NSOLO WA PFUNDZIRO 26
NYIMBO 123 Tisabvera Yahova na Gulu Yace
Mwakucepeseka, Tawirani Kuti Nee Musadziwa Pyonsene
“Ife nkhabe kwanisa kubvesesa pyonsene pya Wamphambvu Zonsene.”—YOBE 37:23.
PINAFUNA IFE KUPFUNDZA
Tinapfundza kuti maseze nee tisadziwa pyonsene pinafuna kucitika, ife tinakwanisa kupirira nyatwa tinganyindira Yahova mbatinyerezera basi ene pinthu pinadziwa ife.
1. Yahova aticita na maluso api, pontho thangwi yanji?
YAHOVA aticita na luso yakunyerezera, yakupfundza pinthu pipswa na yakudziwa kuti tinaphatisira tani pinthu pinapfundza ife. Thangwi yanji iye aticita tenepa? Toera tikwanise ‘kugumana cidziwiso ca Mulungu’ mbatintumikira na luso yathu yakunyerezera.—Mis. 2:1-5; Aroma 12:1.
2. (a) Tisafunika kudzindikiranji? (Yobe 37:23, 24) (Onanimbo foto.) (b) Thangwi yanji ndi pyadidi kucita pyenepi?
2 Ndimomwene kuti Yahova aticita na luso yakupfundza, mbwenye pali na pinthu pizinji pyakuti nee tisapidziwa. (Lerini Yobe 37:23, 24.) Nyerezerani pidacitikira Yobe. Yahova acita mibvundzo mizinji toera Yobe abvesese kuti pana pinthu pizinji pyakuti iye nee asapidziwa. Pyenepi pyaphedza Yobe toera kukhala wakucepeseka kakamwe mbacinja manyerezero ace. (Yobe 42:3-6) Munjira ibodzi ene, ndi pyadidi kukhala akucepeseka mbatidzindikira kuti nee tisadziwa pyonsene. Tingacita pyenepi, tinakwanisa kukhala na cinyindiro cakuti Yahova ndzidzi onsene anatipanga pinthu pyakuti mwandimomwene tisafunika kupidziwa toera ticite pisankhulo pyadidi.—Mis. 2:6.
Ninga Yobe, ife tinaphedzeka tingadzindikira kuti nee tisadziwa pyonsene (Onani ndima 2)
3. Tinapfundzanji mu nsolo uno?
3 Mu nsolo uno, tinapfundza pinthu pingasi pyakuti nee tisapidziwa, pontho tinaona nyatwa zakuti panango tinathimbana nazo thangwi yakukhonda kudziwa pinthu pyenepi. Tinapfundzambo kuti thangwi yanji ndi pyadidi kukhonda kudziwa pinthu pinango. Kupfundza pyenepi kunatiphedza toera kunyindira kakamwe kuti Yahova, ‘Ule wakuti asadziwa pyonsene,’ asatipanga pinthu pyonsene pyakuti mwandimomwene tisafunika kupidziwa.—Yobe 37:16.
NEE TISADZIWA KUTI NTSIKU YAKUMALA INAFIKA LINI
4. Mwakubverana na Mateu 24:36, ndi pinthu pipi pyakuti nee tisapidziwa?
4 Lerini Mateu 24:36. Ife nee tisadziwa kuti ntsiku yakumala kwa dziko ino yakuipa inafika lini. Ngakhale Yezu, mu ndzidzi ukhali iye pa dziko yapantsi nee akhadziwa thangwi ya “ntsiku ineyi na ndzidzi unoyu.” a Mukupita kwa ndzidzi, iye apanga apostolo ace kuti ndi Yahova anasankhula ndzidzi unafuna kucitika pinthu “pantsi pa utongi wace.” (Mabasa 1:6, 7) Yahova akhazikisa ntsiku inafuna iye kufudza dziko ino, mbwenye ife nee tinakwanisa kudziwa kuti pyenepi pinacitika lini.
5. Ndi pinthu pipi pyakuti panango pinaticitikira thangwi yakukhonda kudziwa ntsiku yakumala kwa dziko?
5 Pidalonga Yezu pisapangiza kuti ife nee tisadziwa kuti tisafunika kudikhira ndzidzi ungasi toera kumala kufike. Na thangwi ineyi, panango tinasiya kukhala akupirira peno tinatsukwala, makamaka khala tiri kudikhira ntsiku ya Yahova mu pyaka pizinji. Panango pinanentsambo kupirira khala acibale athu peno anthu anango asatiseka thangwi yakukhonda kufika kwa ntsiku ineyi. (2 Ped. 3:3, 4) Kusiyapo pyenepi, panango tinanyerezera kuti mbapidakhala pyakukhonda nentsa kupirira mbatidadziwa ntsiku yakumala kwa dziko ino.
6. Thangwi yanji ndi pyadidi kukhonda kudziwa ntsiku yakumala kwa dziko ino?
6 Thangwi yakukhonda kutipanga ntsiku yakumala kwa dziko ino, Yahova ali kutipasa mwai toera kupangiza kuti tisantumikira thangwi yakunfuna na kun’nyindira. Ife tisafuna kutumikira Yahova kwenda na kwenda, tayu basi ene mpaka kumala kwa dziko ino. M’mbuto mwakunyerezera kuti “ntsiku ya Yahova” inafika lini, ndi pyadidi kunyerezera pinthu pyadidi pinafuna kucitika ntsiku ineyi ingafika. Pyenepi pinatiphedza toera kukhala na uxamwali wakuwanga na Yahova, kun’nyindira kakamwe na kucita pyonsene pinakwanisa ife toera kuntsandzayisa.—2 Ped. 3:11, 12.
7. Ndi pinthu pipi pinadziwa ife?
7 Ndi pyakufunika kakamwe kunyerezera pinthu pinadziwa ife. Tisadziwa kuti ntsiku zakumalisa zatoma mu caka ca 1914. Yahova alembesa m’Bhibhlya pinthu pinapangiza kuti ntsiku zakumalisa zatoma mu caka ca 1914, pontho apangiza kuti dziko mbidakhala tani kutomera mu caka ceneci. Natenepa, ife tiri na cinyindiro cakuti “ntsiku ikulu ya Yahova iri dhuzi.” (Sof. 1:14) Pontho tisadziwa kuti Yahova asafuna kuti timwaze “mphangwa zadidi za Umambo” kuna anthu azinji kakamwe. (Mat. 24:14) Mphangwa zenezi ziri kumwazwa m’madziko akupiringana 240 mu pilongero pyakupiringana 1.000. Ife nee tisafunika kudziwa thangwi ya “ntsiku ineyi na ndzidzi unoyu” toera kucita pyonsene pinakwanisa ife m’basa ineyi yakufunika kakamwe.
NEE TISADZIWA PINAFUNA KUCITA YAHOVA
8. Mafala akuti “mabasa a Mulungu wandimomwene” asabvekanji? (Ekleziaste 11:5)
8 Midzidzi inango nee tinadziwa “mabasa a Mulungu wandimomwene.” (Lerini Ekleziaste 11:5.) Mafala anewa asabveka pinthu pinacita Yahova peno pinatawirisa iye kucitika toera kukwanirisa cifuno cace. Ife nee tisadziwa mathangwi anacitisa Yahova kutawirisa pinthu kucitika. Peno nee tisadziwa kuti Yahova anacitanji toera kutiphedza. (Mas. 37:5) Bhibhlya isalandanisa kukhonda kudziwa “mabasa a Mulungu wandimomwene” na kukhonda kubvesesa kukula kwa mwana m’mimba mwa mai wace. Ngakhale asiyentista nee asadziwa mwadidi kuti mwana asakula tani m’mimba mwa mai wace. Munjira ibodzi ene, nee tisadziwambo pyonsene pinacita Yahova.
9. Ndi pinthu pipi pyakuti panango pinaticitikira thangwi yakukhonda kudziwa kuti Yahova anatiphedza tani?
9 Thangwi yakukhonda kudziwa pinafuna kucita Yahova toera kutiphedza, panango tinatoma kugopa kucita pisankhulo pinango mbatikhonda kucita pizinji m’basa ya Yahova. Mwacitsandzo, panango tinagopa kuenda katumikira ku cisa ciri na amwazi mphangwa akucepa. Panango tinatoma kunyerezera kuti Yahova nee ali kutipasa nkhombo khala nee tiri kukwanisa kucita pinafuna ife n’gulu ya Yahova, khala tiri kucita pizinji m’basa ya kumwaza mphangwa mbwenye nee tiri na mapfundziro a Bhibhlya peno khala tikuthimbana na pinentso m’basa inacita ife n’gulu ya Yahova.
10. Ndi makhaliro api akufunika akuti tinakwanisa kukhala nawo thangwi yakukhonda kudziwa pinthu pinafuna kucita Yahova?
10 Kukhonda kudziwa pinafuna kucita Yahova kuna ife kusatiphedza toera kukulisa nkhaliro wakucepeseka. Pyenepi pisatiphedza kubvesesa kuti Yahova ndzidzi onsene asadziwa pinthu pyakufunika kuna ife. (Iza. 55:8, 9) Pontho ndzidzi onsene tisanyindira Yahova toera pinthu pitifambire mwadidi. Basa yathu yakumwaza mphangwa peno mabasa anango anacita ife n’gulu ya Yahova angafamba mwadidi, tisapasa mbiri Yahova. (Mas. 127:1; 1 Kro. 3:7) Pinthu pingakhonda kufamba ninga mukhadikhira ife, tisafunika kukumbuka kuti Yahova asaona pyonsene pinacitika. (Iza. 26:12) Ife tisacita pinakwanisa ife, pontho tisanyindira kuti Yahova anatiphedza. Tiri na cinyindiro cakuti iye anatiphedza maseze nee anacita pyenepi mwacirengo ninga pikhacita iye mu ndzidzi wakale.—Mabasa 16:6-10.
11. Ndi pinthu pipi pyakufunika pinadziwa ife thangwi ya Yahova?
11 Ife tisadziwa kuti Yahova ndi waufuni, waulungami na waudziwisi. Tisadziwambo kuti iye asakomerwa na pinthu pinacita ife kuna iye na kuna abale na alongo anthu. Pontho tiri na cinyindiro cakuti ndzidzi onsene Yahova asapasa nkhombo anthu akukhulupirika kuna iye.—Aheb. 11:6.
NEE TISADZIWA PINAFUNA KUCITIKA MANGWANA
12. Lemba ya Tiyago 4:13, 14, isatipfundzisanji?
12 Lerini Tiyago 4:13, 14. Ife tiri na cinyindiro cakuti nee tisadziwa pinafuna kuticitikira mangwana. Mu dziko ino tisacitikirwa na “pinthu pyakukhonda kudikhirwa.” (Ekle. 9:11) Na thangwi ineyi, nee tisadziwa khala pinthu pinanyerezera ife pinafamba mwadidi, pontho nee tisadziwa khala tinapitiriza kukhala m’maso toera kucita pinanyerezera ife.
13. Tisapibva tani pinthu pingakhonda kucitika ninga mukhadikhira ife?
13 Nakuti nee tisadziwa pinafuna kuticitikira ntsogolo, panango pinakhala pyakunentsa kuna ife kupirira. Panango pyenepi pinaticitisa kukhala akudzudzumika mbatikhonda kutsandzaya. Umaso wathu unakwanisa kucinja mwakukhonda dikhira, pontho pyenepi panango pinatitsukwalisa kakamwe. Kusiyapo pyenepi, pinthu pingakhonda kucitika ninga mukhadikhira ife, ntima usapha.—Mis. 13:12.
14. Kutsandzaya kwathu kusanyindiranji? (Onanimbo mafoto.)
14 Tingathimbana na nyatwa, tisakhala na mwai wakupangiza kuti mwakukhonda tsalakana pinacitika, tisatumikira Yahova thangwi tisanfuna. Bhibhlya isapangiza kuti nee tisafunika kudikhira kuti Yahova anatitsidzikiza mu nyatwa zonsene, pontho nee tisafunika kunyerezera kuti iye asakhazikisa pinthu pinafuna kuticitikira mu umaso wathu. Yahova asadziwa kuti kutsandzaya kwathu nee kusanyindira kudziwa pinthu pinafuna kuticitikira ntsogolo. Mwandimomwene, kutsandzaya kwathu kusanyindira kubvera pitsogolero pya Yahova. (Yer. 10:23) Tingaphemba ciphedzo ca Yahova toera kucita pisankhulo, nee tisadzudzumika kakamwe na pinthu pinafuna kucitika. Pyenepi pinakhala ninga tiri kulonga kuti: “Yahova angafuna, ife tinadzakhala m’maso, mbaticita ipi peno pire.”—Tiya. 4:15.
Tingabvera pitsogolero pya Yahova tisatsidzikizwa (Onani ndima 14-15) b
15. Tisadziwanji thangwi ya ntsogolo?
15 Ndimomwene kuti ife nee tisadziwa pinthu pinafuna kuticitikira ntsogolo, mbwenye tisadziwa kuti Yahova apikira kuti anatipasa umaso wakukhonda mala. Anango anatambira umaso unoyu kudzulu, anangombo anatambira pano pa dziko yapantsi. Ife tisadziwa kuti Yahova nkhabe kulonga uthambi, pontho nkhabepo cinthu cinafuna kumpingiza toera kukwanirisa mapikiro ace. (Tito 1:2) Ndiye ‘analonga mwanyapantsi kuti pinthu pinacitika tani, pontho kutomera kale kakamwe, asalonga pinthu pyakuti pidzati kucitika.’ Pyonsene pidalonga Yahova nduli kuti mbapidacitika pyacitikadi. Pontho pyonsene pidalonga iye kuti pinacitika ntsogolo pinacitikadi. (Iza. 46:10) Kusiyapo pyenepi, ife tiri na cinyindiro cakuti nkhabe cinafuna kupingiza Yahova kutifuna. (Aroma 8:35-39) Mwakukhonda tsalakana pinthu pinafuna kuticitikira mu umaso wathu, iye anatipasa udziwisi, anatibalangaza, pontho anatipasa mphambvu toera kupirira. Tiri na cinyindiro consene cakuti Yahova anatiphedza, pontho anatipasa nkhombo.—Yer. 17:7, 8.
NEE TINAKWANISA KUBVESESA KUTI YAHOVA ASATIDZIWA MPAKA PAPI
16. Ndi pinthu pipi pinadziwa Yahova thangwi ya ife pyakuti nee tisapibvesesa mwadidi? (Masalmo 139:1-6)
16 Lerini Masalmo 139:1-6. Yahova asadziwa pyonsene thangwi ya ife. Iye asadziwa pinanyerezera ife na mabvero athu. Iye asadziwa pinthu pinalonga ife na piri muntima mwathu. Iye asadziwambo pyonsene pinacita ife, pontho thangwi yanji tacita pyenepi. Mambo Dhavidhi apangiza kuti Yahova ndzidzi onsene asaona pinthu pinaticitikira, pontho ali dzololo toera kutiphedza. Musapibva tani thangwi yakudziwa kuti Yahova, Nciti wakudzulu na dziko yapantsi asationa munjira ineyi? Pyenepi ndi pyakudzumisa kakamwe. Na thangwi ineyi, Dhavidhi alonga: “Mphyakunentsa kakamwe kwa ine kudziwa pinthu pyenepi pyonsene. Nakuti mphyakudzumisa kakamwe, ine nkhabe kwanisa kupibvesesa.”—Mas. 139:6.
17. Thangwi yanji panango pinakhala pyakunentsa kuna ife kutawira kuti Yahova asatidziwa mwadidi?
17 Thangwi ya njira idakuzwa ife, misambo yathu peno pinthu pikhakhulupira ife mbatidzati kupfundza undimomwene, panango pinakhala pyakunentsa kuna ife kuona Yahova ninga Baba waufuni wakuti asatitsalakana. Panango tinaona kuti Yahova nee anakhalabve xamwali wathu peno ali kutali kakamwe na ife tinganyerezera kuti madawo adacita ife nduli ndi makulu kakamwe. Midzidzi inango, Dhavidhi akhalambo na manyerezero ninga anewa. (Mas. 38:18, 21) Munthu wakuti asawangisira kakamwe toera kucinja umaso wace kuti atsandzayise Yahova panango anabvundzika: ‘Khala mwandimomwene Mulungu asandidziwa, thangwi yanji asafuna kuti ndisiye kucita pinthu pinakomerwa na ine?’
18. Thangwi yanji ndi pyakufunika kutawira kuti Yahova asatidziwa mwadidi kupiringana ife ene? (Onanimbo mafoto.)
18 Ndi pyakufunika kutawira kuti Yahova asatidziwa mwadidi kupiringana ife ene, pontho kuti asaona pinthu pyadidi pinacita ife pyakuti ife nee tisapiona. Maseze Yahova asaona madodo athu, iye asatifuna kakamwe thangwi asaona kuwangisira kunacita ife. (Aroma 7:15) Tingabvesesa mwadidi pyenepi, tinakhala na mphambvu toera kuntumikira mwakukhulupirika na mwakutsandzaya.
Tingathimbana na nyatwa mwakukhonda dikhira, Yahova asawangisa cikhulupiro cathu na mapikiro ace a ntsogolo toera kutiphedza kupirira (Onani ndima 18-19) c
19. Tisadziwanji thangwi ya Yahova?
19 Tisadziwa kuti Yahova ndi ufuni. Ife nee tisapenula pyenepi. (1 Juw. 4:8) Tisadziwa kuti pyonsene pinatipanga iye toera kucita ndi thangwi iye asatifuna, pontho asafuna kuti tikhale na umaso wadidi. Kusiyapo pyenepi, tisadziwa kuti Yahova asafuna kuti tikhale na umaso wakwenda na kwenda. Mbwenye toera pyenepi pikwanisike, iye atipasa ciomboli. Ciomboli ceneci cisatipasa cinyindiro cakuti maseze ticite madodo, tinakwanisa kutsandzayisa Yahova. (Aroma 7:24, 25) Pontho ife tisadziwa kuti “Mulungu ndi nkulu kupiringana mitima yathu, pontho iye asadziwa pinthu pyonsene.” (1 Juw. 3:19, 20) Yahova asadziwa pyonsene thangwi ya ife, pontho ali na cinyindiro cakuti tinakwanisa kucita pinthu pinafuna iye.
20. Thangwi yanji nee tisafunika kudzudzumika kakamwe na pinthu pyakuti nee tisapidziwa?
20 Yahova asatipanga pyonsene pinafunika ife kudziwa. Tingakhala akucepeseka mbatitawira pyenepi, nee tisadzudzumika kakamwe na pinthu pyakuti nee tisapidziwa. M’mbuto mwace, tisafunika basi ene kunyerezera pinthu pyakuti mwandimomwene ndi pyakufunika. Tingacita pyenepi tinapangiza kuti ndife akucepeseka, pontho tisanyindira na ntima onsene Yahova, “Ule wakuti asadziwa pyonsene.” (Yobe 36:4) Ndimomwene kuti nee tisadziwa pinthu pinango, mbwenye tisadziwa kuti Yahova anapitiriza kutipfundzisa kwenda na kwenda. Pyenepi ndi pyadidi thangwi nee tinasiya kupfundza pinthu pipswa thangwi ya Mulungu wathu Yahova.—Ekle. 3:11.
NYIMBO 104 Nzimu Wakucena Ndi Muoni wa Mulungu
a Yezu anatsogolera nkhondo yakufudzwa kwa dziko ino ya Sathani. Natenepa, ife tinakwanisa kulonga kuti cincino iye asadziwa ntsiku inafuna kucitika nkhondo ya Armajedhoni na ntsiku inafuna iye “kumalisa kuwina kwace.”—Apok. 6:2; 19:11-16
