Fadeso, Jésus na azo so ayeke tambela legeoko na lo asi na kodro ti Jéricho. Ti londo na Jéricho ti gue na Jérusalem, zo apeut ti sara lango oko na lege. A-Jéricho ayeke use, ngbene ni ayo kilomètre oko na ndambo na fini ni so a sara ni na ngoi ti aRomain. Tongana Jésus na azo so ayeke tambela na tere ti lo alondo na mbeni oko ti agbata ni so ti gue na mbeni, ambeni waziba use amä bruit ti hongo ti ala. Iri ti mbeni waziba ni oko ayeke Bartimée.

Na mango so Jésus la ayeke hon so, Bartimée na mbeni mba ti lo waziba ni akomanse ti dekongo atene: “Seigneur, Molenge ti David, sara nzoni bê na e!” (Matthieu 20:30). Ambeni zo atene na ala ti kanga yanga ti ala, me akoli ni akiri adekongo na kota go ahon ti kozo. Na mango ye ni so, Jésus aluti, na lo hunda na azo so ayeke nduru na tere ti lo ti gue ti ga na azo so ayeke dekongo so. Azo ni ague na mbage ti akoli ni na ala tene na mbeni oko ti awaziba ni atene: “Kanga bê ti mo, londo, bâ lo yeke iri mo.” (Marc 10:49). Na dongo tere, waziba ni abi bongo so ayeke na ndo ti go ti lo, lo huru lo luti na gere ti lo na lo gue na tere ti Jésus.

Jésus ahunda ala, lo tene: “Ala ye mbi sara nyen na ala?” Ala use kue atene: “Seigneur, e ye si lê ti e azi.” (Matthieu 20:32, 33). Mawa asara Jésus, lo ndu lê ti ala na lo tene na mbeni oko na milieu ti ala, lo tene: “Mo gue, mabe ti mo asava mo awe.” (Marc 10:52). Lê ti ala angbâ azi na ala komanse ti mû gonda na Nzapa. Tongana azo kue abâ ye so, ala nga amû gonda na Nzapa. Na pekoni, akoli use so akomanse ti mû peko ti Jésus.

Gbâ ti azo ayeke ngoro lani Jésus tongana lo yeke hon na yâ ti kodro ti Jéricho. Azo kue aye gi ti bâ zo so asara si awaziba use so akiri abâ ndo so. Azo ayeke pete Jésus mbage na mbage; me ambeni awara nga lege pëpe ti bâ lo. A yeke ye so asi na Zachée la. Lo la lo yeke mokonzi ti azo ti rongo nginza ti impôt so ayeke na Jéricho nga na akodro so ayeke na tere ni. Ngbanga ti so lo yeke mbeni nduru zo, lo peut ti bâ ye so ayeke passé so ape. Tongaso, lo mû loro, lo hon na devant na lo gue lo monté mbeni keke ti sycomore (wala keke ti sycomore so afigue asigi dä) so ayeke na tere ti lege so Jésus aga ti hon dä. Tongana lo monté keke ni, lo bâ aye kue nzoni. Tongana Jésus aga nduru na lo bâ Zachée na li ti keke ni, lo tene: “Zachée, descend hio si, ndali ti so laso mbi yeke lango na da ti mo.” (Luc 19:5). Zachée angbâ adescend na lo bi gere hio lo gue na yanda-da ti leke aye ti ku na Jésus.

Tongana azo abâ ye so, ala komanse ti diko tënë na gbe ti go. Ti ala, a yeke na lege ni ape ti tene Jésus ague na yanga-da ti mbeni zo so ala bâ lo tongana wasiokpari. Zachée aga zo ti mosoro ndali ti so lo yeke sara ye ti likisi na ngoi so lo yeke ro nginza ti impôt na maboko ti azo.

Tongana Jésus ayeke lï na yâ ti da ti Zachée tongaso, azo adiko tënë atene: “Lo gue gene na da ti mbeni koli so ayeke wasiokpari.” Me ti Jésus, lo bâ so Zachée apeut ti changé. Zachée azia kamene na lê ti Jésus ape. Zachée angbâ alondo na lo tene: “Seigneur, bâ, mbi yeke mû na awayere ndambo ti aye ti mbi, na ye kue so mbi gbu na likisi na maboko ti azo, mbi yeke kiri na ni na ala fani osio.”—Luc 19:7, 8.

So pendere ye la Zachée asara ti fa so lo ye ti changé bê ti lo! Âmanke, lo peut lani ti hinga wungo ti nginza so lo wara ni na maboko ti aJuif nde nde, na a yeke ndali ni la lo deba même yanga ti lo so lo yeke kiri na ni na ala fani osio. Ahon même ye so Ndia ti Nzapa ahunda (Exode 22:1; Lévitique 6:2-5). Na nda ni, Zachée atene so fade lo yeke mû ndambo ti aye ti lo ti mû ni na awayere.

A nzere na Jésus ti bâ so Zachée achangé bê ti lo na a yeke ndali ni la lo tene na lo, lo tene: “Laso, salut aga na da so, ndali ti so lo kue lo yeke molenge ti Abraham. Ti tâ tënë ni, Molenge ti zo aga ti gi azo so agirisa na ti sö ala.”—Luc 19:9, 10.

Ade ti ninga ape, Jésus asara tënë lani na ndo ti azo so agirisa tongana lo mû toli ti molenge so agirisa (Luc 15:11-24). Ti ge, lo fa na ala tâ tapande ti mbeni zo so agirisa kue, me so na pekoni a wara lo. Amokonzi-nzapa nga na azo so amû peko ti ala ayeke diko tënë na tere ti Jésus ndali ti so lo sara ye na nzoni bê na mbage ti amara ti azo so ayeke tongana Zachée so. Me, Jésus ayeke ngbâ lakue ti gi na ti kiri na amolenge ti Abraham so agirisa.