani si awara na pekoni. Mingi ni, awango ti ambeti ni na ndö ti seni akiri asara sioni na azo. Nga gbâ ti angbene mbeti ni abuba kue; ambeni mbage ni ayeke nga dä ape wala abuba mingi.

Me Bible ayeke tâ nde mingi. A sara ngu 3 500 awe la a komanse ti sû ni, me atâa so kue ye oko asara ni ape. Nga teti angu mingi, a gi ti sara si a duti encore dä ape, na lege so a gi ti gbi ni kue, a gbanzi ni na azo na yâ ti ambeni kodro nga a fa so a yeke buba mbeti, me ye so Bible afa achangé ape. Bible afa gbâ ti aye so lani azo ti ândö ahinga ni ape.​—Bâ encadré “Bible aga ngbene ye awe wala lo fa ye kozo si azo ahinga?”

Me mo peut ti hunda terê ti mo: ‘Eskê aye so Bible afa alingbi biani ti aidé e laso?’ Ti kiri tënë na ni, hunda terê ti mo: ‘Akota kpale ti dunia laso ayeke so wa? Ati so wa la asara zo mbeto mingi?’ Peut-être mo pensé na abira, tënë ti bubango aye so angoro e, sarango ye ti sioni wala petengo ngoro. Ni la, zia e bâ ambeni kota ye so Bible afa. Na ngoi so e yeke bâ ni, hunda terê ti mo: ‘Tongana azo asara fade ye alingbi na atënë ni so, dunia ayeke duti nzoni ape?’

TI YE SIRIRI

“Ngia ayeke na ala so asara si siriri amaï, ndali ti so a yeke iri ala ande amolenge ti Nzapa.” (Matthieu 5:9). “Tongana lege ni ayeke dä, na ala lingbi ti sara mbeni ye, zia ala duti na siriri na azo kue.”​—aRomain 12:18.

TI SARA NZONI BÊ NGA TI PARDONNÉ ZO

“Ngia ayeke na ala so ayeke sara nzoni bê na zo, ndali ti so a yeke sara nzoni bê na ala ande.” (Matthieu 5:7). “Ala ngbâ ti kanga bê na amba ti ala na popo ti ala, na ti pardonné mba na bê ti ala kue, même tongana mbeni zo ayeke na tënë ti dema na terê ti mba ti lo. Gï tongana ti so Jéhovah a apardonné ala na bê ti lo kue, ala nga ala sara tongaso.”​—aColossien 3:13.

SIRIRI NA POPO TI AMARA

Nzapa asara “mara oko oko kue ti azo ti duti na lê ti sese kue”. (Kusala 17:26). “Nzapa ayeke sara kangbi na popo ti azo pëpe, me na yâ ti amara kue, zo so akpe mbeto ti lo na asara ye so ayeke mbilimbili, lo yeke nzere na lê ti Nzapa.”​—Kusala 10:34, 35.

TI BUBA SESE APE

“Jéhovah Nzapa amû zo, lo zia lo na yâ ti yaka ti Éden ti fâ ni nga ti bâ lege ni.” (Genèse 2:15). Nzapa ayeke “futi azo so ayeke futi sese.”​—Apocalypse 11:18.

TI KE SARANGO BÊ TI YE NGA NA LANGO-SIONI

“Ala sara hange na alege nde nde kue ti sarango bê ti ye, ngbanga ti so, atâa tongana mbeni zo ayeke na aye mingi, fini ti lo alondo pëpe na aye so lo yeke na ni.” (Luc 12:15). “Tongana ti so a lingbi na azo ti be-vulu, zia a sara même tënë ti lango-sioni, tënë ti sioni ye nde nde kue wala ti bê ti warango ye na popo ti ala pëpe.”​—aÉphésien 5:3.

TI SARA YE MBILIMBILI NGA TI SARA KUA NGANGU

“E ye ti sara ye mbilimbili na yâ ti aye kue.” (aHébreu 13:18). “Zia zo ti nzi anzi ye encore ape, me ahon ti nzi ye, zia lo sara kua ngangu.”​—aÉphésien 4:28.

TI AIDÉ AZO SO ABEZOIN TI TENE A AIDÉ ALA

“Sara tënë so adë bê ti a-âme so vundu asara ala mingi, ala mû maboko na azo so awoko nga ala kanga bê ti ala na azo kue.” (1 aThessalonicien 5:14). “Bâ lege ti anyindu na awali-mua na yâ ti pasi ti ala.”​—Jacques 1:27.

Bible asara pëpe tënë ti aye ni so polele tongaso. Na mbeni nzoni lege, Bible afa na e so a lingbi e duti na asarango ye ni so me lo fa nga na e tongana nyen ti sara ye alingbi na ni na yâ ti gigi ti e ti lâ oko oko. Tongana gbâ ti azo asara fade ye alingbi na aye so e londo ti bâ na nduzu ge so, andâ kpale ayeke duti fade mingi ape na yâ ti dunia. Ti tâ tënë ni, afango ye ti Bible alingbi tâ biani na ngoi ti e! Aye ti nzoni wa la Bible alingbi ti ga na ni na e laso?

Koli so ayeke na ndara ahon azo kue atene mbeni lâ atene: “A yeke hinga so ndara ayeke mbilimbili na lege  ti akusala ti lo.” (Matthieu 11:19, bâ kete tënë na gbe ni). Mo yeda na tënë so? Zo ayeke hinga wala mbeni tënë ayeke biani tënë ti ndara na ngoi so lo sara ye alingbi na ni. Tongaso, mo peut ti gbu li ti mo, mo tene: ‘Tongana Bible alingbi biani ti aidé zo, eskê lo peut ti sara si mbi wara ye ti nzoni na yâ ti gigi ti mbi? Bible apeut ti aidé mbi tongana nyen ti hon ndö ti akpale ti mbi na ndembe so?’ Zia e bâ mbeni tapande.

Delphine b ayeke lani mbeni zo so ayeke na aye mingi ti sara, nga lo yeke bien na yâ ti gigi ti lo. Me gï gbagburu tongaso, lo wara akpale na peko ti terê. Molenge ti lo ti wali so ade maseka akui. Yâ ti mariage ti lo abuba. Lo komanse ti wara kpale ti nginza. Lo rappelé na aye ni so na lo tene: “Mbi hinga li ti mbi na gigi ti mbi encore ape; molenge ayeke dä ape, koli ayeke dä ape, da kue ayeke dä ape. Nengo ti mbi ayeke encore dä ape; nzara ti gigi asigi na yâ ti mbi, ngangu ayeke dä ape, gigi ti mbi ayeke na sens encore ape.”

Ti Delphine, kozo ti tene lo bâ tâ polele tongana nyen la atënë ti versê so ayeke tâ tënë: “Fini ti e aninga ngu 70, wala ngu 80 tongana zo ni ayeke ngangu. Me angu so kue asi singo na akpale nga na vundu; a yeke hon gï hio tongaso, na e huru e hon.”​—Psaume 90:10.

Bible la a-aidé Delphine na yâ ti ngoi ti kpale so. Ye ti nzoni so Bible aga na ni na lo ayeke tâ nde mingi. Tongana ti so ambage ota so ayeke ga na peko ayeke fa  ni, ambeni zo nga kue abâ so Bible a-aidé ala na ngoi so ala sara ye alingbi na awango ti Bible ni ti hon ndö ti akpale ti ala. Ala bâ so Bible ayeke tongana kota statue so e sara tënë ni na tongo nda ni so. A yeke nde na angbene mbeti so atënë ni alingbi na ngoi ti e ape so. Eskê ye so aye ti fa so a sara Bible na mbeni fason so ayeke nde la ape? Nga so apensé ti yâ ni ayeke biani ti Nzapa, me ti azo ape?​—1 aThessalonicien 2:13.

Peut-être mo kue mo bâ so gigi ti zo aninga ape nga gbâ ti akpale ayeke na yâ ni. Tongana akpale aye ti hon ndö ti mo, na ndo wa la mo lingbi ti wara dengo bê, mungo maboko nga na anzoni wango?

Zia e bâ fadeso ambeni lege ota so Bible alingbi ti mû biani maboko na mo na yâ ti gigi ti mo. Bible alingbi ti aidé mo ti

1. kpe si akpale asi na mo.

2. leke akpale so asi.

3. gbu ngangu na yâ ti akpale so mo lingbi ti leke ni ape.

Ambage so ayeke ga na peko so ayeke sara tënë na ndö ti aye ota so.