BÂ AFLEUR na alê ti keke ti amande so apusu na tere ti keke so. Keke so ayeke keke ti Aaron. Afleur na alê ti keke so asigigi na tere ti keke ti Aaron gi na bï oko. Me ye ni asi tongana nyen?

A ninga kete awe so azo ti Israël ayeke tambela na yando. Ambeni na popo ti ala aye si Moïse aduti mokonzi ti ala pëpe, nga si Aaron aduti kota prêtre pëpe. Koré ayeke oko ti azo ni so. Dathan, Abiram na amokonzi 250 ti azo ti Israël ayeke nga lani na popo ti azo so. Ala kue aga, na ala tene na Moïse: ‘Ngbanga ti nyen mo sara tere ti mo kota na popo ti e kue?’

Moïse atene na Koré nga na azo ti lo: ‘Kekereke na ndapre ala ga na ta ti wâ, na ala zia dukani na yâ ni. Na pekoni ala ga na tabernacle ti Jéhovah. Fade e yeke bâ zo wa si Jéhovah asoro lo.’

Na ndade ni, Koré na azo ti lo 250 aga na tabernacle ni. Azo mingi aga nga na tere ti atente ti Koré, ti Dathan na ti Abiram ti mû mbage ti ala. Ngonzo agbu Jéhovah ngangu mingi. Moïse atene na azo: ‘Ala hon yongoro na tere ti atente ti asioni zo so. Ala ndu ye ti ala oko pëpe.’ Azo ni amä tënë ti Moïse, na ala pusu yongoro na atente ti Koré, ti Dathan na ti Abiram.

Na pekoni Moïse atene: ‘Na lege ti ye so ayeke si, e yeke hinga zo so Jéhovah asoro lo. Sese ayeke zi ande na ayeke mênë asioni zo so.’

Tâ gi na ngoi so Moïse akaï tënë ti lo ni, sese azi na amene tente ti Koré na akungba ti lo. A mene nga Dathan na Abiram nga na azo kue so amû peko ti ala. Tongana azo amä dekongo ti azo so sese ni ayeke mene ala, ala dekongo, ala tene: ‘E kpe! Sese ni alingbi ti mene e nga!’

Koré na azo ti lo 250 angbâ nduru na tabernacle ni. Tongaso, Jéhovah atokua wâ na ndo ti ala si a gbi ala kue. Na pekoni, Jéhovah atene na Eléazar, molenge ti Aaron, ti mû ta ti wâ ti azo so akui awe na ti pika ni si a ga kpangbala ti leke na ndo ti gbalaka ni. Kpangbala ye ni so a leke na ndo ti gbalaka ni ayeke ti fa ande na azo ti Israël so mbeni zo nde pëpe, me gi Aaron na amolenge ti lo si alingbi ti sara kusala ti prêtre na gbele Jéhovah.

Me Jéhovah aye si a duti polele na li ti azo kue so gi Aaron na amolenge ti lo si lo soro ala ti ga aprêtre. Tongaso, lo tene na Moïse: ‘Tene na amokonzi ti mara oko oko kue ti ga na keke ti ala. Ti mara ti Lévi, tene na Aaron ti ga na keke ti lo. Na pekoni, mû akeke so kue na zia ni na yâ ti tabernacle na gbele arche ti mbele. Keke ti zo so mbi soro lo ti ga prêtre, fade fleur ayeke sigigi na tere ni.’

Na ndade ni, na ndapre, tongana Moïse abâ akeke ni, lo bâ so afleur na alê ti keke ti amande asigigi na tere ti keke ti Aaron. Mo hinga fadeso awe ngbanga ti nyen Jéhovah asara si afleur asigigi na tere ti keke ti Aaron?