Na ngoi so Jésus azia kodro ti Jéricho, lo gue na Béthanie. Tambela ni so ayeke lani ngangu, ndali ti so lege ni ayeke nzoni ape nga ayo akilomètre 20 na ndo ti hoto. Lazare na aita ti lo ti wali, use, alango na kete kodro ti Béthanie, so ayo kilomètre 3 tongaso na Jérusalem, na a yeke na mbage ti est ti Hoto ti akeke ti olive.

A-Juif mingi asi na Jérusalem awe teti matanga ti Pâque. Azo ni ague ka kozo tongaso si ala lingbi “ti zi sioni ye na tere ti ala, tongana ti so ndia afa.” Ala gue ti sukula tere ti ala peut-être ndali ti so ala ndu mbeni kuâ wala ala sara mbeni ye so asara si ala ga sioni (Jean 11:55; Nombre 9:6-10). Mingi ti ambeni zo ni abungbi tere ti ala na yâ ti temple. Ala yeke hunda tere ti ala ti hinga wala Jésus ayeke ga ande na matanga ti Pâque ni, wala lo yeke ga ape.—Jean 11:56.

Mbeni kota tënë alondo na ndo ti Jésus. Ambeni mokonzi-nzapa aye ti gbu lo ti tene a fâ lo. Ala tene na azo atene, tongana mbeni zo ahinga place so Jésus ayeke dä, a lingbi zo ni afa ni, “tongaso si ala gbu lo.” (Jean 11:57). Amokonzi-nzapa so atara awe ti fâ Jésus, na peko ti so lo zingo lani Lazare na kuâ (Jean 11:49-53). Ni la, peut-être ambeni ayeke hunda tere ti ala wala eskê lo yeke kiri ti sigi encore na lê ti azo la?

Jésus asi na Béthanie na vendredi, “lango omene kozo na matanga ti Pâque”. (Jean 12:1). Mbeni fini lango (Sabbat ti lango 8 ti nze ti Nisan) akomanse na ngoi so lâ alinda. Tongaso, lo hunzi tambela ti lo ni kozo na lango ti Sabbat. Lo peut lani ti londo na Jéricho ti sara voyage na lâ ti Sabbat ni ape, so akomanse na vendredi na lakui juska na samedi na lakui, ngbanga ti so ndia ti aJuif ake mara ti tambela tongaso. Ni la, Jésus ague peut-être na da ti Lazare, tongana ti so lo sara lani na mbeni ngoi.

Simon, so lo nga kue lo lango na Béthanie, atisa Jésus na akamarade ti lo, so Lazare nga kue ayeke na popo ni, ti te kobe na da ti lo, na samedi na lakui. A iri ka Simon ni so “zo ti buruma,” âmanke ngbanga ti so lo yeke na kobela ni so kozo, na peut-être Jésus asava ni awe. Tongana ti so Marthe ayeke sara ka lakue, lo londo, lo komanse ti kangbi kobe na agene ni. Me ti Marie, lo yeke dengi mê na afango ye ti Jésus, me na mbeni lege so asara si mbeni kota tënë alondo.

Marie amû mbeni ngbenda ti albâtre, so ‘ndambo ti litre tongaso ti mafuta so afun pendere, tâ mafuta ti nard,’ ayeke na yâ ni (Jean 12:3). Mafuta ni so ayeke ti nginza mingi, ngere ni (denier 300) alingbi tâ na nginza ti kua so mbeni zo ayeke wara na yâ ti ngu oko! Marie atuku mafuta ni so na li ti Jésus nga na gere ti lo, na lo mû kuä ti li ti lo la si lo essuyé na gere ti Jésus ni. Fion ti mafuta ni so amû yâ ti da ni kue.

Bê ti adisciple ni ason, si ala tene: “Mafuta so afun pendere so, a buba ni tongaso ngbanga ti nyen?” (Marc 14:4). Judas Iscariote angbâ atene: “Ngbanga ti nyen a kä mafuta so denier 300 na a mû nginza ni na awayere ape?” (Jean 12:5). Tënë ti Judas ni ayeke pëpe tâ bingo bê na ndo ti awayere, me a yeke ndali ti so lo yeke nzi ka nginza so a zia na yâ ti sanduku ti nginza ni, so lo la lo yeke bata ka ni.

Jésus amû part ti Marie, lo tene: “Ngbanga ti nyen ala ye ti ga na kpale na wali so? Ye so lo sara na mbi ayeke nzoni mingi. Ala na awayere ayeke ngbâ lakue, me mbi na ala e yeke ngbâ lakue ape. Tongana wali so atuku yombo so na tere ti mbi, lo sara ni ti leke mbi teti ngoi ti lungo mbi. Ti tâ tënë ni, na ndo kue so a yeke fa nzoni tënë dä na yâ ti dunia kue, a yeke sara nga tënë ti ye so wali so asara, ti tene azo adabe ti ala na lo.”—Matthieu 26:10-13.

Jésus ayeke na Béthanie ahon lango oko awe, na tënë ti lo amû ndo kue. A-Juif gbani gbani aga na da ti Simon ti bâ Jésus nga na Lazare, “lo so Jésus azingo lo na kuâ.” (Jean 12:9). Fadeso, aprêtre-mokonzi amä tere ti fâ Jésus nga na Lazare ni kue. Amokonzi-nzapa ni apensé so, a yeke ndali ti so Jésus azingo Lazare la si azo mingi ayeke mä na bê na lo Jésus ni so. Amokonzi-nzapa ni so ayeke tâ sioni mingi!