1. Thangwi yanji mpostolo Paulu atsandzaya pikhanyerezera iye mabasa adidi adacita iye?

 MPOSTOLO Paulu akhadziwa kuti mbadaphiwa mwakukhonda dembuka. Mbwenye mu ndzidzi ukhanyerezera iye mabasa adidi adacita iye, atsandzaya kakamwe. Iye alonga: “Ndamalisa mapika akuthamanga, ndakoya cikhulupiro.” (2 Tim. 4:6-8) Paulu acita pisankhulo pyadidi mu umaso wace ninga Nkristu, pontho akhadziwa kuti akhadatsandzayisa Yahova. Ife tisafunambo kucita pisankhulo pyadidi mbatitsandzayisa Yahova. Mphapo tinacita tani pyenepi?

2. Pisabvekanji kutsogolerwa na cikhulupiro?

² Mpostolo Paulu alonga tenepa thangwi ya iye na Akristu anango akukhulupirika: “Tisatsogolerwa na cikhulupiro, tayu na pinthu pinaona ife na maso.” (2 Akor. 5:7) Munthu anatsogolerwa basi ene na pinthu pinaona iye na maso, asacita pisankhulo mwakubverana na pinthu pinaona iye na pinabva iye. Mbwenye munthu anatsogolerwa na cikhulupiro, asacita pisankhulo mwakubverana na pinanyerezera Yahova. Pinthu pinacita iye pisapangiza kuti asanyindira kuti Mulungu anampasa nkhombo, pontho kuti uphungu wa Yahova unagumanika m’Bhibhlya ndzidzi onsene usatiphedza.—Mas. 119:66; Aheb. 11:6.

3. Ndi pinthu pipi pinacitika tingatsogolerwa na cikhulupiro? (2 Akorinto 4:18)

³ Ndimomwene kuti tonsene tisacita pisankhulo mwakubverana na pinaona ife na pinabva ife. Mbwenye tinganyindira basi ene pinthu pyenepi toera kucita pisankhulo pyakufunika, panango pinthu nee pinafamba mwadidi. Thangwi yanji? Thangwi midzidzi inango pinthu pinaona ife na pinabva ife nee ndi pyakunyindirika. Tingatsogolerwa basi ene na pinthu pinaona ife, tinacita cisankhulo cakuti Yahova nee anakomerwa naco. (Ekle. 11:9; Mat. 24:37-39) Mbwenye tingatsogolerwa na cikhulupiro, tinacita pisankhulo mwakubverana na “pinakomerwa na Mbuya.”  (Aef. 5:10) Kusiyapo pyenepi, kubvera uphungu wa Mulungu kunatiphedza toera kukhala akukhurudzika na akutsandzaya. (Mas. 16:8, 9; Iza. 48:17, 18) Pontho tingapitiriza kutsogolerwa na cikhulupiro, tinakhala m’maso kwenda na kwenda.—Lerini 2 Akorinto 4:18.

4. Tinadziwa tani khala tiri kutsogolerwa na cikhulupiro peno na pinthu pinaona ife?

⁴ Tinadziwa tani khala tiri kutsogolerwa na cikhulupiro peno na pinthu pinaona ife? Tisafunika kubvundzika: Ninji pinanyerezera ine pakucita cisankhulo? Kodi ndisanyerezera basi ene pinthu pinaona ine? Peno ndisacita pisankhulo mwakubverana na uphungu wa Yahova? Mu nsolo uno, tinapfundza kuti tinapitiriza tani kutsogolerwa na cikhulupiro mu pinthu pitatu pyakufunika kakamwe: Pakusankhula basa, pakusankhula munthu toera kumanga naye banja na tingatambira pitsogolero pya gulu ya Yahova. Kusiyapo pyenepi, tinaona pinafunika ife kunyerezera toera ticite pisankhulo pyadidi.

PAKUSANKHULA BASA

5. Tisafunika kunyerezeranji pakusankhula basa?

⁵ Ife tonsene tisafuna kutsalakana anthu a panyumba pathu. (Ekle. 7:12; 1 Tim. 5:8) Mabasa anango asaphedza anthu toera kukhala na kobiri izinji kupiringana mabasa anango. Natenepa ndi pyakukwanisika kugula pinthu pinafunika ntsiku na ntsiku, ngakhale kukoya kobiri toera kuiphatisira ntsogolo. Mbwenye mabasa anango asaphedza toera kukhala na kobiri yakukwana basi ene toera kutsalakana anthu a panyumba pathu. Pakusankhula basa, ndimomwene kuti tinanyerezera kuti tinatambira kobiri ingasi. Mbwenye tinganyerezera basi ene pyenepi, ife tinatsogolerwa na pinthu pinaona ife.

6. Tinatsogolerwa tani na cikhulupiro pakusankhula basa? (Ahebheri 13:5)

⁶ Tingatsogolerwa na cikhulupiro, tinanyerezerambo pinthu pinafuna kucitika na uxamwali wathu na Yahova thangwi ya basa inafuna ife. Tinakwanisa kubvundzika: ‘Kodi m’basa ineyi ndinafunika kucita pinthu pyakuti Yahova nee anakomerwa napyo?’ (Mis. 6:16-19) ‘Ndinadjomba misonkhano peno kusowa ndzidzi wakumwaza mphangwa na kuleri Bhibhlya? Ndinafunika kukhala ndzidzi uzinji kutali na banja yanga?’ Khala ntawiro wa ubodzi mwa mibvundzo ineyi ndi inde, mphyadidi kukhonda basa ineyi ngakhale kuti ndi pyakunentsa kugumana basa. Nakuti tisatsogolerwa na cikhulupiro, ife tisacita pisankhulo pinapangiza kuti tisanyindira kuti Yahova anatitsalakana.—Mat. 6:33; lerini Ahebheri 13:5.

7-8. M’bale Javier atsogolerwa tani na cikhulupiro? (Onanimbo foto.)

⁷ M’bale Javier, a wa ku Amerika do Sul aona kuti ndi pyakufunika kakamwe kutsogolerwa na cikhulupiro. Iye alonga: “Ine ndayesera kugumana basa inango yakuti mbidandiphedza kukhala na kobiri izinji kupiringana ikhatambira ine pabasa ikhaphata ine.” Mbwenye Javier akhafuna kakamwe kukhala mpainiya. Iye alonga: “Ine ndakwanisa kuenda kacedza na ntsogoleri wa empreza ineyi. Mbandidzati kuenda kacedza naye, ndacita phembero toera Yahova andiphedze, thangwi ndikhali na cinyindiro cakuti iye akhadziwa pinthu pinandiphedza. Ine ndikhafuna kuphata basa yakuti mbidawina kobiri izinji. Mbwenye nee ndikhafuna kuphata basa yakuti mbidandipingiza kucita pizinji m’basa ya Yahova.”

⁸ Javier alonga: “Ndzidzi ukhandicita iye mibvundzo, ntsogoleri wa empreza andipanga kuti mwakubwereza-bwereza ine mbandidaphata basa ndzidzi uzinji kupiringana anyabasa anango. Mwacilemedzo, ine ndampanga kuti nee mbidakwanisa kucita pyenepi thangwi ya uphemberi wanga.” Javier akhonda basa ineyi, pontho pidapita masumana mawiri atoma kutumikira ninga mpainiya. Mukupita kwa ndzidzi, caka cibodzi cene, iye agumana basa inango  yakuti mbadaiphata m’maora akucepa. Iye alonga: “Yahova abvesera maphembero anga, pontho andiphedza toera kugumana basa yadidi toera nditumikire ninga mpainiya. Ndiri wakutsandzaya thangwi basa ineyi isandipasa ndzidzi toera kutumikira Yahova na kuphedza abale na alongo anga.”

9. Mwapfundzanji na pinthu pidacitikira m’bale Trésor?

⁹ Tinacitanji tingaona kuti basa inaphata ife cincino isatipingiza kukhala na uxamwali wakuwanga na Yahova? Onani pidacitikira m’bale Trésor wa ku Kongo. Iye alonga: “Ine ndikhali na basa yakuti anthu azinji akhaifuna, ndikhatambira kobiri izinji kakamwe kupiringana ikhatambira ine kale, pontho ndikhalemedzwa na anthu thangwi ya basa ineyi.” Mbwenye midzidzi inango akhadjomba misonkhano thangwi akhafunika kuphata basa mu ndzidzi uzinji. Kusiyapo pyenepi, iye akhakakamizwa toera kulonga uthambi toera kubisa pinthu pyakuipa pikhacita empreza ikhaphata iye basa. Trésor akhafuna kusiya basa ineyi, mbwenye akhagopa kuti nee mbadagumana basa inango. Ninji pidamphedza? Iye alonga: “Lemba ya Abhakuki 3:17-19 yandiphedza toera ndibvesese kuti Yahova ndzidzi onsene ananditsalakana ngakhale ndisiye basa ineyi. Natenepa ndasiya basa ineyi.” Iye alonga: “Apatrau azinji asanyerezera kuti anyabasa awo anatawira kucita pinthu pyonsene toera awine kobiri izinji, kuphatanizambo kusowa ndzidzi toera kukhala pabodzi na mabanja awo na kulambira Mulungu. Ine ndiri wakutsandzaya thangwi ndacita pinthu toera ndikhale na uxamwali wadidi na banja yanga, pontho na Yahova. Pidapita caka cibodzi, Yahova andiphedza toera kugumana basa yadidi. Ine ndisatambira kobiri yakukwana toera kutsalakana banja yanga, pontho ndiri na ndzidzi uzinji toera kutumikira Yahova.” Tingaikha Yahova pa mbuto yakutoma, maseze tisowe kobiri, ndzidzi onsene iye anatitsalakana. Tinganyindira uphungu wa Yahova na mapikiro ace, tinapitiriza kutsogolerwa na cikhulupiro, pontho iye anatiphedza.

 PAKUSANKHULA MUNTHU TOERA KUMANGA NAYE BANJA

10. M’bale peno mulongo anatsogolerwa tani na pinthu pinaona iye pakusankhula munthu toera kumanga naye banja?

¹⁰ Banja ndi muoni wa Yahova, pontho nee ndi pyakuipa kufuna kumanga banja. Pakusankhula munthu toera kumanga naye banja, panango mulongo ananyerezera makhaliro a m’bale anafuna iye, maonekero ace akunja, njira inadziwika iye na anthu anango, njira inatsalakana iye kobiri, njira inatsalakana iye mabasa ali na iye panyumba, pontho ananyerezera khala m’bale unoyu asantsandzayisa. b Pinthu pyenepi pyonsene ndi pyakufunika. Mbwenye mulongo anganyerezera basi ene pinthu pyenepi, iye anatsogolerwa na pinthu pinaona iye.

11. Tisafunika kucitanji kuti titsogolerwe na cikhulupiro pakusankhula munthu toera kumanga naye banja? (1 Akorinto 7:39)

¹¹ Yahova asatsandzaya na abale na alongo anabvera uphungu wace pakusankhula munthu toera kumanga naye banja. Mwacitsandzo, iwo asabvera uphungu wakudikhira toera apiringane “thunga ya uwana” mbadzati kutoma kubanyirana. (1 Akor. 7:36) Iwo asabanyirana na munthu ali na makhaliro analonga Yahova kuti mamuna peno nkazi wadidi asafunika kukhala nawo. (Mis. 31:10-13, 26-28; Aef. 5:33; 1 Tim. 5:8) Iwo nee asabanyirana na munthu wakuti nee ndi Mboni wa Yahova. Mbwenye asabvera uphungu wakumanga banja “basi ene mwa Mbuya” unagumanika pa 1 Akorinto 7:39. (Lerini.) Iwo asapitiriza kutsogolerwa na cikhulupiro, pontho asanyindira kuti Yahova ndzidzi onsene anaatsalakana mwadidi kupiringana munthu unango.—Mas. 55:22.

12. Mwapfundzanji na pinthu pidacitikira mulongo Rosa?

¹² Onani pidacitikira mpainiya wa ku Kolombya anacemerwa Rosa. Thangwi ya basa yace, iye akhacedza kazinji kene na mamuna m’bodzi wakuti nee akhali Mboni wa Yahova, pontho mamuna unoyu akhansirira. Rosa atoma kufuna mamuna unoyu. Iye alonga: “Iye akhaoneka ninga mamuna wadidi kakamwe. Akhacita basa yakuperekeka, pontho akhali na umaso wadidi. Kusiyapo pyenepi, akhanditsalakana mwadidi. Iye akhali na makhaliro akhafuna ine kuti mamuna akhale nawo, mbwenye nee akhali Mboni wa Yahova. Mu ndzidzi unoyu, ine ndikhapibva kuti ndikhali ndekhene. Ine ndikhafuna kumanga banja, mbwenye nee ndikhagumana munthu mu gulu. Na thangwi ineyi pyakhala pyakunentsa toera kunkhonda, thangwi ine ndikhanfuna kakamwe.” Ngakhale tenepo, Rosa nee atsogolerwa na pinthu pikhaona iye. Iye anyerezera pinthu pikhafuna kucitika na uxamwali wace na Yahova angabanyirana na mamuna unoyu. Natenepa, iye asiya kucedza na mamuna unoyu mbaphatisira ndzidzi wace toera kuwangisa uxamwali wace na Yahova. Mukupita kwa ndzidzi, iye acemerwa toera kuenda Kuxikola ya Amwazi Mphangwa a Umambo, pontho cincino asatumikira ninga mpainiya wakupambulika. Rosa alonga: “Ine ndiri wakutsandzaya kakamwe na pinthu pyadidi pidandipasa Yahova.” Ndimomwene kuti midzidzi inango ndi pyakunentsa kutsogolerwa na cikhulupiro mu pinthu pinafuna ntima wathu. Mbwenye tingasiya kuti Yahova atitsogolere, ndzidzi onsene pinthu pinatifambira mwadidi.

TINGATAMBIRA PITSOGOLERO PYA GULU YA YAHOVA

13. Ndi mabvero api akuti panango tinakhala nawo tingatambira pitsogolero pya gulu ya Yahova?

¹³ Kazinji kene tisatambira pitsogolero pya gulu ya Yahova pyakuti pisatiphedza toera kutumikira Yahova mwadidi kakamwe. Pitsogolero pyenepi panango pinaperekwa na akulu a mpingo, muyang’aniri wa cisa, abale a ku Bheteli peno Mathubo Akutonga. Mphapo ndiye tani tingakhonda kubvesesa kuti thangwi yanji  tiri kutambira pitsogolero pyenepi? Panango tinatoma kunyerezera basi ene pinentso pinafuna kuoneka thangwi ya pitsogolero pyenepi na madodo a abale adapipereka.

14. Ninji pinafuna kutiphedza toera kutsogolerwa na cikhulupiro tingatambira pitsogolero pya gulu ya Yahova? (Ahebheri 13:17)

¹⁴ Tingatsogolerwa na cikhulupiro, tisanyindira kuti Yahova ali kutsogolera gulu yace, pontho iye asadziwa mwadidi m’bodzi na m’bodzi wa ife. Na thangwi ineyi, tisabvera mwakucimbiza pitsogolero, pontho tisacita pyenepi na maonero adidi. (Lerini Ahebheri 13:17.) Ife tisadziwa kuti tingabvera, tisaphedzera toera abale na alongo mu mpingo akhale akuphatana. (Aef. 4:2, 3) Maseze abale anatsogolera ndi anthu akuti asadodoma, ife tiri na cinyindiro cakuti Yahova anatipasa nkhombo tingabvera. (1 Sam. 15:22) Khala mwandimomwene ndi pyakufunika kucita macinjo, Yahova anacita pyenepi pa ndzidzi wakuthema.—Mik. 7:7.

15-16. Ninji pidaphedza m’bale Kevin toera kubvera pitsogolero pidaperekwa na gulu ya Yahova maseze akhadzudzumika? (Onanimbo foto.)

¹⁵ Tingatsogolerwa na cikhulupiro mbatibvera pitsogolero pya gulu ya Yahova tisapaswa nkhombo. Mwacitsandzo, ku Peru anthu azinji asalonga Cixipanyola, mbwenye anango asalonga pilongero pinango pya dziko ineyi. Cibodzi mwa ipyo ndi Cikexua. Mu pyaka pizinji, abale na alongo asasaka anthu analonga cilongero ceneci. Mbwenye toera kubvera mitemo ya mautongi, yacinjwa njira yakugumana anthu anewa. (Aroma 13:1) Na thangwi ineyi, abale na alongo atoma kubvundzika khala macinjo anewa mbadacitisa basa yakumwaza mphangwa ikhonde kufamba mwadidi ncilongero ceneci. Nakuti abale abvera pitsogolero pyenepi, Yahova aapasa nkhombo thangwi yakuwangisira kwawo toera kugumana anthu analonga Cikexua.

¹⁶ Nkulu wa mpingo wa cilongero ca Cikexua anacemerwa Kevin akhali m’bodzi mwa abale  akhadzudzumika. Iye alonga: “Ine ndikhabvundzika khala mbatidakwanisa kugumana anthu analonga Cikexua.” Mphapo Kevin acitanji? Iye alonga: “Ndanyerezera lemba ya Misangani 3:5 na pinthu pidacitikira Mose. Yahova akhadampasa pitsogolero pikhaoneka ninga nee mbapidaphedza. Mu ndzidzi ukhabuluka Aizraeli ku Ejitu, Yahova apanga Mose toera apite na ku Bara Yakufira. Kweneko nee kukhali na njira, natenepa Aejitu mbadaaphata mwakukhonda nentsa. Ngakhale tenepo, Mose abvera, pontho Yahova aphedza Aizraeli mbacita cirengo toera kupulumusa mbumba yace.” (Eks. 14:1, 2, 9-11, 21, 22) Maseze m’bale Kevin adzudzumika, iye abvera pitsogolero pipswa. Pyenepi pyaphedza tani? Iye alonga: “Pyakhala pyakudzumatirisa kuona njira idatiphedza Yahova. Kale tikhafamba nsindzo wakulapha toera kugumana munthu m’bodzi peno awiri. Cincino tisamwaza mphangwa m’mbuto ziri na anthu azinji analonga Cikexua. Natenepa tisakwanisa kucedza na anthu azinji kakamwe, pontho tisacitisa maulendo akubwereza na mapfundziro mazinji. Kusiyapo pyenepi, cincino anthu azinji kakamwe asagumanika pa misonkhano.” Mwakukhonda penula, tingatsogolerwa na cikhulupiro, ndzidzi onsene Yahova asatiphedza.

17. Mwapfundzanji mu nsolo uno?

¹⁷ Ife tapfundza kuti tinatsogolerwa tani na cikhulupiro pakucita pisankhulo thangwi ya pinthu pitatu pyakufunika mu umaso wathu. Mbwenye tisafunika kupitiriza kutsogolerwa na cikhulupiro pakucita pisankhulo pinango. Mwacitsandzo, pakusankhula ubalangazi, njira inaphatisira ife ndzidzi wakuti nee tiri kuphata basa, tingafuna kucita cisankhulo thangwi yakupfundza kakamwe peno kucita kursu na njira yakukuza ana. Mu pisankhulo pyonsene pinacita ife, nee tisafunika kutsogolerwa basi ene na pinthu pinaona ife. Mbwenye tisafunika kutsogolerwa na uxamwali wathu na Yahova, uphungu wace, kuphatanizambo pikiro idacita iye kuti anatitsalakana ndzidzi onsene. Tingacita pyenepi, “tinadzafamba mu dzina ya Yahova Mulungu wathu kwenda na kwenda.”—Mik. 4:5.