Ye ti Manda 9

Andeko ti Nzapa Ayeke Azo Wa?

Jésus Christ ayeke Molenge ti Jéhovah. Lo yeke nga kota ndeko ahon kue ti Jéhovah, na lo so Nzapa andoye lo mingi ahon atanga ni. Kozoni si lo ga zo na ndo ti sese, Jésus ayeke giriri na yayu tongana mbeni ngangu zo ti yingo. (Jean 17:5) Na pekoni, lo ga na ndo ti sese ti fa na azo tâ tene na ndo ti Nzapa. (Jean 18:37) Lo mu nga fini ti lo ti zo ti zi na gbe ti siokpari na kui azo so amä yanga. (aRomain 6:23) Jésus ayeke fadeso Gbia ti Royaume ti Nzapa, mbeni ngorogbia ti yayu so ayeke ga ande na Paradis na ndo sese so.—Apocalypse 19:16.

A-ange ayeke nga andeko ti Nzapa. A-ange aba gigi la ni pepe tongana azo na ndo ti sese. A sala ala na yayu kozoni si Nzapa aleke sese. (Job 38:4-7) A-ange ayeke kutu mingi mingi. (Daniel 7:10) Andeko ti Nzapa so ayeke na yayu aye si azo amanda tâ tene na ndo Jéhovah.—Apocalypse 14:6, 7.

Nzapa ayeke nga na andeko na ndo ti sese; lo hiri ala atémoin ti lo. Mbeni témoin na ndo ti fango ngbanga ayeke tene ye so lo hinga na ndo ti mbeni zo wala mbeni ye. A-Témoin ti Jéhovah ayeke tene na azo ye so ala hinga na ndo ti Jéhovah nga na ndo ti ye so lo leke ti sala. (Esaïe 43:10) Legeoko tongana a-ange, aTémoin aye ti mu maboko na mo ti manda tâ tene na ndo ti Jéhovah. Ala ye si mo nga mo duti ndeko ti Nzapa.