1 Samuel 7:1-17
7 Tongaso, azo ti Kiriath-Jéarim aga amû Sanduku ti Jéhovah, ala gue na ni na da ti Abinadab+ so ayeke na ndö ti hoto. Ala zia Éléazar molenge ti Abinadab nde ti bata Sanduku ti Jéhovah.
2 Na peko ti so a gue na Sanduku ni na Kiriath-Jéarim, a ngbâ kâ a ninga, a sara ngu 20; azo ti Israël kue akomanse ti gi ti kiri na mbage ti Jéhovah.+
3 Samuel atene na azo ti Israël kue: “Tongana a yeke na bê ti ala kue si ala yeke kiri na mbage ti Jéhovah,+ ala zi anzapa ti awande+ nga na ayanda ti Ashtoreth+ so ala yeke na ni. Ala zia bê ti ala kue gï na Jéhovah, ala sara gï na lo oko,+ na lo yeke sö ala na maboko ti aPhilistin.”+
4 Na mango tënë so, azo ti Israël azi ayanda ti Baal na ti Ashtoreth so ala yeke na ni, na ala sara gï na Jéhovah oko.+
5 Na pekoni, Samuel atene: “Ala bungbi azo ti Israël kue na Mizpah,+ na mbi yeke sambela Jéhovah ndali ti ala.”+
6 Tongaso, azo kue abungbi na Mizpah, na ala tö ngu, ala tuku ni na sese na gbele Jéhovah nga ala mû jeûne na lango ni so.+ Kâ, ala tene: “E sara siokpari na terê ti Jéhovah.”+ A yeke na Mizpah la Samuel akomanse ti sara kua tongana juge+ na ndö ti azo ti Israël.
7 Tongana aPhilistin amä so azo ti Israël abungbi na Mizpah, aseigneur ti aPhilistin+ ague ti sara bira na Israël. Tongana azo ti Israël amä tënë ni, mbeto ti aPhilistin asara ala.
8 Ni la ala tene na Samuel: “Zia pëpe ti toto na Jéhovah Nzapa ti e ti hunda lo ti mû maboko na e+ na ti sö e na maboko ti aPhilistin.”
9 Samuel amû mbeni kete taba so angbâ ti nyon me, lo yâa ni na Jéhovah na sandaga+ so a zö ni agbi kue; na pekoni, Samuel atoto na Jéhovah ti mû maboko na Israël, na Jéhovah amä lo.+
10 Na ndembe so Samuel ayeke yâa sandaga ni, aPhilistin aga ti sara bira na Israël. Jéhovah asara si bekpa asungba ngangu+ na ndö ti aPhilistin na lango ni so. Lo sara si li ti ala aga kirikiri,+ na Israël asö benda na ndö ti ala.+
11 Azo ti Israël alondo na Mizpah, ala tomba peko ti aPhilistin, ala fâ ala juska na ndo so ayeke na sud ti Beth-Car.
12 Samuel amû mbeni tênë,+ lo kpo ni na nduzu na popo ti Mizpah na Jéshanah, na lo iri ni Ében-Ézer,* ndali ti so lo tene: “Jéhovah amû maboko na e juska fadeso.”+
13 A yeke tongaso si azo ti Israël asö benda na ndö ti aPhilistin; na pekoni, ala kiri ala ga na sese ti Israël pëpe.+ Jéhovah angbâ ti sara ye ti ngangu na aPhilistin na ngoi kue so Samuel angbâ na fini.+
14 Nga, agbata ti Israël so aPhilistin amû ni, so alondo na Écron ti si na Gath, akiri na Israël. Azo ti Israël akiri amû asese so angoro agbata so aPhilistin amû ni.
Siriri ayeke nga na popo ti Israël na azo ti mara ti Amori.+
15 Samuel angbâ ti duti juge na Israël na yâ ti fini ti lo kue.+
16 Ngu oko oko, lo tambela na yâ ti Béthel,+ Guilgal+ na Mizpah,+ na lo fâ yâ ti ngbanga ti azo ti Israël na yâ ti ando ni so kue.
17 Me lakue, lo yeke kiri na Ramah,+ ndali ti so da ti lo ayeke kâ, nga lo yeke fâ yâ ti ngbanga ti azo ti Israël kâ. Lo leke mbeni gbalaka na Jéhovah kâ.+
Akete tënë na terê ni
^ Ndani aye ti tene “Tênë ti mungo maboko na zo.”
