1. Anthu azinji lero asaona tani udziwisi unagumanika m’Bhibhlya? (Misangani 1:20, 21)

 M’MADZIKO mazinji, kazinji kene tisaona amwazi mphangwa mbakagawira mabukhu m’miseu mwakutsandzaya. Kodi imwe mwatomambo kale kucita basa ineyi yakutsandzayisa? Khala ndi tenepo, panango imwe musakumbuka mafala anagumanika m’bukhu ya Misangani analonga thangwi ya udziwisi unacemera m’mbuto zinagumanika anthu, toera anthu aubve. (Lerini Misangani 1:20, 21.) M’Bhibhlya na m’mabukhu athu, ife tisagumana udziwisi wa Yahova wakuti ndi ‘udziwisi wandimomwene.’ Ndi udziwisi unoyu unafuna anthu toera akwanise kugumana umaso wakukhonda mala. Ife tisakhala akutsandzaya kakamwe anthu angatawira ibodzi mwa mabukhu athu. Mbwenye anango asaakhonda thangwi iwo nee asafuna kudziwa pinalonga Bhibhlya. Anango asatiseka thangwi asanyerezera kuti uphungu wa m’Bhibhlya nee usaphatabve basa cincino. Anangombo asapwaza pinapfundzisa Bhibhlya thangwi ya makhaliro adidi, mbanyerezera kuti ale anatowezera pipfundziso pyenepi ndi akuuma ntima, pontho asanyerezera kuti iwo ndi akufunika kakamwe kupiringana anango. Ngakhale tenepo, thangwi ya ufuni wace, Yahova asapitiriza kupasa udziwisi wandimomwene anthu onsene. Iye asacita tani pyenepi?

2. Tinagumana kupi udziwisi wandimomwene lero? Mphapo anthu azinji asasankhula kucitanji?

² Ibodzi mwa njira zinaphatisira Yahova toera kutipasa udziwisi wandimomwene lero ndi Mafalace, Bhibhlya. Anthu azinji ali nayo Bhibhlya. Mphapo ndiye tani thangwi ya mabukhu athu anabvekesa pinalongwa m’Bhibhlya? Thangwi ya nkhombo za Yahova iwo asagumanika mu pilongero pyakupiringana 1.000. Ale analeri, mbaphatisira pinaleri iwo asaphedzeka kakamwe. Mbwenye anthu azinji nee asabvesera udziwisi wandimomwene  wa Yahova. Iwo angafuna kucita pisankhulo asanyindira ndzeru zawo, peno uphungu wa anthu anango. Pontho anango asationa ninga ndife anthu akupwazika thangwi yakutowezera pinalonga Bhibhlya. Mu nsolo uno tinaona kuti thangwi yanji anthu asacita pyenepi. Mbwenye pakutoma tendeni tione kuti tinacitanji toera tikhale na udziwisi wa Yahova.

3. Tinapangiza tani kuti tiri na udziwisi wandimomwene?

³ Bhibhlya isalonga: ‘Kugopa Yahova ndi kutoma kwa udziwisi, pontho kudziwa Wakucena Kakamwe ndi kubvesesa pinthu.’ (Mis. 9:10) Udziwisi ndi luso yakuphatisira pire pinadziwa ife toera kucita pisankhulo pyadidi. Mbwenye ife tinapangiza kuti tiri na udziwisi wandimomwene ‘tingadziwa Wakucena Kakamwe,’ peno tingadziwa pakutoma kuti Yahova asanyerezera tani thangwi ya cisankhulo cakufunika cinafuna ife kucita. Ife tinakwanisa kucita pyenepi tingaona kuti Bhibhlya na mabukhu athu asalonganji thangwi ya pyenepi. Tingacita pyenepi tinapangiza kuti tiri na udziwisi wandimomwene.—Mis. 2:5-7.

4. Thangwi yanji nkhabepo unango wakuti anakwanisa kutipasa udziwisi wandimomwene kusiyapo Yahova?

⁴ Nkhabepo unango wakuti anakwanisa kutipasa udziwisi wandimomwene kusiyapo Yahova. (Aroma 16:27) Thangwi yanji tiri kulonga pyenepi? Cakutoma, thangwi iye ndiye Adaticita, pontho asadziwa pyonsene thangwi ya pinthu pidacita iye. (Masal. 104:24) Caciwiri, pyonsene pidacita Yahova pisapangiza kuti iye ndi waudziwisi. (Aroma 11:33) Cacitatu, onsene anaphatisira udziwisi wa Yahova, ndzidzi onsene asakhala na nkhombo. (Mis. 2:10-12) Ife tingafuna kukhala na udziwisi wandimomwene, tisafunika kutawira pipfundziso pyenepi pyakutoma pya m’Bhibhlya, buluka penepo mbatitawirisa kuti pipfundziso pyenepi pitsogolere pisankhulo pyathu na pinacita ife.

5. Ninji pinacitika anthu angakhonda kutawira kuti udziwisi wandimomwene basi ene usabuluka kuna Yahova?

⁵ Anthu azinji anagumana ife m’basa yakumwaza mphangwa asatawira kuti pinthu pyacitwa munjira yakudzumisa kakamwe. Mbwenye iwo asakhonda kuti alipo adapicita mbalonga kuti pinthu pyenepi pyacita kusanduka. Anango asalonga kuti asakhulupira Mulungu, mbwenye iwo asalonga kuti mitemo inagumanika m’Bhibhlya ndi yakale kakamwe mbasankhula kutowezera pinaona iwo kuti ndi pyadidi. Mphapo ninji pinaacitikira? Thangwi yakunyindira udziwisi wawo kusiyapo wa Mulungu, kodi dziko isakhala mbuto yadidi kakamwe? Kodi iwo asakhala na kutsandzaya kwandimomwene peno asakhala na cidikhiro cakunyindirika ca ntsogolo? Tingayang’ana n’khundu mwathu tisaona undimomwene uyu wakufunika kakamwe: ‘Nkhabeko udziwisi, ndzeru peno uphungu wakuti unakwanisa kuthimbana na Yahova.’ (Mis. 21:30) Pyenepi pisatikulumiza toera tipitirize kuphemba Yahova kuti atipase udziwisi wandimomwene. Mbwenye mwakutsukwalisa anthu azinji nee asacita pyenepi. Thangwi yanji?

6. Mwakubverana na Misangani 1:22-25, ndi anthu api akuti nee asabvesera udziwisi wandimomwene?

⁶ Anthu azinji nee asabvesera udziwisi wandimomwene ‘ungakhuwa m’miseu.’ Mwakubverana na Bhibhlya pana misoka mitatu ya anthu akuti asakhonda udziwisi: ‘Anthu akusowa udziwisi,’ ‘anyakusingirira’ na ‘madzemwa.’ (Lerini Misangani 1:22-25.) Cincino tendeni tione pinacitisa anthu anewa kukhonda udziwisi wa Mulungu na pinafunika ife kucita toera kucalira kukhala ninga iwo.

7. Thangwi yanji anango asasankhula kupitiriza kukhala ‘anthu akusowa udziwisi’?

⁷ ‘Anthu akusowa udziwisi’ ndi ale akuti  asakhulupira pyonsene, peno ale akuti asanyengezwa mwakukhonda nentsa. (Mis. 14:15) Kazinji kene tisagumana anthu ninga na anewa m’basa yathu yakumwaza mphangwa. Mwacitsandzo, nyerezerani pya anthu azinji kakamwe ananyengezwa na atsogoleri a mauphemberi peno atsogoleri a ndale. Anango asatsukwala kakamwe angadzindikira kuti anyengezwa na atsogoleri anewa. Mbwenye ale analongwa pa Misangani 1:22 asasankhula kukhala anthu akusowa udziwisi, thangwi iwo asafuna pyawo kukhala tenepo. (Yer. 5:31) Iwo basi ene asakomerwa kucita pinafuna iwo mbakhonda kufuna kupfundza pinalonga Bhibhlya na kubvera mitemo inagumanika mwenemo. Anthu azinji asanyerezera ninga nkazi m’bodzi wa ku Quebec, Kanadha, wakuti akhafuna kakamwe pya uphemberi adalonga tenepa kuna m’bodzi wa Mboni za Yahova: “Khala ntsogoleri wathu ali kutinyengeza, ife nkhabe mulando, mulando uli na iye!” Mwandimomwene ife nee tisafunika kukhala ninga anthu anewa akuti asapitiriza kupwaza udziwisi wandimomwene!—Mis. 1:32; 27:12.

8. Ninji pinafuna kutiphedza toera kukhala anthu audziwisi?

⁸ Ndi thangwi yace Bhibhlya isatiphemba toera tikhonde kukhala ninga anthu akusowa udziwisi, mbwenye “tikhale ninga akulu pakubvesesa [kwathu] pinthu.” (1 Akor. 14:20) Ife tisakhala na udziwisi wandimomwene tingaphatisira mu umaso wathu pinapfundza ife m’Bhibhlya. Mwapang’ono-pang’ono ife tisaona tekhene kuti pinthu pyenepi pinapfundzisa Bhibhlya pisatiphedza toera kucalira nyatwa na kucita pisankhulo mwandzeru. Tisafunika kunyerezera thangwi ya pisankhulo pidacita ife. Khala papita ndzidzi mbatikapfundza Bhibhlya na kugumanika pa misonkhano, ife tisafunika kubvundzika kuti thangwi yanji tidzati kucita macinjo akufunika toera kuperekeka kuna Yahova mbatibatizwa. Khala ndife akubatizwa, ife tisafunika kubvundzika: Kodi tiri kuwangisira toera kuthambaruka ninga m’mwazi mphangwa peno mpfundzisi wa mphangwa zadidi? Pisankhulo pinacita ife pisapangiza kuti tisaphatisira pinapfundza ife m’Bhibhlya? Tisatsalakana anango ninga pikhacita Yezu? Tingadzindikira kuti alipo makhundu anafunika ife kusasanyira, tisafunika kubvera uphungu wa Yahova wakuti ‘usacitisa munthu wakusowa maluso kukhala waudziwisi.’—Masal. 19:7.

9. ‘Anyakusingirira’ asapangiza tani kuti nee asafuna udziwisi wa Mulungu?

⁹ Nsoka waciwiri wa ale anapwaza udziwisi wa Mulungu ndi wa ‘anyakusingirira.’ Midzidzi inango ife tisagumana anthu ninga na anewa m’basa yathu yakumwaza mphangwa, pontho iwo asakomerwa kakamwe na kusingirira anango. (Masal. 123:4) Mbwenye Bhibhlya ikhadalonga kale kuti mu ntsiku zakumalisa mbapadaoneka anyakusingirira. (2 Ped. 3:3, 4) Ninga pidacitika na akamwene a Loti, anthu anango lero nee asabvera macenjezo anapereka Mulungu. (Gen. 19:14) Azinji asaseka ale anatowezera pinalonga Bhibhlya. Pontho anyakusingirira asacita pinthu mwakubverana na “pifuno pyawo pyakuipa.” (Yuda 7, 17, 18) Pinalonga Bhibhlya thangwi ya anyakusingirira pisabverana kakamwe na pinacita ale adasandukira gulu na anango akuti nee asabvera Yahova!

10. Mwakubverana na Masalmo 1:1, tinacitanji toera kucalira kukhala ninga anyakusingirira?

¹⁰ Ife tingakhonda kucita mphole-mphole mwakukhonda nentsa tinacitambo pinthu ninga anyakusingirira. Mphapo tinacitanji toera pinthu pyenepi pikhonde kucitika? Njira ibodzi yakucita pyenepi ndi kucalira kucita uxamwali na anthu akuti nsambo wawo ndi wakudungunya. (Lerini Masalmo 1:1.) Pyenepi pisabveka kuti ife nee tisafunika kubvesera peno kuleri mphangwa za ale adasandukira gulu ya Yahova.  Thangwi tingakhonda kucita mphole-mphole mwapang’ono-pang’ono tinatoma kupenula pitsogolero pinatipasa Yahova na gulu yace. Toera kucalira kugwera mu nsampha unoyu m’bodzi na m’bodzi wa ife asafunika kubvundzika: ‘Kodi kazinji kene ndisakhala na cipendamiro ca kudungunya ndingatambira pitsogolero pipswa? Ndiri na nsambo wakuona basi ene madodo anacita abale anatitsogolera?’ Tingasiya mwakucimbiza kucita pinthu ninga na pyenepi, ife tinakomeresa Yahova.—Mis. 3:34, 35.

11. ‘Madzemwa’ asaona tani mitemo ya Yahova?

¹¹ Nsoka wacitatu unapwaza udziwisi wa Mulungu ndi wa ‘madzemwa.’ Iwo ndi madzemwa thangwi asakhonda kucita pinthu mwakubverana na mitemo ya Mulungu. Iwo asacita pinthu pinaona iwo kuti ndi pyadidi. (Mis. 12:15) Munjira ineyi, iwo asakhonda Yahova wakuti ndiye anapasa udziwisi wandimomwene. (Masal. 53:1) Tingagumana anthu ninga na anewa m’basa yathu yakumwaza mphangwa, iwo asatisandika kakamwe thangwi yakuphatisira kwathu pinalonga Bhibhlya. Mbwenye iwo nkhabe kutipasa uphungu wadidi. Bhibhlya isalonga: ‘Dzemwa nkhabe kwanisa kukhala na udziwisi wandimomwene; iye nkhabe cakulonga pansuwo wa nzinda.’ (Mis. 24:7) Vesi ineyi isapangiza kuti madzemwa nkhabe kwanisa kupereka uphungu wadidi. Ndi thangwi yace Yahova asaticenjeza toera ‘tikhale kutali na dzemwa.’—Mis. 14:7.

12. Ninji pinafuna kutiphedza toera tikhonde kukhala ninga madzemwa?

¹² Mwakusiyana na ale anaida uphungu wa Mulungu, ife tisafuna kakamwe matongero a Yahova na mitemo yace. Ufuni wathu usathimizirika kakamwe tingaona pinacitika kuna ale anabvera Yahova na kuna ale anakhonda kumbvera. Cincino tendeni tione nyatwa zinakhala na ale anakhonda kubvera uphungu wa Yahova. Buluka penepo, onani nkhombo zinakhala na imwe thangwi yakubvera Mulungu.—Masal. 32:8, 10.

13. Kodi Yahova asatikakamiza toera kubvera uphungu wace?

¹³ Yahova asapasa udziwisi wace onsene anaufuna, mbwenye iye nkhabe kukakamiza munthu toera kuutawira. Basi ene iye asalonga nyatwa zinafuna kugwera ale anakhonda udziwisi wace. (Mis. 1:29-32) Ale anakhonda kubvera Yahova ‘anathabuka thangwi ya pidacita iwo.’ Makhaliro awo akuipa anaacitisa kutsukwala, kuthabuka na pakumalisira kuphiwa. Mbwenye Bhibhlya isalonga tenepa kuna ale anabvera uphungu wa Yahova mbauphatisira: ‘Munthu anandibvesera anadzakhala mwakutsidzikizika, iye anapfulika mbakhonda kugopa nyatwa.’—Mis. 1:33.

14-15. Tisapfundzanji na Misangani 4:23?

¹⁴ Kuphatisira udziwisi wa Mulungu ndzidzi onsene kusabweresa nkhombo. Ninga pidapfundza ife, Yahova asapasa udziwisi anthu onsene. Mwacitsandzo, m’bukhu ya Misangani Yahova asapereka uphungu wakuti ndzidzi onsene usaphata basa. Cincino tendeni tione pitsandzo pinai.

 ¹⁵ Tsidzikizani ntimanu wakuphiphirisa. Bhibhlya isalonga: ‘Kupiringana pinthu pyonsene pinatsidzikiza iwe, tsidzikiza ntima wako, thangwi umaso wako usanyindira ntima wako.’ (Mis. 4:23) Nyerezerani pinacita ife toera kutsidzikiza ntima wathu wandimomwene. Ife tisafunika kudya cakudya cinapasa ungumi wadidi, kudzongola manungo na kucalira misambo yakuipa. Ndi pibodzi pyene pinafunika ife kucita na ntima wathu wakuphipirisa. Ntsiku zonsene tisaudyesa na Mafala a Mulungu. Ife tisakhunganyika, kugumanika pa misonkhano, pontho tisacita khundu pa misonkhano ineyi. Tisacita basa yakumwaza mphangwa mwaphinga, pontho tisacalira makhaliro akuipa akuti anaticitisa kukhala na manyerezero akuipa ninga ulukwali na axamwali akuipa.

16. Thangwi yanji uphungu unagumanika pa Misangani 23:4, 5 ndi wakuphedza kakamwe lero?

¹⁶ Tsandzayani na piri na imwe. Bhibhlya isatipasa uphungu uyu: ‘Leka kumala mphambvu na kusaka mpfuma. Maso ako angayang’ana mpfuma, iyo isazambazika, thangwi mwandimomwene iyo inamera maphapido ninga a capungu, mbimburuka kuenda kudzulu.’ (Mis. 23:4, 5) Ife tinakwanisa kuluza kobiri yathu mwakukhonda dikhira. Ngakhale tenepo, lero ife tisaona anthu akupfuma na akutcerenga mbakasaka kakamwe kobiri. Midzidzi inango anthu anafuna kakamwe kobiri, asafudza makhaliro awo adidi, asafudza uxamwali wawo, ngakhale kuikha pangozwi ungumi wawo. (Mis. 28:20; 1 Tim. 6:9, 10) Mbwenye udziwisi usatiphedza toera tikhale na maonero akulinganira thangwi ya kobiri. Udziwisi unoyu usatiphedza toera tikhonde kufuna pyonsene, tikhale akukomerwa na akutsandzaya na piri na ife.—Koel. 7:12.

17. Tinakhala tani na ‘lirimi ya munthu wandzeru,’ ninga analongwa pa Misangani 12:18?

¹⁷ Nyerezerani mbamudzati kulonga. Tingakhonda kucita mphole-mphole tinakwanisa kubweresa nyatwa ikulu na mafala athu. Bhibhlya isalonga: ‘Mafala analongwa mwakukhonda kunyerezera asalasa ninga supada, mbwenye lirimi ya munthu wandzeru isakondza.’ (Mis. 12:18) Ife tisaphedzera toera tikhale na ntendere tingacalira kulonga psweda thangwi ya madodo a anango. (Mis. 20:19) Tingafuna kuti mafala athu abalangaze anango mbakhonda  kudzidzida, tisafunika kuleri Mafala a Mulungu ntsiku zonsene na kunyerezera thangwi ya pinaleri ife. (Luka 6:45) Tinganyerezera mwadidi pinalonga Bhibhlya, mafala athu anakwanisa kukhala ninga ‘ncera waudziwisi’ wakuti usabalangaza anango.—Mis. 18:4.

18. Lemba ya Misangani 24:6 isatiphedza tani toera kumwaza mphangwa munjira yadidi?

¹⁸ Towezerani pitsogolero. Bhibhlya isapereka uphungu uyu toera pinthu pitifambire mwadidi: ‘Unamenya nkhondo yako na citsogolero cadidi, pontho pinthu pisafamba mwadidi pangakhala na mapungu mazinji.’ (Mis. 24:6) Vesi ineyi inatiphedza tani toera tikhale amwazi mphangwa na apfundzisi adidi? Mbuto mwakuphatisira ndzeru zathu toera kumwaza mphangwa, ife tisawangisira toera kutowezera pitsogolero pinatambira ife. Ife tisatambira pitsogolero pyadidi pa misonkhano yathu Yacikristu. Pa misonkhano ineyi ife tisapfundziswa na nkhani, pontho na pitsandzo pinacita abale na alongo a maluso. Kusiyapo pyenepi, gulu ya Yahova isatipasa mabukhu na mavidhyu mazinji akuti asaphedza anthu toera kubvesesa Bhibhlya. Kodi imwe musawangisira toera kuphatisira mwadidi mabukhu na mavidhyu anewa?

19. Ndi api maonero anu thangwi ya udziwisi unapereka Yahova? (Misangani 3:13-18)

¹⁹ Lerini Misangani 3:13-18. Ife tisapereka takhuta kakamwe thangwi ya uphungu unagumana ife m’Mafala a Mulungu! Mbatidasowa uphungu unoyu umaso wathu mbudakhala tani? Mu nsolo uno, ife takumbuka pitsandzo pya uphungu wadidi unagumanika m’bukhu ya Misangani. Bhibhlya yonsene iri na uphungu wadidi wa Yahova. Natenepa, tendeni tikhale dzololo toera ndzidzi onsene ticite pinthu mwakubverana na uphungu unapereka Yahova. Anthu azinji lero nee asalemedza uphungu wa Mulungu, mbwenye ife tiri na cinyindiro cakuti ‘ale anapitiriza kuuphatirira anadzacemerwa anyakutsandzaya.’