Psaume 119:1-176
-
Bango anzoni tënë ti Nzapa na nene ni
-
‘Amaseka ayeke sara tongana nyen ti bata lege ti ala mbilimbili?’ (9)
-
“Mbi ye awango ti mo mingi” (24)
-
“Mbi ye ndia ti mo mingi!” (97)
-
“Mbi hinga ti bâ yâ ti aye nzoni ahon azo kue so ayeke fa ye na mbi” (99)
-
“Tënë ti mo ayeke lampe ndali ti gere ti mbi” (105)
-
“Gunda ti tënë ti mo ayeke tâ tënë” (160)
-
Siriri ndali ti azo so aye ndia ti Nzapa (165)
-
א [Aleph]
119 Ngia ayeke na azo so tënë ayeke na li ti ala pëpe,*so ayeke sara ye alingbi na ndia ti Jéhovah.+
2 Ngia ayeke na azo so asara ye alingbi na awango ti lo+na so ayeke gi lo na bê ti ala kue.+
3 Ala ngbâ ti sara ye ti kirikiri pëpe.Ala tambela na lege ti lo.+
4 Mo hunda ti tenea sara ye alingbi tâ gï na yanga so mo mû na ndö ti aye nde nde.+
5 Tongana mbi peut ti luti ngangu,*+si mbi bata andia ti mo so afa lege na zo, ka a yeke nzoni!
6 Tongaso, kamene ayeke sara mbi pëpe+na ngoi so mbi yeke bi bê na acommandement ti mo kue.
7 Na bê so avuru, mbi yeke sepela mona ngoi so mbi manda ti hinga afango ngbanga ti mo so ayeke mbilimbili.
8 Mbi yeke bata andia ti mo so afa lege na zo.
Zia si lâ oko pëpe mo ke mbi biani biani.
ב [Beth]
9 Maseka-koli ayeke sara tongana nyen ti bata lege ti lo mbilimbili?
Na sarango hange ti sara ye lakue alingbi na tënë ti mo.+
10 Mbi gi mo na bê ti mbi kue.
Zia si mbi hon yongoro na acommandement ti mo pëpe.+
11 Mbi bata tënë ti mo nzoni na yâ ti bê ti mbi,+si mbi sara siokpari na terê ti mo pëpe.+
12 Jéhovah, zia si a sepela mo;fa na mbi andia ti mo so afa lege na zo.
13 Mbi zi yanga ti mbi ti sara tënë tiangbanga kue so mo fâ.
14 Awango ti mo azia ngia na bê ti mbi+ahon tanga ti aye ti mosoro kue.+
15 Mbi yeke gbu li* na ndö ti yanga so mo mû na ndö ti aye nde nde,+nga lê ti mbi ayeke ngbâ gï na ndö ti alege ti mo.+
16 Mbi ye ambela ti mo mingi.
Mbi yeke girisa tënë ti mo pëpe.+
ג [Guimel]
17 Sara ye na nzoni bê na mbage ti mbi wakua ti mo,si mbi ngbâ na fini na mbi sara ye alingbi na tënë ti mo.+
18 Zi lê ti mbi si mbi bâ poleleaye ti dongo bê so ayeke na yâ ti ndia ti mo.
19 Mbi yeke gï wande na yâ ti kodro ni.+
Honde acommandement ti mo na mbi pëpe.
20 Nzara ti angbanga so mo fâahon ndö ti mbi* na ngoi kue.
21 Mo suku na azo ti fandara,azo so a deba ala awe, so ague yongoro na acommandement ti mo.+
22 Zi na ndö ti mbi* zonga nga na hengo ndo,ndali ti so mbi bata awango ti mo.
23 Même tongana amokonzi aduti ndo oko, na ala tene sioni tënë ti mbi,mbi wakua ti mo mbi gbu li* na ndö ti andia ti mo so afa lege na zo.
24 Mbi ye awango ti mo mingi;+a yeke tongana azo ti mungo wango na mbi.+
ד [Daleth]
25 Mbi lango* na yâ ti fuku ti sese.+
Bata fini ti mbi alingbi na tënë ti mo.+
26 Mbi fa na mo alege ti mbi, na mo kiri tënë na mbi;fa na mbi andia ti mo so afa lege na zo.+
27 Sara si mbi hinga nda ti yanga so mo mû na ndö ti aye nde nde,si mbi gbu li* na ndö ti akusala ti mo so adö bê.+
28 Mbi lango* gbä ndali ti vundu ti mbi.
Mû na mbi ngangu alingbi na tënë ti mo.
29 Sara si mbi sara ye na handa pëpe;+sara nzoni bê na mbi na fango na mbi ndia ti mo.
30 Mbi soro ti ngbâ gï be-ta-zo.+
Mbi hinga so angbanga so mo fâ ayeke na lege ni.
31 Mbi hule na terê ti awango ti mo.+
Jéhovah, zia si a zia vundu na bê ti mbi* pëpe.+
32 Na bê kue, mbi yeke tomba peko ti* acommandement ti mo,ndali ti so mo sara si a wara place na yâ ti bê ti mbi.*
ה [Hé]
33 Jéhovah, fa na mbi+ lege ti andia ti mo so afa lege na zo,na mbi yeke tambela dä juska na nda ni.+
34 Sara si mbi hinga ndo,si mbi bata ndia ti monga mbi bata ni na bê ti mbi kue.
35 Fa na mbi* lege ti acommandement ti mo,+ndali ti so mbi wara ngia dä mingi.
36 Sara si bê ti mbi aye awango ti mo,me pëpe ti wara ye gï ndali ti mbi wani.+
37 Zi lê ti mbi na terê ti ye so ayeke senge senge ye;+sara si mbi tambela na ndö ti lege ti mo si mbi ngbâ na fini.
38 Sara ye so mo mû zendo ni* na mbi wakua ti mo,si azo akpe mbeto ti mo.*
39 Zi ye ti kamene so mbi sara mbeto ni mingi,ndali ti so angbanga so mo fâ ayeke nzoni.+
40 Bâ tongana nyen yanga so mo mû na ndö ti aye nde nde agbu bê ti mbi mingi.
Bata fini ti mbi alingbi na mbilimbili ti mo.
ו [Waw]
41 Jéhovah, zia si mbi bâ tâ ndoye ti mo na yâ ti fini ti mbi,+nga na salut ti mo tongana ti so mo mû zendo ni,*+
42 tongaso si mbi kiri tënë na zo so agi yanga ti mbi,ndali ti so mbi zia bê ti mbi na ndö ti tënë ti mo.
43 Zi tënë so ayeke tâ tënë na yanga ti mbi biani biani pëpe,ndali ti so mbi zia bê ti mbi ti ku* ngbanga so mo fâ.
44 Mbi yeke bata ndia ti mo lakue,lakue lakue nga kpu na kpu.+
45 Mbi yeke fono na mbeni ndo so ayeke nzoni,*+ndali ti so mbi gi ti hinga yanga so mo mû na ndö ti aye nde nde.
46 Mbi yeke sara tënë na ndö ti awango ti mo na lê ti agbia,na kamene ayeke sara mbi pëpe.+
47 Acommandement ti mo agbu bê ti mbi mingi,mbi ye ni mingi.+
48 Mbi yeke yâa maboko ti mbi na nduzu na mbage ti acommandement ti mo so mbi ye ni mingi,+na mbi yeke gbu li* na ndö ti andia ti mo so afa lege na zo.+
ז [Zaïn]
49 Dabe ti mo na tënë so mo tene* na mbi wakua ti mo,so na lege ni mo mû na mbi beku.*
50 Ye so la ayeke dë bê ti mbi na yâ ti pasi ti mbi,+ndali ti so tënë ti mo abata mbi na fini.
51 Azo ti fandara ahe mbi ngangu,me mbi gue nde na ndia ti mo pëpe.+
52 Jéhovah, mbi dabe ti mbi na angbanga so mo fâ ngbene ye ândö,+na a sara si bê ti mbi adë.+
53 Ngonzo asara mbi mingi ndali ti azo ti sioniso ake ndia ti mo.+
54 Andia ti mo so afa lege na zo aga abia na yanga ti mbina ndo kue so mbi sara kodro dä.*
55 Jéhovah, na bï, mbi dabe ti mbi na iri ti mo,+tongaso si mbi bata ndia ti mo.
56 So ayeke ye so mbi yeke sara kandali ti so mbi sara ye alingbi na yanga so mo mû na ndö ti aye nde nde.
ח [Heth]
57 Jéhovah ayeke part ti mbi;+mbi mû zendo ti sara ye alingbi na tënë ti mo.+
58 Mbi voro yanga na mo* na bê ti mbi kue;+sara nzoni bê na mbi+ tongana ti so mo mû zendo ni.*
59 Mbi bâ yâ ti tambela ti mbi nzoni,ti tene mbi kiri mbi sara ye alingbi na awango ti mo.+
60 Mbi sara ye hio, mbi ku pëpeti bata acommandement ti mo.+
61 Kamba ti azo ti sioni angoro mbi kue,me mbi girisa ndia ti mo pëpe.+
62 Na bê ti bï, mbi londo ti kiri singila na mo+ndali ti angbanga so mo fâ so ayeke mbilimbili.
63 Mbi yeke kamarade ti azo kue so akpe mbeto ti monga na ti azo so asara ye alingbi na yanga so mo mû na ndö ti aye nde nde.+
64 Jéhovah, sese asi singo na tâ ndoye ti mo;+fa na mbi andia ti mo so afa lege na zo.
ט [Teth]
65 Jéhovah, sara ye nzoni na mbi wakua ti mo,alingbi na tënë ti mo.
66 Fa na mbi ti sara ye tongana zo so li ti lo ayeke dä, nga mû na mbi hingango ye,+ndali ti so mbi zia bê ti mbi na ndö ti acommandement ti mo.
67 Kozo si mbi bâ pasi, mbi yeke gue ka yongoro;*me fadeso, mbi yeke bata tënë ti mo.+
68 Mo yeke nzoni+ nga akusala ti mo ayeke nzoni.
Fa na mbi andia ti mo so afa lege na zo.+
69 Azo ti fandara abuba iri ti mbi na atënë ti mvene,me na bê ti mbi kue, mbi sara ye alingbi na yanga so mo mû na ndö ti aye nde nde.
70 Tënë ti ye oko agbu bê ti ala pëpe,*+me ti mbi, mbi ye ndia ti mo mingi.+
71 So mbi bâ pasi so, a yeke nzoni,+a sara si mbi manda ti hinga andia ti mo so afa lege na zo.
72 Ndia so mo fa tënë ni ayeke nzoni ndali ti mbi,+ahon alê ti lor na ti argent saki mingi.+
י [Yod]
73 Maboko ti mo la aleke mbi nga asara mbi.
Mû na mbi hingango ndo,si mbi manda ti hinga acommandement ti mo.+
74 Azo so akpe mbeto ti mo abâ mbi, na ala duti na ngia,ndali ti so tënë ti mo la ayeke beku ti mbi.*+
75 Jéhovah, mbi hinga so angbanga so mo fâ ayeke mbilimbili,+nga so mo sara pasi na mbi ndali ti so mo yeke be-ta-zo.+
76 Pardon, zia si tâ ndoye ti mo+ adë bê ti mbialingbi na zendo so mo mû* na mbi wakua ti mo.
77 Sara nzoni bê na mbi, si mbi ngbâ na fini,+ndali ti so mbi ye ndia ti mo mingi.+
78 Zia si kamene agbu azo ti fandara,ndali ti so senge senge tongaso,* ala sara ye na mbi na lege ni pëpe.
Me mbi yeke gbu li* na ndö ti yanga so mo mû na ndö ti aye nde nde.+
79 Zia si azo so akpe mbeto ti mo akiri na mbage ti mbi,azo so ahinga awango ti mo.
80 Zia si bê ti mbi amû tâ gï peko ti andia ti mo so afa lege na zo,+si a bi kamene na lê ti mbi pëpe.+
כ [Kaph]
81 Mbi yeke ku salut ti mo kungo,*+ndali ti so tënë ti mo la ayeke beku ti mbi.*
82 Lê ti mbi ayeke gï na lege ti ku tënë ti mo,+na mbi yeke tene: “Lawa la mo yeke dë bê ti mbi?”+
83 Mbi yeke tongana ngbenda so a sara na poro ti nyama, so guru ague na terê ni ngbii si a hule.Me mbi girisa pëpe andia ti mo so afa lege na zo.+
84 Mbi wakua ti mo mbi yeke ku juska lango oke?
Lawa la mo yeke fâ ngbanga na ndö ti azo so ayeke sara ye ti ngangu na mbi?+
85 Azo ti fandara azi adû ti tene mbi tï dä,azo so ake ti kpe ndia ti mo.
86 Zo alingbi ti zia bê ti lo na ndö ti acommandement ti mo kue.
Azo ayeke sara ye ti ngangu na mbi gï senge senge; mû maboko na mbi!+
87 A ngbâ kete ala zi mbi na ndö ti sese;me yanga so mo mû na ndö ti aye nde nde, mbi zia lege ni pëpe.
88 Bata mbi na fini ndali ti tâ ndoye ti mo,si mbi ngbâ ti sara ye alingbi na awango so mo mû.
ל [Lamed]
89 Jéhovah, teti lakue lakuetënë ti mo ayeke ngbâ na yayu.+
90 Mo yeke be-ta-zo na yâ ti angoi nde nde kue.+
Mo sara si gere ti sese aluti nzoni si angbâ lakue lakue.+
91 Grâce na angbanga so mo fâ, aye so* angbâ juska laso,ndali ti so ala kue ayeke awakua ti mo.
92 Tongana fade mbi ye ndia ti mo mingi pëpe,ka mbi kui na yâ ti pasi ti mbi awe.+
93 Yanga so mo mû na ndö ti aye nde nde, mbi yeke girisa ni lâ oko pëpe,ndali ti so, grâce na ni la mo bata mbi na fini.+
94 Mbi yeke ti mo; sö mbi,+ndali ti so mbi gi ti hinga yanga so mo mû na ndö ti aye nde nde.+
95 Azo ti sioni aku ti fâ mbi,me mbi bi bê ti mbi mingi na awango ti mo.
96 Aye kue so ayeke mbilimbili-kue ayeke na limite ni,me acommandement ti mo ayeke na limite pëpe.*
מ [Mem]
97 Mbi ye ndia ti mo mingi!+
Mbi gbu li ti mbi dä* na yâ ti lango ni kue.+
98 Acommandement ti mo asara si mbi yeke na ndara ahon awato ti mbi,+ndali ti so a yeke na terê ti mbi lakue lakue.
99 Mbi hinga ti bâ yâ ti aye nzoni ahon azo kue so ayeke fa ye na mbi,+ndali ti so mbi gbu li* na ndö ti awango ti mo.
100 Sarango ye ti mbi afa so mbi hinga ndo ahon ambakoro-koli,ndali ti so mbi sara ye alingbi na yanga so mo mû na ndö ti aye nde nde.
101 Mbi ke ti tambela na ndö ti sioni lege kue,+si mbi bata tënë ti mo.
102 Mbi gue nde pëpe na angbanga so mo fâ,ndali ti so mo fa ye na mbi.
103 Atënë ti mo anzere na yanga ti mbi mingi,+a nzere na yanga ti mbi ahon mafuta ti otoro.
104 Grâce na yanga so mo mû na ndö ti aye nde nde, mbi sara ye tongana zo so ahinga ndo.+
Ndani la mbi ke sioni lege kue.+
נ [Noun]
105 Tënë ti mo ayeke lampe ndali ti gere ti mbina ayeke lumière ndali ti lege ti mbi.+
106 Mbi deba yanga ti mbi, na mbi yeke sara ye alingbi na ni.Mbi tene: mbi yeke sara ye alingbi na angbanga so mo fâ so ayeke mbilimbili.
107 Mbi bâ pasi mingi.+
Jéhovah, bata mbi na fini alingbi na tënë ti mo.+
108 Pardon, Jéhovah, zia si asandaga so mbi mû na bê ti mbi wani ti sepela mo*+ anzere na mo,nga fa ye na mbi na ndö ti angbanga so mo fâ.+
109 Fini ti mbi ayeke lakue na yâ ti kpale,*me mbi girisa ndia ti mo pëpe.+
110 Azo ti sioni azia kûkû ti gbu mbi,me yanga so mo mû na ndö ti aye nde nde, mbi gue yongoro na ni pëpe.+
111 Mbi mû awango ti mo tongana ye ti mbi biani biani awe,*ndali ti so a zia ngia na bê ti mbi.+
112 Mbi mû desizion ti bata andia ti mo so afa lege na zolakue lakue, juska fini ti mbi ahunzi.
ס [Samek]
113 Mbi ke azo so bê ti ala ayeke use use,*+me mbi ye ndia ti mo mingi.+
114 Mo yeke ndo so mbi bata terê ti mbi dä nga vala ti mbi,+ndali ti so tënë ti mo ayeke beku ti mbi.*+
115 Ala asioni zo,+ ala ngbâ yongoro kâ,si mbi sara ye alingbi na acommandement ti Nzapa ti mbi.
116 Mû maboko na mbi tongana ti so mo mû zendo ni,*+si mbi ngbâ na fini;
zia si peko ti beku ti mbi angbâ senge senge pëpe.*+
117 Mû maboko na mbi, si mbi sö kuâ,+na pekoni mbi yeke zia li ti mbi lakue gï na ndö ti andia ti mo so afa lege na zo.+
118 Mo ke azo kue so ague yongoro na andia ti mo so afa lege na zo,+ndali ti so ala sara ye na handa nga ala yeke azo ti mvene.
119 Mo zi azo ti sioni kue ti sese na terê ti mo, mo bâ mo tene ala yeke saleté ti awen so a tö ni.+
Ndani la mbi ye awango ti mo mingi.
120 Mbeto ti mo asara si terê* ti mbi adö;mbi sara mbeto ti angbanga so mo fâ.
ע [Aïn]
121 Mbi sara ye so ayeke na lege ni nga mbilimbili.
Zia mbi pëpe na yâ ti maboko ti azo so ayeke sara pasi na mbi.
122 Sara si mbi hinga so mo yeke bâ lege ti nzoni duti ti mbi wakua ti mo;zia si azo ti fandara asara pasi na mbi pëpe.
123 Lê ti mbi afatigué na ngoi so mbi yeke ku salut ti mo+nga na zendo* ti mo so ayeke mbilimbili.+
124 Fa tâ ndoye ti mo na mbage ti mbi wakua ti mo,+nga fa na mbi andia ti mo so afa lege na zo.+
125 Mbi yeke wakua ti mo; mû na mbi hingango ndo,+tongaso si mbi hinga awango ti mo.
126 Jéhovah, ngoi ti tene mo sara mbeni ye alingbi awe,+ndali ti so azo adoro ndia ti mo.
127 Ndani la mbi ye acommandement ti mo mingiahon lor, même ahon lor ti nzoni ni.+
128 Ni la mbi bâ so ye kue so mo fa* ayeke na lege ni;+mbi ke sioni lege kue.+
פ [Pé]
129 Awango ti mo ayeke tâ nzoni mingi,
ndani la mbi sara ye* alingbi na ni.
130 Tongana a zi nda ti tënë ti mo, a ga na lumière+nga a sara si zo so ahinga ndo mingi pëpe ahinga ndo.+
131 Mbi zi yanga ti mbi kota nga mbi dema,*ndali ti so nzara ti acommandement ti mo ahon ndö ti mbi.+
132 Tourné lê ti mo na mbage ti mbi nga sara nzoni bê na mbi,+alingbi na ngbanga so mo fâ ndali ti azo so aye iri ti mo.+
133 Fa lege nzoni na gere ti mbi* na lege ti tënë ti mo;zia si mbeni ye ti sioni akomande mbi pëpe.+
134 Zi mbi na maboko ti azo so ayeke sara pasi na mbi,na mbi yeke sara ye ague oko na yanga so mo mû na ndö ti aye nde nde.
135 Zia si lumière ti lê ti mo aza na ndö ti mbi wakua ti mo,+nga fa na mbi andia ti mo so afa lege na zo.
136 Ngu ti lê ti mbi asua tongana ngundali ti so azo abata ndia ti mo pëpe.+
צ [Tsadé]
137 Jéhovah, mo yeke mbilimbili+nga angbanga so mo fâ ayeke na lege ni.+
138 Awango ti mo ayeke mbilimbilinga zo alingbi ti zia bê ti lo kue na ndö ni.
139 Nzara ti mo agbi mbi gbingo tongana wâ,+ndali ti so awato ti mbi agirisa na ndö ti tënë ti mo.
140 Tënë ti mo ayeke nzoni kue, ye ti sioni oko ayeke dä pëpe,+na mbi wakua ti mo mbi ye ni mingi.+
141 Mbi yeke ye oko pëpe nga azo ake mbi ngangu;+ye oko, mbi girisa pëpe yanga so mo mû na ndö ti aye nde nde.
142 Mbilimbili ti mo ayeke ngbâ lakue lakue,+nga ndia ti mo ayeke tâ tënë.+
143 Atâa so mbi wara ye ti vundu nga na ngangu kpale,mbi ngbâ ti ye acommandement ti mo mingi.
144 Awango ti mo ayeke ngbâ mbilimbili lakue lakue.
Sara si mbi hinga ndo,+ tongaso si mbi ngbâ na fini.
ק [Qoph]
145 Mbi iri ndo na mo na bê ti mbi kue. Jéhovah, kiri tënë na mbi.
Mbi yeke bata andia ti mo so afa lege na zo.
146 Mbi iri ndo na mo; sö mbi!
Mbi yeke sara ye alingbi na awango ti mo.
147 Kozo si ndo ahan,* mbi zingo ti toto na mo ti mû maboko na mbi,+ndali ti so tënë ti mo ayeke beku ti mbi.*
148 Na bê ti bï,* mbi zi lê ti mbi awe,si mbi gbu li* na ndö ti tënë ti mo.+
149 Mä go ti mbi ndali ti tâ ndoye ti mo.+
Jéhovah, bata mbi na fini alingbi na fango ngbanga ti mo ti mbilimbili.
150 Azo so ayeke sara aye ti kamene* apusu nduru na mbi;ala gue yongoro na ndia ti mo awe.
151 Jéhovah, mo yeke nduru na mbi,+nga acommandement ti mo kue ayeke tâ tënë.+
152 A ninga mingi awe si mbi manda ye na ndö ti awango ti moso mo sigi na ni ti tene angbâ lakue lakue.+
ר [Resh]
153 Bâ pasi so mbi yeke na yâ ni, nga zi mbi,+ndali ti so mbi girisa na ndö ti ndia ti mo pëpe.
154 Gbu koko ti mbi nga zi mbi;+bata mbi na fini alingbi na zendo* ti mo.
155 Salut ayeke yongoro mingi na azo ti sioni,ndali ti so ala gi pëpe ti hinga andia ti mo so afa lege na zo.+
156 Jéhovah, nzoni bê ti mo ayeke kota.+Bata mbi na fini alingbi na fango ngbanga ti mo ti mbilimbili.
157 Azo so ayeke sara ye ti ngangu na mbi nga na awato ti mbi ayeke gbani;+me mbi gue nde na awango ti mo pëpe.
158 Azo so ayeke sara ye na handa, mbi ke ala bê oko,ndali ti so ala bata tënë ti mo pëpe.+
159 Bâ tongana nyen mbi ye mingi yanga so mo mû na ndö ti aye nde nde!Jéhovah, bata mbi na fini ndali ti tâ ndoye ti mo.+
160 Gunda ti tënë ti mo ayeke tâ tënë;+angbanga kue ti mbilimbili so mo fâ ayeke ngbâ lakue lakue.
ש [Sin] wala [Shin]
161 Amokonzi asara ye ti ngangu na mbi+ senge senge,me tënë ti mo apika bê ti mbi mingi.+
162 Bê ti mbi ayeke na ngia ndali ti tënë ti mo+tongana ti zo so agbu gbâ ti aye na ngoi ti bira.
163 Mbi ke mvene; mbi ke ni bê oko.+Mbi ye ndia ti mo mingi.+
164 Mbi sepela mo fani mbasambala na yâ ti lango okondali ti so angbanga so mo fâ ayeke mbilimbili.
165 Azo so aye ndia ti mo, siriri ti ala ayeke mingi;+mbeni ye ti sara si ala pika gere ti ala ayeke dä pëpe.*
166 Jéhovah, mbi zia bê ti mbi ti ku aye so mo yeke sara ti sö zo,nga mbi bata acommandement ti mo.
167 Mbi bata* awango ti mo,nga mbi ye ni na bê ti mbi kue.+
168 Mbi sara ye alingbi na yanga so mo mû na ndö ti aye nde nde nga na awango ti mo,ndali ti so mo hinga aye kue so mbi sara.+
ת [Taw]
169 Jéhovah, zia si toto so mbi toto na mo ti mû maboko na mbi atï na mê ti mo.+
Ti lingbi na tënë ti mo, sara si mbi mä yâ ti ye.+
170 Mbi hunda ti tene mo sara nzoni bê na mbi; zia si a si na gbele mo.
Sö mbi, tongana ti so mo mû zendo ni.*
171 Zia si tënë ti sepela asua gbani gbani na yanga ti mbi+ndali ti so mo fa na mbi andia ti mo so afa lege na zo.
172 Zia si tënë ti mo aduti bia na yanga ti mbi,+ndali ti so acommandement ti mo kue ayeke mbilimbili.
173 Zia si tïtî mo aduti nduru ti mû maboko na mbi,+ndali ti so mbi soro ti sara ye alingbi na yanga so mo mû na ndö ti aye nde nde.+
174 Jéhovah, mbi yeke ku salut ti mo kungo,nga mbi ye ndia ti mo mingi.+
175 Zia si mbi ngbâ* na fini, si mbi sepela mo;+zia si angbanga so mo fâ amû maboko na mbi.
176 Mbi fono kirikiri tongana taba so agirisa.+ Gi peko ti mbi wakua ti mo,ndali ti so mbi girisa na ndö ti acommandement ti mo pëpe.+
Akete tënë na terê ni
^ Wala “so ayeke sara ye lakue mbilimbili.”
^ Na Hébreu: “Tongana alege ti mbi aluti nzoni.”
^ Wala “manda ye.”
^ Wala “âme ti mbi.”
^ Na Hébreu: “Roulé yongoro na terê ti mbi.”
^ Wala “manda ye.”
^ Wala “Âme ti mbi alango.”
^ Wala “manda ye.”
^ Wala “Âme ti mbi alango.”
^ Wala “a bi kamene na lê ti mbi.”
^ Na Hébreu: “mû loro na peko ti.”
^ A lingbi nga ti tene “mo sara si bê ti mbi ayeke na confiance.”
^ Wala “Sara si mbi tambela na ndö ti.”
^ Wala “Sara ye tongana ti so mo tene.”
^ A lingbi nga ti tene “so mo mû ni na azo so akpe mbeto ti mo.”
^ Wala “tongana ti so mo tene.”
^ Wala “mbi ku.”
^ Wala “ndo so akono.”
^ Wala “manda ye.”
^ Wala “zendo so mo mû.”
^ Wala “so mo sara si mbi ku ni.”
^ Wala “na yâ ti da so mbi lango dä tongana wande.”
^ Wala “Mbi gi ti dë bê ti mo.”
^ Wala “tongana ti so mo tene.”
^ Wala “mbi yeke sara lani siokpari me na mbana pëpe.”
^ Na Hébreu: “Bê ti ala ane, tongana mafuta ti nyama.”
^ Wala “mbi ku tënë ti mo.”
^ Wala “tënë so mo tene.”
^ A lingbi nga ti tene “na lege ti amvene.”
^ Wala “manda ye.”
^ Wala “Âme ti mbi awoko kue na kungo salut ti mo.”
^ Wala “mbi ku tënë ti mo.”
^ So ti tene aye kue so lo créé.
^ Na Hébreu: “andu aye mingi.”
^ Wala “manda ni.”
^ Wala “manda ye.”
^ Na Hébreu: “asandaga ti yanga ti mbi so mbi mû na bê ti mbi wani.”
^ Wala “Âme ti mbi ayeke na yâ ti maboko ti mbi lakue.”
^ Wala “héritage ti mbi ti lakue lakue.”
^ Wala “azo so yâ ti bê ti ala akangbi.”
^ Wala “mbi ku tënë ti mo.”
^ Wala “alingbi na tënë ti mo.”
^ Wala “zia si a bi kamene na lê ti mbi pëpe.”
^ Na Hébreu: “mitele.”
^ Wala “tënë.”
^ Wala “yanga kue so mo mû.”
^ Wala “âme ti mbi asara ye.”
^ Na Hébreu: “mbi wu ngangu ngangu.”
^ Wala “Sara si gere ti mbi so mbi bi aluti nzoni.”
^ Wala “na ndapre kozoni si lâ asigi.”
^ Wala “mbi ku tënë ti mo.”
^ Wala “Kozo na al’heure nde nde ti sinziri.”
^ Wala “manda ye.”
^ Wala “sara aye so ayeke sioni mingi.”
^ Wala “tënë.”
^ Wala “ti ala, mbeni ye ti pika gere dä ayeke dä pëpe.”
^ Wala “Âme ti mbi abata.”
^ Wala “alingbi na tënë ti mo.”
^ Wala “âme ti mbi angbâ.”
