Mingi ni, azo ayeke yeda hio na tënë ti Royaume tongana ala mä ni na yanga ti kodro so a dü ala dä. Peut-être a yeke ndani la na Pentecôte ti ngu 33, Jéhovah aleke si “aJuif so akpe mbeto ti Nzapa, so alondo na amara nde nde kue so ayeke na gbe ti yayu” amä nzoni tënë na ‘yanga ti kodro so a dü ala dä,’ atâa so peut-être ala yeke tene même yanga ti kodro so azo mingi atene ni, na tapande Hébreu wala Grec (Kus 2:5, 8). Laso, na yâ ti aquartier so azo ni ayeke tene ayanga ti kodro nde nde, a lingbi ti mû même territoire na acongrégation so ayeke sara abungbi na ayanga ti kodro nde nde. Tongana nyen la na yâ ti acongrégation tongaso awafango tënë alingbi ti sara kua maboko na maboko ti fa tënë na azo kue, me ti kpe ti fa tënë na yâ ti mbeni territoire oko lege mingi si bê ti azo ni ason ape?

• Ala mä terê (aPr 15:22): A lingbi asurveillant ti kusala ti congrégation oko oko asara lisoro na popo ti ala ti zia na sese mbeni kode ti fango tënë so alingbi ti ga na ye ti nzoni na acongrégation ni kue. Tongana territoire ti acongrégation so ayeke fa tënë na ayanga ti kodro nde nde akono ape, kite ayeke dä ape so ala yeke ye ande ti tene mo fa tënë pëpe na azo so ayeke tënë yanga ti kodro nde so ayeke na yâ ti territoire ti ala. Me, tongana acongrégation so ayeke tene yanga ti kodro nde alingbi pëpe ti fa tënë lakue na yâ ti territoire ti ala kue ndali ti so akono mingi, ala lingbi ti yeda ti tene na fango tënë congrégation ti mo afa tënë na ada ni kue, me tongana tënë ni anzere na mbeni zo, ala ye si mo fa lo na ala (od l. 93 par. 37). Wala ala lingbi ti hunda na congrégation ti mo ti mû maboko na ala ti wara azo so ayeke tene yanga ti kodro so a yeke sara na bungbi na congrégation ti ala nga ti mû maboko na ala ti wara azo so a tokua asango na ndö ti ala na yâ ti territoire ni (km 12/7 l. 5, encadré). Girisa pëpe so na ambeni ngoi, na yâ ti mbeni da oko azo ti yâ ni ayeke tene ayanga ti kodro mingi. A lingbi aye so a leke ndali ti fango tënë na yâ ti territoire ni ague oko na aye so ndia ayeda na ni na ndö ti batango asango na ndö ti azo.

• Sara kua maboko na maboko (aÉp 4:16): Sara ye mbilimbili alingbi na afango lege kue so alondo na surveillant ti kusala. Mo yeke manda Bible na mbeni zo so yanga ti kodro so lo ye ayeke nde na ti so a yeke sara na bungbi na congrégation ti mo? Lo yeke maï peut-être hio tongana mo kiri na étude ni na mbeni zo ti congrégation wala groupe so ayeke nduru na lo so azo ni ayeke tene yanga ti kodro ti lo.

• Leke terê ti mo (aPr 15:28; 16:1): Na yâ ti territoire ti mo, tongana zo so mo wara lo atene mbeni yanga ti kodro nde, sara kue ti fa nzoni tënë na lo. Mo lingbi ti leke terê ti mo na lege so mo gi kozoni ti hinga ayanga ti kodro so azo ayeke tene na yâ ti territoire ti mo nga ti téléchargé kozoni na ndö ti appareil ti mo aBible nga na avidéo. Mo lingbi nga ti sara kua na application JW Language ti manda barango zo na ambeni yanga ti kodro.