Kamarade ayeke mbeni “zo so ayeke nduru na mba ti lo ndali ti so ala ye mba.” Na tapande, Jonathan na David aga akota kamarade na peko ti so David afâ Goliath (1Sa 18:1). Ala use kue ayeke na asarango ye so asara si ala ye ti ga akamarade. Tongaso, kpengba songo ti kamarade aluti na ndö ti tâ hingango ye. Mingi ni, ti hinga mbeni zo ahunda ngoi nga na effort. Me na ndö ti aréseaux sociaux, hio tongaso azo apeut ti ga “akamarade” gï tongana ala cliqué na ndö ti bouton oko. Ndali ti so na ndö ti Internet azo apeut ti leke nzoni atënë so ala yeke tene nga ala peut ti sara si azo apensé so ala yeke nzoni zo, andâ a yeke vrai ape. Tongaso, a yeke nzoni ti gbu li nzoni na ndö ti azo so mo ye ti tene ala duti akamarade ti mo. Tongana mbeni zo so mo hinga lo vrai ape ahunda ti ga kamarade ti mo na ndö ti arésaux sociaux, sara mbeto ape ti sara sanka ni wala ti ke ti yeda na ni ndali ti so mo pensé so mo yeke son bê ti lo. Ndali ti akpale so, ambeni zo asoro ti sara kua na aréseaux sociaux ape. Ye oko, tongana mo soro ti sara kua na aréseaux sociaux, nyen la mo doit ti girisa ape?

BÂ VIDÉO ZIA SI ARÉSEAUX SOCIAUX AHANDA MO APE, NA PEKONI KIRI TËNË NA AHUNDA SO:

• Nyen la mo doit ti bâ kozo si mo zia acommentaire na afoto na ndö ti aréseaux sociaux?

• Ngbanga ti nyen la mo doit ti soro akamarade ti mo na ndö ti Internet nzoni?

• Ngbanga ti nyen la mo doit ti zia limite na ndö ti ngoi so mo yeke sara na ndö ti aréseaux sociaux?—aÉp 5:15, 16