2 Samuel 8:1-18
8 Mbeni ngoi na pekoni, David asö benda na ndö ti aPhilistin,+ na lo mû na maboko ti ala gbata ti Métheg-Ammah.
2 Lo sö benda na ndö ti azo ti Moab+ na lo sara si ala lango na sese. Lo mû kamba, lo mû mesure ti ala na ni. Tongana lo diko kamba use, a yeke fâ azo ni. Tongana lo diko kamba oko, azo ni ayeke ngbâ na fini.+ Azo ti Moab aga azo ti kua ti David, nga ala futa na lo impôt so ala doit ti futa.+
3 Na ngoi so Hadadézer, gbia ti Zobah,+ molenge ti Réhob, ayeke gue ti kiri ti komande na ndö ti ando so ayeke na terê ti Ngu ti Euphrate,+ David asö benda na ndö ti lo.
4 David agbu aturugu ti kpengo na mbarata 1 700 nga na ala so ayeke tambela na gere 20 000. Na pekoni, David afâ kamba ti gere ti ambarata kue so ayeke kpe na puse, me lo bata ambeni 100.+
5 Tongana azo ti kodro ti Syrie aga na gbata ti Damas+ ti mû maboko na Hadadézer, gbia ti Zobah, David afâ aturugu ti Syrie 22 000.+
6 David azia ambeni turugu ti lo na Damas, so ayeke na Syrie. Azo ti Syrie aga azo ti kua ti David, nga ala futa na lo impôt so ala doit ti futa. Jéhovah asara si David asö benda* na ndo kue so lo gue dä.+
7 Na ndö ni, David amû na maboko ti awakua ti Hadadézer avala so ayeke ronde ronde so a sara na lor, na lo ga na ni na Jérusalem.+
8 Gbia David ague na Bétah nga na Bérothaï, agbata ti Hadadézer, lo mû gbâ ti cuivre.
9 Toï, gbia ti Hamath,+ amä so David asö benda na ndö ti aturugu ti Hadadézer kue.+
10 Tongaso, Toï atokua molenge ti lo Joram na Gbia David ti hunda lo wala lo yeke senge nga ti gonda lo, ndali ti so David asara bira na Hadadézer na lo sö benda na ndö ti lo (lakue la Hadadézer ayeke sara bira na Toï). Joram ague na aye so a sara na argent, lor nga na cuivre na David.
11 Gbia David amû aye ni so, lo zia ni nde ndali ti kua ti Jéhovah. Lo sara nga tongaso na argent nga na lor so lo mû lani na maboko ti amara kue so lo sö benda na ndö ti ala.+
12 A yeke azo ti Syrie, ti Moab,+ ti Ammon, aPhilistin+ nga na azo ti Amalec.+ Nga na popo ti aye so lo gbu na maboko ti Hadadézer,+ gbia ti Zobah, molenge ti Réhob, lo zi argent na lor, lo zia ni nde ndali ti kua ti Nzapa.
13 Na ngoi so David akiri na peko ti so lo fâ aturugu ti Édom 18 000 na yâ ti Popo-hoto ti Ingo, lo sara nga si iri ti lo awu mingi.+
14 Lo zia aturugu na Édom. Lo zia aturugu na yâ ti kodro ti Édom kue, na azo ti Édom kue aga azo ti kua ti David.+ Jéhovah asara si David asö benda* na ndo kue so lo gue dä.+
15 David angbâ ti komande na ndö ti Israël kue.+ David afâ ngbanga ti azo ti lo kue+ na lege ti mbilimbili.+
16 Joab,+ molenge ti Zéruïah, ayeke na ndö ti aturugu. Josaphat,+ molenge ti Ahilud, ayeke zo so ayeke bâ lege ti ambeti.
17 Zadoc+ molenge ti Ahitub nga Ahimélec molenge ti Abiathar ayeke aprêtre. Séraïah ayeke wakuasu.
18 Bénaïah,+ molenge ti Jéhoïada, ayeke na ndö ti azo ti mara ti Kérét nga na ti Pélét.+ Amolenge ti David aga akota zo* ti kodro.
Akete tënë na terê ni
^ Wala “Jéhovah asö David.”
^ Wala “Jéhovah asö David.”
^ Na Hébreu: “aga aprêtre.”
