1. Ndi ndzidzi upi wakuti pisakhala pyakunentsa toera kutumikira Yahova?

NDI ndzidzi upi wakunentsa kakamwe toera kutumikira Yahova? Ndi ndzidzi wakuti musathimbana na nyatwa zizinji peno ndi ndzidzi wakuti musathimbana na nyatwa zakucepa? Pisakhala pyakukhonda nentsa kwa ife kunyindira Yahova tingathimbana na nyatwa. Mphapo ndiye tani mu ndzidzi wakuti nee tisathimbana na nyatwa? Kodi tisaduwala kuti tisafunika kutumikira Mulungu? Yahova acenjeza Aizraeli thangwi ya pyenepi.—Deut. 6:10-12.

2. Thangwi yanji Mambo Aza ndi citsandzo cadidi?

² Mambo Aza akhacita pinthu mwandzeru. Thangwi iye ndzidzi onsene akhanyindira Yahova. Iye nee akhatumikira basi ene Yahova m’midzidzi ya nyatwa, mbwenye akhatumikirambo Yahova m’midzidzi ya ntendere. Pyenepi pisapangiza kuti kutomera uwana wace, ‘Aza aperekeka kuna Yahova na ntimace onsene.’ (1 Ama. 15:14) Iye apangizambo kuti akhalambira Yahova na ntimace onsene mu kufudza ulambiri wauthambi mu Yuda. Bhibhlya isalonga kuti: ‘Iye abulusa maguwa a alungu a madziko akunja, afudza mbuto zaulambiri, agwanda-gwanda miti ikhalambirwa, mbagwisa mizati ikhalambirwa.’ (2 Pya dziko. 14:3, 5) Pontho Aza abulusa cidzo cikhali na yavu wace wankazi akhacemerwa Maaka. Thangwi yanji? Thangwi iye akhakulumiza anthu toera kulambira dzimunthu.—1 Ama. 15:11-13.

3. Tinapfundzanji mu nsolo uno?

³ Aza nee afudza basi ene madzimunthu, mbwenye akulumizambo anthu a mu Yuda toera alambire pontho Yahova. Natenepa Yahova apasa nkhombo Aza na Aizraeli mbaacitisa kukhala pa ntendere. Mu pyaka khumi pya utongi wa Aza, ‘dziko ikhali mu  ntendere.’ (2 Pya dziko. 14:1, 4, 6) Mu nsolo uno, ife tinapfundza kuti Aza aphatisira tani ndzidzi unoyu wantendere. Pontho tinadzapfundzambo kuti Akristu a mu ndzidzi wa apostolo aphatisira tani mwadidi ndzidzi ukhali iwo pa ntendere. Pakumalisa, ife tinatawira mbvundzo uyu: Khala imwe musakhala mu dziko yakuti mautongi asatawirisa Mboni za Yahova toera kulambira Mulungu wawo, kodi musaphatisira tani ndzidzi unoyu wantendere?

4. Mwakubverana na 2 Pya dziko ya Israele 14:2, 6, 7, Aza aphatisira tani ndzidzi wantendere?

⁴ Lerini 2 Pya dziko ya Israele 14:2, 6, 7. Aza apanga anthu kuti ndi Yahova ‘adaapasa ntendere mu dziko yonsene.’ Mbwenye Aza nee aphatisira ndzidzi unoyu wantendere toera kupuma. Iye aphatisira ndzidzi unoyu toera kumanga mizinda, mipanda, mbuto za ndzulu na misuwo mikulu. Pontho iye apanga anthu a mu Yuda kuti: ‘Dziko iciri m’manja mwathu.’ Kodi Aza akhafuna kulonganji na mafala anewa? Iye akhafuna kulonga kuti anthu mbadakwanisa kufamba mwakusudzuka, pontho mbadakwanisa kucita mabasa awo nee kupingizwa na anyamalwa. Kusiyapo pyenepi, iye akulumiza anthu toera aphatisire mwadidi ndzidzi unoyu wantendere.

5. Thangwi yanji Aza akhunganya anyankhondo ace?

⁵ Aza aphatisirambo ndzidzi unoyu wantendere toera kukhunganya anyankhondo ace. (2 Pya dziko. 14:8) Kodi pyenepi pisabveka kuti iye nee akhanyindira Yahova? Nkhabe. Aza akhadziwa kuti ineyi ikhali basa yace ninga mambo toera kukhunganya anthu thangwi ya nyatwa zikhafuna kudzathimbana na iwo ntsogolo. Pontho iye akhadziwa kuti ndzidzi unoyu wantendere nee mbudakhala kwenda na kwenda.

6. Kodi Akristu a mu ndzidzi wa apostolo aphatisira tani ndzidzi wantendere?

⁶ Maseze Akristu a mu ndzidzi wa apostolo akhatcingwa kazinji kene, iwo akhalambo  na midzidzi ya ntendere. Kodi iwo aphatisira tani midzidzi ineyi? Iwo akhamwaza mphangwa zadidi mwaphinga. Bukhu ya Mabasa isalonga kuti iwo ‘akhabvera Yahova.’ Iwo akhapitiriza kumwaza mphangwa zadidi, na thangwi ineyi “akhapitiriza kuthimizirika.” Mwakukhonda penula Yahova apasa nkhombo basa yawo yakumwaza mphangwa ikhacita iwo m’midzidzi ineyi ya ntendere.—Mabasa 9:26-31.

7-8. Kodi Paulu na Akristu anango abandza mwai toera kucitanji? Fokotozani.

⁷ Akristu a mu ndzidzi wa apostolo akhacita pyonsene pikhakwanisa iwo toera kumwaza mphangwa zadidi. Mwacitsandzo, pidadzindikira mpostolo Paulu kuti iye mbadakwanisa kumwaza mphangwa kuna anthu azinji ku Efeso, iye abandza mwai unoyu toera kumwaza mphangwa na kucita anyakupfundza mu nzinda unoyu.—1 Akor. 16:8, 9.

⁸ Apostolo na akulu a mu Yerusalemu pidamala iwo kutsalakana nkandzo wa kusidzwa mu caka 49, pyenepi pyacitisa Paulu na Akristu anango kumwaza mphangwa zadidi kuna anthu azinji. (Mabasa 15:23-29) Kusiyapo pyenepi, Paulu pabodzi na Akristu anango pidadziwisa iwo mpingo thangwi ya njira idatsalakanwa nkandzo unoyu, natenepa iwo awangisira kakamwe toera “kumwaza mphangwa zadidi za mafala a Yahova.” (Mabasa 15:30-35) Ndi nkhombo zipi zidakhala na iwo? Bhibhlya isalonga kuti: “Mipingo ikhapitiriza kuwangiswa cikhulupiro, pontho anyakupfundza akhathimizirika ntsiku zonsene.”—Mabasa 16:4, 5.

9. Ndi mwai upi wakuti usagumanika m’madziko mazinji lero, pontho tisafunika kubvundzikanji?

⁹ M’madziko mazinji lero, ife nee tisakhondeswa kumwaza mphangwa. Kodi mu dziko inakhala imwe, musatawiriswa kumwaza mphangwa? Khala ndi tenepo, bvundzikani: ‘Kodi ine ndisabandza mwai unoyu toera kumwaza mphangwa?’ Mu ntsiku zino zakumalisa, atumiki a Yahova asakhala akuphatika kakamwe na basa yakumwaza mphangwa na kupfundzisa anthu. (Marko 13:10) Pontho m’basa ineyi muna pinthu pizinji pyakuti atumiki a Yahova anakwanisa kupicita.

10. Kodi lemba ya 2 Timoti 4:2 isatikulumiza toera kucitanji?

¹⁰ Munaphatisira tani mwadidi ndzidzi wantendere? (Lerini 2 Timoti 4:2.) Ndiye tani kucita masasanyiro toera kuona khala imwe peno m’bodzi wa pa banja panu anakwanisa kutumikira ninga mpainiya? Uno nee ndi ndzidzi wa kukoya pinthu pya mpfuma, thangwi ipyo nee pinadzatipulumusa pa nyatwa ikulu.—Mis. 11:4; Mat. 6:31-33; 1 Juwau 2:15-17.

11. Kodi amwazi mphangwa anango asacitanji toera kumwaza mphangwa zadidi kuna anthu azinji?

¹¹ Amwazi mphangwa azinji asapfundza cilongero cinango toera aphedze anthu kuti adziwe Yahova. Gulu ya Yahova isabulusa mabukhu mu pilongero pyakusiyana-siyana toera kutiphedza kumwaza mphangwa kuna anthu azinji. Mwacitsandzo, mu caka ca 2010 mabukhu athu abuluswa mu pilongero cifupi na 500. Mbwenye lero asabuluswa mu pilongero pyakupiringana 1.000.

12. Ndi mabvero api asakhala na anthu angabva mphangwa za Umambo mu cilongero cawo? Perekani citsandzo.

¹² Ndi mabvero api asakhala na anthu angabva mphangwa za Yahova mu cilongero cawo? Mulongo unango agumanika pa nsonkhano wa gawo ku Memphis, Tennessee, Estados Unidos da América. Nsonkhano unoyu waphatisira cilongero ca Kinyarwanda, cilongero cakuti cisalongwa ku Rwanda, Kongo (Kinshasa), na Uganda. Pidamala nsonkhano unoyu mulongo alonga: “Papita pyaka 17 mbandiri kuno ku Estados Unidos, mbwenye uno ndi ulendo wakutoma kubvesesa mwadidi nsonkhano unoyu.” Mwandimomwene,  mulongo unoyu akomerwa kakamwe pidabva iye nsonkhano unoyu mu cilongero cace. Kodi imwe munakwanisa kupfundza cilongero cinango toera kuphedza anthu a mu cisa canu kuti adziwe Yahova? Panango ndi pyadidi kucita pyenepi thangwi iwo panango anakomerwa kakamwe angabva mphangwa mu cilongero cawo. Pontho dziwani kuti mungawangisira kucita pyenepi munakhala akutsandzaya kakamwe.

13. Abale athu a ku Rusiya aphatisira tani mwadidi ndzidzi wantendere?

¹³ Nee ndi abale athu onsene ali na ufulu wa kumwaza mphangwa. M’madziko anango, abale athu nee asamwaza mphangwa mwa ufulu thangwi mautongi asakhondesa basa yathu yakumwaza mphangwa. Mwacitsandzo, nyerezerani pinacitikira abale athu a ku Rusiya. Iwo akhatcingwa mu pyaka pizinji, mbwenye kutomera mwezi wa Março wa caka 1991 utongi wa dziko ineyi watawirisa toera kulambira Yahova mwaufulu. Pa ndzidzi unoyu, ku Rusiya kukhali na amwazi mphangwa cifupi na 16.000. Pidapita pyaka 20 kutomera mu caka ceneci, numero ya amwazi mphangwa yathimizirika kupiringana 160.000. Pyenepi pisapangiza kuti abale athu amwaza mphangwa mwa phinga mu ndzidzi unoyu ukhali iwo pa ufulu. Mbwenye ndzidzi unoyu wa ufulu nee waenda kutali. Maseze abale athu a ku Rusiya nee alibve paufulu iwo asaphatisira njira zonsene zinakwanisa iwo toera kupitiriza kutumikira Yahova mwaphinga.

14-15. Yahova aphatisira tani mphambvu zace toera kuphedza Aza?

¹⁴ Mu ntsiku za Aza ndzidzi wantendere nee wadzakhala kwenda na kwenda. Thangwi nkulu wa anyankhondo anacemerwa Zera wa ku Etiopya adzabwera na anyankhondo ace a mphambvu akupiringana 1.000.000 toera kufudza dziko ya Yuda. Mbwenye Aza anyindira  Yahova Mulungu wace. Iye aphembera: ‘Tiphedzeni Yahova Mulungu wathu, thangwi ife tisanyindira imwe, pontho tabwera mu dzina yanu toera kumenyana na nsoka ukulu wa anyankhondo awa.’—2 Pya dziko. 14:11.

¹⁵ Maseze anyankhondo a Etiopya akhali azinji kakamwe, Aza akhadziwa kuti Yahova ali na mphambvu zakuphedza atumiki Ace. Mwandimomwene Yahova aphedza atumiki ace mbapha anyankhondo a ku Etiopya.—2 Pya dziko. 14:8-13.

16. Tisadziwa tani kuti ndzidzi wantendere unadzamala?

¹⁶ Ife nee tisadziwa pinthu pyonsene pinafuna kuticitikira ntsogolo, mbwenye tisadziwa kuti ndzidzi wantendere uli na atumiki a Mulungu lero ndi wakucepa. Kumbukani kuti Yezu alonga mwanyapantsi kuti mu ntsiku za kumalisa, anyakupfundza ace ‘mbadaidiwa na anthu a mitundu yonsene.’ (Mat. 24:9) Munjira ibodzi ene, mpostolo Paulu alonga kuti “onsene anafuna kukhala na umaso wakuperekeka kuna Mulungu mwakuphatana na Kristu Yezu, anadzatcingwambo.” (2 Tim. 3:12) Sathani “ali na ukali ukulu,” pontho ife nee tinakwanisa kucalira ukali wace.—Apok. 12:12.

17. Kodi cikhulupiro cathu panango cinadzayeserwa tani?

¹⁷ Mwakukhonda dembuka, ife tonsene tinadzathimbana na mayesero a cikhulupiro cathu. Thangwi kunadzoneka “nyatwa ikulu yakuti cipo yaoneka kale kubulukira pakucitwa kwa dziko mpaka cincino.” (Mat. 24:21) Mu ndzidzi unoyu, panango acibale athu anatitcinga peno basa yathu inakhondeswa. (Mat. 10:35, 36) Kodi pa ndzidzi unoyu ife tinadzanyindira Yahova ninga pidacita Aza?

18. Mwakubverana na Ahebheri 10:38, 39, thangwi yanji tisafunika kukhunganyika toera kukhala na cikhulupiro cakuwanga?

¹⁸ Lero Yahova asatikhunganya toera tikhale na cikhulupiro cakuwanga. Iye asaphatisira “m’bandazi wakukhulupirika na wandzeru” toera kutipasa cakudya cauzimu “pa ndzidzi wakuthema” cakuti cisatiphedza toera kukhala akuwanga mwauzimu. (Mat. 24:45) Natenepa, m’bodzi na m’bodzi wa ife asafunika kuwangisira toera kukhala na cikhulupiro cakuwanga kuna Yahova.—Lerini Ahebheri 10:38, 39.

19-20. Mwakubverana na 1 Pya dziko ya Israele 28:9, ndi mibvundzo ipi yakuti tisafunika kucitika tekhene, pontho thangwi yanji tisafunika kucita mibvundzo ineyi?

¹⁹ Ninga pidacita Mambo Aza, ife tisafunika  ‘kusaka Yahova.’ (2 Pya dziko. 14:4; 15:1, 2) Ife tinatoma kusaka Yahova tingapfundza thangwi ya iye mbatibatizwa. Buluka penepo, ife tisafunika kucita pyonsene pinakwanisa ife toera ufuni wathu kuna Yahova ukhale wakuwanga. Natenepa bvundzikani: ‘Kodi ine ndisagumanika pa misonkhano ya mpingo mwakukhonda phonya?’ Tingagumanika pa misonkhano, tisagumana mphambvu toera kupitiriza kutumikira Yahova, pontho tisawangiswa na abale na alongo athu. (Mat. 11:28) Kusiyapo pyenepi, tisafunika kubvundzika: ‘Kodi ine ndiri na nsambo wakucita pfundziro ya munthu paekha?’ Khala muli na banja, kodi musakhala na ndzidzi wakucita kulambira kwa banja masumana onsene? Khala musakhala mwekhene, kodi musakhala na ndzidzi wakupfundza ninga pinacita mabanja, pontho musacita pyonsene pinakwanisa imwe toera kumwaza mphangwa na kupfundzisa anango?

²⁰ Thangwi yanji tisafunika kucitika mibvundzo ineyi? Bhibhlya isalonga kuti Yahova asadziwa piri mu ntima mwathu na manyerezero athu, natenepa ife tisafunikambo kucita pibodzi pyene. (Lerini 1 Pya dziko ya Israele 28:9.) Tingaona kuti tisafunika kucita macinjo thangwi ya manyerezero athu na makhaliro athu, tisafunika kuphemba Yahova toera atiphedze kucita macinjo anewa. Uno ndi ndzidzi toera kukhunganyika thangwi ya mayesero anafuna kuthimbana na ife ntsogolo. Natenepa lekani tawirisa kuti cinthu consene cikudzudzumiseni toera kuphatisira mwadidi ndzidzi wantendere.