“Sara mbeto pëpe, ndali ti so mbi yeke na mo. Gi bê ti mo pëpe, ndali ti so mbi yeke Nzapa ti mo. Mbi yeke kpengba mo, ti tâ tënë ni, mbi yeke mû maboko na mo. Mbi yeke gbu mo nzoni na maboko ti mbi ti koli, so mbi yeke sara aye ti mbilimbili na ni.”—Ésaïe 41:10, Mbeti ti Nzapa ti fini dunia.

“Zia mbeto asara mo pëpe teti Mbi yeke na mo; na zia ye ayengi mo pëpe, teti Mbi yeke Nzapa ti mo; fade Mbi sara si mo kpengba; biani, fade Mbi sara na mo; biani, fade Mbi bata mo na tïtî Mbi ti koti ti mbilimbili.”—Ésaïe 41:10, La Sainte Bible en sango.

Jéhovah a Nzapa adë bê ti awakua ti lo so ayeke be-ta-zo na lo so lo yeke mû maboko na ala atâa akpale wa la ala tingbi na ni.

“Mbi yeke na mo.” Jéhovah afa na awakua ti lo ngbanga ti nyen la ala doit ti sara mbeto ape: ala yeke ala oko ape. So lo yeke bâ aye so ayeke si na ala nga lo yeke mä sambela ti ala, a yeke mo bâ mo tene lo yeke tâ gï na terê ti ala.—Psaume 34:15; 1 Pierre 3:12.

“Mbi yeke Nzapa ti mo.” Jéhovah adë bê ti awakua ti lo na lege so lo dabe ti ala so atâa situation ti ala ayeke so wa, lo yeke ngbâ lakue ti bâ terê ti lo tongana Nzapa ti ala nga lo yeda ti tene ala duti awakua ti lo. Ala peut ti duti sûr so mbeni ye apeut lâ oko ti kanga lege na Nzapa ape ti mû maboko na ala.—Psaume 118:6; aRomain 8:32; aHébreu 13:6.

“Mbi yeke kpengba mo, ti tâ tënë ni, mbi yeke mû maboko na mo. Mbi yeke gbu mo nzoni na maboko ti mbi ti koli, so mbi yeke sara aye ti mbilimbili na ni.” Jéhovah akiri na ndö ti tënë so fani ota na alege nde nde ti fa so lo yeke mû ande maboko biani na ala. Lo sara kua na mbeni tapande ti fa ye so lo yeke sara tongana awakua ti lo abezoin mungo maboko. Tongana mbeni zo atï, Nzapa apeut ti yoro maboko ti lo ti koli ti yô lo na nduzu.—Ésaïe 41:13.

Kozo lege so Nzapa ayeke sara kua na ni ti kpengba awakua ti lo nga ti mû maboko na ala, a yeke na lege ti tënë ti lo Bible (Josué 1:8; aHébreu 4:12). Na tapande, Mbeti ti Nzapa amû anzoni wango na azo so atingbi na akpale tongana yere, kobela wala kuâ ti mbeni zo so ala ye lo mingi (aProverbe 2:6, 7). Nzapa ayeke sara nga kua na yingo vulu ti lo, so ayeke ngangu ti lo so lo yeke sara na kua, ti mû maboko na awakua ti lo ti gbu li nzoni, nga ti tene akpale ti ala ahon ndö ti ala ape.—Ésaïe 40:29; Luc 11:13.

Atënë ti versê so adë lani bê ti aJuif so ayeke lani be-ta-zo, so na pekoni a gue lani na ala na ngbâa na Babylone. Jéhovah atene lani kozo awe so, tongana a ga nduru ti zi aJuif na ngbâa, ala yeke mä ande sango ti mbeni wato so ayeke ga ande ti futi amara so angoro ala nga so ayeke zia mbeto na yâ ti Babylone (Ésaïe 41:2-4; 44:1-4). Na ngoi so azo ti Babylone nga na amara so angoro ala ayeke mä ande sango ni so terê ti ala ayeke dö, me ti aJuif ala doit ti gi bê ti ala ape ngbanga ti so Jéhovah ayeke bata ande ala. Fani ota, lo tene na ala ti “sara mbeto pëpe.”—Ésaïe 41:5, 6, 10, 13, 14.

Atâa so na tongo nda ni a sara tënë so ayeke na Ésaïe 41:10 na aJuif so ayeke be-ta-zo so ague na ala na ngbâa lani na Babylone, Jéhovah asara kue ti tene a bata atënë ni so na yâ ti Bible ti tene adë bê ti awakua ti lo kue (Ésaïe 40:8; aRomain 15:4). Lo yeke aidé awakua ti lo laso gï tongana ti so lo aidé lani awakua ti lo ti ândö.