Ye ti Manda 1

Nzapa Atisa Mo ti Ga Ndeko ti Lo

Nzapa aye si mo duti ndeko ti lo. Mo bi bê ti mo mbeni lâ awe so mo lingbi ti duti ndeko ti Zo so ayeke kota ahon kue na yâ ndagigi? A di iri ti Abraham, so aduti na fini giriri, ndeko ti Nzapa. (Jacques 2:23) Ambeni zo, so a sala tene ti ala na yâ ti Bible, alë nga songo ti dutingo ndeko na Nzapa na a hiri adeba nzoni mingi na ndo ti ala. Laso, azo ti ambage kue ti sese aga fadeso andeko ti Nzapa. Mo nga mo lingbi ti duti ndeko ti Nzapa.

Ti duti ndeko ti Nzapa ayeke nzoni ahon ti duti ndeko ti zo. Nzapa ayeke zia lâ oko pepe vundu na bê ti andeko ti lo so ayeke be-ta-zo. (Psaume 18:26 [18:25, NW]) Ti duti ndeko ti Nzapa ayeke nzoni ahon ti duti na mosoro. Tongana mbeni zo ti mosoro akui, nginza ti lo ayeke gue na ambeni zo. Ye oko, ala so alë songo ti dutingo ndeko na Nzapa ayeke na mbeni mosoro so zo oko alingbi ti zi ni na maboko ti ala pepe.—Matthieu 6:19.

Ambeni zo alingbi ti tara ti kanga lege na mo ti manda ye na ndo Nzapa. Même ambeni kamarade ti mo na azo ti sewa ti mo alingbi ti sala tongaso. (Matthieu 10:36, 37) Tongana ambeni zo ahe mo na ngia wala aye ti zia mbito na bê ti mo, hunda tele ti mo, ‘Mbi ye ti nzere na zo wa: na azo wala na Nzapa?’ Gbu li ti mo na ndo ti tene so: Tongana mbeni zo atene na mo ti zia ti te kobe, mo yeke mä yanga ti lo? Biani, oko pepe! A lingbi mo te kobe ti ngbâ na fini. Me Nzapa alingbi ti sala si mo duti na fini teti lakue lakue! Tongaso, zia zo oko pepe akanga lege na mo ti manda tongana nyen mo lingbi ti duti ndeko ti Nzapa.—Jean 17:3.