Ye Ti Manda 3

A Lingbi Mo Manda Ye na Ndo Nzapa

Ti duti ndeko ti Nzapa, a lingbi mo manda ye na ndo lo. Akamarade ti mo ahinga iri ti mo na ayeke di ni? Ala sala tongaso biani. Nzapa aye si mo hinga nga iri ti lo na mo di ni. Iri ti Nzapa ayeke Jéhovah. (Psaume 83:19 [83:18, NW]; Matthieu 6:9) A lingbi mo manda nga ti hinga ye so lo ye na ye so lo ke. A lingbi mo hinga azo so ayeke andeko ti lo na azo so ayeke awato ti lo. Ti gi ti hinga mbeni zo amu ngoi mingi. Bible atene so a yeke lege ti ndara ti bata ngoi ti manda ye na ndo Jéhovah.—aEphésien 5:15, 16.

Andeko ti Nzapa asala ye so anzere na lo. Bi bê ti mo na ndo akamarade ti mo. Tongana mo sala ye na ala na lege ni pepe, na mo sala ye so ala ke ni, fade ala ngbâ ti duti akamarade ti mo? Oko pepe! Legeoko tongaso nga, tongana mo ye ti duti ndeko ti Nzapa, a lingbi mo sala ye so anzere na lo.—Jean 4:24.

A yeke pepe alege ti vorongo kue si ague na zo ti lë songo ti dutingo ndeko na Nzapa. Jésus, so ayeke kota ndeko ahon kue ti Nzapa, asala tene giriri ti alege use. Mbeni lege ni akono na azo asi singo dä. Lege so ague na futingo. Mbeni lege ni ayeke kete na azo mingi pepe atambela na ndo ni. Lege so ague na fini ti lakue lakue. Tene so aye ti tene tongana mo ye ti lë songo ti dutingo ndeko na Nzapa, a lingbi mo manda mbilimbili lege ti voro lo.—Matthieu 7:13, 14.