NA NGOI so David akomande Jérusalem, Jéhovah amû maboko na aturugu lo ti hon awato ti ala mingi na ngangu. Jéhovah atene ândö so ni yeke mû sese ti Canaan na azo ti Israël. Fadeso, lo sara si sese ni kue aga ti ala.

David ayeke nzoni gbia. Lo ye Jéhovah. Ni la, tongana lo mû Jérusalem awe, kozo ye so lo sara ayeke ti ga na arche ti mbele ti Jéhovah na yâ ti kodoro ni. Lo ye nga ti sara mbeni temple ti zia arche ni dä.

Tongana ngu ti David ayeke gue na li ni, lo sara mbeni sioni ye. David ahinga so a yeke sioni ti tene zo amû ye so ayeke ti lo pëpe. Me mbeni lâ na lakui, tongana lo yeke na li ti da ti lo, lo bâ ndo na sese na lo bâ mbeni wali so ayeke pendere mingi. Iri ti lo ayeke Bath-Séba. Iri ti koli ti lo ayeke Urie, mbeni oko ti aturugu ti David.

Nzara ti Bath-Séba asara David mingi, si lo tokua ti tene a ga na lo na da ti lo. Koli ti lo Urie ague na bira awe. David alango na Bath-Séba, na pekoni, Bath-Séba abâ so lo më ngo. Bê ti David agi lo mingi si lo tokua mbeti na Joab, mokonzi ti aturugu ti lo, ti zia Urie na lê ti bira, tongaso si a fâ lo. Tongana Urie akui, David amû Bath-Séba ti ga wali ti lo.

Jéhovah asara ngonzo mingi na tere ti David. Lo tokua wakua ti lo Nathan ti fa siokpari ti David na gigi. Bâ Nathan na sarango tënë na David na lê ti foto so. Vundu asara David mingi. Ye so asara si Jéhovah afâ lo pëpe. Me Jéhovah atene: ‘Ndali ti sioni so mo sara so, mo yeke wara ande aye ti vundu mingi na yâ ti da ti mo.’ A yeke ye so asi biani na David la.

Kozoni, molenge ti Bath-Séba akui. Na pekoni, Amnon, kozo molenge ti David ti koli, agbu ita ti lo ti wali, Tamar, na ngangu na lo lango na lo. Absalom, mbeni molenge ti David, asara ngonzo mingi si lo fâ Amnon. Na pekoni, Absalom asara si azo ti Israël mingi amû peko ti lo, na lo mveni lo sara tere ti lo gbia. Na nda ni, David ahon Absalom na yâ ti bira, na Absalom akui. Tâ tënë, David awara aye ti vundu mingi.

Na yâ ti aye so kue, Bath-Séba akiri adü mbeni molenge ti koli. Iri ti lo ayeke Salomon. Tongana David aga mbakoro awe na kobela asara lo, molenge ti lo Adonija atara ti ga gbia. Tongaso, David airi Tsadok, mbeni prêtre, ti tuku mafuta na li ti Salomon ti fa so lo yeke duti ande gbia. Kete na pekoni, David akui tongana lo yeke lani na ngu 70. Lo komande ngu 40, na fadeso, Salomon ayeke gbia ti Israël.