NSOLO WA PFUNDZIRO 2
“Cinjani Manyerezero Anu”
“Cinjani manyerezero anu toera mukwanise kudziwa mwadidi pinafuna Mulungu, pyakuti ndi pyadidi, pyakuthema na pyakutawirika kwa iye.”—AROMA 12:2.
NYIMBO 88 Ndipfundziseni Njira Zanu
PINAFUNA a
1-2. Tisafunika kupitiriza kucitanji pakumala kubatizwa? Fokotozani.
KODI imwe musacenesa kangasi n’nyumba mwanu? Panango ntsiku yakutoma idafuluka imwe kuenda mu nyumba ineyi mwaicenesa mwadidi kakamwe. Mphapo ninji pinafuna kucitika mungasiya kuicenesa mukupita kwa ndzidzi? Mwakukhonda dembuka, iwo inapswipa pontho. Toera ipitirize kukhala yakucena, imwe musafunika kuicenesa kazinji kene.
2 Munjira ibodzi ene, ife tisafunikambo kupitiriza kusasanyira manyerezero athu na makhaliro athu. Ndimomwene kuti mbatidzati kubatizwa, ife tawangisira kakamwe toera kucinja umaso wathu toera “kuceneseka, mbatisiya pinthu pyonsene pinapswipisa manungo athu na manyerezero athu.” (2 Akor. 7:1) Mbwenye cincino ife tisafunikambo kubvera uphungu wa mpostolo Paulu wakuti “pitirizani kusasanyira mphambvu inatsogolera manyerezero anu.” (Aef. 4:23) Thangwi yanji tisafunika kupitiriza kucita pyenepi? Thangwi tingakhonda kucita pyenepi, dziko ino inakwanisa kuticitisa kukhala akukhonda cena pamaso pa Yahova. Toera kucalira pyenepi mbatipitiriza kukhala akutawirika kuna Yahova, ndzidzi onsene tisafunika kudinga manyerezero athu, makhaliro athu na pifuno pyathu.
PITIRIZANI ‘KUCINJA MANYEREZERO ANU’
3. Mafala akuti “cinjani manyerezero anu” asabvekanji? (Aroma 12:2)
3 Tisafunika kucitanji toera tipitirize kucinja manyerezero athu? (Lerini Aroma 12:2.) Fala Yacigerego idathumburuzwa kuti “cinjani manyerezero anu” inakwanisambo kuthumburuzwa ninga “khalani na manyerezero mapswa.” Natenepa, ife nee tisafunika basi ene kucita pinthu pingasi pyadidi, mbwenye tisafunika kudinga uunthu wathu wankati mbaticita macinjo toera tikwanise kubvera mitemo ya Yahova. Ife tisafunika kupitiriza kucita pyenepi, tayu kabodzi basi.
Kodi pisankhulo pinacita imwe thangwi yakuenda ku universidhadhe na basa inasankhula imwe, pisapangiza kuti musaikha pakutoma Umambo wa Mulungu? (Onani ndima 4-5) c
4. Tisafunika kucitanji toera manyerezero athu akhonde kutsogolerwa na dziko ino?
4 Tingadzakhala aungwiro, ndzidzi onsene tinakwanisa kucita pinthu pinakomeresa Yahova. Mbwenye cincino ife tisafunika kuwangisira kakamwe toera kukomeresa Yahova. Onani kuti pa Aroma 12:2, Paulu alonga kuti ife tisafunika kucinja manyerezero athu toera tikwanise kudziwa pinafuna Mulungu. M’mbuto mwakutawirisa kuti manyerezero athu atsogolerwe na dziko ino yakuipa, ife tisafunika kudingika tekhene toera tione khala tisatsogolerwa na manyerezero a Mulungu, thangwi nee tisafuna kuti pifuno pyathu na pisankhulo pinacita ife pitsogolerwe na dziko ino.
5. Tisafunika kucitanji toera kubvesesa kuti ntsiku ya Yahova iri dhuzi? (Onani foto.)
5 Nyerezerani basi. Yahova asafuna kuti tipitirize ‘kukumbuka kubwera kwa ntsiku ya Yahova.’ (2 Ped. 3:12) Natenepa bvundzikani: ‘Kodi umaso wanga usapangiza kuti ndisabvesesa kuti dziko ino iri dhuzi na kumala? Kodi pisankhulo pinacita ine thangwi ya kuenda ku universidhadhe na basa inasankhula ine pisapangiza kuti kutumikira Yahova ndi kwakufunika kakamwe kuna ine? Kodi ndisakhulupira kuti Yahova anatsalakana ine na banja yanga peno ndzidzi onsene ndisadzudzumika na pinthu pyakumanungo?’ Yahova asatsandzaya kakamwe angaona kuti tiri kucinja umaso wathu toera kucita pinthu mwakubverana na cifuno cace.—Mat. 6:25-27, 33; Afil. 4:12, 13.
6. Tisafunika kupitiriza kucitanji?
6 Ife tisafunika kupitiriza kudinga manyerezero athu toera tikwanise kucita macinjo akufunika. Paulu apanga Akristu a ku Korinto kuti: “Pitirizani kuonesesa khala muciri akuwanga mu cikhulupiro; pitirizani kudingika mwekhene toera mudziwe kuti ndimwe anthu a ntundu wanji.” (2 Akor. 13:5) Kukhala “mu cikhulupiro” kusaphataniza pinthu pizinji kupiringana kugumanika pa misonkhano na kumwaza mphangwa m’midzidzi inango. Kusaphatanizambo manyerezero athu, pifuno pyathu na mathangwi anaticitisa kucita pyenepi. Natenepa ife tisafunika kupitiriza kucinja manyerezero athu, kuleri Mafala a Mulungu, kunyerezera ninga munanyerezera iye na kucita pinthu pyakufunika toera kukomeresa Yahova.—1 Akor. 2:14-16.
‘BVALANI UUNTHU UPSWA’
7. Mwakubverana na Aefesi 4:31, 32, ndi pinthu pipi pinango pinafunika ife kucita, pontho thangwi yanji panango pinakhala pyakunentsa?
7 Lerini Aefesi 4:31, 32. Kusiyapo kucinja manyerezero athu, ife tisafunikambo “kubvala uunthu upswa.” (Aef. 4:24) Ife tisafunika kuwangisira kakamwe toera kucita pyenepi. Pinthu pinango pyakuti tisafunika kupicita ndi kuwangisira kakamwe toera kusiya kuipirwa na ukali. Thangwi yanji panango pinakhala pyakunentsa kucita pyenepi? Thangwi makhaliro anango akuipa ndi akunentsa kakamwe toera kuasiya. Mwacitsandzo, Bhibhlya isalonga kuti anthu anango ‘asaipirwa mwakucimbiza.’ (Mis. 29:22) Natenepa, kusiya makhaliro akuipa ninga anewa pisaphemba kuwangisira ngakhale pakumala kubatizwa, ninga pinafuna kuona ife mu citsandzo cinatowera.
8-9. Citsandzo ca Stephen cisapangiza tani kuti tisafunika kupitiriza kudula uunthu wakale?
8 M’bale unango anacemerwa Stephen akhali na nkandzo wakuipirwa mwakucimbiza. Iye alonga: “Maseze ndikhadamala kubatizwa, ine ndikhafunika kupitiriza kuwangisira toera ndikhonde kuipirwa mwakucimbiza. Mwacitsandzo, ntsiku inango pikhamwaza ife mphangwa nyumba na nyumba, ine ndathamangira mbava wakuti akhadaba radhyo ya karu yanga. Pikhafuna ine kum’phata iye ataya radhyo mbathawa. Pidapanga ine anango pinthu pyenepi pidacitika, nkulu wa mpingo m’bodzi wa mu nsoka wathu ya basa ya m’munda andibvundza: “Stephen mbudacitanji mbudam’phata munthu unoyu?’ Mbvundzo unoyu wandicitisa kunyerezera, pontho wandikulumiza kupitiriza kuwangisira kakamwe toera kukhala wakukhurudzika.” b
9 Citsandzo ca Stephen cisapangiza kuti ife tinakwanisa kupangiza makhaliro akuipa mwakukhonda dikhira, maseze tinyerezere kuti tasiya makhaliro anewa. Pyenepi pingacitika kuna imwe, lekani kubwerera nduli, pontho lekani kunyerezera kuti ndimwe Nkristu wakuipa. Ngakhale mpostolo Paulu alonga: “Ndingafuna kucita cinthu cadidi, ndisaona muna ine cifuno cakucita pinthu pyakuipa.” (Aroma 7:21-23) Akristu onsene akusowa ungwiro asathimbana na pifuno pyakucita pinthu pyakuipa pyakuti pisabwera ninga pfumbi inapswipisa nyumba yathu. Natenepa ife tisafunika kuwangisira toera tipitirize kukhala akucena. Tinakwanisa tani kucita pyenepi?
10. Tisafunika kucitanji toera tikhonde kupangiza makhaliro akuipa? (1 Juwau 5:14, 15)
10 Phembani Yahova toera akuphedzeni kusiya makhaliro akuti ndi akunentsa kuna imwe toera kuasiya. Pontho khalani na cinyindiro cakuti iye anakuphedzani. (Lerini 1 Juwau 5:14, 15.) Yahova nee anamalisa makhaliro anewa mwacirengo, mbwenye iye anakwanisa kukupasani mphambvu toera mukhonde kupangiza makhaliro anewa. (1 Ped. 5:10) Mu ndzidzi ubodzi ene, imwe musafunika kucita pinthu mwakubverana na maphembero anu mbamukhonda kucita pinthu pyakuti pinakucitisani kubvala uunthu wakale. Mwacitsandzo, imwe musafunika kucita mphole-mphole toera mukhonde kuona mafilimu, maprogramu a televizau peno kuleri pinthu pinapangiza kuti makhaliro anayesera imwe kuasiya nee ndi akuipa. Pontho wangisirani toera mukhonde kunyerezera pinthu pyakuipa.—Afil. 4:8; Akol. 3:2.
11. Ndi pinthu pipi pinafunika ife kucita toera tipitirize kubvala uunthu upswa?
11 Mungadula uunthu wakale, musafunika kubvala uunthu upswa. Munacita tani pyenepi? Khalani na cifuno cakutowezera Yahova mu ndzidzi unapfundza imwe makhaliro ace. (Aef. 5:1, 2) Mwacitsandzo, mungaleri m’Bhibhlya mphangwa zinalonga kuti Yahova ndi wakulekerera, bvundzikani: ‘Kodi ine ndisalekerera anango?’ Mu ndzidzi unaleri imwe m’Bhibhlya kuti Yahova asabvera ntsisi anthu akutcerenga, bvundzikani: ‘Kodi ine ndisapangiza citsalakano kuna abale na alongo anafuna ciphedzo, pontho ndisacita pinthu toera kuaphedza?’ Pitirizani kucinja manyerezero anu mu kubvala uunthu upswa, pontho khalani akupirira mu ndzidzi unacita imwe pyenepi.
12. Citsandzo ca Stephen cisapangiza tani kuti Bhibhlya iri na mphambvu yakucinja umaso wa anthu?
12 Stephen adalongwa pakutoma, adzindikira kuti mwapang’ono na pang’ono akhakwanisa kubvala uunthu upswa. Iye alonga: “Kutomera mu ndzidzi udabatizwa ine, ndikhathimbana na pinthu pyakusiyana-siyana pyakuti pikhandicitisa kufuna kuipirwa. Ine ndaona kuti ndikhafunika kusiya anthu akuti akhandicitisa kukhala wakuipirwa. Anthu azinji kuphatanizambo nkazanga, andisimba thangwi yakukhala kwanga wakukhurudzika m’midzidzi ineyi. Ngakhale ine ndadzumatirwambo thangwi yakucita pyenepi. Mbwenye ine nee ndisapasika mbiri thangwi yakukwanisa kucinja makhaliro anga. M’mbuto mwace, ine ndisakhulupira kuti Bhibhlya iri na mphambvu yakucinja umaso wa anthu.”
PITIRIZANI KUTHIMBANA NA PIFUNO PYAKUIPA
13. Ninji pinafuna kutiphedza toera kucita pinthu pyadidi? (Agalata 5:16)
13 Lerini Agalata 5:16. Yahova asatipasa nzimu wace wakucena toera tikwanise kukunda pifuno pyakuipa mbaticita pinthu pyadidi. Tingapfundza Mafala a Mulungu, tisatawirisa kuti nzimu unoyu utitsogolere. Pontho ife tinatambira nzimu wakucena tingagumanika pa misonkhano. Pa misonkhano ineyi, ife tisakhala pabodzi na abale na alongo athu akuti asawangisirambo toera kucita pinthu pyadidi, pontho pyenepi ndi pyakuwangisa. (Aheb. 10:24, 25; 13:7) Pontho tingaphemba Yahova toera atiphedze kusiya pinthu pyakuipa, iye anatipasa nzimu wace wakucena toera tikwanise kupitiriza kuthimbana na pifuno pyakuipa. Pinthu pyenepi panango nee pinacitisa kuti pifuno pyakuipa pimale, mbwenye pinatiphedza toera tikhonde kucita pinthu mwakubverana na pifuno pyenepi. Mwakubverana na Agalata 5:16, ale anafamba mukutsogolerwa na nzimu wakucena ‘nee anadzacita pinthu mwakubverana na pifuno pyaunyama.’
14. Thangwi yanji ndi pyakufunika kupitiriza kukulisa pifuno pyadidi?
14 Tingakhala na nsambo wakucita pinthu pyakuti pinatiphedza toera kukhala na uxamwali wakuwanga na Yahova, ndi pyakufunika kakamwe kupitiriza kucita pyenepi, pontho tisafunika kupitiriza kukulisa pifuno pyadidi. Thangwi yanji? Thangwi pifuno pyakuipa ndzidzi onsene pisabwera m’manyerezero mwathu. Pifuno pyenepi pisatiyesera toera kucita pinthu pyakuipa. Ngakhale pakumala kubatizwa, ife tisafunika kuwangisira toera tikhonde kucita pinthu pyakuipa ninga kugwa cabutha, kumwa pyakumwa pyakuledzeresa mwakupiringana midida na kuona ucipezipezi. (Aef. 5:3, 4) M’bale m’bodzi alonga: “Cinthu cakuti cikhandinentsa kakamwe toera kucisiya ndi cifuno cakupita m’mabonde na mamuna ndzanga. Ine ndikhanyerezera kuti cifuno ceneci mbacidamala, mbwenye ndisapitiriza kukhala na cifuno ceneci.” Mphapo ninji pinafuna kukuphedzani khala ndi pyakunentsa kakamwe kuna imwe toera kukunda pifuno pyakuipa?
Mungathimbana na pifuno pyakuipa, imwe nee muli mwekhene; anthu anango athimbanambo na pifuno pyenepi mbakwanisa kupikunda (Onani ndima 15-16)
15. Thangwi yanji ndi pyakuwangisa kudziwa kuti ‘anthu anango’ asathimbanambo na pifuno pyakuipa? (Onani foto.)
15 Mu ndzidzi unawangisira imwe toera kukunda cifuno cakuipa cakuti ndi cakunentsa kakamwe toera kucisiya, kumbukani kuti nee muli mwekhene. Bhibhlya isalonga: “Mayesero anathimbana na imwe ndi mabodzi ene na anathimbanambo na anthu onsene.” (1 Akor. 10:13a) M’Bhibhlya inango vesi ineyi yathumburuzwa tenepa: “Mayesero anathimbana na imwe nee ndi akukhonda dziwika kuna anthu.” Mafala anewa alemberwa Akristu akakhala ku Korinto. Thangwi anango mwa iwo mbadzati kutumikira Yahova akhali aulukwali, akhapita m’mabonde mamuna na mamuna, pontho akhali anyakuledzera. (1 Akor. 6:9-11) Kodi imwe musanyerezera kuti pakumala kubatizwa, iwo nee athimbanabve na pifuno pyakucita pinthu pyenepi? Iwo athimbana na pifuno pyakuipa. Maseze Akristu anewa onsene akhali akudzodzwa, iwo akhali anthu akusowa ungwiro. Mwakukhonda penula, iwo akhathimbanambo na pifuno pyakuipa midzidzi inango. Pyenepi ndi pyakuwangisa kuna ife. Thangwi yanji? Thangwi pisapangiza kuti mwakukhonda tsalakana pifuno pyakuipa pinathimbana na ife, tinakwanisa kupikunda. Mbwenye imwe munakwanisa kukhala ‘akuwanga mu cikhulupiro thangwi musadziwa kuti abale anu onsene asathimbanambo na nyatwa zibodzi zene.’—1 Ped. 5:9.
16. Ndi manyerezero api asafunika ife kucalira, pontho thangwi yanji?
16 Ife tisafunika kucalira kunyerezera kuti nee m’bodzi anakwanisa kubvesesa mayesero anathimbana na ife. Thangwi manyerezero anewa anaticitisa kuona kuti nee tinakwanisa, pontho nee tiri na mphambvu toera kukunda pifuno pyakuipa. Mbwenye Bhibhlya isalonga: “Mulungu ndi wakukhulupirika, iye nkhabe kudzatawirisa kuti muthimbane na mayesero akuti nee munakwanisa kuapirira, mbwenye mayesero angabwera, iye anadzakusakirani njira yakubuluka nayo, toera mukwanise kupirira.” (1 Akor. 10:13b) Natenepa, ngakhale tione kuti mayesero anathimbana na ife ndi akunentsa toera kuakunda, ife tinakwanisa kupitiriza kukhala akukhulupirika kuna Yahova. Thangwi ya ciphedzo ca Yahova, ife tinakwanisa kucalira kucita pinthu pyakuipa.
17. Maseze nee tinakwanisa kucalira kunyerezera pinthu pyakuipa, ninji pinafunika ife kucita?
17 Ndzidzi onsene kumbukani kuti thangwi yakusowa ungwiro panango nee munakwanisa kucalira kunyerezera pinthu pyakuipa. Mbwenye tingakhala na manyerezero anewa, ife tinakwanisa kuakunda ninga pidacita Zuze wakuti athawa mwakucimbiza mu ndzidzi udayeserwa iye na nkazi wa Putifare. (Gen. 39:12) Imwe nee musafunika kucita pinthu mwakubverana na pifuno pyakuipa.
PITIRIZANI KUWANGISIRA
18-19. Tisafunika kubvundzikanji mu ndzidzi unawangisira ife kucinja manyerezero athu?
18 Toera kucinja manyerezero athu, tisafunika kupitiriza kunyerezera na kucita pinthu pinakomeresa Yahova. Mbwenye toera mukwanise kucita pyenepi, ndzidzi onsene musafunika kubvundzika: ‘Kodi pinthu pinacita ine pisapangiza kuti ndisadzindikira kuti tikukhala mu ntsiku zakumalisa? Kodi ndisawangisira toera kubvala uunthu upswa? Ndisatawira kutsogolerwa na nzimu wa Yahova toera ndikhonde kucita pinthu mwakubverana na pifuno pyaunyama?’
19 Mu ndzidzi unabvundzika imwe, lekani kudikhira kuti munacita pinthu ninga munthu waungwiro, mbwenye komerwani na pinakwanisa imwe kucita. Mungaona pinthu pinafunika imwe kusasanyira, lekani kufewa manungo, mbwenye bverani uphungu unagumanika pa Afilipi 3:16: “Mwakukhonda tsalakana kuti tathambaruka mpaka papi, tendeni tipitirize kufamba munjira ibodzi ene.” Mu ndzidzi unacita imwe pyenepi, khalani na cinyindiro cakuti Yahova anakupasani nkhombo thangwi yakuwangisira kwanu kucinja manyerezero anu.
NYIMBO 36 Titsidzikize Ntimathu
a Mpostolo Paulu afokotoza kuti ndi pyakufunika kakamwe kuti abale na alongo ace akhonde kutowezera makhaliro a dziko ino. Unoyu ndi uphungu wakufunika kakamwe kuna ifembo lero. Ife tisafunika kucita pyonsene pinakwanisa ife toera tikhonde kucita pinthu pya dziko ino. Toera tikwanise kucita pyenepi, ife tisafunika kupitiriza kusasanyira manyerezero athu tingaona kuti nee tisacita pinthu mwakubverana na pinafuna Mulungu. Mu nsolo uno, ife tinaona kuti tinacita tani pyenepi.
b Onani nsolo wakuti “Umaso Wanga Ukhabuluka Pakuipa Kuenda Pakutekera” mu Ncenjezi wa 1 ya Julho ya 2015.
c FOTO TSAMBA 9: M’bale akunyerezera khala asafunika kuenda ku universidhadhe peno kutoma kutumikira ninga mpainiya.
