Yezu atuma atowereri ace toera aende kacita anyakupfundza. (Mat. 28:19) Pyenepi pisaphataniza kumwaza mphangwa na kupfundzisa. M’midzidzi inango tisafunika kubvundzika, ‘Ndinathimizira tani maluso anga ku basa ineyi?’

Nkhabe funika kudikhira kuti anthu abwere kuna ife, mbuto mwace tisafunika kukhala akutoma kuasaka. (Mat. 10:11) Mu ndzidzi unamwaza ife mphangwa, kodi tisabandza miyai yonsene toera kulonga na anthu ‘anagumanikana na ife’? (Mac. 17:17) Lidhya akhala nyakupfundza thangwi mpostolo Paulu akhamwaza mphangwa mwaphinga.—Mac. 16:13-15.

ONANI VIDHYU YAKUTI PITIRIZANI KUMWAZA MPHANGWA “NEE KUPUMA”—MWANTSUSUKANO NA NYUMBA NA NYUMBA, BULUKA PENEPO TAWIRANI MIBVUNDZO IYI:

• Kodi m’bale Samweli akhabandza tani mwai mu mabasa ace a ntsiku na ntsiku toera kubzwala mbeu ya undimomwene?

• Thangwi yanji tisafunika kukhala a phinga m’makhundu onsene a basa yakumwaza mphangwa?

• Mu umaso wanu wa ntsiku na ntsiku, mbani anafunika imwe kulonga naye thangwi ya mphangwa za Umambo?

Toera kucita anyakupfundza, nee tisafunika basi ene kupasa anthu mabukhu. M’mbuto mwace, tisafunika kucita maulendo akubwereza na cifuno ca kutomesa mapfundziro a Bhibhlya toera anthu athambaruke mwauzimu. (1 Akor. 3:6-9) Mphapo, ndiye tani khala kuwangisira kwathu toera kupfundzisa anthu Mafala a Mulungu nee kusabala misapo mizinji? (Mat. 13:19-22) Ife tisafunika kupitiriza kusaka ale akuti ali na mitima ninga “mataka adidi.”—Mat. 13:23; Mac. 13:48.

ONANI VIDHYU YAKUTI PITIRIZANI KUMWAZA MPHANGWA “NEE KUPUMA”—PAKUPEREKA UMBONI WAPAKWECA NA PAKUCITA ANYAKUPFUNDZA, BULUKA PENEPO TAWIRANI MIBVUNDZO IYI:

• Kodi Serjio na nkazace Mariya athirira tani mbeu ya undimomwene mu ntima mwa Ezekyeli na Abhigayeli?

• Ndi cipi cifuniro cathu pakukhala a phinga m’makhundu onsene a basa yakumwaza mphangwa, kuphatanizambo umboni wapakweca?

• Tinapangiza tani kuti tisaikha pa mbuto yakutoma basa yakupfundzisa anango undimomwene?