Apocalypse 15:1-8
15 Mbi bâ mbeni fä ni nde na yayu, mbeni kpengba fä so adö bê ti zo: a-ange mbasambala+ so ayeke na asioni ye mbasambala. So ayeke tanga ti aye ni la, ngbanga ti so a yeke na lege ti aye so la si ngonzo ti Nzapa ayeke hunzi.+
2 Na mbi bâ mbeni ye so akpa ngu-ingo so lê ni ayeke tongana tatara+ so a bungbi ni na wâ. Mbi bâ nga ala so asö benda+ na ndö ti nyama ti ngonda ni na statue ti lo+ nga na ndö ti numéro ti iri ti lo,+ ala yeke luti na terê ti ngu-ingo so lê ni ayeke tongana tatara so, ala yeke na aharpe ti Nzapa na maboko ti ala.
3 Ala yeke he bia ti Moïse,+ ngbâa ti Nzapa, nga na bia ti Molenge ti taba ni,+ ala tene:
“Jéhovah* Nzapa, Mo so ngangu ti mo ahon angangu kue,+ akusala ti mo ayeke kota mingi nga ayeke ye ti dongo bê.+ Gbia ti lakue lakue,+ alege ti mo ayeke mbilimbili nga ayeke atâ lege biani.+
4 Jéhovah,* so gï mo oko si ayeke be-ta-zo+ so, zo wa la biani si ayeke kpe mbeto ti mo ape? Zo wa la biani si ayeke mû gloire na mo ape? Biani, amara kue ayeke ga ande na gbele mo si ala voro mo,+ ndali ti so ambela ti mo so ayeke mbilimbili so asigi polele awe.”
5 Na peko ti ye so, mbi bâ ndo na mbi bâ yanga ti akubu ti tente so aduti tongana témoin+ azi na yayu kâ,+
6 na a-ange mbasambala so agbu asioni ye mbasambala+ alondo na yâ ti akubu ti tente ni asigi, ala yü bongo ti lin so avuru nga aza zango, na ala kanga a-écharpe ti lor na kate ti ala.
7 Mbeni oko ti acréature osio so ayeke na fini amû na a-ange mbasambala ni adû ti sembe mbasambala so a sara ni na lor, so ngonzo ti Nzapa asi yâ ni,+ Nzapa so ayeke na fini lakue lakue nga kpu na kpu.
8 Na guru asi yâ ti akubu ti tente ni ngbanga ti gloire ti Nzapa+ nga ngbanga ti ngangu ti lo, na mbeni zo alingbi ti lï na yâ ti akubu ti tente ni pëpe juska asioni ye mbasambala+ so a-ange mbasambala so ayeke na ni ahunzi awe si.
