Exode 20:1-26
20 Na pekoni, Nzapa asara atënë so kue, lo tene:+
2 “Mbi yeke Jéhovah Nzapa ti mo, lo so asigi na mo na kodro ti Égypte, ndo so a sara mo na ngbâa dä.+
3 A lingbi mo voro ambeni nzapa nde pëpe, gï mbi oko awe.*+
4 “A lingbi mo leke ndali ti mo wani pëpe mbeni statue so a leke ni na kode, wala mbeni ye so akpa mbeni ye so ayeke na yayu wala na ndö ti sese wala na yâ ti angu na gbe ti sese.+
5 Mo kuku na gbe ti ala pëpe wala zia mbeni ye ahanda mo ti voro ala pëpe,+ ndali ti so mbi Jéhovah Nzapa ti mo, mbi yeke Nzapa so mbi hunda ti tene zo avoro gï mbi oko awe.+ Ti azo so ake mbi, mbi yeke punir amolenge ti ala, atarä ti ala nga na amolenge ti atarä ti ala ndali ti faute ti ala ababâ ni,
6 me ti azo so aye mbi na abata acommandement ti mbi, mbi yeke fa tâ ndoye na mbage ti ahale ti ala juska na molongo saki oko ni.+
7 “A lingbi mo di iri ti Jéhovah Nzapa ti mo senge senge pëpe,+ zo so adi iri ni so senge senge, Jéhovah ayeke zia lo senge pëpe, lo yeke punir lo.+
8 “Mo bata lango ti Sabbat so ayeke nzoni-kue.+
9 Mo sara angangu kua ti mo na asenge kua ti mo kue na yâ ti lango omene,+
10 me lango mbasambala ni ayeke sabbat na lê ti Jéhovah Nzapa ti mo. Mo sara mbeni kua pëpe, atâa a yeke mo wala molenge ti mo ti koli wala ti wali, wala ngbâa ti mo ti koli wala ti wali, wala nyama ti mo, wala wande so ayeke sara kodro na kodro* ti mo.+
11 Ngbanga ti so na yâ ti alango omene Jéhovah asara yayu na sese, ngu-ingo na aye kue so ayeke na yâ ni, na lo to nda ti wu terê ti lo na lango mbasambala ni.+ Ndani la Jéhovah asara tufa na ndö ti lango ti Sabbat na lo sara si lango ni ayeke nzoni-kue.
12 “Mo ne babâ na mama ti mo,+ tongaso si mo ngbâ na fini aninga na ndö ti sese so Jéhovah Nzapa ti mo ayeke mû na mo so.+
13 “Mo fâ zo pëpe.+
14 “Mo gi wali wala koli nde pëpe.+
15 “Mo nzi ye pëpe.+
16 “Tongana a iri mo ti duti témoin, mo tene mvene na ndö ti mba ti mo pëpe.+
17 “Mo sara nzara ti da ti mba ti mo pëpe. Mo sara nzara ti wali ti mba ti mo pëpe,+ wala ngbâa ti lo ti koli, wala ngbâa ti lo ti wali, wala bagara ti lo wala kororo ti lo wala mbeni ye ti mba ti mo.”+
18 Azo ni kue ayeke mä sungbango ti abekpa nga na totongo ti didi ni, ala yeke bâ wâ ti bekpa ni nga hoto ni so guru ayeke sigi dä, ni la terê ti ala adö na ala luti ayo.+
19 Tongaso ala tene na Moïse: “Mo sara tënë na e, e yeke mä mo; me zia Nzapa la asara tënë na e pëpe ndali ti e kui.”+
20 Moïse atene na azo ni: “Ala sara mbeto pëpe, ngbanga ti so tâ Nzapa aga ti tara bê ti ala+ si ala kpe mbeto ti lo lakue, tongaso si ala sara siokpari pëpe.”+
21 Azo ni angbâ ti luti ayo, me Moïse ague na terê ti gbâ ti vuko mbinda ni so tâ Nzapa ayeke na yâ ni so.+
22 Jéhovah atene na Moïse: “Tene na azo ti Israël, mo tene: ‘Ala wani abâ na lê ti ala awe so mbi ngbâ na yayu kâ la mbi sara tënë na ala so.+
23 Ala leke anzapa ti argent wala ti lor pëpe, ngbanga ti so a lingbi ala voro mbeni nzapa nde pëpe, gï mbi oko awe.+
24 A lingbi mo sara gbalaka ti sese ndali ti mbi, na mo yâa na ndö ni asandaga so a zö ni agbi kue, asandaga ti beoko,* ataba nga na abagara. Na ndo kue so mbi yeke sara si azo adabe ti ala na iri ti mbi dä,+ mbi yeke ga ande na mbage ti mo, mbi yeke sara tufa na ndö ti mo.
25 Tongana mo sara gbalaka ti tênë na mbi, mo sara ni pëpe na atênë so a dë terê ni na agbakuru ti dengo na tênë.*+ Tongana mo dë terê ni na burin, mo yeke sara si gbalaka ni aga sioni.
26 A lingbi mo monté escalier si mo gue na terê ti gbalaka ti mbi pëpe, ngbanga ti a bâ terê ti mo ti koli.’
Akete tënë na terê ni
^ Wala “mo mû ambeni nzapa nde ti gi na yanga ti mbi pëpe.” Na Hébreu: “contre lê ti mbi.”
^ Na Hébreu: “na ayanga ti gbagba.”
^ Wala “asandaga ti siriri.”
^ Wala “atênë so a leke terê ni.”
