“Mo ne babâ na mama ti mo, tongaso si mo ngbâ na fini aninga na ndö ti sese so Jéhovah Nzapa ti mo ayeke mû na mo so.”—Exode 20:12, Mbeti ti Nzapa ti fini dunia.

“A lingbi mo yekia babâ na mama ti mo si lâ ti mo awu mingi na yâ sese ni so L’Eternel Nzapa ti mo amû na mo.”—Exode 20:12, La Sainte Bible en sango.

Nzapa alu lani ndia na azo ti Israël ti ne babâ na mama ti ala. Nzapa a-encouragé ala ti sara ye alingbi na ndia so na lege so lo zia mbeni zendo na terê ni. Atâa so aChrétien ayeke pëpe na gbe ti Ndia ti Moïse, wala Ndia so Nzapa amû lani na azo ti Israël, amama-ndia so ayeke na peko ti Ndia ti Nzapa so achangé ape; a ngbâ na ngangu juska laso, ndani la aChrétien ayeke bâ ni na nene ni.—aColossien 3:20.

Atâa amolenge ade maseka wala ala yeke kota zo, ala yeke ne ababâ na mama ti ala na lege so ala yeke kpe mbeto ti ala na ala yeke mä yanga ti ala (Lévitique 19:3; aProverbe 1:8). Même tongana amolenge ni akono si na pekoni ala yeke na sewa ti ala wani, ala yeke ngbâ ti bâ lege ti ababâ na mama ti ala nga ti ndoye ala. Na tapande, ala yeke ngbâ ti bâ lege ti ababâ na mama ti ala nzoni tongana babâ na mama ni aga mbakoro, ala yeke mû même na ala pata tongana bezoin ni ayeke dä.—Matthieu 15:4-6; 1 Timothée 5:4, 8.

Bâ so a hunda na amolenge ti Israël lani ti ne babâ na mama ti ala, ye so aye ti fa so a lingbi ala hinga kota kua so mama ayeke na ni na yâ ti sewa (aProverbe 6:20; 19:26). A lingbi amolenge laso kue asara nga tongaso.

Me commandement ti ne babâ na mama ayeke na alimite. Amolenge ti Israël adoit ti mä yanga ti babâ na mama ti ala ape wala ti mbeni zo nde ape, tongana mango yanga ti azo ni so ayeke gue na ala ti ke yanga ti Nzapa (Deutéronome 13:6-8). Legeoko nga laso, aChrétien ayeke “mä yanga ti Nzapa lo so lo yeke mokonzi, ahon ti mä azo.”—Kusala 5:29.

Na yâ ti Ndia so Nzapa amû na azo ti Israël lani, lo mû zendo so amolenge so ayeke mä yanga ti babâ na mama ti ala, ala yeke “ngbâ na fini aninga” nga ‘aye ti ala ayeke maï’ na ndö ti sese so Nzapa amû na ala (Deutéronome 5:16). Ala yeke wara pëpe punition so ayeke mû ka na amolenge so asara sanka ti Ndia ti Nzapa nga asara kpengba-li na ababâ na mama ti ala (Deutéronome 21:18-21). Amama-ndia so ayeke na peko ti andia so achangé ape (aÉphésien 6:1-3). Atâa e yeke maseka wala kota zo, e yeke na tënë ti kiri na ni na Zo so acréé e. Nga ti gue oko na zendo ti Nzapa, amolenge so amä yanga ti lo nga amä yanga ti ababâ na mama ti ala ayeke duti na fini aninga nga ala lingbi ti wara fini ti lakue lakue.—1 Timothée 4:8; 6:18, 19.

E lingbi ti manda mbeni pendere ye tongana e gbu li na ndö ti place so ndia so e wara na Exode 20:12 ayeke dä na yâ ti aCommandement bale-oko so Nzapa amû lani na azo ti Israël (Exode 20:1-17). A-Commandement so aga kozo na ni afa aye so azo ti Israël adoit ti sara na mbage ti Nzapa, na tapande, ala doit ti voro gï lo oko. Ati so aga na pekoni afa ye so ala doit ti sara na mbage ti amba ti ala, na tapande ti duti be-ta-zo na koli wala wali ti ala, nga ti nzi ye ti mba ti ala ape. Tongaso e lingbi ti bâ commandement ti “ne babâ na mama ti mo” tongana mbeni pont ndali ti so tongana e sara ye alingbi na ni e yeke sara ye so Nzapa ahunda nga e yeke sara ye so a hunda na e ti sara na amba ti e.