▪ Pisaoneka pakweca kuti Yezu adzakhala Nyantsembe Wankulu mu ndzidzi udabatizwa iye mu caka 29. Tisadziwa tani pyenepi? Pidabatizwa Yezu, apangiza kuti akhali dzololo toera kupereka umaso wace ninga ntsembe pa guwa yakuti isaimirira ‘cifuno’ ca Mulungu. (Agal. 1:4; Aheb. 10:5-10) Guwa ineyi yakuphipirisa iripo kutomera padabatizwa Yezu. Guwa ndi cinthu cakufunika kakamwe mu templo. Natenepa, tinakwanisa kulonga kuti templo ikulu yauzimu yatoma pa ndzidzi udabatizwa Yezu kuenda kutsogolo. Templo ineyi isaimirira pinthu pyonsene pinacita Yahova toera timulambire munjira yakucena kubulukira mu ntsembe ya Yezu.—Mat. 3:16, 17; Aheb. 5:4-6.

Mu templo ikulu yauzimu mukhafunika nyantsembe wankulu toera atumikire mwenemu. Na thangwi ineyi, Yahova adzodza Yezu “na nzimu wakucena mbampasa mphambvu” toera atumikire ninga nyantsembe wankulu. (Mabasa 10:37, 38; Marko 1:9-11) Thangwi yanji tiri na cinyindiro cakuti Yezu akhazikiswa ninga Nyantsembe Wankulu mbadzati kufa na kulamuswa muli akufa? Pidacitika na Aroni pabodzi na ale adatumikira ninga nyantsembe wankulu patsogolo pace pinatiphedza toera kutawira mbvundzo unoyu.

Mwakubverana na Mwambo, basi ene nyantsembe wankulu ndiye akhafunika kupita mu mbuto Yakucena Kakamwe ya tabhernakulu, mukupita kwa ndzidzi, ndiye basi akhafunika kupita m’mbuto Yakucena Kakamwe ya mu templo. Mbuto Yakucena Kakamwe ikhafungwa na kurtina toera kuisiyanisa na Mbuto Yakucena. Nyantsembe wankulu akhapita na pa kurtina ineyi basi ene pa Ntsiku yakupereka ntsembe Yakulekerera Madawo. (Aheb. 9:1-3, 6, 7) Ninga Aroni pabodzi na ale adatumikira ninga nyantsembe wankulu patsogolo pace akhadzodzwa mbadzati kupita ‘na pa kurtina’ ya mu tabhernakulu, Yezu akhafunikambo kudzodzwa ninga Nyantsembe Wankulu wa templo ikulu yauzimu ya Yahova mbadzati kufa, mbadzati kupita na pa kurtina “yakuti ndi manungo ace” toera kuenda kudzulu. (Aheb. 10:20) Na thangwi ineyi, mpostolo Paulu alonga ipi thangwi ya Yezu: ‘Ninga nyantsembe wankulu iye apita mu tabhernakulu ikulu na yadidi kakamwe, yakuti nee yacitwa na manja a anthu,’ pyenepi pisabveka “kudzulu.”—Aheb. 9:11, 24.

▪ Nkhabepo kusiyana kwa ndzidzi udakhazikiswa cibverano cipswa na ndzidzi udatoma ico kuphata basa. Thangwi yanji? Pidabwerera Yezu kudzulu mbapereka kuna Mulungu ntengo wa umaso wace ninga munthu wakusowa madawo toera kuphedza ife, iye acita cinthu cakutoma mwa pinthu pitatu toera kukhazikisa cibverano cipswa. Pinthu pyenepi pitatu pyacitisa kuti cibverano cipswa citome kuphata basa. Pinthu pyenepi ndi pipi?

Cakutoma, Yezu aenda pamaso pa Yahova; caciwiri, Yezu apereka ntengo wa ntsembe yace kuna Yahova; cacitatu, Yahova atawira ntengo wa ciropa ca Yezu. Pinthu pyenepi pitatu mbapidzati kucitika, cibverano cipswa cikhadzati kutoma kuphata basa.

Bhibhlya nee isalonga kuti Yahova atambira lini ntengo wa ntsembe ya Yezu. Na thangwi ineyi, ife nee tinakwanisa kulonga ntsiku idatoma kuphata basa cibverano cipswa. Mbwenye ife tisadziwa kuti pidabwerera Yezu kudzulu pakhadasala ntsiku khumi toera kufika ntsiku ya Pentekoste. (Mabasa 1:3) Pisaoneka kuti nkati mwa ntsiku zenezi, Yezu apereka ntengo wa ntsembe yace, Yahova mbautawira. (Aheb. 9:12) Cipangizo cakuoneka na maso ca undimomwene unoyu ndi pidacitika pa Pentekoste ya caka 33. (Mabasa 2:1-4, 32, 33) Mwakukhonda penula, pa ndzidzi unoyu cibverano cipswa cikhaphata basa.

Mwacigwagwa, tinakwanisa kulonga kuti cibverano cipswa catoma kuphata basa pidamala Yahova kutawira ntengo wa ciropa ca Yezu. Penepo cibverano cipswa catoma kuphata basa, Yezu ndi Nyantsembe Wankulu wakuti asatumikira ninga Muimiriri wa cibverano ceneci.—Aheb. 7:25; 8:1-3, 6; 9:13-15.