Bira angbâ lakue ti mû na yâ ti dunia kue. Ye so asara si Bendo ti gigi nga na ambeni organisation so abâ tënë ti siriri a ayeke tokua ambeni zo na yâ ti akodro so bira ayeke dä. Ye so ala ye ayeke ti aidé ti kaï sarango ye ti ngangu na yâ ti ando ni so. António Guterres, so ayeke secrétaire général ti Nations Unies, atene: “Aturugu ti Bendo ti gigi so ayeke bâ tënë ti siriri ayeke sara kue ti tene siriri amû yâ ti dunia kue.”

 Tongana angu ayeke hon, aye so a-organisation so ayeke sara ndali ti tënë ti siriri ayeke ga na ambeni ye ti nzoni. Na tapande, ala yeke bata asenge zo, ala yeke aidé aréfugié ti kiri na kodro ti ala, ala yeke mû na azo kobe nga na aye so ala yeke na bezoin ni nga ala yeke leke peko ti aye so abuba. Me ndali ti ambeni ngangu kpale, a-organisation ni so apeut ape ti sara ye kue so azo apensé so ala yeke sara ni. Eskê mbeni lâ a yeke wara ambeni solution so angbâ aninga ti tene tâ siriri amû na yâ ti dunia kue? Kiringo tënë ti Bible ayeke so wa?

Akpale so a-organisation so ayeke bâ tënë ti siriri ayeke wara nga aye so Bible afa

 Kpale ni: Ala yeke sara kua maboko na maboko ape. A yeke lakue kete ye ape ti tene gbâ ti aturugu nga na asenge zo so alondo na yâ ti akodro nde nde asara kua maboko na maboko. Parfois, a yeke ngangu na ala ti sara kua place oko ndali ti so ala yeke mä terê ape na ndö ti ambeni ye nga aye so agbu bê ti ala ayeke nde nde.

 Ye so Bible afa: “Nzapa ti yayu ayeke sigi na mbeni royaume . . . Royaume ni so ayeke neka aroyaume so kue [agouvernement ti azo] na gï royaume so oko la ayeke ngbâ lakue lakue.”—Daniel 2:44.

 Kpale ni: Mosoro nga na ngangu so ala yeke na ni alingbi ape. A-organisation ni so ayeke bâ tënë ti siriri ayeke na azo mingi ape, nginza wala ambeni mosoro ti gbe ti sese. Ye so la ayeke kanga lege na ye so ala peut ti sara. A yeke nga ngangu na ala ti sara kua na ando so angangu kpale ayeke dä.

 Ye so Bible afa: ‘Nzapa ti Seigneur ti e Jésus Christ . . . azia Jésus na mbage ti maboko ti lo ti koli na yayu, na nduzu kâ na ndö ti gouvernement kue, komandema kue, ngangu kue.’—aÉphésien 1:17, 20, 21.

 Jéhovah, b Nzapa so ngangu ti lo ahon angangu kue, amû na Jésus so ayeke Gbia ti Royaume ni so lo soro lo, aye kue so lo yeke na bezoin ni ti komande nzoni (Daniel 7:13, 14 c). Nzapa amû na Jésus ngangu, hingango ye, ndara nga na bango yâ ti aye nzoni so mbeni gouvernement ti azo wala mbeni ndokua ayeke na ni ape (Ésaïe 11:2). Jésus ayeke nga na angangu ange so lo peut ti sara kua na ala (Apocalypse 19:14). Mbeni ye ti hon ngangu ti lo ayeke dä ape.

 Kpale ni: Anzoni fango lege. Na ambeni ngoi, a-organisation so ayeke bâ tënë ti siriri apeut ape ti sara ye so ala ye ti sara ndali ti so ala yeke na a-instruction polele ape na ndö ti yanga so a mû na ala wala ye so ala ku ti sara ni. Ye ti peko ni ayeke so, a yeke ngangu na ala ti protégé ambeni zo wala ti atteindre a-objectif ti ala.

 Ye so Bible afa: “A mû na [Jésus] komandema kue na yayu nga na sese.”—Matthieu 28:18.

 Nzapa afa na Jésus polele aye so lo yeke sara nga lo mû na lo komandema ti ga ande na tâ siriri na yâ ti dunia kue (Jean 5:22). Jésus ayeke sara ye lakue na lege ni nga lo ke tënë ti goro (Ésaïe 11:3-5). A yeke ndani la Bible airi Jésus “Mokonzi ti siriri,” so Royaume ti lo ayeke sara ande si “fango ngbanga ti mbilimbili nga na sarango ye na lege ni” aduti dä.—Ésaïe 9:6, 7.

Royaume ti Nzapa ayeke ga ande na tâ siriri

 A-organisation so ayeke bâ tënë ti siriri apeut ti ga na siriri nga peut-être ti hunzi abira na yâ ti ambeni kodro. Me, ala peut pëpe ti zi aye so ayeke na gunda ti sarango ye ti ngangu na zo, so ti tene, tënë ti kengo zo senge senge so ayeke na yâ ti bê ti mingi ti azo.

 “Vrai kpale ni ayeke so a-organisation ni so apeut ape ti sara si siriri aduti lakue dä.”—Dennis Jett, ngbene ambassadeur ti États-Unis.

 Me, Royaume ti Nzapa ayeke na ngangu ti ga na tâ siriri ndali ti so ayeke aidé azo ti zi na yâ ti bê ti ala tënë ti kengo zo senge senge. Na tapande, na ngoi so Jésus ayeke lani na sese, lo fa na adisciple ti lo na lege ti atënë ti lo nga na asarango ye ti lo tongana nyen ti duti na siriri nga ti ye amba ti ala:

 Jésus atene nga so ayeke hinga azo ti gbe ti Royaume ti Nzapa na lege ti ndoye so ayeke na popo ti ala. Bible afa polele so azo so ake amba ti ala ayeke duti ande na gbe ti Royaume ti Nzapa ape:

 Jéhovah Nzapa, so acréé azo kue, la ahinga nzoni mingi ye so lo yeke sara ti ga na siriri na yâ ti dunia kue. Royaume ti lo ayeke na ngangu ti sara aye so azo nga na a-organisation so ayeke bâ tënë ti siriri apeut ti sara ni ape.