Na peko ti so lo sava koli so ayeke na kobela ti sukungo tere, Jésus angbâ na da ti Farizien ni. Jésus abâ so ambeni gene ni ayeke gi gi ti duti na kozo ndo na place ti tengo ye ni. Lo ngbâ lo gbu oko ngoi ni so ti mû wango na ndo ti tënë ti sarango tere kete.

Jésus atene: “Tongana mbeni zo atisa mo na matanga ti mariage, mo duti na kozo ndo pëpe. Hinga ape lo tisa nga mbeni zo so ayeke kota ahon mo, na zo so atisa ala use kue ayeke ga ti tene na mo: ‘Mo zia ndo na zo so si lo duti.’ Mo yeke londo na kamene ti gue ti duti na ndangba ndo ni.”—Luc 14:8, 9.

Na pekoni, lo tene: “Tongana a tisa mo, gue mo duti na ndangba ndo. Tongaso si na ngoi so zo so atisa mo aga, lo yeke tene na mo: ‘Kamarade, londo mo gue mo duti na li ni.’ Tongaso, mo yeke ne na lê ti azo so a tisa mo na ala kue.” A yeke gi pëpe tënë ti dutingo na anzoni sarango ye la Jésus asara tënë ni ge so. Jésus afa ndani, lo tene: “Zo kue so ayä iri ti lo, a yeke sara si lo ga kete, na zo so asara tere ti lo kete, a yeke yä iri ti lo.” (Luc 14:10, 11). Biani, Jésus ayeke wa azo so ayeke mä lo ti sara tere ti ala kete.

Na pekoni, Jésus amû mbeni wango na Farizien so atisa lo na da ti lo so. Lo fa na lo tongana nyen la lo lingbi ti mû mbeni kobe so ayeke na nene ni mingi na lê ti Nzapa. Jésus atene: “Tongana mo leke kobe ti midi wala ti lakui, mo iri pëpe akamarade ti mo, aita ti mo, afami ti mo wala avoizin ti mo so ayeke na mosoro. Tongana mo tisa ala, mbeni lâ, ala nga alingbi ti tisa mo ti te kobe na ndo ti ala. Me tongana mo sara matanga, tisa awayere, awazin, azo ti bubango gere na awaziba, na mo yeke duti ande na ngia, ndali ti so ala yeke na ye oko ape ti kiri na ni na mo.”—Luc 14:12-14.

A yeke sioni ape ti iri akamarade, afami wala avoizin ti e ti ga ti te kobe na ndo ti e, na Jésus atene pëpe so ti sara tongaso ayeke sioni. Me, lo tene so ti mû kobe na azo so ayeke na bezoin ni, na tapande na awayere, awazin wala awaziba, ayeke ga na gbâ ti tufa. Jésus afa ndani na zo so atisa lo so, lo tene: “Fade a yeke kiri na ni na mo na ngoi ti zingongo ti azo ti mbilimbili na kuâ.” Mbeni gene ni angbâ atene: “Ngia ayeke na lo so ayeke te ye na yâ ti Royaume ti Nzapa.” (Luc 14:15). Koli ni abâ ye so tongana mbeni kota pasa. Me, a yeke azo kue la ayeke na mara ti bango ndo ti lo so ape, na a yeke ndali ni la Jésus afa mbeni toli.

Lo tene: “Mbeni zo aleke mbeni kota kobe ti lakui, na lo tisa gbâ ti azo. . . . Lo tokua ngbâa ti lo ti tene na azo so a tisa ala: ‘Ala ga, ndali ti so a leke ye kue awe.’ Me ala kue ato nda ti gi araison. Kozo zo ni atene na ngbâa ni: ‘Mbi vo mbeni yaka na a lingbi mbi gue mbi bâ ni si. Pardon, mbi yeke ga ape.’ Mbeni atene: ‘Mbi vo abagara bale-oko na mbi ye ti gue ti bâ ala nzoni si. Pardon, mbi yeke ga ape.’ Mbeni nga atene: ‘Mbi sara mariage a ninga ape, tongaso mbi lingbi ti ga ape.’”—Luc 14:16-20.

Araison ti ala ni so agbu nga ngu ape! Ti tâ tënë ni, tongana mbeni zo aye ti vo yaka wala anyama, lo yeke bâ ni kozoni si lo vo ni, na tongana lo vo ni awe, lo bezoin nga pëpe ti gue hio ti kiri ti bâ ye so lo vo ni so. Ota zo ni so angbâ ti leke ti sara mariage lekengo ape, lo sara mariage awe. Tongaso, ye oko akanga nga lege na lo ape ti yeda ti gue na mbeni kota matanga. Na mango araison so azo ni so afa, ngonzo agbu maître ni, na lo tene na ngbâa ni:

“Mo gue hio na akota lege nga na akete lege ti gbata ni, na mo ga na awayere, awazin, awaziba nga na azo ti bubango gere.” Ngbâa ni asara tongaso, me place angbâ encore. Maître ni angbâ atene encore na ngbâa ni atene: “Mo gue na alege nga na akete lege, mo sara kue ti tene azo aga, si yâ ti da ti mbi asi. Mbi tene na ala: Na popo ti azo so mbi tisa ala fade, zo oko ayeke tara kobe ti mbi ni ape.”—Luc 14:21-24.

Toli ti Jésus so afa pendere mingi tongana nyen la Jéhovah Nzapa atene na Jésus Christ ti mû mbeni tisango ndo na azo, tongaso si ala lingbi ti lï na yâ ti Royaume ti yayu. A-Juif, mbilimbili amokonzi-nzapa, la ayeke akozo zo so amû na ala tisango ndo so. Gbâ ti ala ake tisango ndo so Jésus amû na ala na lege ti fango tënë ti lo. Me, a yeke gi ala oko la atisa ala ape. Jésus afa polele so na yâ ti angoi so ayeke ga, a yeke mû use tisango ndo ni na azo so ayeke na kete ndo na popo ti mara ti aJuif nga na aprosélyte. Na pekoni, a yeke mû ota tisango ndo ni, so ayeke tanga ni, na azo so aJuif abâ ala tongana azo so Nzapa apeut ti yeda na ala ape.—Kusala 10:28-48.

Biani, tënë ti Jésus so ague oko na tënë ti mbeni gene so atene fade atene: “Ngia ayeke na lo so ayeke te ye na yâ ti Royaume ti Nzapa.”