Zo-ti-fa-tene 12:1-14
12 Ni la, na lâ ti maseka ti mo, dabe ti mo na Lo so asara mo, so ayeke kota mingi,+ kozo si angoi ti vundu* asi+ nga na angu so na yâ ni mo yeke tene: “Gigi ni anzere na mbi pëpe”;
2 kozo si lâ, lumière, nze na atongoro avuko,+ nga ambinda akiri aga na peko ti* kota ngu-nzapa;
3 na ngoi so terê ti agarde* so ayeke bata da ayeke dö, peko ti angangu koli aba, awali so ayeke neka ye azia kua ti ala, ndali ti so ala ngbâ mingi pëpe nga awali so ayeke bâ ndo na lê ti fenêtre abâ so ndo avuko;+
4 na ngoi so ayanga-da so azi si zo abâ ndo na lege akanga, na ngoi so bruit ti tênë so a yeke neka ye na ndö ni atoto ngangu encore ape, na ngoi so zo ayeke londo na mango toto ti ndeke nga na ngoi so go ti amolenge-wali kue so ayeke he bia atoto ngangu encore ape.+
5 Nga, zo ayeke sara mbeto ti ye so ayo na nduzu, na aye so asara si mbeto ahon ndö ti zo ayeke na ndö ti lege. Akeke ti amande asara fleur,+ ngadi ayeke huru gbä nga lê ti keke so ayeke sara si yanga ti zo anzere asungba, ndali ti so zo ayeke tambela ti gue na da ti lo ti lakue lakue,+ nga azo ti totongo kuâ ayeke fono na lege;+
6 kozo si a zi kamba so a sara ni na argent, kozo si yâ ti dû ti sembe ti lor afâ kete kete, kozo si yâ ti ta so ayeke na yanga ti dû ti ngu afâ nga kozo si ye so a yeke roulé kamba ti rambâi na terê ni afâ.
7 Na pekoni, fuku ti sese akiri na sese,+ gï tongana ti so lo yeke kozo, na yingo* akiri na tâ Nzapa so amû ni na zo.+
8 Zo ti bungbingo azo+ atene: “A yeke tâ gï senge senge! Ye kue ayeke senge senge.”+
9 Zo ti bungbingo azo aga pëpe gï zo ti ndara, me nga lo ngbâ ti fa na azo ye so lo hinga,+ lo gbu li nzoni nga lo gi nda ti ye nzoni, tongaso si lo bungbi* gbâ ti aproverbe.+
10 Zo ti bungbingo azo agi ti wara atënë so anzere+ nga ti sû na mbeti atënë so ayeke na lege ni nga so ayeke tâ tënë.
11 Atënë ti azo ti ndara ayeke tongana asaworo,+ nga atënë ti ala so a bungbi ni ayeke tongana apointe so a pika ni si alï nzoni; atënë so kue alondo na berger oko.
12 Âdu ti ambeni ye nde, molenge ti mbi, mä wango so: Sungo gbâ ti ambeti ayeke hunzi lâ oko pëpe, nga ti mû ngoi mingi ti diko ni ayeke woko zo.+
13 Na peko ti so a mä atënë nde nde kue awe, kota tënë ni ayeke so: Kpe mbeto ti tâ Nzapa+ na bata acommandement ti lo,+ ndali ti so a yeke ye kue so zo adoit ti sara la.+
14 Tâ Nzapa ayeke fâ ngbanga ande na ndö ti ye oko oko kue, même ye kue so a honde ni, ti bâ wala a yeke nzoni wala a yeke sioni.+
Akete tënë na terê ni
^ Wala “angoi ti ye ti ngangu.”
^ A lingbi nga ti tene “aga na.”
^ Wala “azo ti batango da.”
^ Wala “ngangu so asara si zo angbâ na fini.”
^ Wala “leke na molongo.”
