Jacob adü Joseph na ngoi so lo ga lani mbakoro awe, ni la lo ye Joseph mingi ahon tanga ti amolenge ti lo. Mo pensé bê ti tanga ti amolenge ni ayeke tongana nyen na mbage ti Joseph? Bê ti ala ason na terê ti Joseph na ala ke lo. Joseph abâ li ti lo, mbeni bango li so ayeke tâ nde mingi. Lo fa peko ti bango li ni na aita ti lo ni. Ala tene so bango li ti lo so aye ti fa biani so mbeni la ala yeke kuku na gbe ti lo. Fadeso, ala kiri ake lo bê oko.

Mbeni lâ, aita ti Joseph ayeke bata ataba nduru na gbata ti Sichem. Jacob atokua Joseph ti bâ wala ala yeke nzoni. Na ngoi so Joseph angbâ ayo, ala bâ lo na ala tene na popo ti ala: ‘Bâ zo ti bango li so la ayeke ga so! Zia e fâ lo!’ Ala gbu lo ala bi lo na yâ ti dû ti ngu so alï mingi. Me, ita ti ala Juda atene na ala, atene: ‘Ala fâ lo ape! Ahon tënë e kä lo tongana ngbâa’. Tongaso, ala kä lo teti lê ti nginza ti argent 20 na awadengo buze ti kodro ti Madian so ayeke gue na Égypte.

Na pekoni, aita ti Joseph ni ayôro yongoro bongo ti lo na yâ ti mênë ti koli-ngasa na ala tokua ni na babâ ti ala, ala tene: ‘Bongo ti molenge ti mo la ape?’ Jacob apensé so mbeni sioni nyama ti ngonda afâ Joseph awe. Vundu ahon ndö ti lo, na zo oko apeut ti dë bê ti lo ape.

Na Égypte, a kä Joseph tongana ngbâa na mbeni kota zo ti yangbo ti Pharaon so iri ti lo ayeke Potiphar. Me Jéhovah ayeke lakue na Joseph. Potiphar abâ so Joseph asara kua nzoni mingi nga lo peut ti sara confiance na lo. Kete na pekoni, lo zia Joseph ti bâ ndo na ndö ti aye ti da ti lo kue.

Wali ti Potiphar abâ so Joseph ayeke pendere mingi nga lo yeke ngangu. Lâ na lâ, lo yeke hunda Joseph ti lango na lo. Nyen la Joseph  asara? Lo ke, na lo tene: ‘Ên-ën, a yeke na lege ni ape! Wa ti mbi asara confiance na mbi mingi na mo yeke wali ti lo. Tongana mbi lango na mo, andâ mbi sara siokpari na terê ti Nzapa ti mbi!’

Mbeni lâ, wali ti Potiphar atara ti gbu Joseph na ngangu ti lango na lo. Lo gbu lo na bongo ti lo, me Joseph akpe ahon. Tongana Potiphar akiri na yanga-da awe, lo tene na Potiphar so Joseph agbu lo na ngangu ti lango na lo. Lo tene tâ tënë ape. Ngonzo asara Potiphar sioni na lo bi Joseph na da ti kanga. Me Jéhovah agirisa Joseph lâ oko ape.