Josué 7:1-26
7 Me azo ti Israël asara ye ague nde mingi na yanga so a mû na ala na ndö ti tënë ti aye so a deba ni awe. Acan,+ molenge ti Carmi, molenge ti Zabdi, molenge ti Zérah, zo ti mara ti Juda, amû ambeni ye so a mû yanga lani ti tene a futi ni.+ Tongaso, ngonzo ti Jéhovah alondo na terê ti azo ti Israël.+
2 Na ngoi so ala yeke na Jéricho, Josué atokua azo na kodro ti Aï,+ so ayeke nduru na Beth-Aven, na mbage ti est ti Béthel,+ lo tene na ala: “Ala gue ala bembe ndo na yâ ti kodro ti Aï.” Tongaso, akoli so alondo ala gue ala bembe ndo na yâ ti kodro ni.
3 Tongana ala kiri, ala tene na Josué: “A yeke nzoni aturugu ni kue la ague kâ pëpe. Gï azo saki use wala saki ota alingbi ti futi kodro ti Aï. Tokua aturugu ni kue senge senge pëpe, ngbanga ti so azo ti kodro ni ayeke mingi pëpe.”
4 Akoli 3 000 tongaso la amonté na Aï, me ala kpe na gbele azo ti Aï.+
5 Azo ti Aï afâ akoli 36 nga ala tomba ala, a londo na yanga ti gbagba ti gbata ni juska a si na Shébarim. Azo ti Aï angbâ ti fâ ala na ndö ti lege so alondo na yâ ti ahoto si adescend. Ye so asara si bê ti azo ti Israël afun kue.*
6 Josué asuru bongo ti lo na lo kpo li ti lo na sese na devant ti Sanduku ti Jéhovah juska na lakui, lo na a-ancien ti Israël. Ala fû sese ala yeke tuku na li ti ala.
7 Josué atene: “Aï! Jéhovah, Seigneur ti dunia kue, mo mû azo so kue ala fâ Ngu ti Jourdain ngbanga ti nyen? Ti tene mo zia e na maboko ti azo ti mara ti Amori ti fâ e? Tongana e ngbâ fade kâ na mbage* ti Ngu ti Jourdain, ka a yeke duti nzoni.
8 Jéhovah mo pardonné mbi, tënë ti nyen la mbi lingbi ti tene fadeso, so azo ti Israël akpe na devant* ti awato ti ala awe so?
9 Tongana azo ti Canaan nga na azo ti ndo ni kue amä tënë ni, ala kue ayeke ngoro e ti fâ e si azo amä tënë ti e encore ape na ndö ti sese. Tongana ye tongaso asi, mo yeke sara ande nyen na iri ti mo so ayeke kota mingi so?”+
10 Jéhovah atene na Josué, atene: “Londo! Mo kpo li ti mo na sese ngbanga ti nyen?
11 Azo ti Israël asara siokpari. Ala sara ye ague nde na mbele+ so mbi hunda na ala ti sara ye alingbi na ni. Ala mû ambeni ye na popo ti aye so mbi mû yanga ti tene a futi ni,+ ala nzi ni+ na ala honde ni na popo ti akungba ti ala.+
12 Ndani la azo ti Israël alingbi ande ti luti na gbele awato ti ala pëpe. Ala yeke kpe na devant ti awato ti ala ndali ti so ala ga mbeni ye so mbi deba ni awe. Tongana ala zi ye so mbi deba ni awe so na popo ti ala pëpe, mbi yeke duti na ala encore ape.+
13 Londo, mo sara si azo ni azi sioni ye na terê ti ala.+ Tene na ala mo tene: ‘Kekereke ala zi sioni ye na terê ti ala, ngbanga ti so Jéhovah Nzapa ti Israël atene: “Mbeni ye so a deba ni awe ayeke na popo ti azo ti Israël. Ala lingbi ti gbu lê ni na gbele awato ti ala pëpe juska ala zi ye ni so awe si.
14 Kekereke na ndapre amara ti Israël kue ayeke sigi ti ga na gbele Nzapa, mara na mara; mara so Jéhovah ayeke fa ni na popo ti ala,+ azo ni ayeke sigi fami na fami. Na fami so Nzapa ayeke fa ni na popo ti ala, azo so alango na yâ ti da oko la ayeke sigi. Azo so alango da oko so Jéhovah ayeke fa ni, akoli ni ayeke sigi oko na oko.
15 Zo so a yeke wara na tïtî lo ye so a mû yanga ti tene a futi ni so, a yeke fâ lo na a gbi lo+ na aye ti lo kue, ndali ti so lo sara ye pëpe alingbi na mbele+ ti Jéhovah nga lo sara ye ti kamene na Israël.”’”
16 Tongaso, ndade na ndapre ni Josué alondo hio lo mû yanga si azo ti Israël asigi aga na gbele Nzapa mara na mara, na a fa mara ti Juda.
17 Lo mû yanga si afami ti yâ ti mara ti Juda asigi, na a gbu afami ti Zérah.+ Na pekoni, lo mû yanga si afami ti Zérah asigi, koli oko na oko, na a gbu Zabdi.
18 Na nda ni, lo mû yanga si akoli so alango ndo oko na Zabdi asigi oko na oko, na a gbu Acan, molenge ti Carmi, molenge ti Zabdi, molenge ti Zérah, zo ti mara ti Juda.+
19 Josué atene na Acan: “Molenge ti mbi, mbi gbu gere ti mo, mû gonda na Jéhovah Nzapa ti Israël na fa na lo sioni so mo sara. Fa na mbi ye so mo sara. Honde tënë ni na mbi pëpe.”
20 Acan angbâ atene na Josué: “Ti tâ tënë ni, mbi la mbi sara siokpari na terê ti Jéhovah Nzapa ti Israël, na ye so mbi sara ayeke so:
21 Tongana mbi bâ lani mbeni pendere bongo ti kodro ti Shinéar+ nga na sicle ti argent* 200, na popo ti aye so e gbu na peko ti bira mbeni ngbongboro lor so nengo ni ayeke sicle 50, mbi sara nzara ni na mbi mû ni. Bâ, mbi honde ni na gbe ti sese na yâ ti tente ti mbi, sicle ti argent* ni ayeke na gbe ti bongo ni.”
22 Hio, Josué atokua ambeni zo, ala mû loro ague na yâ ti tente ni, na ala bâ so lo honde bongo ni na yâ ti tente ti lo na sicle ti argent* ni ayeke na gbe ti bongo ni.
23 Ala mû ni ala ga na ni na Josué na azo ti Israël kue, ala zia ni na gbele Jéhovah.
24 Josué na azo ti Israël kue na terê ti lo, ala mû Acan+ molenge ti Zérah, argent ni, pendere bongo ni nga na ngbongboro lor ni.+ Ala mû nga amolenge ti lo ti koli, amolenge ti lo ti wali, abagara ti lo, akororo ti lo, ataba ti lo, tente ti lo na aye ti lo kue ala gue na ala na Popo-hoto* ti Akor.+
25 Josué atene: “Mo ga na ye ti sioni na ndö ti e ngbanga ti nyen?+ Jéhovah ayeke ga na ye ti sioni na ndö ti mo laso nga.” Azo ti Israël kue abo Acan na tênë+ si lo kui, na pekoni ala gbi kuâ ti lo.+ A yeke tongaso si a bo ala kue na tênë si ala kui.
26 Na pekoni, ala dö gbâ ti tênë na ndö ti lo, atênë ni angbâ juska laso. Ye so asara si ngonzo ti Jéhovah adë.+ Ndani la a di iri ti ndo ni so Popo-hoto ti Akor juska laso.
Akete tënë na terê ni
^ Na Hébreu: “bê ti azo ti Israël awoko aga tongana ngu.”
^ So ti tene na mbage ti est.
^ Wala “atourné peko ti ala na devant.”
^ Na Hébreu: “nginza.”
^ Na Hébreu: “nginza.”
^ Wala “Kpangbala ndo.”
