NSOLO WA PFUNDZIRO 45
Tinaphedza Tani Anango Toera Abvere Pidalonga Kristu
‘Natenepa, ndokoni mukacite anyakupfundza, apfundziseni toera kubvera pinthu pyonsene pidakupangani ine.’—MAT. 28:19, 20.
NYIMBO 89 Bverani Toera Mupaswe Nkhombo
PINAFUNA IFE KUPFUNDZA *
1. Mwakubverana na Mateu 28:18-20, ndi pinthu pipi pidalonga Yezu kuna anyakupfundzace?
PIDALAMUSWA Yezu muli akufa, iye aonekera kuna anyakupfundzace akuti akhadagumanyikana ku Galileya. Iye akhafuna kuapanga pinthu pyakufunika kakamwe. Pinthu pyenepi pisagumanika pa Mateu 28:18-20.—Lerini.
2. Ndi mibvundzo ipi inafuna kudinga ife?
2 Mafala adalonga Yezu toera kucita anyakupfundza asaphatambo basa kuna atumiki onsene a Mulungu lero. Natenepa, tendeni tidinge mibvundzo mitatu yakuti isabverana na basa idatipasa Yezu. Wakutoma, kusiyapo kupfundzisa anyakupfundza athu midida ya Mulungu, ndi pinthu pipi pinango pisafunika ife kucita? Waciwiri, amwazi mphangwa onsene mu mpingo anaphedzera tani kuthambaruka kwa nyakupfundza Bhibhlya? Wacitatu, tinaphedza tani ale adasiya kusonkhana na kumwaza mphangwa toera atome pontho basa yakucita anyakupfundza?
APFUNDZISENI TOERA ABVERE PIDALONGA KRISTU
3. Ndi ntsonga ipi idalonga Yezu mu pitsogolero pidapereka iye?
3 Pitsogolero pidapereka Yezu ndi pyakubveka mwadidi. Natenepa, ife tisafunika kupfundzisa anthu pinthu pidalonga iye. Mbwenye nee tisafunika kuduwala ntsonga yakufunika kakamwe. Yezu nee alonga kuti: ‘Apfundziseni pinthu pyonsene pidakupangani ine.’ Mbwenye iye alonga: “Apfundziseni toera kubvera pinthu pyonsene pidakupangani ine.” Toera kubvera pitsogolero pyenepi, ife tisafunika kupfundzisa anyakupfundza athu a Bhibhlya pinthu pinafunika iwo kucita na kuapangiza kuti anacita tani pyenepi. (Mabasa 8:31) Thangwi yanji tisafunika kucita pyenepi?
4. Tinapfundzisa tani munthu toera abvere pinthu pidalonga Kristu? Perekani citsandzo.
4 Tinapfundzisa tani munthu toera abvere pinthu pidalonga Kristu? Citsandzo cinatowera cinatiphedza toera kuona kuti tinacita tani pyenepi. Kodi munthu anapfundzisa anango kutekenya karu anaaphedza tani toera kubvera mitemo ya mu nseu? Cakutoma, iye asaapfundzisa mitemo ineyi kuxikola. Mbwenye, toera nyakupfundza abvere mitemo ineyi, mpfundzisi asafunika kucita pinthu pinango. Iye asafunika kukhala pabodzi na nyakupfundzace mu ndzidzi unapfundza iye kutekenya karu toera kumphedza kuphatisira pinthu pidapfundza iye. Kodi citsandzo ceneci cisatipfundzisanji?
5. (a) Mwakubverana na Juwau 14:15; 1 Juwau 2:3, tisafunika kuphedza anyakupfundza athu a Bhibhlya toera acitenji? (b) Tinaphedza tani anyakupfundza athu toera aphatisire pinthu pinapfundza iwo m’Bhibhlya?
5 Tingapfundzisa anango Bhibhlya, ife tisafunika kuapfundzisa pinthu pinafuna Mulungu kuna ife. Mbwenye tisafunika kucita pinthu pinango. Ife tisafunika kuphedza anyakupfundza athu a Bhibhlya toera kuphatisira pinthu pinapfundza iwo. (Lerini Juwau 14:15; 1 Juwau 2:3.) Kubulukira mu pinthu pinacita ife, tinakwanisa kupangiza anyakupfundza athu kuti anaphatisira tani pinthu pinapfundza iwo m’Bhibhlya, kuxikola, kubasa peno mu ndzidzi wa recreação. Ife tinakwanisa kuapanga pinthu pidaticitikira toera kuaphedza kuona kuti kuphatisira midida ya Bhibhlya kusatitsidzikiza, pontho kusatiphedza toera kucita pisankhulo pyadidi. Mu ndzidzi unacitisa ife pfundziro ya Bhibhlya, tisafunika kuphemba Yahova toera aphedza anyakupfundza athu na nzimu wace wakucena.—Juwau 16:13.
6. Tisafunika kucitanji pontho kuna anyakupfundza athu toera abvere pinthu pidalonga Yezu?
6 Tisafunika kucitanji pontho kuna anyakupfundza athu toera abvere pinthu pidalonga Yezu? Ife tisafunika kuaphedza toera akulise cifuno ca kupfundzisambo anango Bhibhlya. Anyakupfundza a Bhibhlya anango asagopa basa yakumwaza mphangwa. Natenepa, tisafunika kukhala akupirira mu ndzidzi unaaphedza ife kubvesesa undimomwene wa Bhibhlya wakuti unaaphedza toera kukhala na cikhulupiro cakuwanga. Kusiyapo pyenepi, undimomwene unoyu ungakhuya ntima wawo, unakulumiza toera kumwaza mphangwa. Tisafunika kucitanji toera kuphedza anyakupfundza a Bhibhlya kuti akhale na cifuno cakumwaza mphangwa?
7. Tinaphedza tani nyakupfundza Bhibhlya toera akhale na cifuno cakumwaza mphangwa
7 Panango ife tinacita mibvundzo iyi kuna nyakupfundza wathu wa Bhibhlya: “Kodi kuphatisira pinthu pinapfundza imwe m’Bhibhlya pyakuphedzani tani? Musaona kuti anango asafunikambo kubva mphangwa zenezi? Musafunika kucitanji toera kuaphedza?” (Mis. 3:27; Mat. 9:37, 38) Pangizani nyakupfundza wanu matratado anagumanika M’bokosi Yathu Yakupfundzisa, pontho mpangeni toera asankhule matratadho akuti anaphedza acibale ace, axamwali ace peno andzace akubasa. Pasani nyakupfundza wanu matratadho akusiyana-siyana. Mpangizeni kuti anagawira tani tratadho munjira yadidi kakamwe. Kusiyapo pyenepi, nyakupfundza angakhala m’mwazi mphangwa wakukhonda batizwa ife tisafunika kumwaza naye mphangwa pabodzi toera kumphedza.—Koel. 4:9, 10; Luka 6:40.
ABALE NA ALONGO MU MPINGO ANAPHEDZA TANI ANYAKUPFUNDZA A BHIBHLYA TOERA ATHAMBARUKE
8. Thangwi yanji anyakupfundza Bhibhlya asafunika kufuna kakamwe Mulungu na anthu? (Onani bokosi yakuti “ Tinaphedza Tani Anyakupfundza Bhibhlya Toera Afune Kakamwe Mulungu?”)
8 Kumbukani kuti Yezu atipasa basa yakupfundzisa anango toera “kubvera pinthu pyonsene” pidatipanga iye. Pinthu pyenepi pisaphataniza matongero mawiri makulu kakamwe akuti ndi kufuna Mulungu na kufuna ndzako. (Mat. 22:37-39) Ife tisafunika kufuna Mulungu na anthu toera tikwanise kumwaza mphangwa. Thangwi yanji? Thangwi tingafuna Mulungu na anthu pinatiphedza toera tikhonde kugopa anthu mbatimwaza mphangwa mwacipapo. Kusiyapo pyenepi, nyakupfundza angafuna kakamwe Mulungu pinamphedza toera akhonde kugopa anthu. (Masal. 18:1-3; Mis. 29:25) Bokosi inagumanika mu nsolo uno isafokotoza kuti tinaphedza tani anyakupfundza athu a Bhibhlya toera afune kakamwe Mulungu. Kusiyapo pyenepi, abale na alongo mu mpingo anaphedza tani anyakupfundza Bhibhlya toera akulise kakamwe ufuni unoyu?
9. Kodi munthu anapfundza kutekenya karu asapfundzanji mu ndzidzi unatekenya iye karu pabodzi na mpfundzisi wace?
9 Nyerezerani pontho citsandzo ca munthu anapfundza kutekenya karu. Kodi iye asapfundza tani mu ndzidzi unatekenya iye karu pabodzi na mpfundzisi wace? Iye asacita pyenepi mukubvesera mpfundzisi wace na kuona mwadidi njira inatekenya anango. Mwacitsandzo, panango mpfundzisi anathonya munthu unango wakuti ali na karu yacembo toera aatawirise kupita patsogolo. Kusiyapo pyenepi, panango iye anapasa cidzindikiro nyakutekenya karu unango anabwera kutsogolo kwace kuti abweze pang’ono maluju a karu yace toera akhonde kudzudzumisa anthu anango anabwera patsogolo pace. Pinthu pyenepi pinacita mpfundzisi pinaphedza nyakupfundza toera apiphatisirembo mu ndzidzi unatekenya iye karu.
10. Ninji pinafuna kuphedza nyakupfundza Bhibhlya toera kuthambaruka?
10 Munjira ibodzi ene, nyakupfundza Bhibhlya wakuti atoma kutumikira Yahova nee asapfundza basi ene na mpfundzisi wace, mbwenye asapfundzambo pizinji na pitsandzo pyadidi pya atumiki anango a Yahova. Munjira ineyi, ndi cinthu cipi cakuti cinaphedza nyakupfundza Bhibhlya toera athambaruke? Ndi kugumanika pa misonkhano yathu ya mpingo. Thangwi yanji ndi pyakufunika? Thangwi misonkhano inamphedza toera kukhala na cidziwiso cakuthimizirika, kuwangisa cikhulupiro cace na kupitiriza kufuna kakamwe Mulungu. (Mabasa 15:30-32) Kusiyapo pyenepi, pa misonkhano m’mwazi mphangwa anakwanisa kupangiza nyakupfundzace abale na alongo anango akuti asathimbanambo na nyatwa ninga zace. Pontho nyakupfundza anakwanisa kuona ufuni unapangiza abale na alongo mu mpingo. Tendeni tione pitsandzo pinatowera.
11. Ndi pitsandzo pipi pyakuti nyakupfundza Bhibhlya anakwanisa kupiona mu mpingo, pontho pyenepi pinamphedza tani?
11 Khala nyakupfundza Bhibhlya ndi nzice, iye anakwanisambo kupfundza pinthu pizinji pa Nyumba ya Umambo kubulukira mu citsandzo ca mulongo wakuti asathimbanambo na pinentso ninga pyace. Nyakupfundza angaona kuwangisira kunacita mulongo unoyu kubwera pabodzi na anace pa misonkhano pyenepi pinamphedza kakamwe. Munjira inango, khala nyakupfundza Bhibhlya asanentseka toera kusiya kufumali anaphedzeka kakamwe angadziwana na m’bale wakuti akhathimbanambo na nkandzo ubodzi ene. M’bale unoyu anakwanisa kupanga nyakupfundza Bhibhlya kuti cinthu cidamphedza kakamwe toera kusiya kufumali ndi ufuni wace kuna Yahova. (2 Akor. 7:1; Afil. 4:13) Pidamala m’bale kufokotoza kuti asiya tani kufumali, iye apanga nyakupfundza Bhibhlya kuti: “Imwe munakwanisambo kusiya kufumali.” Mafala anewa aphedza nyakupfundza toera kuona kuti iye anakwanisambo kusiya kufumali. Nyakupfundza Bhibhlya unango wakuti ndi ntsikana asaona mulongo wacitsikana pa Nyumba ya Umambo wakuti ali wakutsandzaya thangwi yakukhala Mboni ya Yahova. Pikhaona nyakupfundza Bhibhlya kuti ndzidzi onsene mulongo unoyu asakhala wakutsandzaya, iye asaka kudziwa pizinji kuti thangwi yanji mulongo unoyu asakhala wakutsandzaya.
12. Thangwi yanji tinakwanisa kulonga kuti m’bodzi na m’bodzi mu mpingo ali na basa yakuphedza nyakupfundza Bhibhlya?
12 Anyakupfundza Bhibhlya angadziwana na abale na alongo azinji akukhulupirika mu mpingo, pinaaphedza toera kubvera matongero makulu adalonga Kristu kuti funa Mulungu na ndzako. (Juwau 13:35; 1 Tim. 4:12) Ninga pidaona ife mu ndima zidamala, nyakupfundza Bhibhlya anakwanisa kupfundza pizinji na amwazi mphangwa akuti athimbanambo na pinentso ninga pinathimbana na iye. Pitsandzo pyenepi pinaphedza nyakupfundza Bhibhlya toera acite macinjo mu umaso wace mbakhala nyakupfundza wa Kristu. (Deut. 30:11) M’bodzi na m’bodzi mu mpingo anakwanisa kuphedzera munjira zakusiyana-siyana toera anyakupfundza Bhibhlya athambaruke mwauzimu. (Mat. 5:16) Imwembo, musacitanji toera kuphedza nyakupfundza Bhibhlya anabwera pa misonkhano?
PHEDZANI ALE ADASIYA KUSONKHANA NA KUMWAZA MPHANGWA TOERA ATOME PONTHO KUCITA PYENEPI
13-14. Yezu atsalakana tani apostolo ace pikhali iwo akutsukwala?
13 Ife tisafuna kuphedza abale na alongo athu adasiya kusonkhana na kumwaza mphangwa toera atome pontho kumwaza mphangwa na kucita anyakupfundza. Toera kuona kuti tinacita tani pyenepi, tendeni tione kuti Yezu aphedza tani apostolo ace mu ndzidzi ukhali iwo akutsukwala.
14 Mu ndzidzi wakuti Yezu akhali cifupi na kuphiwa apostolo ace “onsene ansiya mbathawa.” (Marko 14:50; Juwau 16:32) Kodi Yezu atsalakana tani apostolo ace anewa? Pidamala Yezu kulamuswa muli akufa, mwakukhonda dembuka iye apanga atowereri ace kuti: ‘Lekani kugopa! Ndokoni kapanga abale anga kuti ine ndalamuswa muli akufa.’ (Mat. 28:10a) Yezu nee asiya apostolo ace. Maseze iwo akhadanthawa, Yezu apitiriza kuacemera “abale anga.” Ninga Yahova, Yezu akhali wantsisi na wakulekerera.—2 Ama. 13:23.
15. Ndi mabvero api ali na ife thangwi ya ale adasiya kusonkhana na kumwaza mphangwa?
15 Munjira ibodzi ene, ife tisafunikambo kupangiza citsalakano kakamwe kuna ale adasiya kusonkhana na kumwaza mphangwa. Iwo ndi abale na alongo athu, pontho tisaafuna. Ife tisapitiriza kukumbuka mabasa onsene adacita abale na alongo anewa kuna Yahova, pontho anango mwa iwo atumikira Yahova mu pyaka pizinji. (Aheb. 6:10) Mwandimomwene ife tisaatsuwa kakamwe. (Luka 15:4-7) Mukutowezera citsandzo ca Yezu, tinapangiza tani kuti tisatsalakana abale na alongo anewa?
16. Tinapangiza tani citsalakano kuna abale na alongo athu adasiya kusonkhana na kumwaza mphangwa?
16 Mwakukoma ntima acemereni toera agumanike pa misonkhano. Njira ibodzi idaphatisira Yezu toera kuwangisa apostolo ace akuti akhali akutsukwala ndi kuacemera toera agumanike pa nsonkhano. (Mat. 28:10b; 1 Akor. 15:6) Munjira ibodzi ene, ife tinakwanisa kuwangisa ale adasiya kusonkhana na kumwaza mphangwa mu kuacemera toera agumanika pa misonkhano ya mpingo. Kumbukani kuti panango iwo anakwata ndzidzi uzinji toera atawire ncemerero wathu. Mwakukhonda penula, Yezu akomerwa kakamwe pidaona iye apostolo ace agumanika pa nsonkhano.—Onani Mateu 28:16 na Luka 15:6.
17. Tisafunika kucitanji tingaona m’bale peno mulongo adasiya kusonkhana na kumwaza mphangwa afika pa Nyumba ya Umambo?
17 Atambireni na manja mawiri. Anyakupfundza a Yezu akwanisa kuona kuti atambirwa mwadidi mu ndzidzi udaonana iwo na Yezu. Thangwi Yezu nee adikhira kuti anyakupfundzace abwere kuna iye, mbwenye iye aenda kuna iwo mbatoma kulonga nawo. (Mat. 28:18) Tisafunika kucitanji tingaona m’bale peno mulongo adasiya kusonkhana na kumwaza mphangwa afika pa Nyumba ya Umambo? M’mbuto mwa kudikhira kuti iye atimwanyike, ife tisafunika kukhala akutoma kumwanyika m’bale peno mulongo unoyu adafika pa Nyumba ya Umambo. Pakutoma, panango tinaona kuti nee tiri na mafala toera kulonga. Mbwenye toera kucalira kuatsukwalisa, ife tinakwanisa kulonga kuti tatsandzaya kakamwe kukuonani.
18. Tinawangisa tani abale adasiya kusonkhana na kumwaza mphangwa?
18 Awangiseni. Panango anyakupfundza a Yezu akhali na mabvero akuti nee mbadakwanisa kumwaza mphangwa pa dziko yonsene yapantsi. Mbwenye Yezu aawangisa mukuapanga kuti: “Ine ndiri na imwe ntsiku zonsene.” (Mat. 28:20) Kodi mafala anewa aphedza anyakupfundzace? Inde. Thangwi mwakukhonda dembuka iwo atoma “kupfundzisa mwaphinga na kumwaza mphangwa zadidi.” (Mabasa 5:42) Natenepa abale na alongo adasiya kusonkhana na kumwaza mphangwa asafunikambo kuwangiswa. Panango iwo anagopa kuti anatoma tani kumwaza pontho mphangwa. Na thangwi ineyi, ife tisafunika kuapasa cinyindiro cakuti nee anamwaza mphangwa okhene. Pontho angatipanga kuti ali dzololo toera kuenda kamwaza mphangwa, ife tisafunika kuenda nayo pabodzi. Mwakukhonda penula iwo anatsandzaya kakamwe thangwi yakutoma pontho kumwaza mphangwa zadidi. Kusiyapo pyenepi, tingaphedza abale na alongo adasiya kusonkhana na kumwaza mphangwa, mpingo onsene usakhala wakutsandzaya kakamwe.
IFE TISAFUNIKA KUMALISA BASA IDATIPASA YEZU
19. Kodi tiri akutonga toera kucitanji, pontho thangwi yanji?
19 Kodi ife tinapitiriza kumwaza mphangwa na kucita anyakupfundza mpaka lini? Tinapitiriza kucita basa ineyi mpaka kumala kwa makhaliro a dziko ino. (Mat. 28:20; onani Mabvekero a Mafala Anango a m’Bhibhlya, “Kumala kwa makhaliro a dziko.”) Kodi ife tiri dzololo toera kumwaza mphangwa na kucita anyakupfundza mpaka ndzidzi unoyu? Inde. Na thangwi ineyi, ife tisatsandzaya kuphatisira ndzidzi wathu, mphambvu zathu na mpfuma zathu toera kusaka ale akuti ‘mitima yawo isafuna kutawira undimomwene unapasa umaso wakukhonda mala.’ (Mabasa 13:48) Tingacita pyenepi, tikutowezera citsandzo ca Yezu. Thangwi iye alonga: “Cakudya canga ndi kucita pinafuna ule adandituma, mbandimalisa basa yace.” (Juwau 4:34; 17:4) Natenepa tisafunikambo kumalisa basa idatipasa Yezu. (Juwau 20:21) Kusiyapo pyenepi, ife tisafunambo kuti abale na alongo adasiya kusonkhana na kumwaza mphangwa apitirize kucita basa ineyi pabodzi na ife.—Mat. 24:13.
20. Mwakubverana na Afilipi 4:13, thangwi yanji tiri na cinyindiro cakuti tinakwanisa kumalisa basa idatipasa Yezu?
20 Mwandimomwene kucita basa idatipasa Yezu ndi pyakunentsa. Mbwenye ife nee tisacita basa ineyi tekhene. Yezu apikira kuti anakhala na ife. Natenepa tingapfundzisa anthu Bhibhlya “tisaphata basa pabodzi na Mulungu” na ciphedzo ca Kristu. (1 Akor. 3:9; 2 Akor. 2:17) Na thangwi ineyi, ife tinakwanisa kumalisa basa ineyi. Mwakukhonda penula, ndi mwai ukulu kakamwe kucita basa ineyi yakuphedza anango toera acitembo basa ibodzi ene.—Lerini Afilipi 4:13.
NYIMBO 79 Apfundziseni Toera Akhale Dzololo
^ ndima 5 Yezu apanga atowereri ace toera acite anyakupfundza na kuapfundzisa toera abvere pinthu pyonsene pidaapanga iye. Mu nsolo uno tinapfundza kuti tinatowezera tani pitsogolero pidapereka Yezu.
^ ndima 66 FOTO TSAMBA: Mulongo akucitisa pfundziro ya Bhibhlya, pontho ali kuphedza nyakupfundza wace pinthu pinafunika iye kucita toera afune kakamwe Mulungu. Mukupita kwa ndzidzi, nyakupfundza Bhibhlya akuphatisira maonero matatu adapaswa iye na mpfundzisi wace.
