Psaume 71:1-24
71 Jéhovah, mbi kpe na mo ti bata terê ti mbi.
Zia kamene agbu mbi lâ oko pëpe.+
2 So mo yeke mbilimbili, sö mbi nga zi mbi.
Dengi mê ti mo, mo mä* mbi na mo sö mbi.+
3 Ga mbeni ngangu gbagba ti tênë ndali ti mbi,ndo so lakue mbi lingbi ti lï dä.
Mû yanga ti tene a sö mbi,ndali ti so mo yeke kota tênë ti mbi na ngangu gbagba ti batango mbi.+
4 Nzapa ti mbi, zi mbi na maboko ti azo ti sioni,+na maboko ti zo ti kirikiri so ayeke sara ye ti ngangu na zo.
5 Jéhovah, Seigneur ti dunia kue, mo la mbi zia bê ti mbi ti ku mo;mbi zia bê ti mbi na ndö ti mo* ngbene ye so mbi ngbâ maseka.+
6 Ngbene ye so a dü mbi, gigi ti mbi ayeke na tïtî mo;Mo la mo gbu mbi na ngoi so mbi sigi na yâ ti mama ti mbi.+
Mbi sepela mo lakue.
7 Mbi yeke tongana miracle na lê ti azo mingi;me mo yeke ngangu ndo so mbi yeke bata terê ti mbi dä.
8 Tënë ti sepelango mo la asi singo na yanga ti mbi;+mbi sara tënë ti gloire ti mo na yâ ti lango ni kue.
9 Tomba mbi na terê ti mo pëpe na ngoi so mbi ga mbakoro;+zia mbi pëpe tongana ngangu ti mbi ahunzi.+
10 Awato ti mbi adiko tënë na terê ti mbi,na azo so agi ti mû fini ti mbi* abungbi ti mä terê,+
11 ala tene: “Nzapa azia lo awe.
E tomba peko ti lo, e gbu lo, ndali ti so zo ti sö lo ayeke dä pëpe.”+
12 Nzapa, ngbâ yongoro na mbi pëpe.
Nzapa ti mbi, ga hio mo mû maboko na mbi.+
13 Azo so ayeke dö sese na mbi,*zia si kamene agbu lê ti ala nga ala kui.+
Azo so agi ti tene ye ti ngangu awara mbi,zia si nengo ti ala atï na sese nga kamene asara ala.+
14 Me mbi, mbi yeke ngbâ ti ku,mbi yeke kiri ti sepela mo mingi ahon ti kozo.
15 Yanga ti mbi ayeke fa peko ti mbilimbili ti mo;+na yâ ti lango ni kue, yanga ti mbi ayeke fa peko ti aye so mo sara ti sö zo,atâa so mbi lingbi ti mä yâ ti* aye ni so kue pëpe ndali ti so ayeke mingi mingi.+
16 Jéhovah, Seigneur ti dunia kue,mbi yeke ga ti fa tënë ti akpengba ye so mo sara;gï mo oko la mbi yeke sara tënë ti mbilimbili ti mo.
17 Nzapa, mo fa ye na mbi ngbene ye so mbi ngbâ maseka,+nga juska laso mbi ngbâ ti fa tënë ti akusala ti mo so adö bê.+
18 Nzapa, même na ngoi so mbi ga mbakoro na kuä ti li ti mbi avuru, zia mbi pëpe.+
Zia si mbi fa tënë ti ngangu* ti mo na azo so a yeke dü ala laso,nga zia si mbi fa tënë ti kota ngangu ti mo na azo kue so a yeke dü ala ande.+
19 Nzapa, mbilimbili ti mo asi juska na lê ti nduzu;+mo sara akota ye mingi;Nzapa, zo wa la ayeke tongana mo zo wa?+
20 Atâa so mo sara si mbi wara gbâ ti aye ti vundu nga na aye ti ngangu,+sara si mbi kiri mbi wara ngangu;mû mbi kâ* na gbe ti sese mo sigi na mbi.+
21 Zia mo sara si mbi ga kota ahon ti kozo,ga na terê ti mbi mbage na mbage nga dë bê ti mbi.
22 Na pekoni, mbi yeke sepela mo na ye ti mozoko so ayeke na kamba,ndali ti so mo, Nzapa ti mbi, mo yeke be-ta-zo.+
Mbi yeke pika harpe ti he bia ti sepela mo,*Nzapa ti Israël so ayeke nzoni-kue.
23 Yanga ti mbi ayeke dekongo na ngia na ngoi so mbi yeke he bia ti sepela mo,+ndali ti so mo sö fini ti mbi.*+
24 Yanga ti mbi ayeke sara tënë ti* mbilimbili ti mo na yâ ti lango ni kue,+ndali ti so azo so agi ti futi mbi, kamene ayeke gbu ala nga nengo ti ala ayeke tï na sese.+
Akete tënë na terê ni
^ Wala “Kuku na mo mä.”
^ Wala “mo la mo yeke zo ti confiance ti mbi.”
^ Wala “ayeke gi âme ti mbi.”
^ Wala “âme ti mbi.”
^ Wala “diko.”
^ Na Hébreu: “maboko.”
^ Wala “na yâ ti ngu so alï mingi.”
^ Wala “ti pika mozoko na mo.”
^ Wala “mo zi âme ti mbi.”
^ Wala “ayeke gbu li na ndö ti.”
