NSOLO WA PFUNDZIRO 39
NYIMBO 125 ‘Anthu Antsisi Ndi Akutsandzaya!’
Kupasa Kunakuphedzani Toera Kukhala Akutsandzaya
“Kupasa kusatsandzayisa kakamwe kupiringana kutambira.” —MABASA 20:35.
PINAFUNA IFE KUPFUNDZA
Tinapfundza njira zakusiyana-siyana zakuti tinakwanisa kupasa pinthu anango, pontho tinaona kuti thangwi yanji pyenepi pisatitsandzayisa.
1-2. Thangwi yanji Yahova aticita munjira yakuti tisatsandzaya tingapasa anango pinthu?
YAHOVA aticita munjira yakuti tisatsandzaya kakamwe tingapasa pinthu anango kupiringana kutambira. (Mabasa 20:35) Kodi pyenepi pisabveka kuti ife nee tinatsandzaya tingatambira pinthu? Nkhabe. Ife tonsene tisatsandzaya tingatambira muoni. Mbwenye tisatsandzaya kakamwe tingapasa anango cinthu. Pontho tisatsandzaya kakamwe thangwi yakucitwa munjira ineyi na Yahova. Thangwi yanji?
2 Thangwi yakucitwa munjira ineyi na Yahova, ife tinakwanisa kuthimizira kutsandzaya kwathu. Tinakwanisa kucita pyenepi mukusaka miyai yakupasa pinthu anango. Mwandimomwene, ndi pyakutsandzayisa kakamwe kudziwa kuti Yahova aticita munjira ineyi.—Mas. 139:14.
3. Thangwi yanji Bhibhlya isalonga kuti Yahova ndi “Mulungu wakutsandzaya”?
3 Nakuti Bhibhlya isalonga kuti kupasa kusatsandzayisa, ife tinakwanisa kubvesesa kuti thangwi yanji Yahova ndi “Mulungu wakutsandzaya.” (1 Tim. 1:11) Iye ndi adatoma kupasa anango pinthu, pontho nkhabe munthu anapasa kakamwe kupiringana Yahova. Thangwi ya iye, “ife tiri na umaso, tisafamba, pontho tiripo,” ninga pidalonga mpostolo Paulu. (Mabasa 17:28) Mwakukhonda penula, “muoni onsene wadidi na wakulungama,” usabuluka kuna Yahova.—Tiya. 1:17.
4. Ninji pinafuna kutiphedza toera kukhala akutsandzaya kakamwe?
4 Ife tonsene panango tisafuna kutsandzaya kakamwe thangwi yakupasa pinthu anango. Tinakwanisa kucita pyenepi mukutowezera Yahova wakuti ndi wakupasa mwakudzala manja. (Aef. 5:1) Mu nsolo uno, ife tinapfundza citsandzo ca Yahova cakupasa anango, pontho tinapfundza kuti tinacitanji tingaona kuti anango nee akupereka takhuta thangwi ya pinthu pidaacitira ife. Pyenepi pinatiphedza toera tipitirize kupasa anango mbatikhala akutsandzaya.
KHALANI AKUPASA MWAKUDZALA MANJA NINGA PINACITA YAHOVA
5. Ndi pinthu pipi pyakumanungo pinatipasa Yahova?
5 Ndi pinthu pipi pinango pyakuti Yahova asatipasa mwakutsandzaya? Onani pitsandzo pingasi. Yahova asatipasa pinthu pyakumanungo. Panango iye nee anaticitisa kuti tikhale na pinthu pizinji kakamwe, mbwenye ndzidzi onsene asatipasa pinthu pinafuna ife. Mwacitsandzo, iye asatipasa cakudya, cakubvala na mbuto yakukhala. (Mas. 4:8; Mat. 6:31-33; 1 Tim. 6:6-8) Kodi Yahova asatipasa pinthu pyenepi mwakukakamizika? Nkhabe. Mphapo thangwi yanji iye asacita pyenepi kuna ife?
6. Tisapfundzanji na lemba ya Mateu 6:25, 26?
6 Yahova asatipasa pinthu pyakumanungo thangwi iye asatifuna. Onani mafala adalonga Yezu thangwi ya mbalame anagumanika pa Mateu 6:25, 26. (Lerini.) Iye alonga: “Izo nkhabe kubzwala mbeu, nee kubvuna peno kukoya cakudya ncikwa, mbwenye Babanu wakudzulu asazidyesa.” Buluka penepo Yezu abvundza: “Kodi imwe na izo, anafunika kakamwe simwe tayu?” Pyenepi pisatipfundzisanji? Yahova asaona atumiki ace akukhulupirika ninga akufunika kakamwe kupiringana pinyama. Natenepa, khala Yahova asatsalakana pinyama, ife tinakwanisa kukhala na cinyindiro cakuti iye anatitsalakanambo. Ninga nyakubala waufuni, Yahova asatsalakana banja yace mwaufuni.—Mas. 145:16; Mat. 6:32.
7. Ndi munjira ipi yakuti tinakwanisa kutowezera kupasa kwa Yahova? (Onanimbo foto.)
7 Ninga Yahova, ife tinakwanisambo kupasa pinthu anango thangwi ya ufuni. Mwacitsandzo, kodi imwe musadziwa m’bale peno mulongo adasowa cakudya peno cakubvala? Yahova anakwanisa kuphatisira imwe toera kuphedza m’bale peno mulongo unoyu. Atumiki a Yahova asakhalambo dzololo toera kuphedza anango m’midzidzi ya nyatwa. Mwacitsandzo, mu ndzidzi wa utenda wa COVID-19, abale na alongo apereka pyakudya, pyakubvala na pinthu pinango kuna ale adasowa. Azinji aperekambo kobiri toera kuphedzera basa yathu pa dziko yonsene. Pyenepi pyaphedzera basa yakuphedza abale na alongo adasowa pinthu thangwi ya cidengwa. Abale na alongo anewa adacita pyakupereka abvera mafala anagumanika pa Ahebheri 13:16 analonga kuti: “Lekani kuduwala kucita pinthu pyadidi, mbamupasambo anango pinthu piri na imwe, thangwi Mulungu asakomerwa na ntsembe zenezi.”
Ife tonsene tinakwanisa kupasa mwakudzala manja ninga Yahova (Onani ndima 7)
8. Tisaphedzeka tani na mphambvu za Yahova? (Afilipi 2:13)
8 Yahova asatipasa mphambvu. Yahova ali na mphambvu zakusowa madire, pontho asakomerwa kupasa mphambvu atumiki ace akukhulupirika. (Lerini Afilipi 2:13.) Kodi imwe mwacita kale phembero kuna Yahova toera akupaseni mphambvu kuti mukwanise kupirira nyatwa peno mayesero? Panango imwe mwacitambo phembero kuna Yahova toera akupaseni mphambvu kuti mukwanise kucita pinthu toera mupirire. Pidatawirwa maphembero anu, imwe mwakwanisa kukhulupira mafala adalonga mpostolo Paulu kuti: “Mu pinthu pyonsene, ine ndisakwanisa kukhala na mphambvu thangwi ya ule anandipasa mphambvu.”—Afil. 4:13.
9. Tinatowezera tani Yahova wakuti asapasa anango mphambvu zace? (Onanimbo foto.)
9 Maseze ndife anthu akusowa ungwiro, ife tinakwanisa kutowezera Yahova wakuti asapasa anango mphambvu zace. Ife nee tinakwanisa kupasa anango mphambvu ninga pinacita Yahova, mbwenye tinakwanisa kuphatisira mphambvu zathu toera kuaphedza. Mwacitsandzo, ife tinakwanisa kuphedza m’bale peno mulongo wakukalamba peno wakuti ali kubva kupha toera kucita mabasa panyumba pace peno kumphedza toera kugula pinthu. Makhaliro athu angatitawirisa, tinakwanisa kuphedzera basa yakucenesa na kusasanyira Nyumba ya Umambo. Tingaphatisira mphambvu zathu toera kucita pinthu pyenepi, tinakwanisa kuphedza mwadidi abale na alongo athu.
Ife tinakwanisa kuphatisira mphambvu zathu toera kuphedza anango (Onani ndima 9)
10. Tinakwanisa tani kuphatisira mphambvu ya mafala athu toera kuwangisa anango?
10 Lekani duwala kuti pinthu pinalonga imwe pinakwanisa kuwangisa anango. Mwacitsandzo, munakwanisa kunyerezera munthu wakuti anawangiswa mungampanga kuti musakomerwa na pinthu pinacita iye? Alipo anadziwa imwe wakuti asafuna kubalangazwa? Khala alipo, citani pinthu toera adziwe kuti imwe musantsalakana. Imwe munakwanisa kuenda kamuona, kum’menyera ntokodzi, kumulembera tsamba peno kuntumizira mphangwa. Imwe nee musafunika kudzudzumika na pinthu pinafuna imwe kulonga. Mafala akucepa na aufuni anakwanisa kuphedza m’bale peno mulongo toera apitirize kukhala wakukhulupirika mbakhala na maonero adidi thangwi ya nyatwa zinathimbana na iye.—Mis. 12:25; Aef. 4:29.
11. Yahova asaphatisira tani udziwisi wace?
11 Yahova asatipasa udziwisi. Nyakupfundza Tiyago alemba: “Khala munthu nee ali na udziwisi wakukwana, mbapitirize kuuphemba kuna Mulungu, iye anadzaupaswa, thangwi Mulungu asapasa onsene mwakudzala manja, nee kusandika munthu.” (Tiya. 1:5) Mafala anewa asapangiza kuti Yahova asapasa anango udziwisi mwakudzala manja. Tiyago alongambo kuti Yahova angapasa munthu udziwisi, iye asacita pyenepi ‘mwakukhonda kusandika,’ peno ‘nee asasaka madodo.’ Iye nee asafuna kuti titsukwale tingaphemba citsogolero cace. Mbwenye asafuna kuti tim’phembe toera atitsogolere.—Mis. 2:1-6.
12. Ndi miyai ipi iri na ife toera kupfundzisa anango pinthu pinadziwa ife?
12 Ndiye tanimbo ife? Ife tinakwanisa kutowezera Yahova mukupfundzisa anango pinthu pinadziwa ife. (Mas. 32:8) Atumiki a Yahova ali na miyai mizinji yakupfundzisa anango pinthu pinadziwa iwo. Mwacitsandzo, ife tisapfundzisa amwazi mphangwa apswa mu utumiki. Mwakupirira, akulu a mpingo asaphedza atumiki akutumikira na abale akubatizwa toera adziwe kuti anacita tani mabasa anapaswa iwo mu mpingo. Pontho abale na alongo ali na maluso akumanga nyumba na kuzisasanyira asapfundzisa anango toera kumanga nyumba zinaphatisirwa na gulu ya Yahova.
13. Tinatowezera tani Yahova pakupfundzisa anango?
13 Wangisirani toera kutowezera Yahova mungapfundzisa anango. Kumbukani kuti Yahova asapasa udziwisi mwakudzala manja. Munjira ibodzi ene, ife tisapfundzisambo mwadidi anango pinthu pinadziwa ife. Ife nee tisafunika kusiya kupfundzisa anango thangwi yakugopa kuti ntsogolo iwo anacita basa inacita ife. Midzidzi inango, anango asanyerezera kuti nakuti iwo nee apfundziswa, iwo nee asafunikambo kupfundzisa anango. Atumiki a Yahova nee asafunika kunyerezera tenepo. Mbwenye tisafunika kukhala akutsandzaya na kupfundzisa anango pyonsene pinadziwa ife na kuwangisira toera kucita pyenepi. (1 Ates. 2:8) Ife tisafuna kuti iwombo ‘adzakhale akuthema toera kupfundzisa anango.’ (2 Tim. 2:1, 2) Tingapfundzisa anango pinthu pinadziwa ife, tonsene tinakhala audziwisi na akutsandzaya.
ANTHU ANGAKHONDA KUPEREKA TAKHUTA
14. Azinji asacitanji tingaapasa mwakudzala manja?
14 Tingakhala akupasa mwakudzala manja, makamaka kuna abale na alongo athu, kazinji kene iwo asapereka takhuta. Panango iwo analemba tsamba toera kupereka takhuta peno anaphatisira njira zinango. (Akol. 3:15) Iwo angacita pyenepi, ife tisakhala akutsandzaya kakamwe.
15. Tisafunika kucitanji munthu angakhonda kupereka takhuta kuna ife?
15 Mwandimomwene, midzidzi inango anthu anango nee asapereka takhuta thangwi ya pinthu pidaacitira ife. Midzidzi inango panango tinaphatisira ndzidzi wathu, mphambvu zathu na kobiri yathu, mbwenye mbationa kuti munthu nee ali kudzindikira kuwangisira kudacita ife toera kum’phedza. Pyenepi pingacitika, munacalira tani kukhala wakutsukwala? Kumbukani lemba ya Mabasa 20:35. Kutsandzaya kwathu thangwi yakupasa nee kusanyindira pinthu pinacita munthu adapasa ife. Ife tinakwanisa kukhala akutsandzaya thangwi yakupasa, maseze anango akhonde kupereka takhuta thangwi ya pinthu pidaapasa ife. Mphapo ninji pinafuna kutiphedza toera tikhale akutsandzaya? Onani njira zingasi.
16. Tisafunika kukumbukanji tingapasa anango?
16 Kumbukani kuti mungapasa anango muli kutowezera Yahova. Iye asapasa anthu pinthu pyadidi mwakukhonda tsalakana khala asapereka takhuta peno nkhabe. (Mat. 5:43-48) Yahova apikira kuti ife tingapasambo ‘mbatikhonda dikhira kubwezerwa cinthu, muoni wathu unadzakhala ukulu.’ (Luka 6:35) “Cinthu” ceneci panango cisaphataniza kupereka takhuta. Natenepa, imwe nee munatsukwala anthu angakhonda kupereka takhuta kuna imwe, thangwi Yahova ndzidzi onsene asakupasani nkhombo thangwi ya ‘kupasa mwakukomerwa.’—Mis. 19:17; 2 Akor. 9:7.
17. Ndi cinthu cipi cinango cakuti tinakwanisa kucicita toera kutowezera Yahova pakupasa anango? (Luka 14:12-14)
17 Cinthu cinango cakuti tinakwanisa kucicita toera kutowezera Yahova pakupasa anango ndi kuphatisira pidalonga Yezu pa Luka 14:12-14. (Lerini.) Nee ndi pyakuipa kucemera panyumba pathu na kucitira udidi anthu akuti anakwanisambo kuticemera kunyumba kwawo. Mphapo tinacitanji tingaona kuti kazinji kene tisacemera anthu thangwi tisadikhira kuti iwo aticemerembo kunyumba kwawo? Pyenepi pingacitika, wangisirani toera kuphatisira pidalonga Yezu. Khalani wakupasa mwakudzala manja kuna munthu anadziwa imwe kuti nee anakwanisa kukubwezerani pinacita imwe. Tingacita pyenepi tinakhala akutsandzaya thangwi tiri kutowezera Yahova. Pontho tingakhonda kudikhira kubwezerwa pinthu pinacita ife, ndzidzi onsene tinakhala akutsandzaya maseze anango akhonde kupereka takhuta thangwi ya pinthu pidaacitira ife.
18. Ninji pinafuna kutiphedza toera tikhonde kunyerezera kuti anango nee asapereka takhuta?
18 Lekani kunyerezera kuti anango nee ndi akupereka takhuta. (1 Akor. 13:7) Anango angakhonda kupereka takhuta, ife tinakwanisa kubvundzika: ‘Kodi mwandimomwene iwo ndi akukhonda kupereka takhuta, peno aduwala kucita pyenepi?’ Panango ali na mathangwi anango anaacitisa kukhonda kupereka takhuta. Anango panango asakomerwa na pinthu pidacita imwe, mbwenye pisaanentsa toera kupereka takhuta kuna imwe. Panango iwo ali na manyadzo a kutambira ciphedzo, makamaka khala nduli iwo akhali na pinthu pizinji toera kupasa anango, mbwenye cincino nee ali napyobve. Mwandimomwene tingafuna abale na alongo athu, ife nee tinanyerezera kuti iwo ndi akukhonda kupereka takhuta, mbwenye tinapitiriza kupasa mwakutsandzaya.—Aef. 4:2.
19-20. Thangwi yanji tisafunika kukhala akupirira tingapasa anango? (Onanimbo foto.)
19 Khalani wakupirira. Mambo Salomoni wakuti akhali waudziwisi, alemba tenepa thangwi ya kupasa mwakudzala manja: “Ponya nkate wako m’madzi, thangwi zingapita ntsiku zizinji unaugumana pontho.” (Ekle. 11:1) Mafala anewa asatipfundzisa kuti anthu anango panango anapereka takhuta pakupita “ntsiku zizinji.” Onani citsandzo cinapangiza undimomwene unoyu.
20 Pyaka pizinji nduli, nkazi wa muyang’aniri wa cisa alembera tsamba yakuwangisa mulongo wakuti akhadamala kwene kubatizwa mbampanga kufunika kwa kupitiriza kukhala wakukhulupirika kuna Yahova. Pidapita pyaka pisere, mulongo atawira tsamba ineyi mbalonga: “Imwe nee musadziwa, mbwenye ndisafuna kukupangani kuti mwandiphedza kakamwe mu pyaka pyenepi pidapita.” Iye athimiza: “Imwe mwalemba mafala aufuni, pontho ine nee ndinaduwala lemba idaikha imwe pa tsamba ineyi.” a Pidamala iye kufokotoza pinentso pidathimbana na iye, alonga: “Midzidzi inango ine ndikhafuna kubwerera nduli mbandisiya kutumikira Yahova. Mbwenye ndzidzi onsene ndikhakumbuka lemba idaikha imwe pa tsamba, pontho pyenepi pyandiphedza toera ndikhonde kubwerera nduli.” Iye athimiza: “Mu pyaka pyenepi pisere, nkhabe cinthu cinango cidandiphedza kakamwe kupiringana tsamba ineyi na lemba idaikha imwe pa tsamba.” Nkazi wa muyang’aniri wa cisa atsandzaya kakamwe pidatambira iye tsamba ineyi pakupita “ntsiku zizinji.” Anthu anakwanisambo kupereka takhuta kuna ife pakupita ntsiku zizinji thangwi ya pinthu pidaacitira ife.
Munthu panango anapereka takhuta kuna ife pakupita ndzidzi uzinji (Onani ndima 20) b
21. Thangwi yanji muli dzololo toera kupitiriza kupasa anango mwakudzala manja ninga pinacita Yahova?
21 Ninga pidaona ife mu nsolo uno, Yahova aticita na luso yakupambulika. Iye aticita munjira yakuti tinakhala akutsandzaya kakamwe tingapasa anango. Ife tisatsandzaya tingakwanisa kuphedza abale na alongo athu. Pontho tisatsandzaya iwo angapereka takhuta kuna ife. Mbwenye mwakukhonda tsalakana khala munthu adaphedza ife apereka takhuta peno nkhabe, ife tinakwanisa kutsandzaya thangwi tacita cinthu cadidi. Kumbukani kuti mwakukhonda tsalakana pinthu pinapasa imwe anango, ‘Yahova anakwanisa kukupasani pizinji kakamwe.’ (2 Kro. 25:9) Ife nee tinakwanisa kupasa anango kupiringana Yahova. Pontho tingapaswa nkhombo na Yahova, nkhombo zenezi ndi zadidi kakamwe. Natenepa, tendeni tipitirize kupasa anango mwakudzala manja ninga pinacita Babathu wakudzulu.
NYIMBO 17 ‘Ndisafuna’
b MAFALA ANAFOKOTOZA FOTO: Mafoto ali kupangiza pidacita nkazi wa muyang’aniri wa cisa adalongwa pa ndima 20. Iye ali kulemba tsamba toera kuwangisa mulongo. Pakupita pyaka pizinji, mulongo adatambira tsamba ineyi, ali kulembambo tsamba toera kupereka takhuta kuna iye.
