1-2. (a) Mwakubverana na Misangani 16:31, tisafunika kuona tani abale na alongo athu akukalamba? (b) Ndi mibvundzo ipi inafuna kutawira ife mu nsolo uno?

MU PARKI ya ku Arkansas, ku Estados Unidos musagumanika miyala inacemerwa diamante. Mbwenye miyala ineyi nee yakhunganywa toera kusasanya pinthu pyakusiyana-siyana. Na thangwi ineyi, anthu azinji nee asaiona ninga yakufunika kakamwe, pontho nee asadzumatirwa nayo.

² Munjira ibodzi ene, abale na alongo athu akukalamba ndi ninga miyala ineyi ya diamante; iwo ndi akufunika kakamwe. Pontho Bhibhlya isalandanisa imbvi zawo na nthimba. (Lerini Misangani 16:31; 20:29) Mbwenye panango pinakhala pyakukhonda nentsa kupwaza abale na alongo anewa akukalamba. Aphale na atsikana angadzindikira kuti abale na alongo akukalamba ndi akufunika kakamwe, iwo anaphindula kakamwe. Mu nsolo uno, ife tinatawira mibvundzo mitatu: Thangwi yanji Yahova asaona abale na alongo akukalamba kukhala akufunika kakamwe? Thangwi yanji iwo ndi akufunika kakamwe mu gulu ya Yahova? Tisafunika kucitanji toera tiphindule mwakukwana na citsandzo cawo?

3. Mwakubverana na Masalmo 92:12-15, thangwi yanji abale na alongo akukalamba ndi akufunika kakamwe kuna Yahova?

³ Abale na alongo akukalamba ndi akufunika kakamwe kuna Yahova Mulungu. Iye asadziwa mwadidi abale na alongo anewa, pontho asakomerwa kakamwe na makhaliro awo adidi. Kusiyapo pyenepi, Yahova asatsandzaya kakamwe angaona abale na alongo akukalamba mbapanga aphale na atsikana pinthu pinaaphedza toera kupitiriza kutumikira Yahova mwakukhulupirika. (Yobe 12:12; 32:9; Mis. 1:1-4) Yahova asakomerwambo kakamwe na kupirira kwawo. (Mal. 3:16) Iwo asathimbana na nyatwa zizinji mu umaso wawo, mbwenye asapitiriza kukhala akukhulupirika  kuna Yahova. Cidikhiro cawo thangwi ya ntsogolo cisakhala cakuwanga kakamwe kupiringana mu ndzidzi udapfundza iwo undimomwene. Pontho Yahova asaafuna kakamwe thangwi iwo asapitiriza kudziwisa dzina yace ‘maseze iwo akalambe.’—Lerini Masalmo 92:12-15.

4. Ndi pinthu pipi pyakuti pinawangisa abale na alongo athu akukalamba?

⁴ Khala imwe muli kukalamba, khalani na cinyindiro cakuti Yahova asakumbuka mabasa onsene adacita imwe nduli. (Aheb. 6:10) Imwe mwamwaza mphangwa mwaphinga kakamwe, pontho pyenepi pisatsandzayisa kakamwe Babathu wakudzulu. Imwe mwapirira nyatwa zizinji, kuphatanizambo nyatwa zakuti zakutsukwalisani kakamwe. Imwe musabvera na kutsidzikiza midida yakulungama ya Bhibhlya, pontho musaphedzera mwakukhulupirika mabasa anacitwa mu gulu ya Yahova. Imwe musacita pyonsene pinakwanisa imwe toera kudzolowera macinjo mazinji anacitika mu gulu ya Yahova. Imwe musaphedza anango toera apitirize m’basa ya ndzidzi onsene. Yahova asakufunani kakamwe thangwi yakukhulupirika kwanu. Iye apikira kuti ‘nkhabe kudzasiya anthu ace akukhulupirika.’ (Masal. 37:28) Kusiyapo pyenepi, iye asakupasani cinyindiro ici: ‘Mpaka imwe mubuluke imbvi, ine ndinapitiriza kukutsalakanani.’ (Iza. 46:4) Natenepa, lekani kunyerezera kuti nakuti imwe mwakalamba, nee ndimwe wakufunika kakamwe mu gulu ya Yahova. Imwe ndimwe wakufunika kakamwe.

5. Ndi pinthu pipi pyakuti abale na alongo akukalamba asafunika kupikumbuka?

⁵ Abale na alongo akukalamba anakwanisa kuphatisirwa munjira zizinji mu gulu ya Yahova. Panango iwo nkhabe mphambvu ninga zikhali na iwo kale, mbwenye iwo ali na maluso mazinji kakamwe. Natenepa Yahova anakwanisa kuaphatisira munjira zakusiyana-siyana ninga pinafuna kuona ife mu pitsandzo pinatowera.

6-7. Longani pitsandzo pingasi pya m’Bhibhlya pya anthu akukalamba akuti apaswa nkhombo na Yahova thangwi ya kuntumikira mwakukhulupirika.

⁶ M’Bhibhlya muli na pitsandzo pyadidi pya anthu akukhulupirika akuti aphatisirwa na Yahova mu ndzidzi ukhali iwo ankhalamba. Mwacitsandzo, pikhali Mose na pyaka 80 pyakubalwa, iye atoma kutumikira ninga mprofeta wa Yahova mbatsogolera mbumba ya Izraeli.  Dhanyeli pikhali iye na pyaka pyakupiringana 90, Yahova apitiriza kumphatisira ninga mprofeta. Pontho pisaoneka kuti mpostolo Juwau akhali na pyaka pyakupiringana 90 pidapumirwa iye toera kulemba bukhu ya Apokalipse.

⁷ Atumiki anango azinji akukhulupirika a Yahova nee akhali akudziwika kakamwe, pontho pikhali pyakukhonda nentsa kupwazwa na anthu azinji. Mbwenye Yahova akhaaona, pontho aapasa nkhombo thangwi ya kukhulupirika kwawo. Mwacitsandzo, Simeoni akhali mamuna “wakulungama na wakugopa Mulungu,” mbwenye iye nee asalongwa kakamwe m’Bhibhlya. Ngakhale tenepo, Yahova akhandziwa, pontho ampasa mwai wakuona Yezu pikhali iye mwana mbalonga pinthu pikhafuna kucitika kuna Yezu na mai wace. (Luka 2:22, 25-35) Onanimbo mprofeta wa nkazi akhacemerwa Yana. Iye akhali nzice wa pyaka 84, “mbwenye ndzidzi onsene iye akhaenda ku templo.” Natenepa Yahova ampasa nkhombo thangwi ya kuenda kwace ndzidzi onsene ku templo, pontho akhala na mwai wakuona Yezu mu ndzidzi ukhali iye mwana. Pyenepi pisapangiza kuti Simeoni na Yana akhali akufunika kakamwe kuna Yahova.—Luka 2:36-38.

8-9. Kodi alongo akuti ndi azice asaphedzera tani gulu ya Yahova lero?

⁸ Lero, pana abale na alongo azinji akukalamba akuti asatumikira Yahova mwakukhulupirika, pontho iwo ndi pitsandzo pyadidi kuna aphale na atsikana. Onani citsandzo ca mulongo Lois Didur. Iye atoma kutumikira ninga mpainiya wakupambulika ku Kanadha pikhali iye na pyaka 21 pyakubalwa. Buluka penepo, iye atumikira mu pyaka pizinji pabodzi na mamunace akhacemerwa John wakuti akhali muyang’aniri wa cisa. Mukupita kwa ndzidzi, iwo atumikira pa Bheteli ya ku Kanadha mu pyaka pyakupiringana 20. Pikhali Lois na pyaka 58 pyakubalwa, iye na John aphembwa toera akatumikire ku Ukraniya. Kodi iwo acitanji? Kodi iwo anyerezera kuti nee tinakwanisabve kuenda katumikira ku dziko inango thangwi takalamba kakamwe? Nkhabe. M’mbuto mwace, iwo atawira kuenda, pontho John akhazikiswa toera kutumikira ninga m’bodzi wa komiti ya Filiali ya dziko ineyi. Pidapita pyaka pinomwe, John alowa, mbwenye Lois asankhula kupitiriza kutumikira kweneko. Lero, Lois ali na pyaka 81 pyakubalwa. Mbwenye iye asapitiriza kutumikira Yahova mwakukhulupirika ku Bheteli ya ku Ukraniya, pontho abale na alongo a pa Bheteli ineyi asanfuna kakamwe.

⁹ Alongo anango lero akuti ndi azice ninga Lois panango nee anaoniwa kakamwe ninga pikhacitwa iwo mu ndzidzi wakuti amuna awo akhali m’maso, ngakhale tenepo, iwo asapitiriza kukhala akufunika kakamwe. Yahova asakomerwa kakamwe na alongo akuti aphedzera amuna awo mu pyaka pizinji, pontho akuti asapitiriza kuntumikira mwakukhulupirika mpaka lero. (1 Tim. 5:3) Kusiyapo pyenepi, iwo ndi citsandzo cadidi kakamwe kuna aphale na atsikana.

10. Tony apangiza tani kukhala citsandzo cadidi kwa ife?

¹⁰ Abale na alongo azinji akukalamba akuti  asakhala okhene peno na acibale awo ndi akufunika kakamwe. Mwacitsandzo, m’bale Tony cincino iye asakhala ku nyumba inatsalakanwa ankhalamba. Iye abatizwa ku Pennsylvania, ku Estados Unidos da Amerika mwezi wa Agosto wa caka 1942, pikhali iye na pyaka 20 pyakubalwa. Pidamala iye kubatizwa, iye apangwa toera akhale nyankhondo. Mbwenye iye akhonda, natenepa iye aikhwa nkaidi mu pyaka piwiri na hafu. Iye na nkazace Hilda abala ana awiri mu undimomwene. Mu pyaka pizinji, Tony atumikira m’mipingo mitatu ninga muimiriri wa mpingo (wakuti cincino asadziwika ninga mbveranisi wa akulu a mpingo), pontho iye atumikirambo ninga muimiriri wa nsonkhano wa cisa. Kusiyapo pyenepi, iye akhaenda kaona anyakaidi, kutsogolera misonkhano na kucitisa mapfundziro a Bhibhlya kuna iwo. Cincino Tony ali na pyaka 98, ngakhale tenepo iye asacita pyonsene pinakwanisa iye toera kupitiriza kutumikira Yahova mbaphata basa pabodzi na abale na alongo mu mpingo wace.

11. Tinapangiza tani cilemedzo kuna abale na alongo akukalamba akuti asakhala okhene peno na acibale awo?

¹¹ Tinapangiza tani cilemedzo kuna abale na alongo akukalamba akuti asakhala okhene peno na acibale awo. Pingakwanisika, akulu a mpingo asafunika kuaphedza toera akwanise kugumanika pa misonkhano peno kubvesera misonkhano na kumwaza mphangwa. Ife tonsene tinakwanisa kupangiza citsalakano kuna iwo mu kuenda kaaona peno kucedza nawo mukuphatisira vidhyukonferensya. Ife tinakwanisambo kupangiza citsalakano cakupambulika kuna abale na alongo akukalamba akuti asakhala kutali na mpingo wawo. Mbwenye ife tisafunika kucita mphole-mphole toera tikhonde kuduwala abale na alongo anewa akukalamba. Tingacedza na abale na alongo athu akukalamba, anango mwa iwo nee asakhala akusudzuka toera kulonga pinthu pidaacitikira mu umaso wawo. Mbwenye pinakhala pyakuwangisa kakamwe kuna ife tingakhala na ndzidzi wa kuacita mibvundzo na kuabvesera mu ndzidzi unalonga iwo nkhombo zidakhala na iwo thangwi yakutumikira Yahova.

12. Ndi abale na alongo api anafuna kugumana ife mu mpingo wathu?

¹² Mu mpingo mwathu, ife tinakwanisambo kugumana abale na alongo akukalamba akuti ndi acitsandzo cadidi kakamwe. Mulongo anacemerwa Harriette atumikira Yahova mwakukhulupirika mu pyaka pizinji mu mpingo wace mu nzinda wa Jersey, ku Estados Unidos da Amerika. Buluka penepo iye afuluka mbaenda kakhala na mwanace wankazi. Abale na alongo a mu mpingo udaenda iye akhala na ndzidzi wakucedza naye, pontho iwo adzindikira kuti iye ndi wakufunika kakamwe. Mulongo Harriette awangisa abale na alongo a mu mpingo unoyu mukuapanga undimomwene udapfundza iye mu caka ca 1925. Pa ndzidzi unoyu, iye angaenda kamwaza mphangwa kazinji kene akhakwata xikova yakutsuka nayo mano thangwi akhadziwa kuti panango anamangwa mbaikhwa nkaidi. Mwandimomwene pyenepi pyacitikadi, thangwi mu caka ca 1933 iye aikhwa nkaidi m’maulendo mawiri. Mu ndzidzi unoyu, mamunace wakuti nee akhatumikira Yahova, apitiriza kutsalakana anawo atatu. Mwandimomwene, abale na alongo akukalamba ninga Harriette asafunika kulemedzwa kakamwe.

13. Tapfundzanji thangwi yakufunika kwa abale na alongo akukalamba mu gulu ya Yahova?

¹³ Abale na alongo athu akukalamba ndi akufunika kakamwe kuna Yahova na mu gulu yace. Iwo akwanisa kuona kuti Yahova asapasa nkhombo gulu yace na atumiki ace munjira zizinji. Iwo akwanisa kupfundza pinthu pizinji thangwi ya madodo akhacita iwo. Natenepa aoneni ninga ‘ncera wa udziwisi,’ pontho pfundzani kubulukira mu pitsandzo pyawo. (Mis. 18:4) Mungakhala na ndzidzi toera kuadziwa mwadidi, munawangisa cikhulupiro canu, pontho munapfundza pizinji na iwo.

14. Kodi lemba ya Deuteronomyo 32:7 isakulumiza aphale na atsikana toera acitenji?

¹⁴ Khalani na ndzidzi toera kucedza na abale na alongo akukalamba. (Lerini Deuteronomyo 32:7.) Panango iwo nee asakwanisa kuona mwadidi, kufamba mwadidi, kulonga mwadidi, mbwenye iwo asapitiriza na cifuno cakucita pizinji m’basa ya Yahova, pontho iwo acita ‘dzina yadidi’ kuna Yahova. (Koel. 7:1) Kusiyapo pyenepi, kumbukani kuti thangwi yanji Yahova asaalemedza kakamwe. Natenepa pitirizani kualemedza. Khalani ninga Elizeu. Iye akakamira kukhala na Eliya mpaka pa ntsiku yakumalisa ya umaso wa Eliya. M’maulendo matatu, Elizeu apanga Eliya kuti: ‘Nee ndinakusiyani.’—2 Ama. 2:2, 4, 6.

15. Ndi mibvundzo ipi yakuti tinakwanisa kuicita abale na alongo akukalamba?

¹⁵ Pangizani citsalakano kuna abale na alongo akukalamba mukuacita mibvundzo mwacilemedzo. (Mis. 1:5; 20:5; 1 Tim. 5:1, 2) Aciteni mibvundzo ninga na iyi: “Pikhali imwe mwana, ninji cidakupasani cinyindiro cakuti mwagumana undimomwene?” “Pinthu pidakucitikirani mu umaso wanu pyakuphedzani tani toera kukhala na uxamwali wakuwanga na Yahova?” “Ninji pisakuphedzani toera kupitiriza kukhala akutsandzaya m’basa ya Yahova?” (1 Tim. 6:6-8) Buluka penepo abvesereni mu ndzidzi unalonga iwo.

16. Abale na alongo akukalamba angacedza pabodzi na aphale na atsikana, onsene anaphindula tani?

¹⁶ Abale na alongo akukalamba angacedza na aphale na atsikana, onsene asaphindula. (Aroma 1:12) Kucedza kweneko kunaphedza aphale na atsikana toera kuona kuti Yahova asatsalakana atumiki ace, pontho kunaphedzambo abale na alongo akukalamba toera kupibva kuti ndi akufunika kakamwe. Kusiyapo pyenepi, abale na alongo akukalamba anatsandzaya kakamwe kukupangani nkhombo zidakhala na iwo thangwi yakutumikira Yahova.

17. Thangwi yanji tisalonga kuti abale na alongo athu akukalamba asapitiriza kukhala akubalika kakamwe mu ndzidzi unakalamba iwo?

¹⁷ Munthu angakalamba, kubalika kwace kusamala. Mbwenye ale anakhala akukhulupirika kuna Yahova kubalika kwawo kusathimizirika mu ndzidzi unakalamba iwo. (1 Ates. 1:2, 3) Thangwi yanji tisalonga tenepo? Thangwi mu pyaka pizinji, iwo atawirisa nzimu wa Mulungu toera kuapfundzisa na kuaphedza kukulisa makhaliro adidi kakamwe. Tingawangisira toera kudziwa mwadidi abale na alongo athu akukalamba, kualemedza na kupfundza kubulukira mu citsandzo cawo, pyenepi pinatiphedza toera kuaona kuti ndi akufunika kakamwe.

18. Tinapfundzanji mu nsolo unatowera?

¹⁸ Aphale na atsikana angalemedza abale na alongo akukalamba, pontho abale na alongo akukalamba angalemedza aphale na atsikana, mpingo usakhala wakuwanga kakamwe. Mu nsolo unatowera, ife tinapfundza kuti abale na alongo akukalamba anapangiza tani kuti asalemedza aphale na atsikana mu mpingo.