Tongana ti so e bâ na yâ ti ye ti manda so ahon, abungbi ti vorongo Nzapa kue la anzere na Nzapa ape. Ye oko, e lingbi ti voro Lo so acréé e na mbeni fason so anzere na lo. “Vorongo Nzapa [wala, Bungbi ti Nzapa]” wa la anzere na lo? (Jacques 1:27, kete tënë na gbe ni). Bâ ye so Bible afa.

1. Tongana nyen la e peut ti hinga lege so Nzapa aye e voro lo na ni?

E peut ti hinga ni na lege ti Bible. Jésus atene na Nzapa, atene: “Tënë ti mo ayeke tâ tënë.” (Jean 17:17). Ambeni bungbi ti nzapa asara sanka ti tâ tënë so ayeke na yâ ti Bible, so a sû na gbe ti yingo ti Nzapa. Ala zia na place ni afango ye nga na angobo ti azo. Me bê ti Jéhovah anzere pëpe na azo so ‘ake commandement ti Nzapa’. (Diko Marc 7:9.) Me, e yeke zia ngia na bê ti Nzapa tongana vorongo so e voro na lo ague oko na ye so Bible afa nga e sara ye alingbi na awango so ayeke na yâ ni.

2. A yeke nzoni e voro Jéhovah tongana nyen?

A yeke nzoni e voro gï Jéhovah oko ndali ti so lo la lo créé e (Apocalypse 4:11). Ye so aye ti tene e doit ti ye lo nga ti voro gï lo oko, sân ti sara kua na ayanda.​—Diko Ésaïe 42:8.

A lingbi vorongo so e yeke voro na Jéhovah aduti ‘nzoni-kue, nga anzere’ na lo (aRomain 12:1). Ye so aye ti tene so a lingbi e sara ye alingbi na andia ti lo. Na tapande, azo so aye Jéhovah ayeke ye andia ti lo na ndö ti mariage nga ayeke sara ye alingbi na ni. Ala yeke ke aye so apeut ti sara sioni na ala, na tapande manga wala sarango kua kirikiri na adrogue wala sämba. a

3. Ngbanga ti nyen la a yeke nzoni e na amba ti e aChrétien e voro Jéhovah?

Abungbi so e yeke sara yenga oko oko amû lege na e ti “sepela Jéhovah . . . na yâ ti congrégation.” (Psaume 111:1, 2). Mbeni lege so e yeke sepela na Nzapa ayeke na hengo bia. (Diko Psaume 104:33.) Jéhovah ahunda na e ti gue na abungbi ndali ti so lo ye e, nga lo hinga so a yeke mû maboko na e ti ngbâ na fini lakue lakue. Tongana e bungbi ndo oko ti kpengba mba, e yeke bâ nzoni dä.

 GI TI HINGA AYE MINGI

4. A lingbi e sara kua pëpe na ayanda ti voro na Nzapa

5. Ti voro gï Jéhovah oko ayeke zi e na yâ ti atënë ti mvene

 6. E yeke voro Nzapa na ngoi ti abungbi

E yeke sepela Jéhovah nga e yeke kpengba mba tongana e he bia nga e mû acommentaire na ngoi ti abungbi. Diko Psaume 22:22, na pekoni kiri tënë na ahunda so:

• A nzere na mo ti mä acommentaire na ngoi ti abungbi?

• Mo ye ti leke terê ti mo ti mû mbeni commentaire?

7. Tongana e fa na amba ti e aye so e manda ayeke nzere na Jéhovah

E kue, lege azi na e mingi ti fa atâ tënë ti Bible na azo. Diko Psaume 9:1 nga na 34:1, na pekoni kiri tënë na hunda so:

• Mbeni ye wa la mo manda na yâ ti Bible so mo ye ti fa ni na mbeni zo?

 NA NDURU TËNË

E yeke zia ngia na bê ti Lo so acréé e tongana e voro gï lo oko, e sepela lo na ngoi ti abungbi nga e fa na azo aye so e manda.

Dango bê

• Tongana nyen la e peut ti hinga lege so Nzapa aye e voro lo na ni?

• Ngbanga ti nyen la a lingbi e voro gï Jéhovah oko?

• Ngbanga ti nyen la a lingbi e voro Nzapa legeoko na amba ti e so aye ti zia ngia na bê ti lo?