Na peko ti so lo gue na mariage na Cana, Jésus aga na Capernaüm. Lo gue legeoko na mama ti lo nga na aita ti lo ti koli so lo na ala ayeke mama oko. Aita ti lo ni lani ayeke Jacques, Joseph, Simon na Judas.

Me Jésus ague na Capernaüm ti sara nyen? Capernaüm ayeke mbeni gbata so ayeke na mbeni place so azo abâ ni hio ahon ti Nazareth wala ti Cana, nga ndo ni akono mingi. Na ndo ni, gbâ ti adisciple ti Jésus alondo na kodro ni so wala nduru na ni. Tongaso, Jésus apeut ti fa na adisciple ti lo ye so ala peut ti sara, na yâ ti kodro ti ala wani.

Na ngoi so lo yeke na Capernaüm, Jésus asara nga gbâ ti akota ye. Ni la gbâ ti azo so ayeke na yâ ti gbata ni, nga ala so ayeke na ati so ayeke na tere ni, amä tënë ti aye so lo sara na ndo ni so. Me Jésus na akamarade ti lo so avoro Nzapa na bê ti ala kue aga nduru ti gue na Jérusalem ti sara matanga ti Pâque ti ngu 30 ti ngoi ti e.

Na ngoi so ala yeke na temple na Jérusalem, adisciple ti Jésus abâ mbeni ye so Jésus asara, so ade ala bâ lo sara ni lâ oko ape. Ye ni so apika bê ti ala mingi.

Ndia ti Nzapa ahunda lani na azo ti Israël ti mû asacrifice ti anyama na temple. Nga azo so aga gango abezoin ti wara kobe ti tengo ni. Tongaso, Ndia amû lani lege na azo so alondo ayo si aga na Jérusalem ti ga na nginza tongana ala ye ti vo ‘bagara, taba, ngasa’ nga na ambeni ye so apeut ti aidé na ngoi so ala yeke na yâ ti gbata ni (Deutéronome 14:24-26). Me ye ti peko ni ayeke so, na Jérusalem, azo ti kango ye ni akä ti ala anyama nga na andeke ni tâ gi na yâ ti lacour ti temple ni. Nga ambeni ayeke nzi azo, na ziango ngere ti aye ni ngangu mingi.

Bê ti Jésus ason, lo tuku alê ti nginza na sese nga lo kinda atable ti azo so ayeke changé nginza, na lo tomba ala na gigi. Na pekoni, Jésus atene: “Ala mû aye so na ndo so ala hon na ni! Ala zia ti sara si da ti Babâ ti mbi aga da ti kango ye!”—Jean 2:16.

Tongana adisciple ti lo abâ ye ni so, ala dabe ti ala na prophétie so a tene na ndo ti Molenge ti Nzapa, a tene: “Nzara ti da ti mo ayeke gbi mbi gbingo tongana wâ.” Me aJuif ahunda lo atene: “So mo yeke sara aye so, ye ti kpene wa la mo yeke sara ti fa na e so a mû na mo ngangu ti sara aye ni so?” Jésus akiri tënë na ala, lo tene: “Ala kungbi temple so na sese, na mbi yeke kiri ti leke ni ande na nduzu na yâ ti lango ota.”—Jean 2:17-19; Psaume 69:9, FD.

A-Juif abâ ti ala atene Jésus angbâ ti sara tënë ti tâ temple ti Jérusalem so la, ni la ala hunda lo atene: “A leke temple so na yâ ti ngu 46, me mo, mo yeke leke ni na nduzu na yâ ti lango ota?” (Jean 2:20). Me, Jésus ayeke haka lani tere ti lo na mbeni temple. Ngu ota na pekoni, tongana a zingo lo na kuâ, ge la adisciple ti lo aga ti dabe ti ala na tënë ni so.