Kusandika kusabveka kupfundzisa, mbwenye kusaphatanizambo kusasanyira na kutcunyusa. Yahova asatisandika toera tikwanise kuntumikira munjira yakutawirika. (Aroma 12:1; Aheb. 12:10, 11) Midzidzi inango, kusandikwa kusapha kakamwe, mbwenye kusacitisa munthu kukhala wakulungama mbapaswa nkhombo. (Mis. 10:7) Kodi ale anasandika na ale anasandikwa asafunika kukumbukanji?

Ale anasandika. Akulu a mpingo, anyakubala na anango asafunika kuwangisira toera kusandika mwakukoma ntima na mwaufuni ninga pinacita Yahova. (Yer. 46:28) Ngakhale kusandika kukhale kwakuwanga, kusafunika kucitwa mwaufuni.—Tito 1:13.

Ale anasandikwa. Mwakukhonda tsalakana njira inasandikwa ife, tisafunika kutawira kusandikwa mbatiphatisira mwakucimbiza pinapangwa ife. (Mis. 3:11, 12) Ninga anthu akusowa ungwiro, ife tonsene tisafunika kusandikwa midzidzi inango, mbwenye munjira zakusiyana-siyana. Mwacitsandzo, panango tinasandikwa kubulukira mu pinthu pinaleri ife m’Bhibhlya peno pinabva ife pa misonkhano. Panango midzidzi inango tinasandikwa na komiti yakutonga miseru. Tingatawira kusandikwa mbatiphatisira pinapangwa ife, tinakwanisa kukhala na umaso wadidi cincino na umaso wakukhonda mala ntsogolo.—Mis. 10:17.

ONANI VIDHYU YA NSOLO WAKUTI “JEOVÁ DISCIPLINA AQUELES A QUEM AMA,” BULUKA PENEPO TAWIRANI MIBVUNDZO IYI:

• Kodi umaso wa Canon ukhali tani pakutoma, pontho cincino wacinja tani?

• Kodi iye asandikwa tani mwaufuni na Yahova?

• Kodi pinthu pidancitikira pisatipfundzisanji?