Mbeni ye so apeut ti sara amaseka vundu mingi ayeke divorce ti babâ na mama ti ala. Nyen la mo peut ti sara ti hon ndö ti vundu ni?

Na yâ ti article so e yeke bâ:

•  Aye ota so mo doit ti sara ape

•  Aye ota so mo peut ti sara

•  Amba ti mo atene ti ala nyen

 Aye ota so mo doit ti sara ape

 1. Tongana mo bâ so ayeke faute ti mo

 “Mbeni lâ, mama ti mbi atene na mbi so aproblème kue so lo na babâ ti mbi awara ayeke na temps so ala dü mbi, ye so asara si mbi bâ so mbi la mbi sara si yâ ti mariage ti ala abuba.”—Diana.

 Girisa ye so ape: Mo la mo sara si babâ na mama ti mo asara divorce ape. A yeke mbeni problème so ayeke na milieu ti babâ na mama ti mo. Mo la mo sara si problème alondo na milieu ti ala ape nga mo la mo peut ti leke ni ape. Ala wani la ayeke leke aproblème ti ala.

 2. Ngbâ ti bata ngonzo na terê ti ala ape

 “Bê ti mbi ason na terê ti babâ ti mbi ndali ti so lo yeke fidèle na mama ti mbi ape. A yeke ngangu na mbi ti kiri ti sara confiance na lo.”—Rianna.

 Girisa ye so ape: Peut-être bê ti mo ason ndali ti ye so asi na milieu ti babâ na mama ti mo, na mo yeke na raison. Me, a yeke na lege ni ape ti tene mo ngbâ ti sara ngonzo na terê ti ala. Ye so apeut ti sara sioni na santé ti mo. A yeke ndani la a tene so ti bata ngonzo na bê ayeke tongana nyongo poison na mo yeke ku ti tene mbeni zo la awara sioni na pekoni. a

 3. Tongana mo yeke na kite so mo yeke duti ande na ngia ape na yâ ti mariage ti mo

 “Mbi yeke gi bê ti mbi so mbi nga kue mbi yeke sara ande ye so babâ ti mbi asara. Mbi sara mbeto so tongana mbi sara mariage na mbi dü amolenge, mbi yeke sara ande même ye so asara si babâ na mama ti mbi asara divorce.”—Jessica.

 Girisa ye so ape: So babâ na mama ti mo asara divorce aye ti tene ape so yâ ti mariage ti mo nga kue ayeke buba ande. Me, mo peut ti manda ye na lege ti ye so asi na babâ na mama ti mo so. Na tapande, mo peut ti gi ti hinga asarango ye wa la mo ye ti tene zo so mo na lo ayeke sara ande mariage aduti na ni. So babâ na mama ti mo asara divorce apeut nga ti aidé mo ti gi ti hinga asarango ye so ayeke mû lege na mo ti duti mbeni nzoni koli wala wali.

 Aye ota so mo peut ti sara

 1. Causé na azo. Azo so aye ka ti fa atënë ti bê ti ala ape apeut ti tï na yâ ti asioni sarango ye, na tapande, nyongo sämba ahon ndö ni wala nyongo mbangi. Ti tï na yâ ti asarango ye ni so ape, gi ti sara aye so a fa na gbe ni ge:

 Causé na babâ na mama ti mo. Tongana lakue babâ na mama ti mo ayeke fa na mo akpale so ala wara na yâ ti mariage ti ala, na nzoni bê me polele, fa na ala so ye ni so ajoué na ndö ti mo mingi. Tongana a yeke ngangu na mo ti fa na ala ye ni so, mo peut ti sara lettre na mbeni oko na popo ti ala wala na ala use kue.

 Sara tënë ni na mbeni kamarade ti mo so mo yeke na confiance na lo. Tongana mo yeke sara tënë ni na mbeni zo so ayeke dengi mê nzoni ti mä mo apeut ti aidé mo mingi. Bible atene so “tâ kamarade aye mba ti lo na ngoi kue nga lo yeke mbeni ita so a dü lo ndali ti angoi ti vundu.”—aProverbe 17:17.

 Sara tënë ni na Wasarango mo. Jéhovah Nzapa, so ayeke lo so ayeke “mä sambela,” ayeke dengi mê ti mä mo (Psaume 65:2). Bible atene so mo peut ti ‘mû agingo bê ti mo kue mo bi ni na ndö ti lo, ngbanga ti so lo yeke bi bê ti lo na ndö ti mo.’—1 Pierre 5:7.

•   Eskê mo peut ti causé na aparent ti mo yeke nga sân ti sara ngonzo?

•   Eskê mbeni kamarade ti mo so mo sara confiance na lo (maseka wala mbakoro) apeut ti aidé mo ti gbu ngangu na yâ ti ye ni so?

•   Aye wa la mo peut ti sambela mbilimbili ndali ni?

 2. Yeda na changement ni

 Tongana babâ na mama ti mo asara divorce apeut ti ga na achangement na yâ ti aye kue, mo yeke gue na yâ ti mbeni fini da, mbeni fini ekole, ti sara mbeni fini ye ti wara na nginza wala même ti wara afini kamarade. Ti vrai ni, ye so apeut ti son bê ti mo nga mo yeke gi bê ti mo, nga mo peut ti bâ so gigi ti mo achangé kue na mbeni lege so ayeke nzoni ape. Nyen la apeut ti sara si changement ni so aduti facile na mo? Tara ti bâ tongana nyen la mo peut ti yeda na afini changement ni so.

•   Kota changement wa la mo sara ndali ti so babâ na mama ti mo asara divorce?

•   Aye wa la mo peut ti sara ti tene a-aidé mo tongaso si mo yeda na changement ni so?

 3. Gi ti hinga anzoni sarango ye so mo yeke na ni

 Tongana divorce ti babâ na mama ti mo asara si mo gi bê ti mo mingi, ye so apeut ti aidé mo ti bâ na nene ni effort so ala sara. Ye so apeut même ti aidé mo ti wara afini kamarade. Jeremy, so babâ na mama ti lo asara divorce na temps so lo yeke na ngu 13, atene: “Divorce ti babâ na mama ti mbi asara si mbi yeke na gbâ ti akua ti sarango ni. Mbi kono lani awe, na mbi yeke aidé mama ti mbi nga na ngambe ti mbi ti koli mingi.”

•   Na yâ ti ye so asi na babâ na mama ti mo so, ambeni sarango ye wa la mo ga ti hinga na ndö ti mo wani?

•   Asarango ye wa la mo ye ti gi ti duti na ni?