1, 2. Tongana nyen la Jéhovah ayeke mû ye mingi na e?

 JÉHOVAH ayeke Nzapa so amû ye mingi na azo. Ye kue so e yeke na ni alondo na lo. Lor na argent nga na amosoro ti sese kue ayeke ti lo, na lo sara kua na ni ti bata azo na anyama na fini (Ps. 104:13-15; Ag. 2:8). Ambaï ti Bible mingi afa tongana nyen la Jéhovah asara kua na amosoro ti lo na lege ti miracle ti mû ye na azo ti lo.

² Na tapande, teti ngu 40, Jéhovah amû manne nga na ngu na azo ti Israël na ngoi so ala yeke lani na yâ ti benyama (Ex. 16:35). A sara si “ye oko amanke ala pëpe.” (Néh. 9:20, 21). Na lege ti prophète Élisée, Jéhovah asara si kete mafuta ti mbeni wali-mua so ayeke be-ta-zo aga gbani na lege ti miracle. Matabisi ti Nzapa so asara si wali ni afuta bon ti azo so ayeke na li ti lo nga lo wara nginza so alingbi lo na amolenge ti lo ti koli ti ngbâ na fini (2 aGbia 4:1-7). Jéhovah amû maboko na Jésus ti tene na lege ti miracle lo mû kobe nga même nginza na azo na ngoi so ala yeke na bezoin ni.—Mat. 15:35-38; 17:27.

3. Nyen la e yeke bâ na yâ ti article so?

³ Jéhovah alingbi ti sara kua na ye kue so lo soro ti mû maboko  na aye so lo créé ni. Ye oko, lo tisa awakua ti lo ti sara kua na aye ti ala ti mû maboko na kua so bungbi ti lo ayeke sara. (Ex. 36:3-7; diko aProverbe 3:9.) Ngbanga ti nyen la Jéhovah ahunda na e ti mû anzoni ye ti e ti kiri na ni na lo? Tongana nyen la awakua ti Jéhovah ti giriri amû maboko na azo ti lo na lege ti aye ti maboko ti ala? Laso bungbi ti Jéhovah asara kua na nginza so azo ayeke mû ni tongana nyen? Article so ayeke kiri tënë na ahundango ndo so.

4. Nyen la e yeke fa na Jéhovah tongana e mû maboko na kua ti lo?

⁴ E yeke mû ye na Jéhovah ndali ti so e ye lo nga e ye ti kiri singila na lo. Tongana e pensé na ndö ti aye kue so Jéhovah asara ndali ti e andu bê ti e mingi. Na ngoi so Gbia David ayeke fa aye so a bezoin ni ti leke na temple, lo tene so ye kue so e yeke na ni alondo na Jéhovah nga ye kue so e mû na Jéhovah ayeke ye so lo mû na e.—Diko 1 Chronique 29:11-14.

5. Tongana nyen la Bible afa so ti mû ye na bê ti e kue ayeke mbeni kota mbage ti tâ vorongo?

⁵ E yeke mû nga ye na Jéhovah ndali ti so ayeke mbeni lege so e yeke voro na lo. Na yâ ti mbeni vision, bazengele Jean amä awakua ti Jéhovah na yayu atene: “Jéhovah, mo so mo yeke Nzapa ti e, mo lingbi biani ti wara gloire, nengo nga na ngangu ngbanga ti so mo la mo sara aye kue, nga a yeke ndali ti ye so bê ti mo aye si aye ni ayeke dä na a sara ala.” (Apoc. 4:11). Biani, Jéhovah alingbi ti tene e mû na lo gloire nga na nengo kue, ni la e ye ti mû na lo aye ti e ti nzoni mingi. Na lege ti Moïse, Jéhovah amû yanga na azo ti Israël ti sara amatanga ota ngu oko oko. Mbeni ye so ala yeke sara ti voro na Jéhovah na ngoi ti amatanga ni ayeke ti mû ye na lo. A tene na azo ni ti “ga na gbele Jéhovah maboko senge pëpe.” (Deut. 16:16). Laso nga, mbeni kota ye so e yeke sara ti voro na Jéhovah ayeke ti mû ye na lo na bê ti e kue. Na lege so, e fa so e bâ na nene ni mingi kua so bungbi ti Jéhovah ayeke sara nga e mû maboko na ni.

6. Ngbanga ti nyen la ti mû ye ayeke ndali ti nzoni ti e? (Bâ foto so ayeke na tongo nda ti article so.)

⁶ Ti mû ye na zo ayeke ndali ti nzoni ti e. Tongana e mû ye mingi na azo me e wara gï ye na maboko ti azo ape, a yeke sara nzoni na e. (Diko aProverbe 29:21.) E lingbi ti pensé na mbeni kete molenge so babâ na mama ti lo amû na lo mbeni kete pata, na pekoni lo mû mbage ni lo vo na mbeni cadeau na ala. Ye so lo sara so ayeke nzere na babâ na mama ni mingi. Wala peut-être mbeni molenge so ayeke pionnier na so angbâ ti lango na gbe ti babâ na mama ti lo ayeke mû na ala mbeni nginza ti mû maboko na ala ti futa na ambeni ye. Peut-être babâ na mama ni aku pëpe ti tene lo sara ni, me ala lingbi ti mû ni ndali ti so a yeke mbeni lege ti tene lo kiri singila na ala ndali ti aye kue so ala sara ndali ti lo. Legeoko nga, Jéhovah ahinga so a yeke nzoni ndali ti e ti mû mbage ti anzoni ye ti e na lo.

7, 8. Tongana nyen la awakua ti Jéhovah ti ândö azia na e tapande tongana ala mû ye (a) ndali ti ambeni mbilimbili kua so a ye ti sara? (b) ti mû maboko na kua ti lo?

⁷ Na lege ti Bible, e hinga so azo ti Jéhovah amû aye ti mû maboko na kua ti lo. Na ambeni ngoi, ala mû aye ndali ti mbeni mbilimbili kua so a ye ti sara. Na tapande, Moïse awa azo ti Israël ti mû aye ndali ti kua ti lekengo tabernacle. Na mbeni ngoi na pekoni, Gbia David awa nga azo ni ti sara tongaso ndali ti lekengo temple (Ex. 35:5; 1 Chron. 29:5-9). Na ngoi ti komandema ti Gbia Joas, aprêtre asara kua na nginza so a mû ni ti leke na aye so abuba na terê ti da ti Jéhovah (2 aGbia 12: 4, 5). Na ngoi ti akozo Chrétien tongana aita ahinga so aita ti ala so ayeke na Judée abezoin ambeni ye ndali ti kota nzara so atï kâ, ala ‘leke na bê ti ala ti tene zo oko oko amû ye alingbi na ye so lo yeke na ni, ti tokua ni si a mû maboko na aita so ayeke na Judée’.—Kus. 11:27-30.

⁸ Na ambeni ngoi, azo ti Jéhovah amû aye ti mû maboko na azo so amû li ni na yâ ti kua ti lo. Na gbe ti Ndia ti Moïse, azo ti mara ti Lévi awara héritage ape tongana ti so tanga ti amara awara. Me azo ti Israël amû na ala dîme ti mû lege na azo ti mara ti Lévi ti bi terê ti ala kue na yâ ti kua ti ala na tabernacle (Nom. 18:21). Legeoko nga, awali amû aye ti ala ti mû maboko na Jésus na abazengele ti lo.—Luc 8:1-3.

9. Aye so azo amû ni ândö, ala wara ni tongana nyen?

⁹ Aye so azo amû ni, ala wara ni na alege nde nde. Peut-être azo ti Israël so amû aye ti mû maboko na kua ti lekengo na tabernacle amû aye ti ala ti ngangu ngere so ala wara ni lani na Égypte (Ex. 3:21, 22; 35:22-24). Na ngoi ti akozo Chrétien, ambeni akä aye ti ala, na tapande ayaka ti ala wala ada ti ala, na ala ga na nginza ni na abazengele. Abazengele akangbi nginza ni na azo alingbi na bezoin ti ala (Kus. 4:34, 35). Ambeni Chrétien azi mbeni nginza azia ni nde tongaso si ala lingbi ti mû nginza lakue ti mû maboko na kua ti Nzapa (1 aCor. 16:2). Tongaso, ti londo na azo so ayeke na mosoro mingi ti si na azo so ayeke na yâ ti kota yere, zo kue alingbi ti mû mbeni ye.—Luc 21:1-4.

10, 11. (a) Tongana nyen la e lingbi ti mû tapande ti awakua ti Jéhovah ti giriri? (b) Mo bâ pasa so mo yeke na ni ti mû maboko na kua ti Royaume tongana nyen?

¹⁰ Laso, a lingbi ti hunda nga na e ti mû aye ndali ti mbeni mbilimbili ye so a leke ti sara ni. Peut-être congrégation ti mo aye ti leke peko ti Da ti Royaume ti ala wala ti leke mbeni fini ni. Peut-être a bezoin ti leke peko ti Da ti Béthel na ndo so mo yeke dä. E lingbi ti mû offrande ndali ti kota bungbi. Wala peut-être aita ti e na mbeni ndo ayeke bâ pasi ndali ti aye tongana ngu so asuku amû ndo wala sese so ayengi, na ala yeke na bezoin ti tene e mû maboko na ala. A-offrande so e yeke mû ayeke mû nga maboko na amissionnaire, apionnier spécial, asurveillant ti circonscription nga na azo so ayeke sara kua na kota ndokua ti e nga na aBéthel na ndö ti sese kue. Peut-être congrégation ti mo ayeke tokua nginza lakue ti mû maboko na kua ti lekengo aDa ti assemblée nga na aDa ti Royaume ti aita ti e na ambeni ndo.

¹¹ E kue e lingbi ti mû mbeni ye ti mû maboko na kua so Jéhovah ayeke sara na lâ ti nda ni so. Mingi ni, a yeke fa ka iri ti azo so amû nginza ndali ti kua ti Jéhovah ape. Na ngoi so e yeke zia nginza na yâ ti aboîte ti offrande na Da ti Royaume wala e mû offrande na lege ti jw.org, e yeke fa ka na amba ti e wungo ti nginza so e mû ape. E lingbi ti pensé e tene nginza so e mû ayeke kete mingi na a lingbi ti sara na ye oko ape. Ti tâ tene ni, mingi ti a-offrande so bungbi ti Jéhovah awara ayeke akete kete ye so aita mingi amû, me a yeke pëpe gï gbâ ti ye so aita amû. Même aita ti e so ayeke na nginza mingi ape amû tapande ti aChrétien ti Macédoine ti ngoi ti akozo Chrétien. Ala yeke lani na yâ ti “kota yere”, me ala voro yanga ti tene a mû lege na ala ti mû ye, na ala mû ye na bê ti ala kue.—2 aCor. 8:1-4.

12. Tongana nyen la bungbi ti Jéhovah ayeke sara kue ti sara kua nzoni na a-offrande so azo amû?

¹² Bebungbi ayeke be-ta-zo nga lo yeke sara ye na ndara na fason so lo yeke sara kua na a-offrande so azo ayeke mû (Mat. 24:45). Amembre ti Bebungbi ayeke sambela ti mû anzoni desizion na ala yeke bâ tongana nyen la ala lingbi ti sara kua nzoni na nginza ni  (Luc 14:28). Na ngoi ti giriri, akoli be-ta-zo so ayeke bâ lege ti a-offrande so azo amû ayeke sara kue ti tene a sara gï kua na ni ndali ti vorongo Jéhovah. Na tapande, Esdras akiri lani na Jérusalem na a-offrande ti ngangu ngere so gbia ti Perse amû na lo: lor, argent nga na ambeni ye nde, wungo ti nginza ti aye so kue alingbi na dollar kutu 100 laso. Esdras abâ lani a-offrande so tongana matabisi so a mû na Jéhovah. Tongaso, lo fa ambilimbili ye so a lingbi ti sara ti bata ni nzoni na ngoi so ala yeke hon na ni na yâ ti akodro so ayeke sioni (Esdras 8:24-34). Angu mingi na pekoni, Paul aro nginza ti mû maboko na aita ti Judée so ayeke na yâ ti bezoin. Lo sara kue ti tene azo so ayeke gue na nginza ni na ala ‘aleke na bê ti ala ti sara ye kue mbilimbili, gï na lê ti Jéhovah pëpe, me na lê ti azo nga.’ (Diko 2 aCorinthien 8:18-21.) Laso, bungbi ti e amû tapande ti Esdras na Paul na ayeke sara kua nzoni mingi na a-offrande so azo amû.

13. Ngbanga ti nyen la ade ti ninga ape bungbi ti Jéhovah asara ambeni changement?

¹³ Asewa alingbi ti changé fason so ala yeke sara kua na nginza ti ala tongaso si ala sara pëpe dépense ahon nginza so ala yeke wara. Wala ala lingbi ti gi ti duti na aye mingi ape tongaso si ala sara kua ti Jéhovah mingi. A yeke nga ye so bungbi ti Jéhovah ayeke sara la. Na yâ ti angu so ahon ade ti ninga ape, a sara afini pendere ye mingi na yâ ti bungbi ti Jéhovah na asara si a dépensé nginza mingi ahon nginza so a wara. Tongaso, bungbi ti Jéhovah agi alege ti kiri na adépense na gbe ni nga ayapu yâ ti akua tongaso si a sara kua nzoni na a-offrande so mo yeke mû na bê ti mo kue.

14-16. (a) Ambeni ye wa la a sara na a-offrande so mo mû? (b) Aye ti nzoni wa la mo wara na lege ti aye so a sara na a-offrande so?

¹⁴ Azo so asara na Jéhovah teti angu mingi atene so laso bungbi ti Jéhovah amû na e aye ti yingo mingi ahon ti kozo. Gbu li ti mo kete! Na yâ ti angu so ahon ande ti ninga ape, a komanse ti sara kua na jw.org nga na JW Télédiffusion. A kiri na peko ti Mbeti ti Nzapa ti fini dunia na ayanga ti kodro mingi. Na ngu 2014-2015, a sara assemblée internationale so li ni ayeke “Ala ngbâ ti gi kozoni Royaume ti Nzapa!” na yâ ti akota stade na yâ ti agbata 14 na yâ ti dunia. Azo kue so aga na kota bungbi so ayeke lani na ngia.

¹⁵ Azo mingi akiri singila ndali ti apendere ye ti nzoni so bungbi ti Jéhovah amû na ala. Na tapande, mbeni koli na wali ti lo so ayeke  sara kua ti Jéhovah na yâ ti mbeni kodro na Asie atene na ndö ti JW Télédiffusion, atene: “E yeke sara kua ti e na yâ ti mbeni kete kodro. A sara si na ambeni ngoi e bâ so e yeke gï e oko na e girisa hio tongana nyen la kua ti Jéhovah amû ndo mingi. Me na peko ti so e bâ aprogramme nde nde ti JW Télédiffusion, e bâ so e yeke na yâ ti sewa ti aita so ayeke na yâ ti dunia kue. JW Télédiffusion anzere mingi na aita ti e so e ye ala mingi na ndo so e yeke dä. Mingi ni e yeke mä ka so ala tene na peko ti so ala bâ JW Télédiffusion ti nze oko oko, ala bâ so ala ga nduru mingi na amembre ti Bebungbi. Fadeso a nzere na ala mingi so ala yeke na yâ ti bungbi ti Jéhovah.”

¹⁶ Na yâ ti dunia kue, a yeke leke aDa ti Royaume wala a yeke leke peko ti aDa ti Royaume nduru na 2 500. Na peko ti so aita ti mbeni congrégation na Honduras akomanse ti sara bungbi na yâ ti fini Da ti Royaume ti ala, ala tene: “E yeke na ngia mingi so e yeke na yâ ti sewa ti Jéhovah, nga so e yeke na yâ ti sewa ti aita so ayeke na yâ ti dunia kue a nzere na e mingi, ye so la asara si bango li so e yeke bâ lani na ndö ti warango mbeni Da ti Royaume na gbata ti e aga tâ tënë.” Azo mingi akiri nga singila tongaso na peko ti so ala wara Bible nga na ambeni mbeti na yanga ti kodro ti ala wani, na peko ti so ala wara mungo maboko na peko ti mbeni kpale wala tongana ala bâ anzoni ye so aga na peko ti fango tënë na akota gbata nga na ando so azo ayeke hon dä mingi na yâ ti territoire ti ala.

17. E hinga tongana nyen so Jéhovah ayeke mû maboko na bungbi ti lo laso?

¹⁷ Azo mingi so ayeke aTémoin ti Jéhovah ape alingbi ti comprendre ape tongana nyen la e yeke sara akua ti e kue gï grâce na a-offrande so azo amû na bê ti ala wani. Mbeni kota zo so ayeke bâ lege ti mbeni kota ndokua ti petengo ambeti asara vizite na ndo so a pete ambeti ti e dä na yâ ti mbeni Béthel. Li ti lo akpe ti bâ so avolontaire la ayeke sara akua ti e kue nga a yeke sara ni na lege ti a-offrande so azo amû na bê ti ala wani. E yeke kä nga mbeni ye ape wala e yeke sara nga pëpe mbeni ye so alingbi ti ga na e nginza. Lo tene so e lingbi pëpe ti sara aye so e yeke sara so. E yeda na tënë ti lo so. E hinga so e lingbi ti sara ni gï ndali ti so Jéhovah ayeke mû maboko na kua ni.—Job 42:2.

18. (a) Tongana e mû maboko na kua ti Royaume, aye ti nzoni wa la e yeke wara? (b) Tongana nyen la e lingbi ti fa na amolenge ti e nga na afini zo ti mû maboko na kua ti Royaume?

¹⁸ Jéhovah ane e la lo mû na e pasa ti mû maboko na kota kua so a yeke sara ni laso. Lo dë bê ti e so tongana e mû maboko na kua ti Royaume, e yeke wara tufa mingi (Mal. 3:10). Jéhovah atene so zo so amû ye mingi na azo, ye ti lo ayeke maï. (Diko aProverbe 11:24, 25.) Tongana e mû ye na zo ayeke sara si e yeke na ngia, ndali ti so “mungo ye na zo aga na ngia mingi ahon warango ye na tïtî zo.” (Kus. 20:35). Na lege ti tënë ti yanga ti e nga na sarango ye ti e, e lingbi ti fa na amolenge ti e nga na afini zo tongana nyen la ala lingbi ti mû maboko na kua ti Royaume nga ti wara tufa mingi.

19. Article so akpengba mo tongana nyen?

¹⁹ Aye kue so e yeke na ni alondo na Jéhovah. Tongana e kiri e mû na lo ambeni ye so lo mû na e, e yeke fa so e ye lo nga e bâ na nene ni aye kue so lo sara ndali ti e (1 Chron. 29:17). Na ngoi so azo ti Israël ayeke mû lani aye ndali ti lekengo na temple “terê ti azo ni anzere mingi ti mû amatabisi so na bê ti ala wani, ndali ti so ala mû ni na Jéhovah na bê ti ala kue”. (1 Chron. 29:9). Zia e nga e ngbâ ti duti na ngia ti mû na Jéhovah aye so lo mû na e.