1, 2. (a) Kodi Yezu atawira tani pidalonga Pedhru kuti bverekani ntsisi mwekhene? (Onani cithundzithundzi cakutoma) (b) Thangwi yanji Yezu atawira munjira ineyi?

PIDALONGA Yezu kuti mwakukhonda dembuka mbadathabuka mpaka kufa, anyakupfundzace atsukwala kakamwe! Iwo akhanyerezera kuti Yezu mbadakhazikisa pontho umambo wa Izraeli. Mpostolo Pedhru alonga: “Mbuya, bverekani ntsisi mwekhene! Pyenepi nee pisafunika kukucitikirani.” Yezu antawira: “Buluka patsogolo panga Sathani! Kwa ine, iwe ndiwe mwala wakugwegwedusa, thangwi manyerezero ako si a Mulungu tayu, mbwenye ndi a anthu.”—Mateu 16:21-23; Mabasa 1:6.

² Ntawiro wa Yezu wapangiza pakweca kuti manyerezero a Yahova na a dziko ya Sathani ndi akusiyana. (1 Juwau 5:19) Pedhru apanga Yezu toera akhale na maonero akuphonyeka akuti anthu azinji a dziko ali nawo. Mbwenye Yezu akhadziwa kuti Yahova akhafuna kuti iye akhale wakukhunganyika toera kuthabuka na kufa. Ntawiro wa Yezu wapangiza pakweca kuti iye atawira manyerezero a Yahova mbakhonda a dziko.

3. Thangwi yanji ndi pyakunentsa kunyerezera ninga Yahova, mbwenye nkhabe nentsa kunyerezera ninga anthu a dziko?

 ³ Mphapo ife tisanyerezera ninga Yahova peno ninga anthu a dziko? Ninga Akristu, tisawangisira toera kucita pinthu pinakomeresa Mulungu. Mphapo tisanyerezera munjira ipi? Kodi ife tisawangisira toera kucita pinthu pinakomeresa Yahova, pyakuti pisabveka kuona pinthu ninga munapionera iye? Mbwenye tisafunika kuwangisira toera kucita pyenepi, thangwi kunyerezera ninga anthu a dziko nkhabe nentsa. Pyenepi pisacitika thangwi tazungulirwa na nzimu wa dziko. (Aefesi 2:2) Pontho, anthu a dziko kazinji kene asatsalakana pinthu pyawo basi na ife tinakwanisambo kukhala na cipendamiro cakunyerezera ninga iwo. Mwandimomwene ndi pyakunentsa kunyerezera ninga Yahova, mbwenye nkhabe nentsa kunyerezera ninga anthu a dziko.

4. (a) Ninji pinafuna kucitika tingatawira kutsogolerwa na dziko? (b) Tinadzapfundzanji mu nsolo uno?

⁴ Tingatawira kutsogolerwa na manyerezero a dziko tinadzakhala anthu akufunika tekha na akusankhula tekha cadidi na cakuipa. (Marko 7:21, 22) Ndi thangwi yace, mphyakufunika kakamwe kupfundza toera tikhale na ‘manyerezero a Mulungu’ tayu ‘manyerezero a anthu.’ Nsolo uno unatiphedza toera kucita pyenepi. Ife tinadzapfundza kuti kuona pinthu ninga munapionera Yahova nee kusamalisa ufulu wathu wakusankhula, mbwenye kusatiphedza. Pontho tinadzapfundza kuti tinacalira tani kuumbwa peno kutsogolerwa na manyerezero a dziko. Mu nsolo unatowera tinapfundza kuti Yahova asaona tani pinthu pinango, pontho ife tinakhala tani na manyerezero ninga ace.

5. Thangwi yanji anthu anango nkhabe funa kutsogolerwa na andzawo?

⁵ Anthu anango nee asafuna kutsogolerwa na manyerezero a munthu unango. Iwo asalonga: “Nkhabe munthu anafuna kutsogolera manyerezero anga.” Panango iwo akhafuna kulonga kuti anacita okha pisankhulo pyawo peno ali na ufulu wakucita pisankhulo. Iwo nkhabe funa kutongwa na anango peno kuakakamiza toera akhalembo ninga iwo. * (Onani cidzindikiro capantsi.)

6. (a) Ndi ufulu upi udatipasa Yahova? (b) Kodi ufulu unoyu ndi wakusowa madire?

⁶ Ndi pyadidi kudziwa kuti kutawira kutsogolerwa na Yahova nee kusamalisa ufulu wathu wakucita pisankhulo. 2 Akorinto 3:17 isalonga: “Panagumanika nzimu wakucena wa Yahova pali na ufulu.” Yahova atipasa ufulu wakusankhula ntundu wa munthu unafuna ife kukhala. Tiri na ufulu wakusankhula pinthu pinaona ife kukhala pyakufunika. Yahova aticita munjira ineyi. Mbwenye pyenepi nee pisabveka kuti ufulu wathu nkhabe madire. (Lerini 1 Pedhru 2:16.) Toera kudziwa cadidi na cakuipa, Yahova atipasa Mafalace toera atitsogolere. Kodi pyenepi pisamalisa ufulu wathu, peno pisatiphedza?

7, 8. Kodi kunyerezera ninga Yahova kusamalisa ufulu wathu? Perekani citsandzo.

⁷ Nyerezerani kuti anyakubala akupfundzisa anawo makhaliro adidi. Panango akuapfundzisa toera akhale akukhulupirika,  akuphata basa mwaphinga na akutsalakana anango mwadidi. Pyenepi nee pisamalisa ufulu wa ana. M’mbuto mwace, anyakubala akukhunganya anawo toera akhale na umaso wadidi. Mu ndzidzi unakula anapiana mbabuluka panyumba asakhala na ufulu wakucita pisankhulo pyawo. Angasankhula kukhala maso mwakubverana na pidaapfundzisa anyakubalawo, iwo anadzatsandzaya nakucita pisankhulo pyadidi mbacalira nyatwa zizinji, kupswipa ntima na kutsumbikika.

⁸ Ninga nyakubala wadidi, Yahova asafuna kuti anace akhale na umaso wadidi. (Izaiya 48:17, 18) Ndi thangwi yace, iye asatipasa midida inalonga kuti tinakhala tani na makhaliro adidi, pontho tinatsalakana tani anango. Pyenepi nee pisamalisa ufulu wathu. M’mbuto mwace, pisaticitisa kukhala anthu a ndzeru na pisatiphedza toera kucita pisankhulo pyadidi. (Masalmo 92:5; Misangani 2:1-5; Izaiya 55:9) Tinganyerezera ninga Yahova tinapitiriza kucita pinafuna ife, mbwenye tinadzacita pisankhulo pyadidi pyakuti pinadzatitsandzayisa. (Masalmo 1:2, 3) Mwandimomwene, kunyerezera ninga Yahova kunatiphedza kakamwe!

9, 10. Ninji pinapangiza kuti manyerezero a Yahova ndi akufunika kakamwe kupiringana a dziko?

⁹ Thangwi inango inaticitisa kufuna kunyerezera ninga Yahova ndi yakuti manyerezero a Yahova ndi adidi kakamwe kupiringana a dziko. Dziko isapereka uphungu wakuti tinakhala tani na makhaliro adidi, tinakhala tani na banja yakutsandzaya, tinakhala tani na basa yadidi na pinango. Mbwenye uphungu uzinji unapereka dziko nkhabe bverana na manyerezero a Yahova. Mwacitsandzo, kazinji kene dziko isakulumiza anthu toera kusaka pinafuna iwo basi. Isakulumizambo anthu toera kuona ulukwali ninga pinthu pyakutawirika. Pontho m’midzidzi inango dziko isalonga kuti khala anyakumanga banja nee ndi akutsandzaya, iwo anakwanisa kumwalana peno kukhondana mwakusowa mathangwi adidi. Uphungu unoyu nkhabe bverana na pinapfundzisa Bhibhlya. Mphapo uphungu wa dziko ndi wakufunika kakamwe kupiringana wa m’Bhibhlya?

¹⁰ Yezu alonga: “Udziwisi wa munthu usapangizika na mabasa akulungama anacita iye.” (Mateu 11:19) Maseze dziko yathambaruka kakamwe na tekinolojiya, mbwenye nyatwa zinapingiza kutsandzaya kwathu zisapitiriza basi kutekera, ninga nkhondo, kusankhulana na uphanga. Kusiyapo pyenepi, dziko isaona ulukwali ninga pinthu pyakutawirika. Mbwenye anthu azinji asatawira kuti pyenepi pisafudza mabanja, pisabweresa matenda na nyatwa zinango. Ndiye tani uphungu wa Yahova? Akristu anatawira kutsogolerwa na Yahova asakhala na mabanja akutsandzaya, ungumi wadidi, pontho asabverana mwadidi na abale na alongo pa dziko yonsene yapantsi. (Izaiya 2:4; Mabasa 10: 34, 35; 1 Akorinto 6:9-11) Pyenepi pisapangiza pakweca kuti manyerezero a Yahova ndi akufunika kakamwe kupiringana a dziko.

11. Mbani akhatsogolera manyerezero a Mose, pontho ndi nkhombo zipi zidakhala na iye?

¹¹ Atumiki akukhulupirika a Yahova a mu ndzidzi wakale akhadziwa kuti manyerezero a Yahova ndi adidi kakamwe. Mwacitsandzo, maseze Mose apfundziswa “udziwisi onsene wa dziko ya Ejitu,” mbwenye iye akhadziwa kuti udziwisi wandimomwene usabuluka kwa Yahova. (Mabasa 7:22; Masalmo 90:12) Natenepa iye aphemba Yahova: ‘Ndidziwiseni njira zanu.’ (Eksodo 33:13) Nakuti Mose akhatawirisa kuti Yahova atsogolere manyerezero ace, Iye am’phatisira munjira yakudzumatirisa toera kukwanirisa cifuniro cace, pontho Yahova alemedza Mose mukuncemera mamuna wacikhulupiro cakuwanga.—Ahebheri 11:24-27.

12. Kodi pisankhulo pya Paulu pikhabulukira kupi?

¹² Mpostolo Paulu akhali na maluso mazinji, akhadapfundza kakamwe, pontho akhalonga pilongero piwiri. (Mabasa 5:34; 21:37, 39; 22:2, 3) Mbwenye iye akhonda udziwisi wa dziko mbacita pisankhulo pyace mwakubverana na Mafala a Mulungu. (Lerini Mabasa 17:2; 1 Akorinto 2:6, 7, 13.) Pyenepi pyacitisa kuti anthu azinji aphedzeke na basa yace yakumwaza mphangwa, pontho iye akhali na cidikhiro cakutambira muoni wakukhonda mala.—2 Timoti 4:8.

13. Kodi mbani ali basa yakuticitisa kunyerezera ninga Yahova?

¹³ Mwakukhonda penula, manyerezero a Mulungu ndi akufunika kakamwe kupiringana a dziko. Tingabvera midida ya Mulungu, tinadzakhala akutsandzaya mbititambira nkhombo. Mbwenye Yahova, “m’bandazi wakukhulupirika na wandzeru” na akulu a mpingo nee asatikakamiza toera kunyerezera ninga iwo. (Mateu 24:45; 2 Akorinto 1:24) Natenepa m’bodzi na m’bodzi wa ife asafunika kuwangisira toera kunyerezera ninga Yahova. Mphapo tinacita tani pyenepi?

14, 15. (a) Kodi tisafunika kunyerezeranji toera manyerezero athu abverane na a Yahova? (b) Thangwi yanji nee tisafunika kutawira kutsogolerwa na dziko? Perekani citsandzo.

¹⁴ Lemba ya Aroma 12:2 isalonga: “Lekani kupitiriza kutowezera anthu a dziko, mbwenye cinjani manyerezero anu toera mukwanise kudziwa mwadidi pinafuna Mulungu, pyakuti ndi pyadidi, pyakuthema na pyakutawirika kwa iye.” Vesi ineyi isapangiza kuti maseze mbitidzati kupfundza undimomwene tikhatsogolerwa na dziko, mbwenye tinakwanisa kucinja manyerezero athu toera ticite pinafuna Mulungu. Ngakhale nyatwa zidathimbana na ife zinakwanisa kukhuya njira yathu yakunyerezera, mbwenye manyerezero athu akupitiriza kucinja. Ndzeru zathu zisacinja mwakubverana na pinanyerezera ife. Tingapfundza mwacidikhodikho njira inanyerezera Yahova, tinadzadzindikira kuti ndzidzi onsene maonero ace ndi adidi. Pyenepi pinaticitisa kunyerezera ninga Iye.

¹⁵ Mbwenye toera kunyerezera ninga Yahova, tisafunika kucalira “kutowezera anthu a dziko.” Pyenepi pisabveka kuti nee tisafunika kuona, kuleri, na kubvesera pinthu pyonsene pyakuti nkhabe bverana na manyerezero a Mulungu. Toera kubvesesa kuti thangwi yanji pyenepi ndi pyakufunika, nyerezerani citsandzo ici: Munthu angafuna  kukhala na ungumi wadidi, asafunika kusankhula cakudya cadidi. Mbwenye nyerezerani pinafuna kucitika khala ntsiku zonsene iye asadya cakudya cakulula. Kodi pyenepi pinam’phedza toera kukhala na ungumi wadidi? Nkhabe. Munjira ibodzi ene, kuwangisira kwathu konsene toera kunyerezera ninga Yahova kunakhala kwakusowa basa tingatawira kutsogolerwa na dziko.

16. Kodi tisafunika kucaliranji?

¹⁶ Kodi ife tinakwanisa kucalira manyerezero onsene a dziko? Nkhabe, ife tisakhala mu dziko ino, ndi thangwi yace m’midzidzi inango tinakwanisa kubva manyerezero a dziko. (1 Akorinto 5:9, 10) Ngakhale pakumwaza mphangwa, ife tisabva manyerezero akuipa analonga anthu na pikhulupiro pyawo pyauthambi. Maseze nee tinakwanisa kucalira manyerezero onsene akuipa, mbwenye nee tisafunika kupitiriza kuanyerezera peno kuatawira. Ninga Yezu, tisafunika kukhonda mwakucimbiza pinafuna Sathani. Cinango cinafuna kutiphedza ndi kucalira manyerezero a dziko m’makhundu onsene.—Lerini Misangani 4:23.

17. Tinacalira tani manyerezero a dziko?

¹⁷ Mwacitsandzo, tisafunika kuona mwadidi pakusankhula axamwali. Bhibhlya isaticenjeza kuti tingacita uxamwali wa ponda ndi pondembo na anthu akuti nee asalambira Yahova, tinatoma kunyerezera ninga iwo. (Misangani 13:20; 1 Akorinto 15:12, 32, 33) Pontho tisafunika kucita mphole-mphole pakusankhula ubalangazi. Tingacalira ubalangazi wakuti usapangiza kusanduka kwa pinthu, uphanga peno ulukwali, tinacalira kukhala na manyerezero akuti anaticimwanisa “kudziwa Mulungu.”—2 Akorinto 10:5.

18, 19. (a) Thangwi yanji tisafunika kucalira maonero a dziko maseze apangizwe munjira yakukhonda oneka mwadidi? (b) Ndi mibvundzo ipi yakuti tisafunika kubvundzika, pontho thangwi yanji?

¹⁸ Ife tisafunikambo kudzindikira na kukhonda manyerezero a dziko anabwera munjira zakukhonda kuoneka mwadidi. Mwacitsandzo, matsamba anango a mphangwa asaphedzera maonero a ndale za dziko.  Peno kulonga mbiri ya munthu wakuti akhali wakubvekera kakamwe ku dziko. Mafilme na mabukhu anango asacitisa kuti maonero akuti “wakutoma ndine” peno “banja isafunika kukhala pa mbuto yakutoma” aoneke ninga maonero adidi. Mbwenye maonero anewa asapwaza Bhibhlya, thangwi iyo isalonga kuti ife pabodzi na mabanja athu tinadzakhala akutsandzaya tingafuna Yahova kupiringana pyonsene. (Mateu 22:36-39) Ngakhale mafilme a anapiana peno pinthu pinango pinalonga thangwi ya iwo pinaoniwa ninga pyadidi, pinakwanisa kuacitisa kuona ulukwali ninga wakutawirika.

¹⁹ Pyenepi nee pisabveka kuti ndi pyakuipa kutsandzaya na ubalangazi. Mbwenye tisafunika kubvundzika: ‘Kodi ine ndisakwanisa kudzindikira maonero a dziko ngakhale apangizwe munjira yakukhonda oneka mwadidi? Kodi ine ndisacalira kuona maprogramu a televizau peno kuleri mphangwa zinaphedzera manyerezero a dziko? Kodi ndisaphedza ananga toera acalirembo pinthu pyenepi? Ndisaphedza ananga toera akhale na maonero a Yahova mwakukhonda tsalakana pinaona iwo na pinabva iwo ku dziko?’ Tingadzindikira kusiyana kwa manyerezero a Mulungu na a dziko, tinacalira “kutowezera anthu a dziko.”

20. Ninji pinafuna pangiza kuti tiri kutsogolerwa na Yahova peno na dziko?

²⁰ Tisafunika kukumbuka kuti pana anthu awiri basi anapereka mphangwa. M’bodzi ndi Yahova, unango ndi Sathani na dziko yace. Mwa anthu anewa awiri mbani anakutsogolerani? Ntawiro usanyindira ule anakupasani mphangwa. Tingatawira maonero a dziko, iyo inatsogolera manyerezero athu, pontho ife tinanyerezera mbaticita pinthu basi ene toera kutsandzayisa umaso wathu. Natenepa tisafunika kucita mphole-mphole pakusankhula pinthu pinafuna ife kuona, kubvesera, kuleri na kunyerezera.

21. Tinadzapfundzanji mu nsolo unatowera?

²¹ Mu nsolo uno tapfundza kuti toera tikhale na manyerezero a Yahova tisafunika kucalira manyerezero a dziko. Pontho, tisafunika kupfundza manyerezero a Yahova, natenepa tinadzanyerezera ninga iye. Mu nsolo unatowera tinadzapfundza kuti tinacita tani pyenepi.