Genèse 48:1-22
48 Na peko ti aye so, a tene na Joseph, a tene: “Ngangu ti babâ ti mo ayeke kiri gï kiringo na peko.” Tongaso, lo mû amolenge ti lo use, Manassé na Éphraïm, lo gue na ndo ti Jacob.+
2 A tene na Jacob, a tene: “Molenge ti mo Joseph aga na ndo ti mo.” Tongaso, Israël asara ngangu, lo londo lo duti na nduzu na ndö ti gbogbo ti lo.
3 Jacob atene na Joseph:
“Nzapa so ngangu ti lo ahon angangu kue asi lani na mbi na Luz na sese ti Canaan, na lo sara tufa na ndö ti mbi.+
4 Lo tene na mbi: ‘Mbi yeke sara si mo dü gbani, na mbi yeke sara si mo ga gbani; mbi yeke sara si mo ga amara so abungbi aga congrégation+ nga mbi yeke mû sese so na ahale* ti mo na peko ti mo ti ga ye ti ala biani biani.’+
5 Fadeso amolenge ti koli use so a dü ala na mo na kodro ti Égypte kozo si mbi ga na ndo ti mo ge na Égypte, ala yeke amolenge ti mbi.+ Éphraïm na Manassé ayeke ga amolenge ti mbi, legeoko tongana ti so Ruben na Siméon ayeke amolenge ti mbi.+
6 Me amolenge so mo yeke dü ande na peko ti ala la ayeke ti mo. A yeke iri ala ande na iri ti aita ti ala na yâ ti héritage ti ala.+
7 Âdu ti mbi, tongana mbi londo na Paddan mbi yeke ga, Rachel akui+ na terê ti mbi na sese ti Canaan na ngoi so lege ti singo na Éphrath angbâ ti yo.+ Tongaso, mbi lu lo kâ na lege ti guengo na Éphrath, wala Bethléhem.”+
8 Israël abâ amolenge ti Joseph, na lo hunda ndo, lo tene: “Azo wa la?”
9 Joseph atene na babâ ti lo: “Amolenge ti mbi so Nzapa amû na mbi na ndo so la.”+ Tongaso, lo tene: “Pardon, ga na ala na mbi si mbi iri tufa na ndö ti ala.”+
10 Lê ti Israël ayeke vuko vukongo ndali ti so lo ga mbakoro awe na lo yeke bâ ndo nzoni pëpe. Tongaso, Joseph aga na ala nduru na lo, na lo su ngbangba ti ala nga lo gbu ala na kate ti lo.
11 Israël atene na Joseph: “Mbi pensé lâ oko pëpe so mbi yeke bâ lê ti mo,+ me Nzapa amû lege na mbi ti bâ nga ahale* ti mo.”
12 Na pekoni, Joseph azi ala na terê ti genou ti Israël, na lo kuku lo kpo li ti lo na sese.
13 Fadeso Joseph amû amolenge use so, lo ga na ala nduru na Israël; Éphraïm+ ayeke na maboko ti lo ti koli si lo duti na mbage ti maboko ti Israël ti wali, na Manassé+ ayeke na maboko ti lo ti wali si lo duti na mbage ti maboko ti Israël ti koli.
14 Ye oko, Israël ayôro maboko ti lo ti koli, lo zia ni na li ti Éphraïm, atâa so lo yeke ngambe, na lo zia maboko ti lo ti wali na li ti Manassé. Lo wani la lo ye ti zia maboko ti lo ni tongaso, atâa so Manassé la ayeke kozo molenge.+
15 Lo iri tufa na ndö ti Joseph nga lo tene:+
“Tâ Nzapa so ababâ ti mbi, Abraham na Isaac, atambela na gbele lo,+tâ Nzapa so afa lege na mbi na yâ ti gigi ti mbi kue juska laso,+
16 ange so azi mbi na yâ ti aye ti vundu kue,+ mo iri tufa na ndö ti amolenge-koli ni.+
Zia a di iri ti mbi na ndö ti ala nga na iri ti ababâ ti mbi, Abraham na Isaac;zia ala wu ala ga gbani gbani na ndö ti sese.”+
17 Tongana Joseph abâ so maboko ti babâ ti lo ti koli angbâ na li ti Éphraïm, a nzere na lo pëpe; tongaso lo tara ti gbu maboko ti babâ ti lo ti zi ni na li ti Éphraïm ti zia ni na li ti Manassé.
18 Joseph atene na babâ ti lo: “Tongaso pëpe, babâ ti mbi, ndali ti so lo so la lo yeke kozo molenge.+ Zia maboko ti mo ti koli na li ti lo.”
19 Me babâ ti lo ake, lo tene: “Mbi hinga, molenge ti mbi, mbi hinga. Lo nga lo yeke ga ande mbeni mara na lo yeke ga kota nga. Me ngambe ti lo la ayeke ga ande kota ahon lo,+ na ahale* ti lo ayeke wu alingbi na wungo ti amara.”+
20 Lo ngbâ ti iri tufa na ndö ti ala na lango ni so,+ lo tene:
“Zia azo ti Israël asara tënë ti mo tongana ala iri tufa na ndö ti mba na lege ti atënë so:
‘Zia Nzapa asara si mo ga tongana Éphraïm nga tongana Manassé.’”
Tongaso, lo ngbâ ti zia Éphraïm kozo ti Manassé.
21 Na pekoni, Israël atene na Joseph: “Mbi yeke kui ti mbi kuingo,+ me Nzapa ayeke ngbâ na ala nga lo yeke kiri ande na ala na sese ti akotara ti ala.+
22 Âdu ti mbi, mbi mû na mo mbeni sese ahon ti aita ti mo, sese so mbi mû na maboko ti azo ti mara ti Amori na lege ti épée ti mbi nga na kokora ti mbi.”
