1. Ninji pinanyerezera ife tingabva mafala akuti munthu wantsisi?

TINGABVA mafala akuti munthu wantsisi, ife tisanyerezera munthu wakuti ndi wakukoma ntima, waufuni na wakupasa mwakudzala manja. Kusiyapo pyenepi, ife tisanyerezerambo pya nsangani udalonga Yezu thangwi ya Nsamariya wadidi. Mamuna unoyu wa dzindza inango ‘apangiza ntsisi’ kuna Muyuda wakuti akhadaphekeswa na mambava. Iye ‘abvera ntsisi’ Muyuda unoyu mbankwata toera kuntsalakana mwaufuni. (Luka 10:29-37) Nsangani unoyu usatipfundzisa thangwi ya ntsisi, wakuti ndi n’khaliro wadidi kakamwe wa Mulungu wathu. Mulungu ndi wantsisi thangwi iye asatifuna. Pontho iye asatibvera ntsisi munjira zakusiyana-siyana na ntsiku zonsene.

2. Ndi njira ipi inango yakuti munthu anakwanisa kupangiza ntsisi?

² Pana njira inango yakuti munthu anakwanisa kupangiza ntsisi. Munthu wantsisi panango anasankhula kukhonda kusandika munthu wakuti athema kusandikwa. Na thangwi ineyi, Yahova asabvera ntsisi ife tonsene. Nyamasalmo alemba: ‘Iye nee asatitsalakana mwakubverana na madawo athu.’ (Masal. 103:10) Ngakhale tenepo, midzidzi inango Yahova asasandika mwakuwanga munthu adacita madawo.

3. Ndi mibvundzo ipi inafuna ife kutawira?

³ Mu nsolo uno, ife tinatawira mibvundzo mitatu: Thangwi yanji Yahova asabvera ntsisi anthu? Kodi ndi pyakukwanisika kusandika mwakuwanga munthu mu ndzidzi ubodzi ene mbatimbvera ntsisi? Pontho ninji pinafuna kutiphedza toera kubvera ntsisi anango? Tendeni tione kuti Mafala a Mulungu asatawira tani mibvundzo ineyi.

4. Thangwi yanji Yahova asabvera ntsisi?

⁴ Yahova asabvera ntsisi thangwi ndi waufuni. Mpostolo Paulu alemba kuti Mulungu ndi “wantsisi kakamwe.” Pidalemba iye mafala anewa, Paulu akhalonga kuti Mulungu ndi wantsisi thangwi  yakupasa cidikhiro atumiki ace akudzodzwa toera kuenda kakhala kudzulu. (Aef. 2:4-7) Mbwenye Yahova nee asabvera ntsisi basi ene atumiki ace akudzodzwa. Nyamasalmo Dhavidhi alemba: ‘Yahova ndi wadidi kuna onsene, pontho mabasace onsene asapangiza ntsisi zace.’ (Masal. 145:9) Nakuti Yahova asafuna anthu, iye asaabvera ntsisi ndzidzi onsene unaona iye kuti ndi pyakufunika toera kucita pyenepi.

5. Kodi Yezu adziwa tani kuti Yahova ndi wantsisi?

⁵ Kupiringana anthu onsene, Yezu asadziwa kuti Yahova asakomerwa kakamwe na kubvera ntsisi anthu. Yezu akhali pabodzi na Yahova kudzulu mu pyaka pizinji kakamwe mbadzati kubwera pa dziko yapantsi. (Mis. 8:30, 31) Mu ndzidzi unoyu, Yezu akhaona kuti pai wace akhabvera tani ntsisi anthu akudawa. (Masal. 78:37-42) Mu ndzidzi ukhapfundzisa iye, kazinji kene Yezu akhafokotoza n’khaliro unoyu wadidi kakamwe wa pai wace.

6. Ndi nsangani upi udaphatisira Yezu toera kutiphedza kubvesesa kuti Babace ndi wantsisi?

⁶ Ninga tapfundza mu nsolo udamala, Yezu aphatisira nsangani wa mwana wakutayika toera kutiphedza kubvesesa kuti Yahova asakomerwa kakamwe na kubvera ntsisi anthu. Mwana unoyu abuluka panyumba pa anyakubala ace ‘mbabvunga pinthu pyace thangwi ya pinthu pyakuipa pikhacita iye.’ (Luka 15:13) Mukupita kwa ndzidzi, iye atcunyuka madawo ace, acepeseka mbabwerera kunyumba. Kodi pai wace acitanji? Mwakukhonda dembuka mwana unoyu akwanisa kudzindikira mabvero akhali na pai wace. Yezu alonga: “Mbadzati kufika, babace amuona nakutali mbambvera ntsisi. Iye an’thamangira, an’khumbatira mbampswompswona.” Iye nee apasa manyadzo mwanace. M’mbuto mwace, iye ambvera ntsisi, amulekerera, pontho antawirisa toera akhale pontho panyumba. Mwana unoyu wakutayika akhadacita madawo makulu, mbwenye nakuti akhadatcunyuka na ntima onsene pai wace amulekerera. Baba wantsisi kakamwe analongwa mu nsangani unoyu asaimirira Yahova. Munjira ineyi, Yezu apangiza kuti Yahova asafuna kulekerera ale anatcunyuka na ntima onsene.—Luka 15:17-24.

7. Kodi njira inabvera Yahova ntsisi isapangiza tani kuti iye ndi waudziwisi?

⁷ Yahova asabvera ntsisi thangwi iye ndi waudziwisi kakamwe. Ndzidzi onsene Yahova asacita pisankhulo pyakuti ndi pyadidi kuna pinthu pyonsene pidacita iye. Bhibhlya isalonga kuti “udziwisi wakudzulu” ndi “wakudzala na ntsisi pabodzi na misapo yadidi.” (Tiya. 3:17) Ninga nyakubala waufuni, Yahova asadziwa kuti ntsisi zace zinaphedza atumiki ace. (Masal. 103:13; Iza. 49:15) Nakuti Yahova asabvera ntsisi atumiki ace, iwo ali na cidikhiro cadidi ca ntsogolo  maseze ndi akusowa ungwiro. Natenepa, nakuti Yahova ndi waudziwisi kakamwe, ndzidzi onsene iye asabvera ntsisi khala ndi pyakufunika toera kucita pyenepi. Mbwenye Yahova asadziwambo ndzidzi wakuti nee asafunika kubvera ntsisi. Nakuti iye ndi waudziwisi, iye nee asalekerera pinthu pyakuipa basi ene toera kubvera ntsisi.

8. Ndi pinthu pipi pyakuti pisafunika kucitwa midzidzi inango kuna munthu adacita madawo, pontho thangwi yanji?

⁸ Nyerezerani kuti ntumiki wa Mulungu asankhula ekhene kucita madawo mu umaso wace. Kodi ife tisafunika kucitanji? Yahova apumira mpostolo Paulu toera kulemba kuti: ‘Lekani kucita uxamwali na munthu’ unoyu. (1 Akor. 5:11) Anthu anacita madawo mbakhonda tcunyuka asabuluswa mu mpingo. Pyenepi ndi pyakufunika toera kutsidzikiza abale na alongo athu akukhulupirika, pontho toera kupangiza kuti tisaphedzera midida ya Yahova. Mbwenye anango asanyerezera kuti munthu angabuluswa mu mpingo, Mulungu nee ambvera ntsisi. Kodi unoyu ndi undimomwene? Tendeni tione.

9-10. Mwakubverana na Ahebheri 12:5, 6, thangwi ndi pyakufunika kubulusa mu mpingo munthu wakukhonda tcunyuka? Perekani citsandzo.

⁹ Ife tingabva cidziwiso pa misonkhano ya mpingo cakuti munthu wakuti tisandziwa na tisanfuna “nee ndi Mboni wa Yahova,” ife tisatsukwala kakamwe. Panango tinabvundzika kuti pikhafunikadi kubulusa mu mpingo munthu unoyu? Kodi mwandimomwene kubulusa munthu mu mpingo kusapangiza ntsisi? Inde. Kukhonda kusandika munthu wakuti asafunika kusandikwa nee pisapangiza udziwisi, ntsisi na ufuni. (Mis. 13:24) Kodi munthu angabuluswa mu mpingo pinamphedza toera atcunyuke mbasiya pinthu pyakuipa pikhacita iye? Inde pinamphedza. Abale na alongo azinji akuti akhacita madawo makulu alonga kuti kubuluswa mu mpingo kwaaphedza toera kudzindikira pinthu pyakuipa pikhacita iwo, pontho kwaaphedza toera kusiya pinthu pikhacita iwo mbabwerera kuna Yahova.—Lerini Ahebheri 12:5, 6.

¹⁰ Onani citsandzo ici: Nyerezerani kuti nkumbizi wa mabira adzindikira kuti bira yace ibodzi iri kuduwala. Iye asadziwa kuti toera kukondza bira ineyi kuti iwange, asafunika kuibulusa pa nkumbi. Mbwenye mabira asakomerwa kukhala pa nkumbi. Natenepa panango pinakhala pyakunentsa toera kuapambula. Kodi pyenepi pisabveka kuti nkumbizi ndi wakuipa ntima thangwi yakubulusa pa nkumbi bira ya kuduwala? Nkhabe. Iye asadziwa kuti angatawirisa kuti bira ineyi ya kuduwala ikhale pabodzi na nkumbi, inathapulisambo mabira anango. Natenepa, thangwi yakubulusa bira ibodzi pa nkumbi iye asatsidzikiza nkumbi onsene.—Onani Levitiko 13:3, 4.

11. (a) Ndi munjira ipi munthu wakubuluswa mu mpingo alandana na bira ya kuduwala? (b) Ndi pinthu pipi pyakuti munthu wakubuluswa mu mpingo anakwanisa kupicita, pontho ndi ciphedzo cipi cakuti anakwanisa kucitambira?

¹¹ Ife tinakwanisa kulandanisa Nkristu wakubuluswa mu mpingo na bira ya kuduwala. Nkristu unoyu ali kuduwala mwauzimu. (Tiya. 5:14) Ninga munthu wakuduwala wakuti anakwanisa kuthapulisa anango utenda wace, munthu wakuduwala mwauzimu anakwanisambo kucitisa anango kutowezera makhaliro ace akuipa. Natenepa midzidzi inango ndi pyakufunika kubulusa mu mpingo munthu unoyu wakuduwala mwauzimu. Kusandika kweneku kusapangiza ufuni wa Yahova kuna abale na alongo akukhulupirika mu mpingo, pontho kunaphedza munthu adacita madawo toera kudzindikira pinthu pyakuipa pidacita iye mbatcunyuka. Munthu adabuluswa mu mpingo anakwanisa kugumanika pa misonkhano toera atambire pipfundziso pyakubuluswa m’Bhibhlya pyakuti pinamphedza toera kukhala pontho na cikhulupiro cakuwanga. Iye anakwanisambo kutambira mabukhu toera kualeri na kuapfundza, pontho anakwanisa kuona  mavidhyu a JW Broadcasting^®. Kusiyapo pyenepi, akulu a mpingo angaona kuti iye akucita macinjo, iwo anakwanisa kumpasa uphungu midzidzi inango toera kum’phedza kuti akhale pontho na uxamwali wakuwanga na Yahova. Munjira ineyi, iye anakwanisa kukhala wakuthema toera kubwezereswa mu mpingo. *

12. Ndi munjira ipi akulu a mpingo anakwanisa kubvera ntsisi na kupangiza ufuni kuna nyakudawa wakukhonda tcunyuka?

¹² Ndi pyakufunika kakamwe kudziwa kuti basi ene anyakudawa akukhonda tcunyuka ndiwo anabuluswa mu mpingo. Akulu a mpingo asadziwa kuti asafunika kunyerezera mwadidi kakamwe mbadzati kubulusa munthu mu mpingo. Iwo asadziwa kuti Yahova asasandika ‘tayu mwakupiringana midida.’ (Yer. 30:11) Kusiyapo pyenepi, akulu a mpingo asafuna abale na alongo awo, pontho iwo nee asafuna kucita pinthu pyakuti pinafudza uxamwali wawo na Yahova. Mbwenye midzidzi inango, thangwi ya ufuni na ntsisi akulu a mpingo anakwanisa kubulusa mu mpingo munthu adacita madawo.

13. Thangwi yanji Nkristu unango wa ku Korinto akhafunika kubuluswa mu mpingo?

¹³ Nyerezerani pinthu pidacita mpostolo Paulu kuna munthu unango wakuti akhacita madawo mbakhonda tcunyuka. Nkristu unango ku Korinto akhacita ulukwali na nkazi wa pai wace. Pyenepi pikhali pyakuipa kakamwe! Paulu akhadziwa kuti Yahova akhadalonga kale kuna Aizraeli kuti: ‘Mamuna angapita m’mabonde na nkazi wa pai wace asapasa manyadzo pai wace. Mwakukhonda penula, uwiri wawo asafunika kuphiwa.’ (Lev. 20:11) Ndimomwene kuti Paulu nee alonga kuti mamuna unoyu akhafunika kuphiwa. Mbwenye iye apanga Akristu a ku Korinto toera abuluse munthu unoyu mu mpingo. Makhaliro aulukwali a mamuna unoyu akhakhuya anthu anango mu mpingo. Pontho anango nee akhaona pyenepi ninga madawo makulu.—1 Akor. 5:1, 2, 13.

14. Kodi Paulu abvera tani ntsisi mamuna adabuluswa mu mpingo ku Korinto, pontho thangwi yanji? (2 Akorinto 2:5-8, 11)

¹⁴ Mukupita kwa ndzidzi, Paulu abva kuti mamuna unoyu akhadacinja kakamwe makhaliro ace. Iye akhadatcunyuka na ntima onsene. Maseze mamuna unoyu akhadacita pinthu pyakuti pikhapasa manyadzo mpingo, mafala adalonga Paulu kuna akulu a mpingo asapangiza kuti iye nee akhafuna kuti mamuna unoyu atsalakanwe mwaukali. Iye aapanga: “Musafunika kumulekerera na ntima onsene, mbamum’balangaza.” Paulu abvera ntsisi mamuna unoyu wakutcunyuka.  Iye nee akhafuna kuona kuti mamuna unoyu ali wakutsukwala kakamwe thangwi ya pinthu pidacita iye mpaka kunyerezera kuti nee alekererwa madawo ace.—Lerini 2 Akorinto 2:5-8, 11.

15. Kodi akulu a mpingo anakwanisa tani kusandika munthu mwakuwanga mu ndzidzi ubodzi ene mbam’bvera ntsisi?

¹⁵ Ninga Yahova, akulu a mpingo asakomerwa na kubvera ntsisi anthu anango. Iwo asasandika mwakuwanga munthu adacita madawo, mbwenye asam’bverambo ntsisi khala ndi pyakufunika. Akulu a mpingo angakhonda kusandika munthu adacita madawo, iwo nee asam’bvera ntsisi, mbwenye asantawirisa toera apitirize kucita pinthu pyakuipa. Kodi ndi akulu a mpingo basi asafunika kubvera ntsisi anango?

16. Mwakubverana na Misangani 21:13, kodi Yahova anacitanji kuna ale anakhonda kubvera ntsisi anango?

¹⁶ Akristu onsene asawangisira toera kukhala antsisi ninga Yahova. Thangwi yanji? Thangwi ibodzi ndi yakuti Yahova nee anabvesera maphembero a ale anakhonda kubvera ntsisi andzawo. (Lerini Misangani 21:13.) Nee m’bodzi wa ife asafuna kuti Yahova akhonde kubvesera maphembero ace, na thangwi ineyi tisafunika kucalira kukhonda bvera ntsisi anango. M’mbuto mwakukhonda kubvesera Nkristu ndzathu angatipanga nyatwa zace, ndzidzi onsene tisafunika kubvesera ‘kukhuwa kwa nyakutcerenga.’ Kusiyapo pyenepi, ife tisafunika kucita pyonsene pinakwanisa ife toera kuphatisira uphungu wa m’Bhibhlya unalonga kuti: “Munthu anakhonda kubvera ntsisi, anadzatongwa mwakusowa ntsisi.” (Tiya. 2:13) Ife tingadzindikira mwakucepeseka kuti tisafunika kakamwe kubverwa ntsisi, tinakwanisambo kubvera ntsisi anango. Ife tisafunika kubvera ntsisi makamaka khala munthu atcunyuka madawo adacita iye mbabwezereswa mu mpingo.

17. Kodi Mambo Dhavidhi abvera tani ntsisi Sauli?

¹⁷ Pitsandzo pya m’Bhibhlya pinakwanisa kutiphedza toera kubvera ntsisi anango mbatikhonda kukhala akuuma ntima. Mwacitsandzo, Nyerezerani thangwi ya Mambo Dhavidhi. Kazinji kene iye akhabvera ntsisi anango. Maseze mambo Sauli akhafuna kumupha, Dhavidhi abvera ntsisi mambo unoyu wakudzodzwa na Mulungu, pontho cipo am’bwezera pinthu pyakuipa pikhacita iye.—1 Sam. 24:9-12, 18, 19.

18-19. Ndi pitsandzo pipi piwiri pinapangiza kuti Dhavidhi nee abvera ntsisi?

¹⁸ Mbwenye Dhavidhi nee abvera anango ntsisi ndzidzi onsene. Mwacitsandzo, Nabhale akhali mamuna wakuipa kakamwe wakuti akhatikana Dhavidhi, pontho akhonda kumpasa cakudya pabodzi na anyankhondo ace. Pyenepi pyacitisa Dhavidhi kuipirwa kakamwe mbatonga kupha Nabhale pabodzi na amuna akhali na iye panyumba pace. Mbwenye nkazi wa Nabhale akhacemerwa Abhigaili, akhali wakukoma ntima na wakupirira, natenepa mwakucimbiza aenda kapasa cakudya Dhavidhi. Na thangwi ineyi, Dhavidhi nee aphabve Nabhale pabodzi na amuna akhali na iye panyumba pace.—1 Sam. 25:9-22, 32-35.

¹⁹ Ulendo unango, mprofeta Natani apanga Dhavidhi thangwi ya mamuna wakupfuma wakuti aba bira ya mamuna wakutcerenga. Dhavidhi aipirwa kakamwe mbalonga: ‘Ndiri kudumbira mu dzina ya Yahova Mulungu wa m’maso  kuti mamuna adacita pyenepi athema kuphiwa!’ (2 Sam. 12:1-6) Dhavidhi akhadziwa mwambo wa Mose unalonga kuti munthu angaba bira ya ndzace akhafunika kulipa mabira manai. (Eks. 22:1) Mphapo munthu unoyu akhafunika kuphiwa? Mbapidakhala pyakuipa kakamwe kucita pinthu pyenepi kuna munthu unoyu. Natani aphatisira citsandzo ceneci toera kuphedza Dhavidhi kubvesesa kuti iye akhadacita madawo makulu kakamwe. Yahova abvera ntsisi kakamwe Dhavidhi, mbwenye Dhavidhi nee abvera ntsisi mamuna adalonga Natani mu nsangani wace.—2 Sam. 12:7-13.

20. Tisapfundzanji na citsandzo ca Dhavidhi?

²⁰ Onani kuti thangwi yakuipirwa, Dhavidhi akhafuna kupha Nabhale pabodzi na amuna onsene akhali na iye panyumba pace. Pontho mukupita kwa ndzidzi Dhavidhi alonga kuti mamuna adalongwa mu nsangani wa Natani akhafunika kuphiwa thangwi ya pinthu pidacita iye. Mbwenye Dhavidhi akhali mamuna wakukoma ntima, mphapo thangwi yanji atonga kuti mamuna wakupfuma adaba bira ya ndzace akhafunika kuphiwa? Nyerezerani pinthu pikhadacitikira Dhavidhi. Pa ndzidzi unoyu, Dhavidhi nee akhali na cikumbuntima cadidi. Munthu angatonga mwakuuma ntima asapangiza kuti ali kuduwala mwauzimu. Yezu acenjeza atowereri ace kuti: ‘Lekani kutonga andzanu, natenepa imwe nee munadzatongwambo; thangwi munjira inatonga imwe andzanu, munadzatongwambo sawasawa.’ (Mat. 7:1, 2) Natenepa tendeni ticite pyonsene pinakwanisa ife toera kutowezera Mulungu wathu wakuti ndi “wantsisi kakamwe,” mbaticalira kukhala akuuma ntima.

21-22. Ndi munjira zipi zakuti tinakwanisa kubvera ntsisi anango?

²¹ Kubvera ntsisi anango kusaphataniza pinthu pizinji. Anthu antsisi asacita pinthu toera kuphedza anango. Tonsene tisafunika kuona khala pana anthu asafunika ciphedzo m’banja mwathu, mu mpingo mwathu na pa cisa cathu. Tingacita pyenepi ife tinakwanisa kubvera ntsisi munjira zakusiyana-siyana. Kodi pana munthu wakuti asafunika kubalangazwa? Kodi ife tinakwanisa kuperekeka toera kum’phedza, panango kumpasa cakudya na kuncitira pinthu pinango? Kodi pali na Nkristu adabwezereswa cincino mu mpingo wakuti asafunika munthu toera kumuwangisa na kum’balangaza? Kodi ife tinakwanisa kulonga mphangwa zadidi zakuwangisa kuna anango? Ineyi ndi ibodzi mwa njira zizinji zakupangiza kuti tisabvera ntsisi anango.—Yobe 29:12, 13; Aroma 10:14, 15; Tiya. 1:27.

²² Tingadziwa anthu anafuna ciphedzo, ife tinaona kuti pana njira zakusiyana-siyana zakupangiza kubvera ntsisi anango. Tingabvera ntsisi anango, ife tisatsandzayisa Babathu wakudzulu wakuti ndi Mulungu “wantsisi kakamwe.”