2 Chronique 21:1-20
21 A si na mbeni lâ, Josaphat akui, na lo wu terê ti lo tongana ti akotara ti lo. A lu lo na cimetière ti akotara ti lo so ayeke na Gbata ti David. Molenge ti lo Joram aga gbia na peko ti lo.+
2 Aita ti lo ti koli so ayeke amolenge ti Josaphat ayeke: Azariah, Jéhiel, Zacharie, Azariah, Michel na Shéphatiah; ala so kue ayeke amolenge ti Josaphat gbia ti Israël.
3 Babâ ti ala amû lani na ala gbâ ti amatabisi: argent, lor, aye ti nginza mingi nga na ambeni gbata ti Juda so angangu gbagba ayeke na terê ni;+ me lo mû royaume ni na Joram,+ ngbanga ti so lo yeke kozo molenge.
4 Tongana Joram aga gbia na peko ti babâ ti lo awe, lo sara si komandema ti lo aluti ngangu. Lo fâ aita ti lo ti koli kue+ na épée; lo fâ nga ambeni mokonzi ti Israël.
5 Joram ayeke na ngu 32 na ngoi so lo ga gbia, na lo komande na Jérusalem ngu miombe.+
6 Lo sara ye tongana ti agbia ti Israël,+ tâ gï tongana ti so Achab na azo ti da ti lo asara, ndali ti so lo mû molenge ti Achab ti ga wali ti lo.+ Lo ngbâ ti sara ye so ayeke sioni na lê ti Jéhovah.
7 Me Jéhovah aye pëpe ti futi ahale ti David, ngbanga ti mbele so lo te lani na David,+ ndali ti so lo mû zendo ti tene lakue mbeni lampe aza ndali ti lo nga na amolenge ti lo.+
8 Na ngoi ti komandema ti Joram, azo ti Édom alondo ti ke yanga ti gbia ti Juda,+ na ala soro mbeni gbia ti komande na ndö ti ala.+
9 Tongaso, Joram na amokonzi ti lo amû apuse ti mbarata ti lo kue ala gue. Na bï, lo londo lo sö benda na ndö ti aturugu ti Édom so angoro lo nga na amokonzi ti apuse ti mbarata ni.
10 Me azo ti Édom angbâ ti sara ngangu-li na gbia ti Juda juska laso. Azo ti gbata ti Libnah+ nga kue alondo ti ke yanga ti gbia ti Juda na oko ngoi ni so, ndali ti so lo zia Jéhovah Nzapa ti akotara ti lo.+
11 Lo leke nga ando so ayeke na nduzu+ na ndö ti ahoto ti Juda ti sara si azo ti Jérusalem asara ndumba na lege ti yingo, na lo sara si azo ti Juda ague yongoro.
12 Mbeni lâ, a ga na lo mbeni mbeti so prophète Élie+ asû, mbeti ni atene: “Jéhovah Nzapa ti kotara ti mo David atene: ‘Mo yeke sara ye tongana ti babâ ti mo Josaphat+ pëpe nga tongana ti Asa+ gbia ti Juda pëpe.
13 Me mo yeke sara ye tongana ti agbia ti Israël+ nga mo yeke sara si azo ti Juda na ti Jérusalem asara ndumba na lege ti yingo,+ legeoko tongana ti so azo ti da ti Achab+ asara. Mo fâ même aita ti mo wani,+ azo ti da ti babâ ti mo, so ayeke nzoni ahon mo.
14 Tongaso, Jéhovah ayeke ga na ye ti ngangu mingi na ndö ti azo ti mo, amolenge ti mo, awali ti mo nga na aye ti mo kue.
15 Mo yeke wara ande akobela mingi, même mbeni kobela so ayeke ndu akamba ti yâ ti mo, juska akamba ti yâ ti mo asigi na gigi lâ na lâ.’”
16 Jéhovah apusu+ aPhilistin+ na azo ti Arabie+ so asara kodro nduru na azo ti Éthiopie ti londo na bira na terê ti* Joram.
17 Tongaso, ala gue ala mû Juda, ala gbu aye kue so ayeke na yâ ti da* ti gbia;+ ala gbu nga amolenge ti lo na awali ti lo. Gï Joachaz*+ so ayeke tanga ti molenge ti lo ti koli la angbâ na lo.
18 Na peko ti aye so kue, Jéhovah asara si mbeni kobela so andu akamba ti yâ amû lo; a lingbi ti sava kobela ni so pëpe.+
19 Ngu use na pekoni, kobela ni asara si akamba ti yâ ti lo asigi na gigi. Lo bâ pasi na kobela ni ngbii lo kui. Azo ti lo atingo wâ pëpe ti gonda na lo tongana ti so ala sara ti gonda na akotara ti lo.+
20 Lo yeke lani na ngu 32 na ngoi so lo ga gbia, na lo komande na Jérusalem ngu miombe. Na ngoi so lo kui, tënë ti kuâ ti lo ason zo oko pëpe. A lu lo na Gbata ti David,+ me na cimetière ti agbia pëpe.+
Akete tënë na terê ni
^ Na Hébreu: “asara si mbeni ye ate li ti ala na terê ti.”
^ Wala “yangbo.”
^ A iri lo nga Achaziah.
