Ye ti Manda 6

Paradis Ayeke Ndulu!

Aye ti sioni so ayeke si fadeso na ndo ti sese afa na gigi so Paradis ayeke ndulu. Bible atene so ngoi kete kozoni si Paradis aga e yeke ba angoi ti ngangu. E yeke fadeso na yâ mara ti angoi tongaso! Ba ambeni ye so Bible atene ayeke si:

Akota bira. “Fade mara alondo ti ke mbeni mara, na royaume ti ke mbeni royaume.” (Matthieu 24:7, NW) Prophétie so aga tâ tene awe. Ngbele ye na ngu 1914, a sala akota bira use so amu ndo sese kue nga gbâ ti akete bira. Azo kutu mingi akui dä.

Kobela na ndo kue. Fade “kobela ti futi kodoro aïa na ndo nde nde.” (Luc 21:11) Ye so aga tâ tene awe? Biani. Cancer, kobela ti bê, kota koro, palu, SIDA, na ambeni kobela nde afâ azo kutu mingi.

Kobe so atia. Na yâ sese kue, ambeni zo awara pepe kobe so alingbi na ala. Ngu oko oko, azo kutu mingi ayeke kui ndali ti nzala. So ayeke nga mbeni fä so na yâ ngoi kete Paradis ayeke ga ge. Bible atene: “Fade boma aïa.”—Marc 13:8.

 Yengingo ti sese. “Fade . . . sese ayengi na ndo nde nde.” (Matthieu 24:7, NW) Ye so kue aga tâ tene nga na ngoi ti e. Ngbele ye na ngu 1914, azo ahon kutu oko awara kuâ na yâ yengingo ti sese.

Azo ti sioni. Azo aga “azo so andoye nginza” na “azo so andoye tele ti ala mveni.” Ala ga “azo so andoye ngia mingi ahon ti ndoye Nzapa.” Amolenge “amä yanga ti babâ na mama pepe.” (2 Timothée 3:1-5, NW) Mo yeda pepe so azo mingi ayeke tongaso na ngoi ti e? Ala kpe mbito ti Nzapa oko pepe, na ala ga na wusuwusu na azo so agi lege ti manda ye na ndo Nzapa.

Kengo ndia. ‘Kengo ndia ayeke wu nga mingi.’ (Matthieu 24:12, NW) Peut-être mo yeke yeda so kengo ndia awu mingi ahon ti kozoni. Na ndo kue, a lingbi ti nzi azo na ngangu, ti handa ala wala ti sala sana na ala.

Aye so kue afa so Royaume ti Nzapa ayeke ndulu. Bible atene: “Tongana i ba ye so ayeke ga, i hinga royaume ti Nzapa ayeke ndulu.” (Luc 21:31) Royaume ti Nzapa ayeke nyen? A yeke ngorogbia ti Nzapa so ayeke na yayu, so ayeke ga ande na Paradis na ndo sese so. Fade Royaume ti Nzapa ayeke mu place ti angorogbia ti azo.—Daniel 2:44.