Élisabeth aga nduru ti dü awe, na a sara nze ota tongaso awe la Marie angbâ na tere ti lo so. Me fadeso, lango ti kiringo ti Marie asi awe. Ti kiri na yanga-da ti lo na Nazareth, so ayeke na mbage ti nord ti ahoto ti Judée, a lingbi Marie asara mbeni yongoro voyage. Me ti lo, a ngbâ na lo nze omene tongaso ti tene lo nga kue lo dü mbeni molenge-koli.

Gi kete na peko ti so Marie ahon, Élisabeth adü. Azo kue ayeke na ngia ngbanga ti so lo dü nzoni nga molenge ni ayeke senge. Na ngoi so Élisabeth afa bébé ti lo ni na afami nga na avoizin ti lo, tere ti ala kue anzere.

Lani, Ndia so Nzapa amû na azo ti Israël afa so, tongana mbeni zo adü molenge-koli, lango miombe na pekoni, a lingbi a fâ lo na ganza nga a zia iri na ndo ti lo (Lévitique 12:2, 3). Ambeni atene so a lingbi a zia iri ti babâ ti lo Zacharie na ndo ti lo. Me, Élisabeth ake, lo tene: “Ên-ën! Iri ti lo ayeke Jean.” (Luc 1:60). Girisa ape so, ange Gabriel atene lani atene so a lingbi a zia iri ti molenge ni Jean.

Afami nga na avoizin ni ake na lo, na ala tene: “Zo oko na popo ti afami ti mo ayeke na iri so ape.” (Luc 1:61). Ala ngbâ asara maboko na Zacharie ti hunda lo wala lo ye ti lo ti tene a zia iri ti molenge ni nyen. Zacharie angbâ ahunda mbeni nduru lê ti keke na lo sara mbeti na ndo ni, lo tene: “Iri ti lo ayeke Jean.”—Luc 1:63.

Tâ gi na ngoi ni so, Zacharie akomanse ti sara tënë. Yanga ti Zacharie akanga lani ngbanga ti so lo dë kite na tënë so ange ni atene lani na lo, so fade Élisabeth ayeke dü ande mbeni molenge-koli. Me, tongana lo kiri lo komanse ti sara tënë, li ti avoizin ti lo kue akpe na ala yeke hunda tere ti ala atene: “Molenge so ayeke sara ande nyen na yâ ti gigi ti lo?” (Luc 1:66). Ala bâ maboko ti Nzapa na yâ ti fason so a zia na iri ti Jean.

Na pekoni, na ngoi so yingo vulu aga na ndo ti lo, Zacharie atene: “Zia a gonda Jéhovah Nzapa ti Israël, ngbanga ti so lo bi lê ti lo na mbage ti azo ti lo na lo zi ala. Nga, lo sara si mbeni ngangu sauveur ti e asigi na popo ti ahale ti David, wakua ti lo.” (Luc 1:68, 69). Tongana Zacharie atene “ngangu sauveur”, lo ye ti sara tënë ti Seigneur Jésus so a ga nduru ti dü lo awe. Zacharie atene so na lege ti Jésus, Nzapa ayeke zi ande ‘e na tïtî awato ti e, lo yeke mû na e pasa ti sara kusala ti lo sân mbeto, si e duti be-ta-zo nga e sara ye so ayeke mbilimbili na lê ti lo na lâ ti fini ti e kue.’—Luc 1:74, 75.

Me na ndo ti molenge ti lo, Zacharie atene: “Ti mo, kete molenge ni, a yeke iri mo ande prophète ti Lo so ayeke na nduzu na ndo ti aye kue, ndali ti so mo yeke hon kozo ti Jéhovah ti leke lege ti lo, nga ti fa na azo ti lo so lo yeke sö ala na lege so lo yeke pardonné siokpari ti ala, ngbanga ti so Nzapa ti e ayeke bâ mawa ti zo mingi. Ni la, e yeke bâ ande mbeni lumière so alondo na yayu si ayeke su tongana lumière ti ndapre, ti sara si azo so ayeke duti na yâ ti bingo nga na gbe ti dê ti kuâ awara lumière, nga ti fa na e lege ti siriri si e tambela dä.” (Luc 1:76-79). So tâ pendere prophétie!

Me na ngoi ni so, Marie, so ade asara mariage ape, asi ti lo na Nazareth awe. Nyen la ayeke passé ande, tongana azo kue ahinga so lo yeke na ngo?