“Ngoi so a diko ni alingbi awe, na Royaume ti Nzapa aga nduru awe. Ala changé bê ti ala, na ala mä na bê na nzoni tënë.”—Marc 1:15, Mbeti ti Nzapa ti fini dunia.

“Lâ asi awe, na royaume ti Nzapa ayeke nduru. I changé bê ti i, i mä Tene-nzoni na bê.”—Marc 1:15, La Sainte Bible en sango.

Jésus Christ atene lani na azo so ayeke mä lo so Royaume ti Nzapa a aga “nduru awe” wala ayeke “nduru” ndali ti so lo la lo yeke duti Gbia ti Royaume ni so nga lo yeke lani na popo ti ala.

Jésus aye ti tene ape so Royaume ni akomanse déjà lani ti komande awe. Ambeni ngoi na pekoni, na lege ti atënë ti lo lo fa même lani na adisciple ti lo so Royaume ni ayeke si na yâ ti angoi so ayeke ga (Kusala 1:6, 7). Me, Bible afa lani mbilimbili ngoi so Gbia ti Royaume ni ayeke bâ gigi, na a ga tâ tënë na ndö ti Jésus alingbi tâ na ngoi so a fa lani. b A yeke ndali ni la Jésus atene lani atene: “Ngoi so a diko ni alingbi awe” so ti tene ngoi so lo yeke komanse na lê ti azo kue ti sara kua ti lo ti fango nzoni tënë so andu Royaume ni.—Luc 4:16-21, 43.

Ti tene azo awara lani aye ti nzoni na lege ti nzoni tënë ti Royaume ti Nzapa, a lingbi ala changé bê ti ala, so ti tene, ala sara vundu ndali ti asiokpari so ala sara lani nga ala sara ye alingbi na amama-ndia ti Bible. Azo so achangé bê ti ala lani afa so ala mä na bê na nzoni tënë ti Royaume ni so ade ti komande lani ape so.

Jésus atene lani atënë so na tongo nda ti kua ti lo ti fango tënë na Galilée. Versê ti Matthieu 4:17, so asara nga tënë na ndö ti oko mbaï ni so, afa so “ti londo na ngoi ni so ti ga na ni,” Jésus afa lani tënë na ndö ti Royaume ti Nzapa. Royaume ti Nzapa la ayeke mama-tene ti fango tënë ti Jésus lani. Ndani la, na yâ ti a-Évangile osio, c a sara tënë ti Royaume ahon fani 100, na mingi ni a sigi na yâ ti atënë ti Jésus. Na yâ ti Bible, atënë so Jésus atene so andu Royaume ti Nzapa ayeke mingi ahon atënë so lo tene na ndö ti ambeni tënë nde.