Na ngoi so Moïse ayeke na ndö ti Hoto ti Sinaï, Jéhovah atene na lo ti leke mbeni tente so ayeke nde, so a iri ni tabernacle, tongaso si azo ti Israël avoro Lo dä. Tongana ala yeke hon, ala yeke yô tabernacle ni ahon na ni.

Jéhovah atene: ‘Tene na azo ni ti mû matabisi so ala lingbi ti mû tongaso si a leke na tabernacle ni.’ Azo ti Israël amû lor, argent, cuivre, atênë ti ngangu ngere nga na abijou. Ala mû nga kamba ti laine, lin, aporo ti terê ti nyama nga na gbâ ti ambeni ye nde. Ala ga na aye ahon ndö ni juska Moïse atene na ala atene: ‘A lingbi awe. Ala zia lege ti gango na aye ni.’

Gbâ ti akoli na awali so ayeke na akode amû maboko na lekengo tabernacle ni. Jéhovah amû na ala ndara ti sara na kua ni. Ambeni aleke akamba ti bleu, akamba so a kpo ni kpongo wala abongo so a brodé ni. Ambeni adë atênë, ala sara kua na lor wala na keke ti acacia.

Azo ni aleke tabernacle ni gï tongana ti so Jéhovah afa na ala. Ala leke mbeni pendere rideau ti kangbi popo ti tabernacle ni na ambage use: Ndo so ayeke nzoni-kue nga na Ndo so ayeke nzoni kue kue kue. Na yâ ti Ndo so ayeke nzoni kue kue kue a yeke wara arche ti mbele, so a sara ni na keke ti acacia nga na lor. Na Ndo so ayeke nzoni-kue a yeke wara mbeni ye ti yongo lampe so a sara na lor, mbeni table nga na mbeni gbalaka ti zongo na dukane. Na yâ ti lacour ni a yeke wara mbeni kota tawa ti cuivre nga na kota gbalaka. Arche ti mbele ni ayeke dabe ti azo ti Israël na zendo so ala mû ti mä  yanga ti Jéhovah. Mbele ayeke nyen? A yeke mbeni zendo so ayeke nde.

Jéhovah asoro Aaron na amolenge ti lo ti sara kua na yâ ti tabernacle tongana aprêtre. Ala doit ti bâ lege ni nga ti mû asandaga na yâ ni na Jéhovah. Gï Aaron oko, so ayeke kota prêtre, la adoit ti lï na Ndo so ayeke nzoni kue kue kue. Lo yeke lï gï fani oko na yâ ti ngu oko ti mû sandaga ndali ti asiokpari ti lo, ti afami ti lo nga na ti amara ti Israël ni kue.

Azo ti Israël ahunzi ti leke tabernacle ni ngu oko na peko ti so ala sigi na Égypte. Ala wara fadeso mbeni ndo ti vorongo Jéhovah dä awe.

Jéhovah asara si gloire ti lo asi singo na yâ ti tabernacle ni nga mbeni mbinda amû ndö ni kue. Tongana mbinda ni angbâ na ndö ti tabernacle ni, azo ti Israël ayeke ngbâ na ndo ni so. Me tongana mbinda ni alondo na ndö ni ti hon, ala hinga so a yeke ngoi ti tene ala hon la. Ala yeke yô tabernacle ni na ala mû peko ti mbinda ni.