1-2. (a) Mwakubverana na Aefesi 6:16, thangwi yanji tisafuna “xango ikulu ya cikhulupiro”? (b) Ndi mibvundzo ipi inafuna kutawirwa mu nsolo uno?

KODI imwe muli na “xango ikulu ya cikhulupiro”? (Lerini Aefesi 6:16.) Mwakukhonda penula, imwe muli nayo. Ninga xango ikulu yakuti ikhatsidzikiza manungo a nyankhondo, cikhulupiro canu cinakutsidzikizani ku makhaliro akuipa ninga, ulukwali, uphanga na pinthu pinango pyakuti nee pisabverana na midida ya Mulungu.

² Nakuti tikukhala “mu ntsiku zakumalisa,” cikhulupiro cathu cinapitiriza kuyeserwa. (2 Tim. 3:1) Mphapo munakwanisa tani kudinga xango yanu ya cikhulupiro toera mukhale na cinyindiro cakuti iri mwadidi? Pontho musafunika kucitanji toera mupitirize kukhala na cikhulupiro cakuwanga? Tendeni tione matawiro a mibvundzo ineyi.

3. Anyankhondo akhacitanji na maxango awo, pontho thangwi yanji?

³ Mu ndzidzi wakale, kazinji kene anyankhondo akhabvala xango yakuti ikhaphimbirwa na nthembe ya cinyama. Anyankhondo akhakhwaza mafuta xango yawo toera nthembe ipitirize kukhala mwadidi, pontho makhundu a utale akhonde kukhala na udzingiri. Nyankhondo angadzindikira kuti xango yace yaphoka, iye akhaisasanya mwakucimbiza. Natenepa iye akhali wakukhunganyika toera kuiphatisira pontho pa ndzidzi unango. Citsandzo ceneci cisabverana tani na cikhulupiro canu?

4. Thangwi yanji musafunika kudinga xango yanu ya cikhulupiro, pontho munacita tani pyenepi?

⁴ Ninga anyankhondo akale, imwe musafunika kudinga xango yanu na kuitsalakana ndzidzi onsene, natenepa munadzakhala  dzololo toera kumenya nkhondo Yacikristu, yakuti ndi nkhondo yakumenyana na mizimu yakuipa. (Aef. 6:10-12) Nkhabe munthu anafuna kutsalakana xango yanu yacikhulupiro. Mphapo munakhala tani na cinyindiro cakuti cikhulupiro canu ciri cakuwanga toera kuthimbana na mayesero? Cakutoma, musafunika kuphemba ciphedzo ca Mulungu. Buluka penepo, musafunika kuphatisira Mafala a Mulungu toera akuphedzeni kuona umaso wanu ninga munauonera Mulungu. (Aheb. 4:12) Bhibhlya isalonga: ‘Nyindira Yahova na ntima wako onsene, leka kunyindira udziwisi wako.’ (Mis. 3:5, 6) Mukunyerezera mavesi anewa, yeserani kukumbuka pisankhulo pidacita imwe cincino. Mwacitsandzo, kodi imwe mwathimbana kale na nkandzo wakusowa kobiri? Kodi musakumbuka pikiro ya Yahova inagumanika pa Ahebheri 13:5 yakuti: “Ine cipo ndinadzakusiya, pontho cipo ndinadzakuthawa”? Kodi pikiro ineyi isakupasani cinyindiro cakuti Yahova anakuphedzani? Khala ndi tenepo, pisapangiza kuti mukupitiriza kutsalakana mwadidi xango yanu ya cikhulupiro.

5. Panango munadzindikiranji mungadinga cikhulupiro canu?

⁵ Mungadinga mwadidi cikhulupiro canu panango munadzumatirwa. Panango munadzindikira kufewa kwanu kwakuti mukhadzati kukudzindikira. Mwacitsandzo, panango munadzindikira kuti cikhulupiro canu cafewa thangwi ya kudzudzumika kakamwe, uthambi na kutsukwala. Khala pyenepi pisacitika kuna imwe, munacitanji toera kupitiriza kutsidzikiza cikhulupiro canu?

6. Ndi pitsandzo pipi pinapangiza kuti midzidzi inango kudzudzumika ndi kwadidi?

⁶ Kudzudzumika thangwi ya pinthu pinango ndi kwadidi. Mwacitsandzo, ndi pyakufunika kwa ife kudzudzumika toera kukomeresa Yahova na Yezu. (1 Akor. 7:32) Tingacita madawo makulu, ife tisadzudzumika toera kukhala pontho na uxamwali na Mulungu. (Masal. 38:18) Ife tisadzudzumikambo toera kukomeresa ndzathu wa m’banja, kutsalakana banja yathu, kuphatanizambo Akristu andzathu.—1 Akor. 7:33; 2 Akor. 11:28.

7. Mwakubverana na Misangani 29:25, thangwi yanji nee tisafunika kugopa munthu?

⁷ Munjira inango, kudzudzumika kakamwe kunakwanisa kufewesa cikhulupiro cathu. Mwacitsandzo, panango tinadzudzumika kakamwe thangwi yakusowa cakudya na cakubvala. (Mat. 6:31, 32) Toera kumalisa kudzudzumika kweneku, panango tinaikha manyerezero athu basi ene ku pinthu pya mpfuma. Natenepa, panango tinatoma kufuna kakamwe kobiri. Tingatawirisa pyenepi kucitika kuna ife, cikhulupiro cathu kuna Yahova cinafewa, pontho uxamwali wathu na iye unadzakhala pangozwi. (Marko 4:19; 1 Tim. 6:10) Cinthu cinango cakuti cinakhuya cikhulupiro cathu ndi kudzudzumika kakamwe na pinanyerezera anango thangwi ya ife. Natenepa, panango tinagopa kusingirirwa peno kutcingwa na anthu m’mbuto mwakugopa kutsukwalisa Yahova. Toera kutsidzikizika m’misampha ineyi, tisafunika kuphemba Yahova toera atipase cikhulupiro na cipapo cinafuna ife kuti tithimbane na mayesero anewa.—Lerini Misangani 29:25; Luka 17:5.

8. Tisafunika kucitanji anyakupanduka angalonga uthambi?

⁸ Sathani wakuti ndi “baba wa uthambi,” asaphatisira anthu ace toera kumwaza uthambi thangwi ya Yahova kuphatanizambo abale na alongo athu. (Juw. 8:44) Mwacitsandzo, anyakupanduka asamwaza uthambi, pontho asaipisa gulu ya Yahova mukuphatisira masaiti, televizau, maprogramu a radyo na matsamba a mphangwa. Uthambi unoyu usacita khundu ya “mapswimo akugaka” a Sathani. (Aef. 6:16) Tisafunika kucitanji munthu unango angatoma kulonga na ife uthambi unoyu? Ife nee tisafunika kum’bvesera! Thangwi yanji? Thangwi tisakhulupira Yahova,  pontho tisanyindira abale athu. Natenepa tisafunika kucalira kucedza na anyakupanduka. Ife nee tisafunika kutawirisa nee cinthu cibodzi, ngakhale kusaka kudziwa mathangwi anaacitisa kulonga pyenepi.

9. Kodi kutsukwala kunatikhuya tani?

⁹ Kutsukwala kunakwanisa kufewesa cikhulupiro cathu. Midzidzi inango ife tinatsukwala thangwi ya nyatwa zathu. Mbwenye nee tisafunika kupwaza nyatwa zenezi. Pontho nee tisafunika kunyerezera nyatwa zathu ndzidzi onsene. Tingacita pyenepi, tinaduwala pinthu pyonsene pyadidi pidapikira Yahova kuna ife. (Apok. 21:3, 4) Kutsukwala kakamwe kunatifewesa mbaticimwana kutumikira Yahova. (Mis. 24:10) Mbwenye pyenepi nee pisafunika kucitika kuna ife.

10. Mwapfundzanji na mafala anagumanika pa tsamba idalemba mulongo unango?

¹⁰ Onani kuti mulongo unango wa ku Estados Unidos apitiriza tani kuwangisa cikhulupiro cace mu ndzidzi ukhatsalakana iye mamunace wakuti akhaduwala kakamwe. Pa tsamba idatumiza iye ku ofesi ikulu, iye alemba: “Makhaliro athu ndi akutsukwalisa kakamwe, pontho midzidzi inango asatifewesa, mbwenye cidikhiro cathu ndi cakuwanga. Ndisapereka takhuta kakamwe thangwi ya pinthu pyonsene pinatipasa Yahova toera kuwangisa cikhulupiro cathu. Mwandimomwene ife tikhafuna uphungu unoyu na ciwangiso ceneci. Pyenepi pisatiphedza toera kupitiriza kutumikira Yahova na kupirira mayesero anaphatisira Sathani toera kutifewesa.” Pinthu pidacitikira mulongo unoyu pisapangiza kuti ndi pyakukwanisika kukunda mabvero akutsukwala. Munjira ipi? Kumbukani kuti nyatwa zinathimbana na imwe ndi mayesero a Sathani. Nyindirani kuti Yahova anakubalangazani. Pontho lemedzani cakudya cauzimu cinakupasani iye.

11. Toera kudziwa mwadidi cikhulupiro cathu, ndi mibvundzo ipi inafunika ife kubvundzika?

¹¹ Kodi musaona kuti makhundu anango a xango yanu ya cikhulupiro asafunika kusasanyirwa? Miyezi mingasi idapita, kodi imwe mwakwanisa kucalira kudzudzumika kakamwe? Kodi imwe mwakhonda kubvesera uthambi unamwaza anyakupanduka peno kuketesana nawo? Kodi imwe mwakwanisa kukunda kutsukwala? Khala ndi tenepo, cikhulupiro canu ciri mwadidi.  Mbwenye tisafunika kucita mphole-mphole thangwi Sathani asaphatisira misampha inango toera kutiyesera. Cincino tendeni tidinge ubodzi mwa misampha ineyi.

12. Ninji pinafuna kucitika kuna ife tingafuna kakamwe mpfuma?

¹² Tingafuna kakamwe mpfuma, cikhulupiro cathu cinafewa mbaticimwana kucita pizinji kuna Yahova. Mpostolo Paulu alonga: “Munthu anaphata basa ninga nyankhondo nkhabe kucita malonda ninga pinacita anthu mu umaso wa ntsiku na ntsiku, thangwi iye asafuna kukomeresa ule adansankhula.” (2 Tim. 2:4) Mwandimomwene, anyankhondo Aciroma nee akhatawiriswa kucita basa inango. Ninji pikhafuna kucitika khala nyankhondo nee abvera ntemo unoyu?

13. Thangwi yanji nyankhondo nee akhafunika kucita malonda?

¹³ Nyerezerani basi. Nsoka wa anyankhondo usapfundza kumenya nkhondo na masupada namacibese, mbwenye m’bodzi wa iwo nee asagumanika. Nyankhondo unoyu ali kugulisa cakudya ku nzinda. Namasiku, anyankhondo asasasanyira pida pyawo pya nkhondo na kunoza masupada awo. Nyankhondo ule akhagulisa cakudya, ali kukhunganya cakudya toera agulise mangwana mwace. Mbwenye pidaca kunja, anyamalwa abwera mwakututumusa. Ndi nyankhondo upi wakuti ali wakukhunganyika toera kumenya mwadidi nkhondo ninga pinafuna nkadamu wa anyankhondo? Mbidakhala kuti muli kumenyambo nkhondo ineyi, mbamudasankhula kukhala dhuzi na nyankhondo ule akhakhunganyika toera kumenya nkhondo peno ule akhadzudzumika na kugulisa cakudya?

14. Ninga anyankhondo a Kristu, ndi cinthu cipi cakufunika kakamwe kwa ife?

¹⁴ Ife ndife ninga anyankhondo anewa adidi. Natenepa, cinthu cakufunika kakamwe kuna ife ndi kutsandzayisa Akadamu athu, Yahova na Kristu. Pyenepi ndi pyakufunika kakamwe kupiringana pinthu pinapereka dziko ya Sathani. Ife tisafunika kukhala na cinyindiro cakuti tiri na ndzidzi na mphambvu yakukwana toera kutumikira Yahova, pontho toera kutsalakana mwadidi xango yathu ya cikhulupiro kuphatanizambo pida pinango pyauzimu.

15. Ndi cenjezo ipi idapereka Paulu, pontho thangwi yanji?

 ¹⁵ Ndzidzi onsene tisafunika kucita mphole-mphole. Thangwi yanji? Mpostolo Paulu acenjeza kuti “ale anasankhula kukhala akupfuma” ‘anadzapeuswa mu cikhulupiro.’ (1 Tim. 6:9, 10) Fala yakuti ‘kupeuswa’ isapangiza kuti kuyesera kufuna pinthu pyakumanungo pyakuti nee ndi pyakufunika kakamwe kwa ife, pinakwanisa kutipeusa. Pontho pyenepi pinaikha pangozwi ntima wathu mbatifuna pinthu “pizinji pyakusowa basa na pyakuipa.” Natenepa tisafunika kukumbuka kuti Sathani asaphatisira pifuno pyenepi ninga misampha toera kufewesa cikhulupiro cathu.

16. Mwakubverana na Marko 10:17-22, ndi mibvundzo ipi inafunika ife kunyerezera?

¹⁶ Nyerezerani kuti muli na kobiri yakukwana toera kugula pinthu pizinji pyakumanungo. Kodi ndi pyakuipa kugula cinthu cinafuna ife, cakuti nee ndi cakufunika kakamwe? Panango nkhabe. Mbwenye nyerezerani mibvundzo iyi: Maseze ndikhale na kobiri toera kugula cinthu, kodi ndiri na ndzidzi toera kuciphatisira na kucitsalakana mwadidi? Kodi ndisafuna kakamwe mpfuma? Kodi kufuna kwanga pinthu pyakumanungo kunandicitisa kukhala ninga m’phale adakhonda ncemerero wa Yezu toera kucita pizinji m’basa ya Mulungu? (Lerini Marko 10:17-22.) Cinthu cakufunika kakamwe ndi kukhala na umaso wakukhonda kufuna  pinthu pizinji mbatiphatisira mphambvu yathu na ndzidzi wathu toera kucita cifuno ca Mulungu.

17. Ndi cinthu cipi cakuti nee tisafunika kuciduwala?

¹⁷ Cipo tisafunika kuduwala kuti tiri pa nkhondo, pontho tisafunika kukhala dzololo toera kumenya nkhondo ineyi ntsiku zonsene. (Apok. 12:17) Abale na alongo athu nee anatithukulira xango yathu ya cikhulupiro. Basa ya kuthukula xango ya cikhulupiro ndi ya m’bodzi na m’bodzi wa ife.

18. Thangwi yanji anyankhondo a mu ndzidzi wakale akhafunika kuphatira mwadidi maxango awo?

¹⁸ Mu ndzidzi wakale, nyankhondo akhalemedzwa kakamwe angakhala wacipapo kunkhondo. Mbwenye iye akhapibva kuti ndi wakupwazika angacimwana kubwerera na xango yace kunkhondo. Nyakulemba mbiri Waciroma anacemerwa Tacitus alemba: “Nyankhondo angacimwana kubwerera na xango yace kunkhondo, pikhali pyakupasa manyadzo kakamwe.” Ndi thangwi yace, anyankhondo akhafunika kuphatira mwadidi maxango awo.

19. Thangwi yanji tisafunika kuphatira mwadidi xango yathu ya cikhulupiro?

¹⁹ Ife tisaphatira mwadidi xango yathu ya cikhulupiro tingagumanika pa misonkhano yathu Yacikristu mwakukhonda phonya, pontho tingalonga dzina ya Yahova na Umambo wace kuna anango. (Aheb. 10:23-25) Kusiyapo pyenepi, tisafunika kuleri Mafala a Mulungu ntsiku zonsene na kuphemba Yahova kuti atiphedze toera tiphatisire pinapfundza ife. (2 Tim. 3:16, 17) Tingacita pyenepi, nee cida cibodzi ca Sathani cinakwanisa kutiphekesa kwenda na kwenda. (Iza. 54:17) ‘Xango yathu ikulu ya cikhulupiro’ inadzatitsidzikiza, pontho tinadzaphata basa mwacipapo pabodzi na abale na alongo athu. Kusiyapo kuwina nkhondo yathu ya ntsiku na ntsiku, ife tinadzakhala na mwai wakukhala kukhundu ya Yezu mu ndzidzi unafuna kuwina iye pakumenyana na Sathani pabodzi na anthu ace.—Apok. 17:14; 20:10.