Misonkhano ya mpingo ndi yakufunika kakamwe pakulambira kwathu Yahova. (Masal. 22:22) Onsene anagumanyikana toera kulambira Yahova asakhala akutsandzaya, pontho asakhala na nkhombo. (Masal. 65:4) Kazinji kene anyakupfundza a Bhibhlya asathambaruka mwakucimbiza angagumanika pa misonkhano mwakukhonda phonya.

Munaphedza tani anyakupfundza anu a Bhibhlya toera agumanike pa misonkhano? Pitirizani kuacemera toera agumanike pa misonkhano. Apangizeni vidhyu ya nsolo wakuti Ninji Pinacitwa pa Nyumba ya Umambo? Apangeni maphindu anafuna kukhala na iwo angagumanika pa misonkhano. (Seja Feliz Para Sempre! nsolo 10) Imwe munakwanisa kuapanga pinthu pingasi pidapfundza imwe pa misonkhano peno pinafuna imwe kudzapfundza pa misonkhano. Pasani anyakupfundza anu mabukhu anafuna kuphatisirwa pa misonkhano. Kusiyapo pyenepi, aphedzeni toera akwanise kufika pa misonkhano. Kuwangisira kwanu kuphedza nyakupfundza wanu toera agumanike pa misonkhano kunakhala kwakutsandzayisa kakamwe iye angatoma kugumanika pa misonkhano.—1 Akor. 14:24, 25.

ONANI VIDHYU YA NSOLO WAKUTI PHEDZANI ANYAKUPFUNDZA ANU A BHIBHLYA TOERA AGUMANIKE PA MISONKHANO, BULUKA PENEPO TAWIRANI MIBVUNDZO IYI:

• Ndi mwai upi udaphatisira Rita toera kucemera Zaida kuti agumanike pa misonkhano?

• Thangwi yanji tisakhala akutsandzaya nyakupfundza Bhibhlya angagumanika pa misonkhano?

• Ninji pidaona Zaida pa ntsiku yakutoma idagumanika iye pa misonkhano?