Zacharie 11:1-17
11 “Liban, mo zi yanga-da ti mo,si wâ agbi akeke ti cèdre ti mo.
2 Keke ti genévrier, mo toto, ndali ti so keke ti cèdre atï awe,a futi akota keke awe!
Ala akeke ti chêne ti Basan, ala toto,ndali ti so a futi kota gbako awe!
3 Azo, ala mä aberger so ayeke toto,ndali ti so a futi gloire ti ala awe.
Azo, ala mä toto ti abamara so akono awe,*ndali ti so a futi kete gbako so ayeke na terê ti Ngu ti Jourdain awe.
4 “Jéhovah Nzapa ti mbi atene: ‘Fa lege na ataba so a gue na ala ti fâ ala,+
5 so azo so avo ala afâ ala,+ me a fâ ngbanga na ndö ti azo ni pëpe. Nga azo so akä ala+ atene: “Zia a sepela Jéhovah, ndali ti so mbi yeke ga zo ti mosoro.” Aberger ti ala abâ mawa ti ala kete pëpe.’+
6 “Jéhovah atene: ‘Mbi yeke kiri ti bâ mawa ti azo ti kodro ni encore ape. Mbi yeke sara si zo oko oko atï na yâ ti maboko ti mba ti lo nga na gbia ti lo. Ala yeke futi kodro ni, na mbi yeke zi ala na yâ ti maboko ti amba ti ala pëpe.’”
7 Mbi komanse ti fa lege na ataba so a ye fade ti gue ti fâ ala,+ na mbi sara ni ndali ti ataba so a sara pasi na ala. Tongaso mbi mû akeke use, mbi zia iri ti mbeni Nzerengo ye, nga ti mbeni ayeke Sarango beoko,+ na mbi komanse ti fa lege na ala.
8 Na yâ ti nze oko, mbi tomba aberger ota na kua ti ala, ndali ti so mbi kanga* bê gbä na ala; ala* nga kue ake mbi bê oko.
9 Mbi tene: “Mbi yeke ngbâ ti fa lege na ala pëpe. Zia lo so ague ti kui akui, nga zia lo so ye aye ti fâ lo afâ lo. Ti ala so angbâ, zia ala te nyama ti terê ti amba ti ala na popo ti ala.”
10 Tongaso, mbi gbu keke ti mbi so iri ni ayeke Nzerengo ye+ mbi fâ yâ ni kete kete; na sarango tongaso, mbi fâ yâ ti mbele so mbi te lani na azo ti mbi.
11 Yâ ti keke ni afâ na yâ ti lango ni so, nga ataba so a sara pasi na ala si abâ mbi ahinga so tënë ti yanga ti Jéhovah la.
12 Na pekoni, mbi tene na ala: “Tongana ala ye, ala mû na mbi futa ti mbi; tongana ala ye pëpe, ala gbanzi ni.” Tongaso ala futa mbi na* alê ti nginza ti argent 30.+
13 Jéhovah atene na mbi: “Tuku ni na ndo ti batango nginza; ti ala, ngere so mbi lingbi na ni la.”+ Tongaso mbi mû alê ti nginza ti argent 30 ni, mbi tuku ni na ndo ti batango nginza na yâ ti da ti Jéhovah.+
14 Na pekoni, mbi fâ yâ ti use keke ni kete kete, so iri ni ayeke Sarango beoko;+ na sarango tongaso, mbi fâ yâ ti songo ti ita so ayeke na popo ti Juda na Israël.+
15 Jéhovah atene na mbi: “Ti fadeso, mû agbakuru ti mbeni berger so ahinga kua ti lo ti berger pëpe,+
16 ndali ti so mbi yeke sara si mbeni berger abâ gigi na yâ ti kodro ni. Lo yeke bâ pëpe lege ti ataba so ague ti kui.+ Lo yeke gi nga pëpe peko ti akete ni, lo yeke kanga pëpe kä ti ala so awara kä+ nga lo yeke mû pëpe kobe na ala so gere ti ala akpengba. Me lo yeke te nyama ti ala so akono pendere+ nga lo yeke gboto sabot ti ataba ni.+
17 Mawa na berger ti mbi so ahinga kua ti lo ti berger pëpe,+ lo so adö ataba ni azia!+
Épée ayeke fâ maboko ti lo nga ayeke kôro lê ti lo ti mbage ti koli.
Maboko ti lo ayeke hule ande kue,nga lê ti lo ti mbage ti koli ayeke vuko biani biani.”*
Akete tënë na terê ni
^ Wala “akoli-bamara so akono awe.”
^ Wala “âme ti mbi akanga.”
^ Wala “âme ti ala.”
^ Na Hébreu: “ala pesé na mbi.”
^ Na Hébreu: “ayeke bâ ndo gï kete kete.”
